INGINGO YA 18

Ikiganiro gifite icyo cyigisha abandi

1 Abakorinto 9:19-23

INSHAMAKE: Tanga ikiganiro mu buryo bushishikaje, ku buryo abateze amatwi bumva ko bize ibintu by’ingirakamaro.

Menya ibyo abaguteze amatwi basanzwe bazi. Aho kubisubiramo gusa, jya ukora uko ushoboye babone ko ari bishya.

Aho gutinda ku bintu basanzwe bazi, jya utinda ku bitekerezo bishya.
Kora ubushakashatsi kandi utekereze. Mu gihe bishoboka, jya uvuga ibintu bitazwi cyane cyangwa ibintu biherutse kuba, kugira ngo wumvikanishe ingingo z’ingenzi. Tekereza witonze ku kiganiro cyawe n’isano gifitanye n’ibyo ugiye kuvuga.

Mu gihe usuzuma ikiganiro cyawe, jya ugitekerezaho wifashishije ibibazo nk’ibi: “Ni iki, kubera iki, ni ryari, ni hehe, ni nde, cyangwa ni mu buhe buryo.” Mu gihe utanga ikiganiro, jya ubaza bimwe muri ibyo bibazo unabisubize, kugira ngo kiryohere abantu.
Garagaza akamaro k’ibyo wigisha. Sobanura uko ibitekerezo byo muri Bibiliya byafasha abantu mu buzima bwabo bwa buri munsi. Gira icyo uvuga ku mimerere runaka, imitekerereze n’ibikorwa abaguteze amatwi babona ko ari iby’ingenzi.