Allah Lé Kuramareeje Ra Né Ge Majel El

Chéitan sang reou sula deouje kar dee ra né ge majel. Deou ge ndigi to kuramar Allah lé, néje ge to kenji kem Allahˈg lé a to kenji kemeeˈg to (Pakosje 97:10). Néje ge nanje ge deouje ge to kuramar Allah dˈa ra el lé bba nee:

Kaiya ge woji do sang nan le dingam qe denné. “Sein a ndalje modkaiya el.” (Teen-Raga 20:14). Too se nan ketté bba taa-nan bei lé kârâ majel to.​—1 Njé ge Corinthe 6:18.

Ra-bber le kido. “Njéra bber le kidoje lé . . . dˈa kinga nédoji lé dee bbeekonˈg lé Allah pai goto.”​—1 Njé ge Corinthe 6:10.

Tol deou, kor-kèm. “Sein a tolje deou el.”​—Teen-Raga 20:13.

Bbogo. “Sein a bbogoje el.”​—Teen-Raga 20:15.

Tangom. Jehova enji “ndon deou ge njepa ta ge ngom lem”.​—Gosota-Kemkàrje 6:17.

Néra-kerm-kerm qe meen kin jugugu. “Nê njemeeyèr qe njéra né kerm-kerm lé [ Jehova] enji dee bein-bein.” (Pakosje 11:5). “Meekad qe ong lem sanéje dann siˈg kö ya.”​—Njé ge Éphèse 4:31.

Kos mbaré larje. Yeen ge to “njekemnda” maji karsi “orje sea kura el”.​—1 Njé ge Corinthe 5:11.

Kenji ginnkoji qe ginnka qe rang bein-bein. “Undaje njébanje le si dann kem siˈg lem, . . . raje tamaji mbata le deen ge dˈula kem si ndôo lem to.”​—Matthieu 5:43, 44.

Néje ge Allah ula ci lé to mbata maji le ci. Kog roi do néraje ge majel lé to kedere yaan ya, nê mbol do Jehova qe témoinje lea to lé, i askem kwa roi ngang mbat néraje ge Allah enji dee bein-bein.​—Esaïe 48:17; Njé ge Philippes 4:13; Hébreuje 10:24, 25.