NUMERO

1 Pa ntsiku yakutoma ya mwezi waciwiri wa caka caciwiri pidamala iwo kubuluka ku dziko ya Ejitu,+ Yahova alonga na Mose nʼthando ya Sinai,+ mu nsasa wa nsonkhano.*+ Iye alonga: 2 “Lembera+ mbumba yonsene ya Izraeli, mʼbodzi na mʼbodzi mwakubverana na madzindza awo, mwakubverana na ambuyawo, mbulemba madzina a amuna onsene. 3 Iwe na Aroni musafunika kulembera amuna onsene a pyaka 20 kuenda kutsogolo+ mwakubverana na misoka yawo, akuti anathema toera kupita mu nsoka wa anyankhondo a Aizraeli.

4 “Mu dzindza ibodzi na ibodzi kwatani mamuna mʼbodzi; onsene asafunika akhale atsogoleri a madzindza+ awo. 5 Awa ndi madzina a amuna anafuna kukuphedzani: Wa dzindza ya Rubheni ndi Elizuri+ mwana wa Sedheuri; 6 wa dzindza ya Simeoni ndi Selumiyeli+ mwana wa Zurisadhai; 7 wa dzindza ya Yuda ndi Nasoni+ mwana wa Aminadhabhu; 8 wa dzindza ya Isakari ndi Netaneli+ mwana wa Zuwari; 9 wa dzindza ya Zebhuloni ndi Eliabhe+ mwana wa Eloni; 10 mwa ana a Zuze: Wa dzindza ya Efraimu+ ndi Elizama mwana wa Amiyudhi; wa dzindza ya Manase ndi Gamaliyeli mwana wa Pedhazuri; 11 wa dzindza ya Bhenjamini ndi Abhidhani+ mwana wa Jidhioni; 12 wa dzindza ya Dhani ndi Aiyezeri+ mwana wa Amisadhai; 13 wa dzindza ya Azeri ndi Pajiyeli+ mwana wa Okrani; 14 wa dzindza ya Gadhi ndi Eliyazafe+ mwana wa Dheuweli; 15 wa dzindza ya Nafitali ndi Aira+ mwana wa Enani. 16 Anewa ndiwo adasankhulwa pakati pa mbumba, akuti akhali atsogoleri+ a madzindza awo. Iwo ndi atsogoleri a pikwi na pikwi pya Aizraeli.”+

17 Natenepa, Mose na Aroni akwata amuna anewa adasankhulwa na Mulungu. 18 Pa ntsiku yakutoma ya mwezi waciwiri, iwo agumanya mbumba yonsene toera amuna a pyaka 20 kuenda kutsogolo+ alemberwe madzina awo, mʼbodzi na mʼbodzi mwakubverana na dzindza yace na ambuyace, 19 mwakubverana na pidalonga Yahova kuna Mose. Iye aalembera nʼthando ya Sinai.+

20 Anthu a dzindza ya Rubheni, wakuti ndi mwana wakutoma+ wa Izraeli, alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 21 mu dzindza ya Rubheni, anthu onsene adalemberwa akhali 46.500.

22 Anthu a dzindza ya Simeoni+ alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 23 mu dzindza ya Simeoni, anthu onsene adalemberwa akhali 59.300.

24 Anthu a dzindza ya Gadhi+ alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 25 mu dzindza ya Gadhi, anthu onsene adalemberwa akhali 45.650.

26 Anthu a dzindza ya Yuda+ alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 27 mu dzindza ya Yuda, anthu onsene adalemberwa akhali 74.600.

28 Anthu a dzindza ya Isakari+ alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 29 mu dzindza ya Isakari, anthu onsene adalemberwa akhali 54.400.

30 Anthu a dzindza ya Zebhuloni+ alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 31 mu dzindza ya Zebhuloni, anthu onsene adalemberwa akhali 57.400.

32 Anthu a dzindza ya Zuze adabalwa kubulukira kuna Efraimu+ alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 33 mu dzindza ya Zuze, anthu onsene adalemberwa akhali 40.500.

34 Anthu a dzindza ya Manase+ alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 35 mu dzindza ya Manase, anthu onsene adalemberwa akhali 32.200.

36 Anthu a dzindza ya Bhenjamini+ alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 37 mu dzindza ya Bhenjamini, anthu onsene adalemberwa akhali 35.400.

38 Anthu a dzindza ya Dhani+ alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 39 mu dzindza ya Dhani, anthu onsene adalemberwa akhali 62.700.

40 Anthu a dzindza ya Azeri+ alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 41 mu dzindza ya Azeri, anthu onsene adalemberwa akhali 41.500.

42 Anthu a dzindza ya Nafitali+ alemberwa madzina awo mwakubverana na dzindza yawo na ambuyawo. Amuna onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mʼbodzi na mʼbodzi, 43 mu dzindza ya Nafitali, anthu onsene adalemberwa akhali 53.400.

