Allah Lé Kuramareeje Dˈa Shi Paradis’g

Paradis lé a tana ge duniya ge bbogenè el. Ketté ge dotar lé, Allah ndigi kar nékemndôoje lem, néurtije lem, némeekonje qe neje ge aou tôo ro ci lé goto do nang nee. Kˈaou ge ketté non lé, Allah a ra do nang nee karee to Paradis. See Paradis lé a tana bann wa. Jˈooje ta ge Bible pa woji dea:

Njéra néje ge maji. Deouje lai ge dˈa shi Paradisˈg lé dˈa to kuramar Allah. Dˈa ra maji qe mardeeje. Dˈa killakoji do godnduje ge le Allah ge qe goo rebee.​—Gosota-Kemkàrje 2:21.

Nékuso a to yaan. Mee Paradisˈg lé bboo a ra deou el. Bible pana: “Kô [esé nékuso] a to ge nang rib-rib.”​—Pakosje 72:16.

Keije qe maji lem qe kula ge maji lem to. Loo ge do nang a tel Paradis ndaà, njémeekeije kara-kara lai dˈa kaou ge kei ge oji do dee-do dee. Nana kârâ a ra kula ge a karee rolel ge togero.​—Esaïe 65:21-23.

Meelom a to do nang nee lai. Deou kara kârâ a to askar el lem a kwei tâ röˈg el lem to. Maktub le Allah pana: “[Allah] nja bba . . . rôo pousse-roje dula-dula lem to.”​—Pakosje 46:9, 10.

Laphia ge daro’g. Bible pana: “Deou-mee-bbee kara kârâ [mee Paradisˈg] a pa pana: Ro neen too neen a pa bèe el!” (Esaïe 33:24). Njémedje, njékemtöje, njémbikuduje esé njégwoskuduje kârâ dˈa goto.​—Esaïe 35:5, 6.

Nékemndôo, némeekon qe yoo a goto. Maktub le Allah pana: “Yoo a bbar ri dee gogo el lem, kemndôo-yoo kârâ a goto lem, non yoo a goto lema, meekon kârâ a goto lem to mbata néje ge dotar lé sané pá mban.”​—Lookillarea 21:4.

Njémeeyèrje d’a goto. Jehova unn ndia ar ci: “Njémeeyèrje lé, dˈa kor dee mee bbeeˈd [esé do nang nee] lem, deen ge to majikojije el kârâ dˈa tos dee rod-rod tor dee kenneng lem to.”​—Gosota-Kemkàrje 2:22.

Deouje d’a ndigi nan lem d’a tedkag nan lem to. Sariya ge qe do najee el a goto lem, kula kem nan ndôo, nerné esé kenji nan bein-bein a goto qe non lem to. Deouje dˈa kom nanˈd sad lem, dˈa killa koji do godndujeˈg le Allah qe goo nera ge dannasur lem to.​—Esaïe 26:9.