Icyo Bibiliya ibivugaho

Reka dusuzume bimwe mu byo yahanuye:

• “Igihugu kizahagurukira ikindi n’ubwami buhagurukire ubundi, kandi hirya no hino hazabaho inzara n’imitingito.”—Matayo 24:7.

• “Mu minsi y’imperuka hazabaho ibihe biruhije, bigoye kwihanganira, kuko abantu bazaba bikunda, bakunda amafaranga, birarira, bishyira hejuru, batuka Imana, batumvira ababyeyi, ari indashima, ari abahemu, badakunda ababo, batumvikana n’abandi, basebanya, batamenya kwifata, bafite ubugome, badakunda ibyiza, bagambana, ari ibyigenge, bibona, bakunda ibinezeza aho gukunda Imana.”—2 Timoteyo 3:1-4.

Hari abantu babona ko dukurikije ubwo buhanuzi, isi yarenze igaruriro. Kandi koko urebye, umuntu buntu nta cyo yakora ku bibazo byugarije isi. Bibiliya igaragaza ko ibibazo byugarije isi birenze ubwenge n’ubushobozi bw’abantu, ku buryo batabikemura burundu. Imirongo y’Ibyanditswe ikurikira ni byo igaragaza:

• “Hari inzira umuntu abona ko itunganye, ariko amaherezo yayo ni urupfu.”—Imigani 14:12.

• “Umuntu yagiye ategeka undi amugirira nabi.”—Umubwiriza 8:9.

• “Ntibiri mu muntu ugenda kwiyoborera intambwe ze.”—Yeremiya 10:23.

Abantu baramutse bakomeje gukora ibyo bashatse, bazarimbura isi. Ariko ibyo ntibizigera biba. Kubera iki? Dore icyo Bibiliya ibivugaho.

• Imana “yashyiriyeho isi imfatiro zihamye; ntizigera inyeganyega kugeza ibihe bitarondoreka, ndetse iteka ryose.”—Zaburi 104:5.

• “Ab’igihe kimwe baragenda hakaza ab’ikindi gihe, ariko isi ihoraho iteka ryose.”—Umubwiriza 1:4.

• “Abakiranutsi bazaragwa isi, kandi bazayituraho iteka ryose.”—Zaburi 37:29.

• “Hazabaho ibinyampeke byinshi ku isi; bizaba byinshi cyane mu mpinga z’imisozi.”—Zaburi 72:16.

Iyo mirongo yo muri Bibiliya itanga ibisubizo byumvikana. Abatuye isi ntibazarimbuka bitewe no guhumanya ikirere, kubura ibyokurya n’amazi, ibyorezo by’indwara cyangwa ibitwaro bya kirimbuzi. Kubera iki? Iherezo ry’iyi si riri mu maboko y’Imana. Yaretse abantu bakoresha uburenganzira bwo kwihitiramo no kwirengera ingaruka zizabageraho (Abagalatiya 6:7). Ariko isi ntimeze nka gari ya moshi yataye umuhanda, igiye gukora impanuka. Imana yashyiriyeho abantu imipaka kugira ngo batayirimbura burundu.—Zaburi 83:18; Abaheburayo 4:13.

Ariko hari ibindi izakora. Izazana “amahoro menshi” (Zaburi 37:11). Ibintu byiza bizaba ku isi byavuzwe muri iyi ngingo, ni umusogongero w’ibyo Abahamya ba Yehova babarirwa muri za miriyoni bize muri Bibiliya.

Abahamya ba Yehova ni umuryango ugizwe n’abantu b’ingeri zose n’amoko yose. Basenga Imana imwe y’ukuri yitwa Yehova ivugwa muri Bibiliya. Ntibatinya ibizaba mu gihe kizaza, kuko Bibiliya igira iti: “Yehova, Umuremyi w’ijuru, we Mana y’ukuri waremye isi akayihanga, we wayishimangiye akayikomeza, utarayiremeye ubusa ahubwo akaba yarayiremeye guturwamo, aravuga ati ‘ni jye Yehova, nta wundi ubaho.’”—Yesaya 45:18.