44 Anewa ndi anthu adalemberwa na Mose na Aroni pabodzi na atsogoleri 12 a Aizraeli. Mʼbodzi na mʼbodzi wa atsogoleri anewa akhaimirira dzindza yace. 45 Aizraeli onsene a pyaka 20 kuenda kutsogolo akuti mbadakwanisa kutumikira mu nsoka wa anyankhondo, alemberwa mwakubverana na madzindza awo, 46 anthu onsene adalemberwa akhali 603.550.+

47 Mbwenye Alevi,+ mwakubverana na dzindza+ yawo nee alemberwa pabodzi na iwo. 48 Yahova apanga Mose: 49 “Basi ene anthu a dzindza ya Levi nee usafunika kualembera, pontho leka kuabvungaza na Aizraeli+ anango. 50 Alevi usafunika kuapasa basa yakutsalakana tabhernakulo yakuti iri na Bokosi ya Umboni,+ atsalakane pyombo pyonsene pya tabhernakulo na pinthu pyonsene pya pa tabhernakulo.+ Iwo anadzathukula tabhernakulo na pyombo+ pyace pyonsene, pontho anadzatumikira penepo.+ Iwo asafunika kumanga misasa yawo nʼkhundu mwa tabhernakulo.+ 51 Ndzidzi onsene wakuti tabhernakulo isafunika kucinjwa toera kuenda kalimiriswa pa mbuto inango, Alevi asafunika kuifudza;+ khala tabhernakulo isafunika kulimiriswa, Alevi ndiwo anafunika kuilimirisa. Munthu onsene wakukhonda tawiriswa* angafendedzera tabhernakulo asafunika kuphiwa.+

52 “Mʼbodzi na mʼbodzi wa Aizraeli asafunika amange nsasa wace kukhundu idapaswa nsoka wace, mʼbodzi na mʼbodzi mwakubverana na misoka+ mitatu ya madzindza awo. 53 Alevi asafunika amange misasa yawo nʼkhundu mwa tabhernakulo yakuti iri na Bokosi ya Umboni, toera ine ndikhonde kuipirwa na mbumba ya Izraeli;+ pontho Alevi ndiwo ali na basa yakutsalakana tabhernakulo yakuti iri na Bokosi ya Umboni.”+

54 Mbumba ya Izraeli yacita pinthu pyonsene pidalonga Yahova kuna Mose. Iwo acita sawasawa ninga mudapangirwa iwo.

2 Yahova apanga Mose na Aroni: 2 “Aizraeli asafunika amange misasa yawo mu mbuto zidapaswa misoka+ yawo ya madzindza matatu-matatu, mʼbodzi na mʼbodzi cifupi na pa cidzindikiro cinapangiza dzindza yace. Misasa yawo isafunika izungulire nsasa wa nsonkhano, mbiyangʼana ku nsasa wa nsonkhano.

3 “Kukhundu yakumabulukiro a dzuwa kunadzakhala misasa ya madzindza matatu anafuna kutsogolerwa na dzindza ya Yuda mwakubverana na misoka yawo;* ntsogoleri wa dzindza ya Yuda ndi Nasoni+ mwana wa Aminadhabhu. 4 Anthu adalemberwa toera kupita mu nsoka wa anyankhondo ace ndi amuna 74.600.+ 5 Dzindza ya Isakari inadzamanga misasa yawo kukhundu ibodzi ya dzindza ya Yuda; ntsogoleri wa dzindza ya Isakari ndi Netaneli+ mwana wa Zuwari. 6 Anthu adalemberwa toera kupita mu nsoka wa anyankhondo ace ndi amuna 54.400.+ 7 Dzindza ya Zebhuloni inadzakhala kukhundu inango ya dzindza ya Yuda; ntsogoleri wa dzindza ya Zebhuloni ndi Eliabhe+ mwana wa Eloni. 8 Anthu adalemberwa toera kupita mu nsoka wa anyankhondo ace ndi amuna 57.400.+

9 “Onsene adalemberwa mʼmisoka ya anyankhondo inafuna kutsogolerwa na dzindza ya Yuda, ndi amuna 186.400. Aizraeli angathukusa misasa, iwo ndiwo anafuna toma+ kubuluka.

10 “Misasa ya madzindza matatu anafuna kutsogolerwa na dzindza ya Rubheni+ inadzakhala kukhundu yakunterero* mwakubverana na misoka yawo.* Ntsogoleri wa dzindza ya Rubheni ndi Elizuri+ mwana wa Sedheuri. 11 Anthu adalemberwa toera kupita mu nsoka wa anyankhondo ace ndi amuna 46.500.+ 12 Dzindza ya Simeoni inadzamanga misasa yawo kukhundu ibodzi ya dzindza ya Rubheni; ntsogoleri wa dzindza ya Simeoni ndi Selumiyeli+ mwana wa Zurisadhai. 13 Anthu adalemberwa toera kupita mu nsoka wa anyankhondo ace ndi amuna 59.300.+ 14 Dzindza ya Gadhi inadzakhala kukhundu inango ya dzindza ya Rubheni; ntsogoleri wa dzindza ya Gadhi ndi Eliyazafe+ mwana wa Reuweli. 15 Anthu adalemberwa toera kupita mu nsoka wa anyankhondo ace ndi amuna 45.650.+

16 “Onsene adalemberwa mʼmisoka ya anyankhondo inafuna kutsogolerwa na dzindza ya Rubheni, ndi amuna 151.450. Aizraeli angathukusa misasa, iwo anadzakhala nsoka waciwiri+ toera kubuluka.

17 “Nsasa wa nsonkhano ungathukuswa+ toera kuenda pa mbuto inango, nsasa wa dzindza ya Levi usafunika ukhale pakati pa misasa yonsene.

“Madzindza onsene asafunika afambe ninga munakhalira iwo mʼmisasa+ yawo, dzindza ibodzi na ibodzi ikhale pa mbuto payo, mwakubverana na misoka yawo ya madzindza matatu-matatu.

