Atongi

18 Mu ntsiku zenezi mu Izraeli+ nee mukhali na mambo. Pontho mu ntsiku zenezi dzindza ya Dhani+ ikhasaka mbuto* toera ikhale, thangwi mpaka pa ndzidzi unoyu akhadzati kutambira unthaka wawo ninga madzindza anango a Izraeli.+

2 Dzindza ya Dhani yatuma amuna axanu a dzindza yawo, amuna akuthema a ku Zora na ku Esitaoli+ toera akaone dziko na kuidziwa mwadidi. Iwo aapanga: “Ndokoni mukadziwe mwadidi dziko.” Pidafika iwo kucisa ca mapiri ca ku Efraimu, panyumba ya Mika,+ agona penepo. 3 Pikhali iwo dhuzi na nyumba ya Mika, adzindikira fala ya mʼphale wakuti ndi Mulevi, natenepa aenda kuna iye, mbambvundza: “Mbani adakupanga toera ubwere kuno? Ukucitanji kuno? Thangwi yanji uli kuno?” 4 Iye aapanga pidancitira Mika, mbalonga: “Iye andiphemba toera ndimʼphatire basa ninga nyantsembe.”+ 5 Buluka penepo, iwo ambvundza: “Taphata miyendo, bvundzisa Mulungu khala ulendo wathu unafamba mwadidi.” 6 Nyantsembe unoyu aapanga: “Ndokoni muntendere. Yahova ali na imwe paulendo wanu.”

7 Natenepa amuna anewa axanu aenda mbafika ku Laisi.+ Iwo aona kuti anthu a kweneko nee akhafuna ciphedzo ca anango ninga Asidhoni. Iwo akhali akupfulika na akukhonda dzudzumika,+ pontho nkhabepo atongi akhapita mu dziko yawo toera kuaponderera. Iwo akhali kutali kakamwe na Asidhoni, pontho nee akhafambirana na anthu anango.

8 Pidabwerera iwo kuna abale awo ku Zora na ku Esitaoli,+ abale awo aabvundza: “Mwafamba tani?” 9 Iwo atawira: “Tendeni kamenyana nawo, thangwi taona kuti dziko ineyi ndi yadidi kakamwe. Thangwi yanji muli kunyinyirika? Mbatilekeni kudembuka, tendeni kakunda dziko ineyi. 10 Tingafika kweneko, tinagumana anthu akukhonda dzudzumika,+ pontho dziko ineyi ndi ikulu kakamwe. Mulungu aipereka mʼmanja mwathu, ndi dziko+ yakuti iri na pinthu pyonsene.”

11 Natenepa amuna 600 a dzindza ya Dhani akuti akhali na pida pya nkhondo abuluka ku Zora na ku Esitaoli.+ 12 Iwo aenda kamanga misasa yawo dhuzi na ku Kiriyati-Jearimu+ ku Yuda. Na thangwi ineyi, mbuto ineyi yakumadokero a dzuwa kwa Kiriyati-Jearimu, isacemerwa Mane-Dhani*+ mpaka lero. 13 Buluka penepo, iwo aenda kucisa ca mapiri ca ku Efraimu, mbafika panyumba pa Mika.+

14 Penepo amuna axanu adaenda kaona dziko ya Laisi+ apanga abale awo: “Kodi imwe musadziwa kuti nʼnyumba izi muli na efodhi, madzimunthu a panyumba,* dzimunthu yakusemwa na dzimunthu ya utale?*+ Nyerezerani pinafuna imwe kucita.” 15 Natenepa, iwo alimira penepo, amuna axanu mbafika panyumba pa Mika pakakhala mʼphale wakuti ndi Mulevi.+ 16 Pa ndzidzi unoyu amuna 600 a dzindza ya Dhani+ akuti akhali na pida pya nkhondo, alimira pansuwo ukulu wa nzinda. 17 Amuna axanu adaenda kaona dziko,+ apita nkati toera kukwata dzimunthu yakusemwa, efodhi,+ madzimunthu a panyumba+ na dzimunthu ya utale.*+ (Nyantsembe+ akhadalimira pansuwo ukulu wa nzinda pabodzi na amuna 600 akuti akhali na pida pya nkhondo.) 18 Iwo apita nʼnyumba mwa Mika mbakwata dzimunthu yakusemwa, efodhi, madzimunthu a panyumba na dzimunthu ya utale.* Nyantsembe aabvundza: “Ninji pinacita imwe?” 19 Mbwenye iwo ampanga: “Matama. Funga mulomo wako, pontho tende pabodzi na ife toera ukhale phungu* na nyantsembe wathu. Ndi pinthu pipi pyadidi kuna iwe, kukhala nyantsembe panyumba ya munthu mʼbodzi+ peno kukhala nyantsembe wa dzindza na banja yonsene mu Izraeli?”+ 20 Nyantsembe akomerwa na pyenepi, iye akwata efodhi, madzimunthu a panyumba na dzimunthu yakusemwa,+ mbaenda pabodzi na mbumba.

21 Natenepa, iwo atoma ulendo wawo, mbaikha kutsogolo kwawo ana, pifuyo na pinthu pyawo pyakufunika. 22 Pikhali iwo kutali pangʼono na nyumba ya Mika, anthu akakhala dhuzi na nyumba ya Mika agumanyikana, atowera dzindza ya Dhani, mbaigumana. 23 Pidacemera iwo dzindza ya Dhani, dzindza ya Dhani yazungunuka mbibvundza Mika: “Ninji pidacitika? Thangwi yanji wabwera na anthu azinji?” 24 Natenepa iye alonga: “Imwe mwakwata alungu adacita ine, pontho mwakwata nyantsembe. Ine ndinasala nanji? Mphapo, thangwi yanji musandibvundza kuti: ‘Ninji pidacitika kuna iwe?’” 25 Dzindza ya Dhani yatawira: “Leka longa na ife munjira ineyi; gopa amuna akuipirwa mwakucimbiza anakucitani pyakuipa, mbapha iwe na anthu a panyumba pako.” 26 Natenepa, dzindza ya Dhani yapitiriza na ulendo wawo; mbwenye Mika pidaona iye kuti iwo akhali amphambvu kupiringana iye, abwerera kunyumba kwace.

27 Pidamala iwo kukwata alungu adacita Mika, pabodzi na nyantsembe wace, aenda ku Laisi,+ kuna anthu akupfulika na akukhonda dzudzumika.+ Iwo apha anthu anewa na supada, mbapisa nzinda na moto. 28 Iwo nee akhali na munthu toera kuapulumusa, thangwi nzinda wawo ukhali kutali na ku Sidhoni, pontho iwo nee akhafambirana na anthu anango. Nzinda unoyu ukhali nʼgowa ya Bheti-Reobhi.+ Buluka penepo, iwo amanga pontho nzinda mbakhala mwenemo. 29 Kusiyapo pyenepi, nzinda unoyu aupasa dzina ya babawo Dhani,+ wakuti akhali mwana wa Izraeli.+ Mbwenye pakutoma nzinda unoyu ukhacemerwa Laisi.+ 30 Buluka penepo, dzindza ya Dhani yatcimika kweneko dzimunthu yakusemwa,+ pontho Yonatani+ mwana wa Jersoni,+ mwana wa Mose, pabodzi na anace adzakhala anyantsembe a dzindza ya Dhani mpaka ntsiku idaendeswa anthu a dziko ineyi ku ubitcu. 31 Pontho iwo atcimika dzimunthu yakusemwa idacita Mika, mbipitiriza kweneko ntsiku zonsene zidakhala nyumba ya Mulungu* wandimomwene ku Silo.+