Néndoo ge 4
See Diable lé to na wa
See Satan Diable—lé ginnee in ra wa. (1, 2)
See Satan lé aou er deouje bann-bann wa. (3-7)
See mba ribba asje kwaje tög si kögero non Diable’d wa. (7)
1. “Diable” lé to ta ge méee pana njé pa taje ge ngom mba k’illa ne ndol do maree’d. “Satan” méee pana njéban esé njékostareou. Rije nee lai lé wöji do njéban le Allah ge ged-ged. Ketté dotar lé, yeen to kura ge dara ge maji or njorong ge shi’d Allah dara. Nê géee’d ndaà, yeen tel njébèlè lem yeen ndigi kàr neen bba pôlé neen, nê né-pôlé lé Allah ya’d karee ba kiao bba wöji dea.—Matthieu 4:8-10.
2. Kura ge dara, Satan lé, pata qe Eve mbol do li. Yeen ula taje ge ngom yèn bba Eve al ne ta tâ Allah’d. Kula ra Satan neelé to rö ge illa do né’d ge bbaree “goso konbbee” le Allah esé loo shi Allah ge uru doo loo lai. Satan bèlè pana Allah lé on bbee majal, yeen ôg nékundaje lea né ge maji. Satan tel bèlè tobei pana: deou kara kârâ as shi to mweisei le Allah el. Mba kula rea ge bèe bba, Satan ra ne rea njéban le Allah. Gelee ge nee bba bbaree ne Satan Diable lé.—Ginn-né 3:1-5; Job 1:8-11; Lookillaréa 12:9.
3. Qe goso bba, Satan ndigi ker deouje kàr dee pôle’ neen. (2 Corinthienje 11:3, 14) Dann néje’d ge aou er ne deouje lé kara to ta-allah ge ngom. Ta-allah ge aou twöji ta ngom do Allah’d ndaà yee aou ra mee ndigi le Satan. (Jean 8:44) Deouje ge d’unn go ta-allahje ge ngom lé banelle meen dee nda kain to ge d’aou pôlé Allah ge togero’d, nê ge togero’d lé deen d’aou ra kula d’àr Satan. Yeen ge to “njetaa loo-kog ge do nang nee.”—2 Corinthienje 4:4.
4. Satan aou er deouje mbol do mbeen bba mba kon dee. Deouje ge nanje deji ndilje ge majel kàr dee taa do dee, mba ra ne mardeeje majal, mba k’oo ne né ge to loo kiya’g esé mba ra ne némorije. Satan bba iya rea gir néraje ge majel nee lai. Mba kàr ci j’a taaje kem Allah ndaà, jeen j’a k’ulaje ro ci séen bèe dann mbeen’d el.—Godndu 18:10-12; Néra 19:18, 19.
5. Tobei Satan aou er deouje, os dee bboin-bboin àr ro dee lel dee yaan do ginnkoji dee’d esé àr dee pôle’ Loo-politiqueje. Deen ge nanje d’enji meen dee’d to ge bbee le dee esé ginnkoji le dee uru do kan mardeeje. Nê togero el. (Néra 10:34, 35) Deouje ge nanje d’unda meen dee do Loo politiqueje’d yee bba d’oo to kuman kan gol némeekonje lai ge aou too ro deouje. Deen ge d’unda meen dee bèe lé, deen mbat Bbeekon le Allah ge yee ya kara ba kiao to kumam kor némeekonje lai.—Daniel 2:44.
6. Satan aou er deouje qe naa mee qe ngur néje ge majel. Jéhovah ger to ge néraje ge majel lé a ree qe tuji do ci’d, yeen ula ci pana j’yânje. (Galateje 6:7, 8) Banelle deouje ge nanje d’a kos si bboin-bboin mba kàr si raje se dee néje ge majel. Nê àrje mee si wei do’d el, to Satan bba ndigi kàr si raje néje nee.—1 Corinthienje 6:9, 10; 15:33.
7. Qe kàrnan-kon esé kosnanreou lé Satan a ra kàr si ubaje Jéhovah yänje. Banelle deouje ge nanje ge sein ndigi deeje yaan d’a ra se si ong mbata sein aou ndooje Bible. Esé deen ge nanje d’a k’ula sul do si’d. Nê see na bba sein ndigije taaje kemee wa. See na bba àr si kheme wa. Satan ndigi ra si kàr bbelje mba kàr si waje tâ néndoo le si ge kan ger Jéhovah lé undaje nang. Yänje Satan àreeje ted si rö el! (Matthieu 10:34-39; 1 Pierre 5:8, 9) Boo lee waje ro si tög non Diable ndaà, a k’àrje Jéhovah rolel lem sein wojije’d raga to ge sein osje gel goso konbbee lea ge tar.—Gosota 27:11.
[Foto ge to mee mbeteʼg 9]
Ta-allah ge ngom, mbeen mweimàrbbee er deouje
[Foto ge to mee mbeteʼg 9]
Waje tög si kögero non Satan’d ndooje né kem-si’d ketté kàr si gerje Jéhovah