18 “Misasa ya madzindza matatu anafuna kutsogolerwa na dzindza ya Efraimu inadzakhala kumadokero a dzuwa mwakubverana na misoka yawo.* Ntsogoleri wa dzindza ya Efraimu ndi Elizama+ mwana wa Amiyudhi. 19 Anthu adalemberwa toera kupita mu nsoka wa anyankhondo ace ndi amuna 40.500.+ 20 Dzindza ya Manase+ inadzamanga misasa yawo kukhundu ibodzi ya dzindza ya Efraimu, ntsogoleri wa dzindza ya Manase ndi Gamaliyeli+ mwana wa Pedhazuri. 21 Anthu adalemberwa toera kupita mu nsoka wa anyankhondo ace ndi amuna 32.200.+ 22 Dzindza ya Bhenjamini inadzakhala kukhundu inango ya dzindza ya Efraimu; ntsogoleri wa dzindza ya Bhenjamini ndi Abhidhani+ mwana wa Jidhioni. 23 Anthu adalemberwa toera kupita mu nsoka wa anyankhondo ace ndi amuna 35.400.+

24 “Onsene adalemberwa mʼmisoka ya anyankhondo inafuna kutsogolerwa na dzindza ya Efraimu, ndi amuna 108.100. Aizraeli angathukusa misasa, iwo anadzakhala nsoka wacitatu+ toera kubuluka.

25 “Misasa ya madzindza matatu anafuna kutsogolerwa na dzindza ya Dhani inadzakhala kunkwiriro* mwakubverana na misoka yawo.* Ntsogoleri wa dzindza ya Dhani ndi Aiyezeri+ mwana wa Amisadhai. 26 Anthu adalemberwa toera kupita mu nsoka wa anyankhondo ace ndi amuna 62.700.+ 27 Dzindza ya Azeri inadzamanga misasa yawo kukhundu ibodzi ya dzindza ya Dhani, ntsogoleri wa dzindza ya Azeri ndi Pajiyeli+ mwana wa Okrani. 28 Anthu adalemberwa toera kupita mu nsoka wa anyankhondo ace ndi amuna 41.500.+ 29 Dzindza ya Nafitali inadzakhala kukhundu inango ya dzindza ya Dhani; ntsogoleri wa dzindza ya Nafitali ndi Aira+ mwana wa Enani. 30 Anthu adalemberwa toera kupita mu nsoka wa anyankhondo ace ndi amuna 53.400.+

31 “Onsene adalemberwa mʼmisoka ya anyankhondo inafuna kutsogolerwa na dzindza ya Dhani, ndi amuna 157.600. Aizraeli angathukusa misasa, iwo anadzakhala akumalisa+ kubuluka, mwakubverana na nsoka wawo wa madzindza matatu.”

32 Anewa ndi Aizraeli adalemberwa mwakubverana na madzindza awo; onsene adalemberwa mʼmisasa toera kupita mu nsoka wa anyankhondo ndi amuna 603.550.+ 33 Mbwenye mwakubverana na pidalonga Yahova kuna Mose, Alevi nee alemberwa+ pabodzi na Aizraeli+ anango. 34 Aizraeli acita pinthu pyonsene pidalonga Yahova kuna Mose. Iwo akakhala tenepo mʼmisasa yawo mwakubverana na misoka+ ya madzindza matatu-matatu, pontho akhathukusa tenepo misasa+ yawo, nsoka ubodzi na ubodzi mwakubverana na mabanja awo na madzindza awo.

3 Awa ndi madzindza a Aroni na a Mose pa ntsiku idalonga Yahova kuna Mose Paphiri ya Sinai.+ 2 Awa ndi madzina a ana a Aroni: Nadhabhe mwanace wautombo,* Abhiyu,+ Eleazare+ na Itamari.+ 3 Anewa akhali madzina a ana a Aroni, akuti ndi anyantsembe adadzodzwa mbasankhulwa toera kutumikira ninga anyantsembe.+ 4 Mbwenye Nadhabhe na Abhiyu afa pamaso pa Yahova pidapereka iwo ntsembe yakukhonda* kutawirika kuna Yahova+ nʼthando ya Sinai, pontho iwo nee abala ana. Mbwenye Eleazare+ na Itamari+ apitiriza kutumikira ninga anyantsembe pabodzi na pai wawo Aroni.

5 Buluka penepo Yahova apanga Mose: 6 “Panga Alevi+ toera afike cifupi na nyantsembe Aroni, pontho iwo anadzamʼphedza.+ 7 Iwo anadzaphata mabasa awo pa nsasa wa nsonkhano toera kuphedza Aroni na mbumba yonsene pa nsasa unoyu. 8 Iwo asafunika kutsalakana pyombo+ pyonsene pa nsasa wa nsonkhano, mbaphata mabasa awo pa tabhernakulo*+ toera kuphedza Aizraeli. 9 Usafunika kupereka Alevi kuna Aroni na anace. Iwo ndi anthu adaperekwa, adasankhulwa pakati pa Aizraeli+ toera kumʼphedza. 10 Usafunika kusankhula Aroni na anace, pontho iwo asafunika aphate mabasa+ awo a unyantsembe; munthu wakukhonda tawiriswa* angafendedza dhuzi asafunika kuphiwa.”+

11 Yahova apitiriza kulonga na Mose: 12 “Ona, ine ndiri kusankhula Alevi pakati pa Aizraeli toera apite pa mbuto ya ana autombo onsene a Aizraeli,+ pontho Alevi anadzakhala anga. 13 Thangwi ana autombo* onsene ndi anga.+ Pa ntsiku idapha ine ana autombo onsene mu dziko ya Ejitu,+ ine ndasankhula ana autombo onsene pakati pa Aizraeli, kutomera mwana wautombo wa munthu mpaka wa cinyama+ toera akhale anga. Iwo anadzakhala anga. Ine ndine Yahova.”

