Ese Bibiliya yamfasha kugira umuryango wishimye?

Icyo Bibiliya ibivugaho

Yego. Dore urugero rw’inama zirangwa n’ubwenge zishingiye kuri Bibiliya, zafashije abagabo n’abagore babarirwa muri za miriyoni kugira umuryango wishimye:

1. Mushyingiranwe mu buryo bwemewe n’amategeko. Isezerano abantu bagirana ryo kubana akaramata bagashyingiranwa mu buryo bwemewe n’amategeko, ni ryo rufatiro rwo kugira umuryango wishimye.​—Matayo 19:4-6.

2. Mujye mugaragarizanya urukundo kandi mwubahane. Ibyo bikubiyemo gufata uwo mwashakanye nk’uko nawe wifuza ko agufata.​—Matayo 7:12; Abefeso 5:25, 33.

3. Mwirinde amagambo akomeretsa. Jya uvugisha neza uwo mwashakanye, nubwo haba hari ikintu gikomeretsa yagukoreye cyangwa yakubwiye (Abefeso 4:31, 32). Nk’uko Bibiliya ibivuga mu Migani 15:1, “gusubizanya ineza bihosha uburakari, ariko ijambo ribabaza ribyutsa umujinya.”

4. Ntimugahemukirane. Uwo mwashakanye ni we wenyine ugomba kugaragariza urukundo rwihariye kandi akaba ari we wenyine mugirana imibonano mpuzabitsina (Matayo 5:28). Bibiliya igira iti “ishyingiranwa ryubahwe n’abantu bose, kandi uburiri bw’abashakanye ntibukagire ikibuhumanya.”​—Abaheburayo 13:4.

5. Mujye muhana abana banyu mu rukundo. Mujye mwirinda kubarera bajeyi, ariko nanone mwirinde kubasharirira.​—Imigani 29:15; Abakolosayi 3:21.