Mba ri bba Allah aou ge loo mbon do néje nanˈd wa

1. Mba ri bba ketté leou lé, Allah mbon do Israëlje nanˈd wa

Allah mbon do ngaka Abraham nanˈd or dee unda dee ge ginnkoji, ar dee Maktub kor ginn godndu. Yeen bbar ginnkoji neelé “Israël” lem, yeen ar dee to njéngem goso kwa Allah ge togero meen deeˈg lem, njéngem tarje lea lem to (Pakosje 147:19, 20). Togebe ndaà, ginnkoji deouje deouje lai dˈa kinga dokaisegere mbol do Israël.​—Turaje Loo-Kunda-Ginn-Néje 22:18.

Allah mber Israëlje mba kar dee to njékorgootaje lea. Sôrtaje le dee twoji to ge loo ge deou illa ngonnkoji do godnduje ge le Allah ndaà a kinga nédokaisegreje (Tel-Tura-Godndu 4:6). Mbol do dee bba deouje ge ran dˈaskem doo né mba ger né Allah ge togero lé to.​—Turaje Ésaïe 43:10,12.

2. Mbari bba njétaamee-kristije ge ged lé dˈwa do gol néje nanˈd wa

Bbalje bula gooˈd ndaà Israël taa kem Allah el nga. Jehova ar loo mbon do néje nanˈd le njétaamee-kristije bba taa tôree (Matthieu 21:43; 23:37, 38). Bbogenè lé njétaamee-kristije ge ged bba to njékorgootaje le Allah, taa nee tôr Isaraëlje.​—Turaje Néra-Njékainkulaje 15:14, 17.

Jesu wa do gol njékwakillaje kar dee dˈilla mbèr lem, kar dee deen kârâ la se deouje kar dee tel njékwakilla Jesu lem to (Matthieu 10:7, 11; 24:14; 28:19, 20). Kula kˈilla mbèr neelé aou kemee ge ketté ketté mee ndoje ge rudu ge dˈishi kenneng bacinè. To sôrta néra ge dotar ya bei. Jehova ar ginnkoji deouje deouje millions bula tö kulla noji le dee nanˈd kara ba loo kwa Allah ge ged meen deeˈg (Lookillarea 7:9, 10). Njétaamee-kristije ge ged lé dˈwa do gol ro dee mba kula dingam meen nanˈd lem, mba la se nan lem to. Do nang nee lé loo kwadonanje ge le dee lai lé, néndoo kara ya ge in mee Bibleˈg bba deen dˈaou ndoo.​—Turaje Hébreuje 10:24, 25.

3. Loo mbon do néje nanˈd le Temoinje le Jehova lé, tum ginnee mee bbal ge ra wa

Mee lebjeˈg 1870 lé deouje jebere bee ge to njéndoo Bible, kem dee tel inja do kankemtaje ge to mee Bibleˈg leou ba meen dee wei doˈg. Bacinè kârâ to togebee ya to. Temoinje le Jehova lé kem dee ree inja do kwa ge Jesu wa do gol njékwakillaje kar dee dˈilla né mber Bbeekon le Allah lé ndaà dˈunn kudu ra campagne mba killa mbèr ge woji do Bbekon le Allah do nang nee lai. Mee bbal ge 1931 ndaà dˈunn ri Temoinje le Jehova.​—Turaje Néra-Njékainkulaje 1:8; 2:1, 4; 5:42.

4. Témoinje le Jehova lé, see dˈor kem loo ra kulaje le dee ban wa

Mee lebje ge le njékainkulaje le Jesuˈg lé loo mbon do nan le njétaamee -kristije ge sané nan do bbeejeˈg bula lé, loo kor non dee to college central kara ba. Yee ger to ge Kristi bba to deou do loo mbondonanje ge do nang nee lai (Néra-Njékainkulaje 16:4, 5). Bacinè kârâ to togebe ya to. Temoinje le Jehova lé Collège Central bba aou or non dee. Collège central lé to ngatogje ge jebere bee ge kem dee inja maji ge dˈishi qe kudee. Deen bba dˈaou dˈaa do bureauje ge dˈaou ndang mbétéje kan ndoo Bible lem ge ginntakoji deouje 600 qe dea lem, dˈula né dˈar deouje dˈinga mba tura lem to. Collège central neelé aou or non njétaamee-kristije ge dˈishi loo kwa donanje ge as 100 000 qe dea do nang nee lai lem, aou ula dingam meen deeˈg lem to, mbol do tar ge maji ge to mee Bibleˈg. Loo kwadonanjeˈg kara kara lai lé ngatogje ge kem dee er dˈishi kenneng genn. Meenoji bba dˈaou dˈaa né do “badkosoje” le Allah.​—Turaje 1 Pierre 5:2, 3.

Temoinje le Jehova lé dˈwa do gol néje mba killa mbèr tarje ge maji ge to mee Bibleˈg lem, mba tel deouje ge njékwakilla Jesu lem to. To ge njékainkulaje ra né lé jeen kârâ jˈaou jˈilla mbèr mee keijeˈg le deouje to (Néra-Njékainkulaje 20:20). Jeen sang deouje ge meen dee ndakain do kankemtaˈg mba ndoo se dee Bible. Nê jeen lé jeen to loo mbon do néje nanˈd ba el. Jeen to njénojije le nan ge Bau ci kara ba lem, yeen ndigi ci lem to. Jeen to ngakonnan qe konnan nan ge jˈaou jˈenji do nanˈd yo qe nee (2 Njé ge Thessalonique 1:3). To ge deen dˈwa do gol ro dee mba taa ne kem Allah lem, mba la né se deouje ge rang lem to ndaà, deen ya dˈwa Jehova meen deeˈg to né njéjojije lea ge rolel le dee ur do kan deouje lai ge do nang nee.​—Turaje Pakosje 33:12; Néra-Njékainkulaje 20:35.