14 Yahova alonga pontho na Mose nʼthando ya Sinai:+ 15 “Lembera ana a dzindza ya Levi mwakubverana na ambuyawo na mabanja awo. Usafunika kulembera ana amuna onsene, kutomera mwana wa mwezi ubodzi kuenda kutsogolo.”+ 16 Natenepa Mose aalembera mwakubverana na pidapangwa iye na Yahova. 17 Madzina a ana a Levi akhali awa: Jersoni, Kowati na Merari.+

18 Madzina a ana a Jersoni akhali awa mwakubverana na dzindza yawo: Libhini na Simei.+

19 Madzina a ana a Kowati akhali awa mwakubverana na dzindza yawo: Amiramu, Izari, Ebhroni na Uzieli.+

20 Madzina a ana a Merari akhali awa mwakubverana na dzindza yawo: Mali+ na Musi.+

Anewa akhali ana a dzindza ya Levi mwakubverana na ambuyawo.

21 Kubulukira mwa Jersoni yabalwa dzindza ya Libhini+ na dzindza ya Simei. Anewa akhali ana a dzindza ya Jersoni. 22 Amuna onsene adalemberwa kutomera mwana wa mwezi ubodzi kuenda kutsogolo akhali 7.500.+ 23 Misasa ya dzindza ya Jersoni ikhali kuntsi kwa tabhernakulo+ kumadokero a dzuwa. 24 Ntsogoleri wa dzindza ya Jersoni akhali Eliyazafe mwana wa Layeli. 25 Basa ya ana a Jersoni+ pa nsasa wa nsonkhano ikhali kutsalakana tabhernakulo na nsasa,+ nguwo za kuphimbira+ nazo tabhernakulo, nguwo ikulu*+ ya pansuwo wa nsasa wa nsonkhano, 26 nguwo+ za mpanda wa thando,* nguwo ikulu*+ ya pansuwo wa mpanda wa tabhernakulo na guwa ya ntsembe, nkhambala za tabhernakulo na mabasa onsene akhacitwa na pinthu pyenepi.

27 Kubulukira mwa Kowati yabalwa dzindza ya Amiramu, dzindza ya Izari, dzindza ya Ebhroni na dzindza ya Uzieli. Anewa akhali ana a dzindza ya Kowati.+ 28 Amuna onsene adalemberwa kutomera mwana wa mwezi ubodzi kuenda kutsogolo akhali 8.600; iwo akhali na basa yakutsalakana mbuto yakucena.+ 29 Misasa ya ana a dzindza ya Kowati ikhali kukhundu yakunterero* kwa tabhernakulo.+ 30 Ntsogoleri wa mabanja a dzindza ya Kowati akhali Elizafani mwana wa Uzieli.+ 31 Basa yawo ikhali kutsalakana Bokosi,+ meza,+ cakuikhira nyale,+ maguwa a ntsembe,+ pyombo+ pinaphatisirwa toera kutumikira pa mbuto yakucena, nguwo ikulu*+ na mabasa onsene akuti akhafunika kuphatisira pinthu pyenepi.+

32 Ntsogoleri wankulu wa Alevi akhali Eleazare+ mwana wa nyantsembe Aroni. Eleazare ndiye akhaonera anthu onsene akhaphata mabasa a pa mbuto yakucena.

33 Kubulukira mwa Merari yabalwa dzindza ya Mali na dzindza ya Musi. Anewa akhali ana a dzindza ya Merari.+ 34 Amuna onsene adalemberwa kutomera mwana wa mwezi ubodzi kuenda kutsogolo akhali 6.200.+ 35 Ntsogoleri wa mabanja a dzindza ya Merari akhali Zurieli mwana wa Abhiyaili. Misasa yawo ikhali kukhundu yakunkwiriro* kwa tabhernakulo.+ 36 Ana a Merari akhali na basa yakutsalakana matabwa+ a tabhernakulo akulandana na aro* wa nsuwo, pimiti+ pya tabhernakulo, mizati+ yace, matsinde ace akuti ali na mabenga, pyombo+ pyonsene pya pa tabhernakulo na mabasa onsene akuti akhafunika kuphatisira pinthu pyenepi,+ 37 pabodzi na mizati yonsene ya mpanda wa thando na matsinde+ ace akuti ali na mabenga, pyakupana napyo, na nkhambala za nsasa.

38 Nsasa wa Mose, wa Aroni na ya anace ikhali kutsogolo kwa tabhernakulo, kumabulukiro a dzuwa kwakuti ndi kutsogolo kwa nsasa wa nsonkhano. Iwo akhali na basa yakutsalakana mbuto yakucena toera kuphedza Aizraeli. Munthu wakukhonda tawiriswa* angafendedza dhuzi akhafunika kuphiwa.+

39 Amuna onsene a dzindza ya Levi kutomera mwana wa mwezi ubodzi kuenda kutsogolo, akuti Mose na Aroni aalembera mwakubverana na mabanja awo ninga pidalonga Yahova, akhali 22.000.

40 Buluka penepo Yahova apanga Mose: “Lembera ana amuna onsene autombo a Aizraeli kutomera mwana wa mwezi ubodzi kuenda kutsogolo,+ alengese mbulemba madzina awo. 41 Ndiikhire pakhundu Alevi toera akhale anga pa mbuto ya ana onsene autombo a Aizraeli.+ Pontho kwata pifuyo pya Alevi pa mbuto ya pifuyo pyonsene pyakutoma kubalwa pya Aizraeli.+ Ine ndine Yahova.” 42 Natenepa Mose alembera ana autombo onsene a Aizraeli mwakubverana na pidampanga Yahova. 43 Amuna onsene adalemberwa kutomera mwana wa mwezi ubodzi kuenda kutsogolo akhali 22.273.

