Ese nawe wigeze kwifuza gusoma Bibiliya, ariko birakunanira bitewe n’izo mpungenge tumaze kuvuga? Hari abantu benshi batinya gusoma Bibiliya. Ariko se umenye ko ishobora kugufasha kugira ibyishimo no kunyurwa, ntiwashishikazwa no kuyisoma? Uramutse umenye se ko hari uburyo bworoshye bwo kuyisoma kandi ikakuryohera, wakora iki? Nuyisoma, uzibonera ukuntu ifite akamaro.

Reka dusuzume ingero nke z’abantu bayisomye, bakibonera ibyiza byayo.

Ezekiel uri mu kigero cy’imyaka 20, yaravuze ati “kera nari meze nk’umuntu utwaye imodoka, ariko atazi iyo ajya. Ariko gusoma Bibiliya byamfashije kugira ubuzima bufite intego. Irimo inama nziza kandi z’ingirakamaro.”

Frieda na we uri mu kigero cy’imyaka 20, yaravuze ati “mbere nakundaga kurakazwa n’ubusa. Ariko aho ntangiriye gusoma Bibiliya, namenye kwifata. Ibyo byamfashije kubana neza n’abandi, none ubu mfite incuti nyinshi.”

Umugore witwa Eunice uri mu kigero cy’imyaka 50, yavuze ko “Bibiliya yamufashije kuba umuntu mwiza no gucika ku ngeso mbi.”

Nk’uko abo bantu ndetse n’abandi benshi babivuze, gusoma Bibiliya bishobora gutuma ugira imibereho myiza (Yesaya 48:17, 18). Ishobora kugufasha (1) gufata imyanzuro myiza, (2) kugira incuti nziza, (3) guhangana n’imihangayiko, kandi ikiruta byose, izagufasha (4) kumenya Imana by’ukuri. Gukurikiza inama zirimo ntibizatuma umanjirwa kuko zituruka ku Mana, kandi Imana ntiyatanga inama mbi.

Icy’ingenzi ni ugutangira kuyisoma. Dore inama zagufasha gutangira kuyisoma kandi ukarushaho kuyikunda.

Ni iki cyagufasha gusoma Bibiliya ku buryo uyikunda kandi ikakugirira akamaro? Reka dusuzume ibintu bitanu byafashije benshi.

Jya usomera ahantu hakwiriye. Gerageza gushakisha ahantu hatuje. Jya wirinda ibyakurangaza kugira ngo urusheho kwerekeza ibitekerezo ku byo usoma. Iyo usomeye Bibiliya ahantu hari urumuri rukwiriye n’akuka keza, bituma uzirikana ibyo usoma.

Jya utegura umutima. Bibiliya yaturutse kuri Data wo mu ijuru. Bityo rero, kugira ngo ikugirire akamaro, wagombye kuyisoma nk’umwana muto, witeguye kwigishwa n’umubyeyi we akunda. Niba hari ibintu wishyizemo byatuma udasoma Bibiliya, ujye ubyikuramo kugira ngo Imana ibone uko ikwigisha.—Zaburi 25:4.

Jya usenga mbere yo kuyisoma. Bibiliya irimo ibitekerezo by’Imana. Ni yo mpamvu dukeneye ko Imana idufasha gusobanukirwa Bibiliya. Imana yadusezeranyije ko ‘izaha umwuka wera abawusaba’ (Luka 11:13). Uwo mwuka wera ushobora kugufasha kumenya uko Imana ibona ibintu. Nyuma y’igihe, uzasobanukirwa “ndetse n’ibintu byimbitse by’Imana.”—1 Abakorinto 2:10.

Jya usoma ugamije gusobanukirwa. Irinde gusoma uhushura, ugamije gusa kurangiza ibyo wateganyije. Ahubwo jya ufata igihe, utekereze ku byo usoma. Jya wibaza uti “ni iyihe mico uyu muntu afite? Namwigana nte?”

Jya wishyiriraho intego zifatika. Kugira ngo Bibiliya igire icyo ikungura, jya uyisoma ushakamo ikintu cyakugirira akamaro. Urugero, ushobora kwiyemeza kumenya byinshi ku Mana, kuba umuntu mwiza kurushaho no kuba umugabo cyangwa umugore w’imico myiza. Hanyuma, ujye utoranya aho wasoma muri Bibiliya kugira ngo ugere ku byo wiyemeje.a

Ibyo bintu uko ari bitanu bizagufasha gutangira gusoma Bibiliya. Ariko se wakora iki ngo gusoma Bibiliya birusheho kugushimisha? Soma ingingo ikurikira.

Ese usoma Bibiliya ukumva uyikunze cyangwa irakurambira? Kugira ngo uyikunde, biterwa ahanini n’uko uyisoma. Reka turebe icyo wakora kugira ngo ushishikarire kuyisoma kandi uyikunde.

Jya uhitamo Bibiliya yizewe kandi ikoresha imvugo yoroshye. Iyo usomye igitabo kirimo amagambo akomeye cyangwa utazi bitewe n’uko atagikoreshwa, ntushobora kugikunda. Ubwo rero, jya ushaka Bibiliya ikoresha imvugo yoroshye kandi ikora ku mutima. Ariko nanone igomba kuba ihinduye neza kandi ihuje n’ukuri.a

Jya wifashisha ikoranabuhanga. Muri iki gihe, hari Bibiliya zicapye n’izo kuri interineti. Hari izo ushobora gusomera kuri interineti cyangwa ukazivanaho, ukajya uzisomera kuri mudasobwa, kuri tabuleti cyangwa kuri telefoni. Hari Bibiliya zifite uburyo bwagufasha kubona vuba imirongo y’inyongera ivuga ku ngingo runaka, cyangwa ikagufasha kugereranya Bibiliya zitandukanye. Nanone niba gutega amatwi Bibiliya yasomwe ari byo byakorohera, ushobora kuyibona. Abantu benshi bakunda gutega amatwi Bibiliya bari mu modoka zitwara abagenzi, bamesa cyangwa bakora indi mirimo itababuza gutega amatwi. Ushobora guhitamo uburyo bukunogeye.

