Néndoo ge 3

See Jesu Kristi lé to na wa

See mba ribba Jesu Kristi lé bbaree ngole Allah ge “dongor” wa. (1)

See mba ribba bbaree “Ta” wa. (1)

See mba ribba Jesu ree’d deou do nang nee wa. (2-4)

See mba ribba ra némorije wa. (5)

See ddi bba waga ndaà Jesu a ra wa. (6)

1. Ketté bba karee ree do nang nee bei lé, Jesu to deou ndil ge shi mee dara’d. Yeen ya bba to nékunda ge dotar le Allah, yèn bba bbaree ne ngole Allah ge “dongor.” (Colossienje 1:15; Lookillaréa 3:14) Jesu ya karee ba to ngole Allah ge yeen Allah ya unda qe da rea. Kette bba karee ree do nang nee qe deou bei lé, Jesu ‘ra Kula mbor Allah’g’, mbol dea bba Jéhovah unda ne ges néje ge rang lai, mee dara’d lem do nang nee lem to. (Gosota 8:​22-31; Colossienje 1:​16, 17) Tobei yeen bba Allah unda’g njétaatoree ge ged loo pa ta’d, gelee ge nee bba bbaree ne “Ta.”​—⁠Jean 1:​1-3; Lookillaréa 19:​13.

2. Allah ula ngonnee do nang nee unn kheme lea illa mee Marie’d. Bau Jesu lé to deou ge do nang nee el. To ge bè bba Jesu wa kaiya nènduba kara kârâ el lem med kara kârâ goto da rea lem to. Jesu lé Allah ula do nang nee mba néje gel munta: (1) Mba karee ndoo ci ta ge togero do Allah’d (Jean 18:37), (2) mba karee illa ngonnkoji maji or njorong kàr ci j’unnje do golee (1 Pierre 2:21), lem (3) mba karee àr da rea sadaga’d mba kor ci ne dann kaiya’d qe tâ yoo’d lem to. See mba ribba kwei le Jesu bba to kuman wa.​—⁠Matthieu 20:⁠28.

3. Loo ge Adam, deou ge dotar lé alta tâ Allah’d ndaà, yeen ra né ge Bible bbaree “kaiya.” Allah gang sariya yoo dea’d. (Ginn-né 3:​17-19) Géee’d ndaà tögee as né ge Allah dejee el nga, mbata yeen maji or njorong el nga. Séen séen ndaà yeen bbuga, géee’d ndaà wei. Adam àr nganneeje lai kaiya. Gelee ge nee bba jeen kârâ j’aou bbugaje ne lem j’osoje ne moei bba j’aou j’weije ne lem to. See deouje lai d’a kinga kaji to ge bann wa.​—⁠Romainje 3:23; 5:⁠12.

4. Jesu lé to deou ge dingam ge maji or njorong, asena béréré qe Adam. Nê né ge yeen ra àree uru do Adam lé, Jesu illa ngonnkoji do Allah’d àree or rod, lee dann nénaaje’d ge kedërë kârâ yeen wa méee ngang. Yeen àr rea sadaga’d ôga ne kaiya le Adam. Yee bba to né ge Bible bbaree “nékôgado.” Ngale Adam d’as teen ne dangai-yoo’d. Deen lai ge d’unn meen dee d’ar Jesu lé d’as kinga meekosolemsé mba kaiyaje le dee lem, d’as kinga kheme ge qe non lem to.​—⁠1 Timothée 2:​5, 6; Jean 3:⁠16; Romainje 5:​18, 19.

5. Loo ge Jesu nai do nang nee bei lé, yeen aji njérokonje, àr néso njélabje lem ôg lel dobaa kula lem to. Yeen ndel njé ge d’wei kârâ lem to. See mba ribba yeen ra némorijé nee wa. (1) Mbata yeen oo kemndôo le deouje ge d’ishi dann némeekonje’d bba yeen ndigi la se dee. (2) Némorije lea d’woji ge raga to ge yeen to ngole Allah ya. (3) Némorije lea twöji néje ge yeen a ra mbata le deouje ge d’illa ngonnkoji loo ge yeen a to Mbai do nang nee lai.​—⁠Matthieu 14:14; Marc 2:​10-​12; Jean 5:​28, 29.

6. Jesu lé wei, nê Allah ndolee. Yeen tel ndil gogo, Jesu tel aou dara. (1 Pierre 3:18) Leou ba, Allah ula mbai dea’d. Waga ndaà, Jesu a kor meeyér lai lem némeekonje lai do nang nee lem to.​—⁠Psaumes 37:​9-11; Gosota 2:​21, 22.

[Foto ge to mee mbeteʼg 7]

Loo killa mbér’d lea lé, Jesu twoji né, ra némorije bba àr da rea mbata le ci lem to