44 Yahova apanga pontho Mose: 45 “Kwata Alevi pa mbuto ya ana autombo onsene a Aizraeli, pontho kwata pifuyo pya Alevi pa mbuto ya pifuyo pya Aizraeli. Alevi asafunika akhale anga. Ine ndine Yahova. 46 Toera kuombola*+ ana autombo 273 a Aizraeli adapiringana numero ya Alevi,+ 47 usafunika ukwate masiklo maxanu kuna mʼbodzi na mʼbodzi+ wa iwo mwakubverana na nʼdida wa siklo inaphatisirwa pa mbuto yakucena. Siklo* ibodzi ndi midida 20 mingʼono.*+ 48 Kobiri ineyi usafunika uipereke kuna Aroni na anace toera kuombola* ale adapiringana numero ya Alevi.” 49 Natenepa Mose agumanya kobiri yakuombola nayo ale adapiringana numero ya Alevi. 50 Kobiri ya ana autombo a Aizraeli idagumanya iye ikhali masiklo 1.365 mwakubverana na nʼdida wa siklo inaphatisirwa pa mbuto yakucena. 51 Buluka penepo Mose akwata kobiri ineyi yakuombola nayo mbaipereka kuna Aroni na anace mwakubverana na pidalonga Yahova, sawasawa na pidalonga Yahova kuna Mose.

4 Penepo Yahova alonga na Mose na Aroni: 2 “Musafunika kulembera ana a dzindza ya Kowati+ pakati pa ana a Levi mwakubverana na mabanja awo na ambuyawo, 3 mulembere onsene ali mu nsoka udasankhulwa toera kutumikira pa nsasa wa nsonkhano+ akuti ali na pyaka 30+ mpaka 50 pyakubalwa.+

4 “Iyi ndi basa inafuna kuphata ana a dzindza ya Kowati pa nsasa wa nsonkhano.+ Ineyi ndi basa yakucena kakamwe. 5 Aizraeli angafuna kuthukusa misasa yawo, Aroni na anace anadzapita mu nsasa wa nsonkhano, anabulusa nguwo ikulu,*+ mbaphimbira nayo Bokosi+ ya Umboni. 6 Iwo anadzaiphimbira na nthembe ya foka, padzulu pace anapaphimbira na nguwo ya bhurumu. Angamala anaikha pontho pimiti+ pyakuthukula napyo Bokosi.

7 “Pontho meza ya mikate+ ya ntsembe anadzaiphimbira na nguwo ya bhurumu, mbaikhapo mbale, ndiko, mabasiya na makhomitco makulu a ntsembe+ za pyakumwa; mikate+ ya ntsembe zinaperekwa ndzidzi onsene isafunika ipitirize pameza. 8 Pinthu pyenepi iwo anapiphimbira na nguwo yakufuira kakamwe, pontho meza asafunika aiphimbire na nthembe ya foka, mbaikha pontho pimiti+ pyakuthukula napyo meza. 9 Buluka penepo, iwo anadzakwata nguwo ya bhurumu mbaphimbira cakuikhira nyale+ cinaphatisirwa toera kumwanikira, pabodzi na nyale,+ pyakuthimisa+ napyo moto, pyakugasa napyo nyale na pyombo pyonsene pinaikhirwa mafuta toera nyale zipitirize kugaka. 10 Cakuikhira nyale na pyombo pyace pyonsene, anadzapipyangirira na nthembe ya foka, mbapiikha pamuti* toera kupithukula. 11 Pa guwa ya ouro iwo anadzathasika nguwo ya bhurumu, anaiphimbira na nthembe ya foka, mbaikha pontho pimiti+ pyakuthukula napyo guwa.+ 12 Buluka penepo anakwata pyombo+ pyonsene pinaphatisira iwo ndzidzi onsene unatumikira iwo pa mbuto yakucena, mbapiikha pa nguwo ya bhurumu; anapiphimbira na nthembe ya foka mbapiikha pamuti* toera kupithukula.

13 “Iwo asafunika abuluse madotha* pa guwa ya ntsembe,+ mbaphimbira guwa na nguwo ya maweya a mabira yakukhwazwa pinthu pyakufuirira. 14 Iwo anadzaikha pinthu pyonsene pinaphatisira iwo angatumikira pa guwa ya ntsembe: Pyakuikhira makala a moto, magarfu, mafoxolo, mabasiya, inde, pyombo pyonsene pya pa guwa+ ya ntsembe. Iwo asafunika apiphimbire na nthembe ya foka, mbaikha pontho pimiti+ pyakuthukula napyo guwa ya ntsembe.

15 “Aizraeli angafuna kuthukusa misasa yawo, Aroni na anace asafunika amalise kuphimbira mbuto+ yakucena na pyombo pyonsene pya pa mbuto yakucena. Buluka penepo, ana a Kowati anadzapita toera kupithukula,+ mbwenye iwo nee asafunika kukhuya pinthu pya pa mbuto yakucena, gopa anafa.+ Ineyi ndi basa ya* ana a Kowati inafunika iwo kuphata pa mbuto yakucena.

16 “Eleazare+ mwana wa nyantsembe Aroni ndiye ali na basa yakuonera mafuta akugasa nawo nyale,+ insenso+ yakununkhira, ntsembe za pyakudya zinaperekwa mwakukhonda phonya na mafuta akudzodza+ nawo. Ndiye anafuna kuonera tabhernakulo na pinthu pyonsene piri mwenemu, kuphatanizambo mbuto yakucena na pyombo pyace.”

