Jya ukora umurimo wo kubwiriza mu buryo bunonosoye—Ushyiraho urufatiro rwo gusubira gusura

Impamvu ari iby’ingenzi: Iyo tubonye umuntu ushimishijwe, tugaruka kumusura igihe aba ari mu rugo kugira ngo twuhire imbuto twateye (1 Kor 3:6). Akenshi biba ngombwa ko dushyiraho urufatiro rwo gusubira kumusura mbere y’uko tugenda, kugira ngo tumenye igihe tuzagarukira. Nanone, biba byiza iyo tumubajije ikibazo tuzaganiraho tugarutse kumusura. Ibyo bituma nyir’inzu ategerezanya amatsiko igihe tuzamusurira kandi iyo igisubizo cy’ikibazo tumubajije kiri mu igazeti cyangwa igitabo tumusigiye, bituma ashishikarira kugisoma. Kumubaza ikibazo tuzaganiraho ubutaha bituma gusubira kumusura bitworohera kuko haba hari icyo tuzaganiraho kandi nyir’inzu akaba akizi. Iyo twongeye kubonana, tumusobanurira ko tugarutse kumusubiza ikibazo twaganiriyeho ubwo duherukana, hanyuma tugakomeza ikiganiro.

Uko twabigenza:

Igihe utegura uko uzatangiza ikiganiro ubwiriza ku nzu n’inzu, ujye utegura n’ikibazo wabaza nyir’inzu, ukazakimusubiza ugarutse kumusura. Icyo kibazo gishobora kuba gishingiye ku igazeti cyangwa igitabo urimo utanga uwo munsi, cyangwa igisubizo cyacyo kikaba kiri mu gitabo tuyoboreramo icyigisho uzamwereka ugarutse kumusura.
Igihe usoza ikiganiro wagiranye n’umuntu ushimishijwe, ujye umubwira ko wifuza kuzongera kuganira na we, umubwire n’ikibazo muzaganiraho ugarutse. Mu mafasi amwe n’amwe abantu baba bahuze cyane ku buryo ubona badashaka ko muhana gahunda y’igihe uzagarukira. Mu mimerere nk’iyo, ushobora kuvuga uti “ese iki gihe ukunda kuba uri mu rugo? [Reka asubize.] Mu cyumweru gitaha, nzanyura hano iminota mike kugira ngo tuganire kuri iki kibazo. . . . Ninsanga uhuze cyane, uzambwire nta kibazo.”
Nubwira nyir’inzu igihe uzagarukira kumusura, uzacyubahirize (Mat 5:37). Mu gusoza ikiganiro mwagiranye igihe wasubiye kumusura, ujye usiga umubajije ikibazo muzaganiraho ubutaha.

Icyo wakora muri uku kwezi:

Igihe utegura uko watangiza ikiganiro, ujye utegura n’ikibazo wabaza nyir’inzu, ukagisubiza ugarutse kumusura. Ujye ukibwira abandi mwajyanye kubwiriza.