Kumenya Imana bigufitiye akahe kamaro?

Mu ngingo zabanje twabonye ibintu byadufashije kubona igisubizo k’ikibazo kivuga ngo: “Imana ni nde?” Twatangiye tureba ukuntu Bibiliya ivuga ko izina ry’Imana ari Yehova kandi ko umuco wayo w’ingenzi ari urukundo. Nanone twasuzumye ibyo yakoze n’ibyo izakora mu gihe kiri imbere bifitiye abantu akamaro. Icyakora nubwo hari ibintu byinshi twakwiga ku byerekeye Imana, ushobora kwibaza uti: Bizangirira akahe kamaro?

Yehova atwizeza ko ‘nitumushaka tuzamubona’ (1 Ibyo ku Ngoma 28:9). Numenya Yehova uzabona ikintu kiza cyane kuko uzaba “inkoramutima” ye (Zaburi 25:14). Kugirana n’Imana ubucuti nk’ubwo bizakugirira akahe kamaro?

Uzagira ibyishimo nyakuri. Bibiliya ivuga ko Yehova ari “Imana igira ibyishimo” (1 Timoteyo 1:11). Ubwo rero, nuba inshuti y’Imana kandi ugakurikiza inzira zayo, uzagira ibyishimo nyakuri, ugire amahoro yo mu mutima kandi ugire amagara mazima (Zaburi 33:12). Nanone uzirinda ibikorwa bibi maze ugire imibereho ishimishije, witoze kugira imico myiza kandi ubane neza n’abandi. Uzibonera ko amagambo umwanditsi wa zaburi yavuze ari ukuri. Yaravuze ati: “Kwegera Imana ni byo byiza kuri jye.”—Zaburi 73:28.

Imana izakwitaho. Yehova yasezeranyije abagaragu be ko ‘azabagira inama kandi ijisho rye rikabagumaho’ (Zaburi 32:8). Ibyo bigaragaza ko Yehova yita cyane kuri buri mugaragu we kandi akamuha ibyo akeneye (Zaburi 139:1, 2). Nuba inshuti ya Yehova uzibonera ko buri gihe azajya akuba hafi.

Uzabaho neza mu gihe kiri imbere. Uretse kuba muri iki gihe Yehova agufasha kugira ubuzima bushimishije, nanone azatuma ubaho neza mu gihe kizaza (Yesaya 48:17, 18). Bibiliya iravuga ngo: “Ubu ni bwo buzima bw’iteka: bitoze kukumenya, wowe Mana y’ukuri yonyine, bamenye n’uwo watumye, ari we Yesu Kristo” (Yohana 17:3). Nubwo turi mu bihe bigoye, ibyiringiro Imana iduha bitubera nk’igitsika ubwato ntiduhungabanywe n’ibigeragezo.—Abaheburayo 6:19.

Izo ni zimwe mu mpamvu nyinshi z’ingenzi zagombye gutuma tumenya Imana neza kandi tukihatira kuba inshuti zayo. Niba wifuza kumenya byinshi kurushaho, ushobora kubiganiraho n’Abahamya ba Yehova cyangwa ugasura urubuga rwa jw.org.