17 Yahova alonga pontho na Mose na Aroni: 18 “Lekani kutawirisa kuti dzindza yonsene ya Kowati+ ifudzwe pakati pa Alevi. 19 Mbwenye citani ipi toera ipitirize na umaso, pontho ikhonde kufa ingafendedzera pinthu+ pyakucena kakamwe. Aroni na anace anadzapita mu nsasa wa nsonkhano mbapasa mʼbodzi na mʼbodzi wa iwo basa yace na pinthu pinafunika iye kuthukula. 20 Iwo nee asafunika kupita mu nsasa wa nsonkhano mbaona pinthu pyakucena, ngakhale kupiona pangʼono basi, gopa anafa.”+

21 Buluka penepo, Yahova apanga Mose: 22 “Usafunika kulembera ana a dzindza ya Jersoni+ mwakubverana na ambuyawo na mabanja awo. 23 Lembera onsene ali mu nsoka udasankhulwa toera kutumikira pa nsasa wa nsonkhano akuti ali na pyaka 30 mpaka 50 pyakubalwa. 24 Iyi ndi basa inafuna kuphata dzindza ya Jersoni na pinthu pinafuna kuthukula+ iwo: 25 Iwo anadzathukula nguwo za pa tabhernakulo,+ nsasa wa nsonkhano, nguwo zakuphimbira nazo nsasa na nthembe za foka ziri padzulu pa nsasa,+ nguwo ikulu* ya pansuwo wa nsasa wa nsonkhano,+ 26 nguwo za mpanda wa thando,+ nguwo ikulu* ya pansuwo wa mpanda+ udazungulira tabhernakulo na guwa ya ntsembe, nkhambala zakumanga nazo, pyombo pyonsene na pinthu pyonsene pinaphatisirwa mʼbasa ya pa tabhernakulo. Ineyi ndi basa yawo. 27 Basa yonsene ya dzindza ya Jersoni+ na pinthu pyonsene pinafuna kuthukula iwo, pisafunika kuonerwa na Aroni pabodzi na anace. Munadzaapasa basa yakuthukula pinthu pyenepi. 28 Ineyi ndi basa inafuna kuphata dzindza ya Jersoni pa nsasa wa nsonkhano;+ pontho mabasa awo anadzaonerwa na Itamari+ mwana wa nyantsembe Aroni.

29 “Mbwenye ana a Merari+ usafunika kualembera mwakubverana na mabanja awo na ambuyawo. 30 Lembera onsene ali mu nsoka udasankhulwa toera kutumikira pa nsasa wa nsonkhano akuti ali na pyaka 30 mpaka 50 pyakubalwa. 31 Iwo ali na basa yakuthukula+ pinthu ipi pa nsasa wa nsonkhano: Matabwa+ a tabhernakulo akulandana na aro wa nsuwo, pimiti+ pya tabhernakulo, mizati+ yace,* matsinde+ ace akuti ali na mabenga; 32 mizati+ ya mpanda udazungulira thando,* matsinde+ ace akuti ali na mabenga, pyakupana+ napyo, nkhambala zace, pyombo pyonsene na pinthu pyonsene pinaphatisirwa mʼbasa ya pinthu pyenepi. Mʼbodzi na mʼbodzi musafunika kumpasa cinthu* cinafunika iye kuthukula. 33 Ana a dzindza ya Merari+ asafunika atumikire tenepo pa nsasa wa nsonkhano, iwo asafunika kuonerwa na Itamari mwana wa nyantsembe+ Aroni.”

34 Mose, Aroni na atsogoleri+ a mbumba alembera ana a dzindza ya Kowati+ mwakubverana na mabanja awo na ambuyawo, 35 iwo alembera onsene akhali mu nsoka udasankhulwa toera kutumikira pa nsasa wa nsonkhano,+ akuti akhali na pyaka 30 mpaka 50 pyakubalwa. 36 Anthu onsene adalemberwa mwakubverana na mabanja awo akhali 2.750.+ 37 Anthu anewa alemberwa mʼmabanja a dzindza ya Kowati, ale onsene akhatumikira pa nsasa wa nsonkhano. Mose na Aroni aalembera mwakubverana na pidalonga Yahova kuna Mose.+

38 Ana a dzindza ya Jersoni+ alemberwa mwakubverana na mabanja awo na ambuyawo, 39 iwo alembera onsene akhali mu nsoka udasankhulwa toera kutumikira pa nsasa wa nsonkhano, akuti akhali na pyaka 30 mpaka 50 pyakubalwa. 40 Anthu onsene adalemberwa mwakubverana na mabanja awo na ambuyawo akhali 2.630.+ 41 Anthu anewa ndiwo adalemberwa mʼmabanja a dzindza ya Jersoni, ale onsene akhatumikira pa nsasa wa nsonkhano. Mose na Aroni aalembera mwakubverana na pidalonga Yahova.+

42 Ana a dzindza ya Merari alemberwa mwakubverana na mabanja awo na ambuyawo, 43 iwo alembera onsene akhali mu nsoka udasankhulwa toera kutumikira pa nsasa wa nsonkhano,+ akuti akhali na pyaka 30 mpaka 50 pyakubalwa. 44 Anthu onsene adalemberwa mwakubverana na mabanja awo akhali 3.200.+ 45 Anthu anewa ndiwo adalemberwa mʼmabanja a dzindza ya Merari, akuti Mose na Aroni aalembera mwakubverana na pidalonga Yahova kuna Mose.+

46 Mose, Aroni na atsogoleri a Aizraeli alembera ana onsene a dzindza ya Levi mwakubverana na mabanja awo na ambuyawo; 47 iwo akhali na pyaka 30 mpaka 50 pyakubalwa, onsene apaswa mabasa toera kuaphata na kuthukula pinthu pinaphatisirwa pa nsasa wa nsonkhano.+ 48 Anthu onsene adalemberwa akhali 8.580.+ 49 Iwo alemberwa mwakubverana na pidalonga Yahova kuna Mose, mʼbodzi na mʼbodzi mwakubverana na basa idapaswa iye na pinthu pikhafunika iye kuthukula; iwo alemberwa tenepo mwakubverana na pidalonga Yahova kuna Mose.

