Néndoo ge 2
See Allah lé to na wa
See na bba to Allah ge togero wa, see ria bann wa. (1, 2)
See da rea to bann wa. (3)
See haleeje ge to bbel yaan bba ra wa. (4)
See maji yaan kàr deou pôlé Allah qe néndajije esé qe ndilnéje wa. (5)
Turaje néje as ginn joo ge d’askem la se deou kàree ger Allah maji. (6)
1. Deouje d’aou pôlé néjé ginn bula. Nê Bible ula ci to ge Allah ge TOGERO lé kara ba kiao. Yeen bba ra néje lai mee dara’d lem do nang nee lem to. To ge yeen àr ci kheme lé, yeen ya qe karee ba j’a pôléje.—1 Corinthienje 8:5, 6; Lookillarea 4:11.
2. Allah lé ri-nangje lea bula nê ria ge togero lé kara ba kiao. Ria to JÉHOVAH. Mee Bibleje’d bula lé, d’yan ri Allah ndaà ri-nangee bba ndang toree’d NJÈSHIQENEAN esé ALLAH. Nê loo ge d’unn kudu ndang Bible lé, ri ge Jéhovah lé too mee’d as gol 7 000!—Teen Raga 3:15; Psaumes 83:19 (83:18, NW).
3. Jéhovah lé da rea to genn, nê da rea tana qe le ci jeen bèe el. Bible pana “Allah to Ndil.” (Jean 4:24) Ndil lé to deou ge bôo yaan uru do ci. Deou kara kârâ oo Allah el. Jéhovah lé shi mee dara’d, nê yeen as ko néje lai. (Psaumes 11:4, 5; Jean 1:18) Ddi bba to ndilmeenda wa. Ndilmeenda lé to deou el, nê to tög ra néje le Allah.—Psaumes 104:30.
4. Bible ula ci to ge Jéhovah lé to deou ge bann wa. Bible twöji ci haleeje ge to bbel yaan ge to nee: meenoji, sariya ge qe do najee, kemkàr bba singamong lem to. (Godndu 32:4; Job 12:13; Esaïe 40:26; 1 Jean 4:8) Tobei Bible ula ci to ge yeen to njékookemtondôo, njémeemaji, njémeekosolemsé, yeen to njérameemaji lem njémeekilla lem to. Jeen to ngannje ge njékillakojije ndaà ár cije jeen sangje reou ndaji kemee.—Ephésien 5:1, 2.
5. K’ula doi nang esé ra tamaji non néndajije’d esé non magje’d lé see maji ya wa. Wah! (Teen Raga 20:4, 5) Jéhovah pana neen nja kara ba kiao bba j’a pôléje neen. Neen n’a gaji ronduba le neen danna qe deou el lem qe nè ge rang el lem to. Néndajije d’as la se ci el.—Psaumes 115:4-8; Esaïe 42:8.
6. See a ra bann bba qe mba ger ne Allah maji wa. Ooje né ge dotar ge a la se si bba nee. Undaje kem si aaje néje ge Allah ra, enjije do’d maji ooje, see ribba néje nee d’aou twöji si wa. Néje lai ge Allah unda lé wöji to ge yeen aou qe singamong ge boo lem kemkàr ge bôo lem to. Jeen j’ooje meenoji lea dann néje’d lai ge yeen ra. (Psaumes 19:2-7; [19:1-6, NW] Romainje 1:20) Né ge rang ge kan ger Allah lé to ndoo Bible. Mee Bible’d lé Allah or ginn néje yaan ar ci, see neen to Allah ge bann wa. Tobei yeen ula ci né ge yeen wöji méee’d mba ra lem né ge yeen aou ngina ro ci’d lem to.—Amos 3:7; 2 Timothée 3:16, 17.
[Foto ge to mee mbeteʼg 5]
Jeen ndoje ger Allah mbol do néje ge yeen unda lem mbol do Bible lem to