Jya ukora ubushakashatsi. Hari ibitabo bishobora kugufasha gusobanukirwa ibyo usoma. Nanone hari amakarita yo muri Bibiliya yagufasha kumenya aho uduce runaka tuvugwamo twari duherereye n’aho ibintu runaka byabereye. Ingingo zo muri iyi gazeti cyangwa izo ku rubuga rwacu rwa jw.org/rw, ahanditse ngo “inyigisho za Bibiliya,” zishobora kugufasha gusobanukirwa byinshi.

Jya uhinduranya ibyo usoma. Niba gusoma Bibiliya uhereye mu Ntangiriro bikurambira, ushobora guhera ku bitabo bigushishikaza. Niba wifuza kumenya byinshi ku bantu bazwi cyane bavugwa muri Bibiliya, ushobora kuyisoma uhereye ku bitabo bibavugaho. Uburyo bubiri bwagaragajwe mu gasanduku kari kumwe n’iyi ngingo, bushobora kubigufashamo. Ako gasanduku gafite umutwe ugira uti “Kora ubushakashatsi umenye abantu bavugwa muri Bibiliya.” Nanone ushobora gusoma Bibiliya ukurikije ingingo zivugwamo cyangwa uko ibintu byagiye bikurikirana. Hitamo ubwo ushaka ubugerageze.

Bibiliya ni igitabo kidasanzwe. Irimo inama zituruka ku Muremyi wacu (2 Timoteyo 3:16). Ubutumwa burimo bushobora kuguhindura. Bibiliya ubwayo igira iti “Ijambo ry’Imana ni rizima, rifite imbaraga (Abaheburayo 4:12). Ishobora guhindura imibereho yacu mu buryo bubiri. Iratuyobora kandi ikadufasha kumenya Imana n’amasezerano yayo.​—1 Timoteyo 4:8; Yakobo 4:8.

Uko Bibiliya yahindura imibereho yawe. Bibiliya ishobora kugufasha, ikakugira inama mu bintu bikurikira:

• Imibanire yawe n’abandi.​—Abefeso 4:31, 32; 5:22, 25, 28, 33.

• Uko wagira umutuzo n’ubuzima bwiza.​—Zaburi 37:8; Imigani 17:22.

• Uko wakwitoza imico myiza.​—1 Abakorinto 6:9, 10.

• Uko wacunga umutungo.​—Imigani 10:4; 28:19; Abefeso 4:28.a

Hari umugabo n’umugore we bo muri Aziya bashimishijwe n’ukuntu inama zo muri Bibiliya zabagiriye akamaro. Kimwe n’abandi bantu bakimara gushaka, bahanganye n’ibibazo byo kumenyerana no kuganira batishishanya. Nyuma yaho batangiye gukurikiza ibyo basomaga muri Bibiliya. Byabagiriye akahe kamaro? Uwo mugabo witwa Vicent yagize ati “ibyo nasomye muri Bibiliya, byamfashije gukemura neza ibibazo twahuraga na byo. Gukurikiza amahame yo muri Bibiliya byatumye tugira urugo rwiza.” Umugore we Annalou yaravuze ati “ingero z’abantu bavugwa muri Bibiliya zaradufashije cyane. Ubu ndishimye kandi ndanyuzwe. Nezezwa n’uko twageze kuri byinshi.”

Kumenya Imana. Vicent yavuze ko Bibiliya yabafashije no mu bindi, agira ati “gusoma Bibiliya byatumye numva negereye Yehova kurusha mbere hose.” Icyo ni ikintu cy’ingenzi cyane. Bibiliya ishobora kugufasha kumenya Imana. Kumenya Imana bituma inama ikugira zikugirira akamaro kandi ukaba incuti yayo. Nanone Imana yavuze ko tuzabaho neza mu gihe kizaza, tukagira “ubuzima nyakuri” ari bwo buzima bw’iteka (1 Timoteyo 6:19). Nta kindi gitabo wasangamo ibyo byose.

Nutangira gusoma Bibiliya kandi ukabikomeza, nawe uzagera ku byo abo bantu bagezeho. Uzabaho neza kandi umenye Imana. Icyakora uko uzagenda usoma Bibiliya, ni ko uzagenda wibaza ibibazo byinshi. Nugira ibibazo wibaza, uzibuke urugero rwiza rw’umugabo wo muri Etiyopiya wabayeho mu myaka 2.000 ishize. Yibazaga byinshi ku birebana na Bibiliya. Igihe bamubazaga niba ibyo asoma abyumva, yarashubije ati “mu by’ukuri se, nabisobanukirwa nte ntabonye unyobora?”b Yemeye ko Filipo wari umwigishwa wa Yesu, amwigisha Bibiliya kuko yari ayisobanukiwe (Ibyakozwe 8:30, 31, 34). Kimwe n’uwo mugabo, niba wifuza kumenya byinshi kuri Bibiliya, ushobora kubisaba ku rubuga rwa www.jw.org/rw cyangwa ukandikira Abahamya ba Yehova bo hafi y’iwanyu, kuri aderesi iri ku ipaji ya 2 y’iyi gazeti. Nanone ushobora kubiganiraho n’Abahamya ba Yehova bo hafi y’iwanyu, cyangwa ukajya ku Nzu y’Ubwami iri hafi yawe. Soma Bibiliya uhereye uyu munsi maze ikuyobore, wibonere ukuntu uzagira ubuzima bwiza.