5 Yahova alonga pontho na Mose: 2 “Panga Aizraeli toera aendese kunja kwa misasa anthu+ onsene akuti ali na matanya, onsene akuti ali na utenda wakubuluka utosi+ kumaso na onsene adakhala akukhonda cena thangwi yakukhuya munthu+ wakufa. 3 Mwakukhonda tsalakana khala ndi mamuna peno nkazi, musafunika kuaendesa kunja kwa misasa. Musafunika kuaendesa kunja kwa misasa, toera akhonde kupswipisa+ misasa ya ale akuti ine ndisakhala+ pakati pawo.” 4 Natenepa, Aizraeli acita pyenepi, mbaendesa anthu anewa kunja kwa misasa. Aizraeli acita sawasawa na pidalonga Yahova kuna Mose.

5 Yahova apitiriza kulonga na Mose: 6 “Panga Aizraeli kuti: ‘Mamuna peno nkazi, angacita madawo akuti anthu asaacita, mbacita pinthu mwakukhonda kukhulupirika kuna Yahova, munthu unoyu ali na mulando.+ 7 Iye asafunika kubweka+ madawo adacita iye, pontho asafunika kubweza ntengo onsene thangwi ya mulando wace, mbathimizira khundu yacixanu ya ntengo unoyu. Asafunika kupereka ntengo+ unoyu kuna munthu adadawira iye. 8 Mbwenye khala munthu adadawira iye afa, pontho nee ali na mʼbale wace toera atambire ntengo unoyu, usafunika uperekwe kuna Yahova, pontho unadzakhala wa nyantsembe. Kusiyapo pyenepi, iye asafunika apereke bira imuna ya ntsembe yakucenesa* madawo, toera aceneswe nayo madawo ace.+

9 “‘Miyoni yonsene inapereka+ Aizraeli kuna nyantsembe isafunika ikhale yace.+ 10 Pinthu pinabweresa munthu toera kupipereka, pinadzakhala pyace.* Pinthu pinapereka mʼbodzi na mʼbodzi kuna nyantsembe, pinadzakhala pya nyantsembe.’”

11 Yahova alonga pontho na Mose: 12 “Panga Aizraeli kuti: ‘Ipi ndipyo pinafunika kucitwa khala nkazi wa munthu acita madawo mbakhala wakukhonda kukhulupirika kuna mamunace.* 13 Mamuna unango angapita naye mʼmabonde,+ khala mamunace nee asadziwa pyenepi, mbapipitiriza nee kudziwika, nkazi unoyu mbakhala wakukhonda cena, mbwenye nkhabe munthu ali na umboni wa pinthu pidacita iye, pontho nkhabe munthu adanʼgumaniza: 14 Mamunace angatoma kukhala na ntcanje, mbapenula* kuti panango nkazace nee ndi wakukhulupirika,* pontho nkazi unoyu acitadi upombo, peno khala nkazi nee acita upombo, mbwenye mamunace atoma kukhala na ntcanje mbapenula kuti panango nkazace nee ndi wakukhulupirika, 15 mamuna unoyu asafunika akwate nkazace mbaenda naye kuna nyantsembe, pontho asafunika abwerese ntsembe ya nkazace, yakuti ndi khundu yacikhumi ya efa* wa ufa wa sevadha. Mu ntsembe ineyi nee asafunika kuikha mafuta a azeti nee olibhano, thangwi ineyi ndi ntsembe ya pyakudya inaperekwa thangwi ya mulando, ntsembe ya pyakudya toera kukumbusa mulando.

16 “‘Nyantsembe anaenda na nkazi unoyu kutsogolo, mbamulimirisa pamaso pa Yahova.+ 17 Nyantsembe anadzakwata madzi adaceneswa akuti ali mu combo ca dongo, anakwata pangʼono pfumbi iri pantsi nkati mwa tabhernakulo mbaiikha mʼmadzi. 18 Nyantsembe anadzalimirisa nkazi unoyu pamaso pa Yahova, mbasudzula nguwo idaphimbira nsolo wace, pontho anadzaikha mʼmanja mwace ntsembe ya pyakudya toera kukumbusa mulando wace, ineyi ndi ntsembe ya pyakudya inaperekwa thangwi ya ntcanje.+ Mʼmanja mwace, nyantsembe anadzakhala na madzi akuwawa akuti anapasa dzedze.+

