Jya ukora umurimo wo kubwiriza mu buryo bunonosoye—Wereka umuntu uko icyigisho cya Bibiliya kiyoborwa ukoresheje igitabo Icyo Bibiliya yigisha

Impamvu ari iby’ingenzi: Abantu benshi ntibumva icyo tuba dushatse kuvuga iyo tubabwiye ko tuyoborera abantu icyigisho cya Bibiliya ku buntu. Bashobora gutekereza ko ibyo bizatuma biga bari kumwe n’itsinda runaka cyangwa ko hari amasomo runaka bazajya bakurikira bari mu rugo. Bityo rero, aho kubwira abantu ko twabayoborera icyigisho cya Bibiliya, tujye tubereka uko icyigisho cya Bibiliya kiyoborwa. Dushobora gukoresha iminota mike ndetse turi no ku muryango tukereka umuntu uburyo kwiga Bibiliya byoroshye kandi ko byatuma asobanukirwa ibintu byinshi.

Uko wabigenza:

Numara kwibwira umuntu wasuye, umubaze niba ajya ahangayikishwa n’igihe kizaza.
Vuga ko abantu benshi na bo bibahangayikishije, hanyuma umwereke ipaji yo mu gitabo Icyo Bibiliya yigisha igaragaza ibirimo. Musobanurire ko icyo gitabo kirimo amasomo yoroshye gusobanukirwa agaragaza icyo Bibiliya yigisha ku bihereranye n’igihe kizaza n’izindi ngingo, hanyuma umubaze igice kimushishikaje.
Muhe icyo gitabo kandi umwereke igice yahisemo. Musobanurire ko ibibazo biri ku ntangiriro y’igice bisubizwa muri za paragarafu ziri hasi.
Saba nyir’inzu gusoma ingingo ya mbere, niba bitamubangamiye. Hanyuma usome ikibazo cy’iyo paragarafu, maze musuzumire hamwe igisubizo. Niba hari imirongo yatanzwe ishyigikira igisubizo, muyisome kandi muyiganireho. Mwereke mu gitabo cyawe aho waciye umurongo ku gisubizo.
Musuzume paragarafu ikurikira, ariko noneho umureke agerageze gusubiza ikibazo mu magambo ye.
Mushimire, kandi mushyireho gahunda y’igihe uzagarukira mukarangiza iryo somo.
Niba ubona bikwiriye, mwereke videwo iri ku rubuga rwa jw.org ifite umutwe uvuga ngo Kwiga Bibiliya bikorwa bite?

Gerageza gukora ibi muri uku kwezi:

Senga Yehova umusaba guha imigisha imihati ushyiraho utangiza icyigisho cya Bibiliya.—Fili 2:13.
Uzagerageze kwereka umuntu uko twigisha abantu Bibiliya wifashishije igitabo Icyo Bibiliya yigisha, cyangwa werekane videwo ifite umutwe uvuga ngo Kwiga Bibiliya bikorwa bite?, nibura incuro imwe igihe uri mu murimo wo kubwiriza.