Isengesho ryakugirira akahe kamaro?

Igihe Pamela yari arwaye kanseri yagiye kwivuza. Nanone yasenze Imana kugira ngo imufashe kwihanganira icyo kibazo gikomeye. Ese gusenga byaramufashije?

Pamela yaravuze ati: “Mu gihe nivuzaga kanseri, akenshi nabaga mfite ubwoba bwinshi cyane. Ariko gusenga Yehova, byatumaga numva ntuje kandi nkagira imbaraga zo kwihangana. Nubwo nkirwaye kanseri kandi nkaba mbabara cyane, isengesho rimfasha kurangwa n’ikizere. Iyo abantu bambajije uko merewe, ndababwira nti: ‘Ndacyarwaye ariko sinihebye.’”

Birumvikana ko tudasenga gusa ari uko turwaye. Twese duhura n’ibibazo byaba bikomeye cyangwa byoroheje kandi dukenera uwadufasha guhangana na byo. Ese isengesho ryadufasha?

Bibiliya igira iti: “Ikoreze Yehova umutwaro wawe, na we azagushyigikira. Ntazigera yemera ko umukiranutsi anyeganyezwa” (Zaburi 55:22). Ayo magambo araduhumuriza rwose. None se isengesho ryagufasha rite? Nusenga Imana nk’uko ibishaka, izagufasha guhangana n’ibigeragezo.—Reba ingingo ivuga ngo: “Akamaro k’isengesho.”

Akamaro k’isengesho

Isengesho rituma dutuza

“Mujye mureka ibyo musaba bimenywe n’Imana, kandi amahoro y’Imana asumba cyane ibitekerezo byose, azarinda imitima yanyu n’ubushobozi bwanyu bwo kwiyumvisha ibintu binyuze kuri Kristo Yesu” (Abafilipi 4:6, 7). Nubwira Imana ibibazo byawe, izagufasha gutuza no gufata imyanzuro myiza mu gihe uzaba uhangayitse cyane.

Isengesho rituma tugira ubwenge

“Niba muri mwe hari ubuze ubwenge, nakomeze abusabe Imana kuko iha bose ititangiriye itama, itongeyeho incyuro; kandi azabuhabwa” (Yakobo 1:5). Akenshi, gufata imyanzuro myiza mu gihe duhangayitse ntibitworohera. Iyo dusenze dusaba ubwenge, Imana itwibutsa amahame yo muri Bibiliya yadufasha.

Isengesho rituma tugira imbaraga n’ihumure

“Mu bintu byose, ngira imbaraga binyuze ku umpa imbaraga” (Abafilipi 4:13). Imana ishobora byose, ubwo rero ishobora kuguha imbaraga zo guhangana n’ibibazo ufite cyangwa ikaguhumuriza (Yesaya 40:29). Nanone Bibiliya ivuga ko Yehova ari “Imana nyir’ihumure ryose.” Bityo rero ishobora ‘kuduhumuriza mu makuba yacu yose.’—2 Abakorinto 1:3, 4.