2 Petero
3 Bakundwa, uru ni urwandiko rwa kabiri mbandikiye. Muri uru rwandiko, kimwe no mu rwa mbere,+ ndakangura ubushobozi bwanyu bwo gutekereza neza, mbibutsa+ 2 ko mukwiriye kwibuka amagambo yavuzwe kera n’abahanuzi bera+ hamwe n’itegeko Umwami n’Umukiza wacu yatanze binyuze ku ntumwa+ zabatumweho. 3 Mubanze kumenya ibi, ko mu minsi y’imperuka+ hazaza abakobanyi+ bakobana, bakora ibihuje n’irari ryabo+ 4 bavuga+ bati “uko kuhaba kwe kwasezeranyijwe kuri he?+ Dore uhereye igihe ba sogokuruza basinziriye mu rupfu, ibintu byose bikomeza kumera nk’uko byahoze kuva isi yaremwa.”+
5 Biyibagiza nkana ko ijuru ryahozeho+ kuva kera, kandi ko isi yakomejwe ivanywe mu mazi+ kandi igoswe n’amazi+ binyuze ku ijambo ry’Imana. 6 Ibyo ni byo byatumye isi y’icyo gihe irimburwa igihe yarengerwaga n’amazi.+ 7 Ariko iryo jambo ni ryo nanone ryatumye ijuru+ n’isi+ biriho ubu bibikirwa umuriro,+ kandi bikaba bitegereje umunsi w’urubanza+ no kurimbuka kw’abatubaha Imana.+
8 Ariko bakundwa, iki kintu kimwe ntikikabisobe, ko umunsi umwe kuri Yehova ari nk’imyaka igihumbi, n’imyaka igihumbi ikaba ari nk’umunsi umwe.+ 9 Yehova ntatinza isezerano rye,+ nk’uko bamwe babona ibyo gutinda, ahubwo arabihanganira kubera ko adashaka ko hagira n’umwe urimburwa, ahubwo ashaka ko bose bihana.+ 10 Ariko umunsi wa Yehova+ uzaza nk’umujura.+ Kuri uwo munsi ijuru rizakurwaho+ habeho urusaku+ rwinshi cyane, ibintu by’ishingiro bishyuhe cyane bishonge,+ kandi isi+ n’ibikorwa biyirimo bizashyirwa ahagaragara.+
11 Kubera ko ibyo byose bizashonga bityo, mbega ukuntu mukwiriye kuba abantu bafite imyifatire irangwa n’ibikorwa byera n’ibyo kwiyegurira Imana, 12 mutegereza+ kandi muhoza mu bwenge bwanyu ukuhaba k’umunsi wa Yehova!+ Kuri uwo munsi ijuru rizashya rishonge,+ kandi ibintu by’ishingiro bizashyuha cyane bishonge. 13 Ariko nk’uko isezerano rye riri, dutegereje ijuru rishya+ n’isi nshya,+ ibyo gukiranuka kuzabamo.+
14 Ku bw’ibyo rero bakundwa, ubwo mutegereje ibyo, mukore uko mushoboye kose kugira ngo amaherezo muzasangwe mu mahoro,+ mudafite ikizinga+ kandi mutagira inenge. 15 Byongeye kandi, muzirikane ko kwihangana k’Umwami wacu ari agakiza, nk’uko Pawulo umuvandimwe wacu ukundwa na we yabibandikiye+ akurikije ubwenge+ yahawe, 16 akavuga ibyerekeye ibyo nk’uko nanone abivuga mu nzandiko ze zose. Icyakora, muri izo nzandiko harimo bimwe bigoye gusobanukirwa, ibyo abatigishijwe n’abahuzagurika bagoreka, nk’uko bagenza n’ibindi Byanditswe+ byose, bakikururira kurimbuka.
17 Ariko mwebweho bakundwa, ubwo mumenye ibyo hakiri kare,+ mwirinde kugira ngo mutayoba mukajyana na bo, muyobejwe n’ikinyoma cy’abantu basuzugura amategeko, maze mukareka gushikama kwanyu.+ 18 Ahubwo ubuntu butagereranywa, n’ubumenyi ku byerekeye Umwami n’Umukiza wacu Yesu Kristo bikomeze bigwire muri mwe.+ Nahabwe ikuzo ubu n’iteka ryose.+