19 “‘Nyantsembe anadzadumbirisa nkazi unoyu, mbampanga: “Khala nkhabe mamuna unango adapita mʼmabonde na iwe pidamala iwe kusembwa+ na* mamunako, pontho nee wagona na mamuna unango mbukhala wakukhonda cena, madzi awa akuwawa akuti anabweresa dzedze, mbaleke kukucita pyakuipa. 20 Mbwenye khala pidamala iwe kusembwa na mamunako wansiya mbukhala wakukhonda cena, pontho wapita mʼmabonde na mamuna+ unango kusiyapo mamunako . . .” 21 Nyantsembe anacitisa nkazi unoyu kudumbira, mbalonga mafala akupasisa dzedze. Nyantsembe asafunika apange nkazi unoyu: “Yahova mbakucitise kukhala munthu anafuna kulongwa pakupasa dzedze na pakudumbira pakati pa mbumba yako, thangwi Yahova anacitisa kuti ukhonde kubala ana,* mbabzwimbisa mimba yako. 22 Madzi awa akupasa dzedze anadzapita mʼmautumbo mwako toera abzwimbise mimba yako, mbakucitisa kukhonda bala ana.”* Penepo nkazi unoyu asafunika atawire: “Ameni! Ameni!”*

23 “‘Buluka penepo, nyantsembe asafunika alembe madzedze anewa mʼbukhu, mbaafudza mʼmadzi akuwawa. 24 Iye anakwata madzi akuwawa akuti anabweresa dzedze, mbamwesa nkazi unoyu, madzi akuwawa anapita mʼmanungo mwace, mbabweresa nyatwa. 25 Ntsembe ya pyakudya yakuti iri mʼmanja mwa nkazi, inafuna kuperekwa thangwi ya ntcanje,+ nyantsembe asafunika aikwate, aiendese kutsogolo mbaibweza nduli pamaso pa Yahova, buluka penepo aende kaisiye pa guwa ya ntsembe. 26 Nyantsembe anakwata pangʼono ntsembe ya pyakudya toera Mulungu akumbuke* ntsembe yonsene; pontho asafunika aipise pa guwa ya ntsembe,+ angamala akwate madzi mbamwesa nkazi unoyu. 27 Nyantsembe angamwesa madzi nkazi unoyu, khala iye apswipisika thangwi yakugona na mamuna unango mbakhala wakukhonda kukhulupirika kuna mamunace, madzi akupasa dzedze anapita mʼmanungo mwace, mbakhala cinthu cakuwawa; mimba yace inabzwimba mbacimwana kubala ana;* natenepa, nkazi unoyu anadzakhala munthu anafuna kulongwa pakupasa dzedze pakati pa mbumba yace. 28 Mbwenye khala nkazi unoyu nee apswipisika, pontho iye ndi wakucena, nee anadzagwerwa na nyatwa zenezi, pontho anakwanisa kumita mimba mbabala ana.

29 “‘Unoyu ndi ntemo thangwi ya ntcanje+ unafunika kutowezerwa khala nkazi asiya mamunace mbapita mʼmabonde na mamuna unango mbakhala wakukhonda cena pidamala iye kusembwa na mamunace, 30 peno khala mamuna atoma kukhala na ntcanje, mbapenula* kuti nkazace nee ndi wakukhulupirika; iye asafunika alimirise nkazace pamaso pa Yahova, nyantsembe mbacita kuna nkazi unoyu pinthu pyonsene pinalongwa mu mwambo unoyu. 31 Mamuna nee anadzakhala na mulando, mbwenye nkazace anadzatawirira* mulando wace.’”

6 Yahova alonga pontho na Mose: 2 “Panga Aizraeli kuti: ‘Mamuna peno nkazi angadumbira toera kuperekeka kuna Yahova kuti akhale Nazireu,*+ 3 nee asafunika kumwa vinyu peno pyakumwa pinango pyakuledzeresa. Nee asafunika kumwa vinagre ya vinyu peno vinagre ya pyakumwa pyonsene pyakuledzeresa.+ Nee asafunika kumwa pyakumwa pyakucitwa na mauva, pontho nee asafunika kudya mauva akutokota peno akuuma. 4 Mu ntsiku zonsene zinafuna kutumikira iye ninga Nazireu, nee asafunika kudya mauva mawisi, nee makoko a mauva.

5 “‘Mu ntsiku zonsene zinafuna kutumikira iye ninga Nazireu nee asafunika kucingwa+ tsisi yace.* Iye asafunika asiye kuti tsisi yace ikule toera apangize kuti aperekeka toera kuphata basa ya Yahova mpaka zingamala ntsiku zenezi. 6 Mu ntsiku zonsene zidaperekeka iye toera kuphata basa ya Yahova nee asafunika kufendedzera munthu wakufa. 7 Mwakukhonda tsalakana khala munthu adafa ndi pai wace, mai wace, mʼbale wace wamamuna peno wankazi, iye nee asafunika kupswipisika,+ thangwi munsolo mwace muli na cidzindikiro cakuti aperekeka kuna Mulungu toera kukhala Nazireu.

8 “‘Iye anadzakhala wakucena kuna Yahova mu ntsiku zonsene zinafuna kutumikira iye ninga Nazireu. 9 Mbwenye munthu angafera pakhundu pace+ mwakukhonda dikhira, mbapswipisa tsisi yace yakuti ndi cidzindikiro cakuperekeka kwace kuna Mulungu, iye asafunika kucinga+ tsisi yace pa ntsiku inafuna iye kuceneseka. Asafunika acinge tsisi yace pa ntsiku yacinomwe. 10 Pa ntsiku yacisere iye asafunika akwate madjiwa mawiri peno ana nkhangaiwa awiri mbaenda nawo kuna nyantsembe pansuwo wa nsasa wa nsonkhano. 11 Nyantsembe anadzapereka mbalame ibodzi ninga ntsembe yakulekererwa madawo, mbalame inango anaipereka ninga ntsembe yakupiswa mbacenesa madawo+ ace, thangwi adawa pidafendedzera iye munthu wakufa. Buluka penepo Nazireu asafunika acenese nsolo wace pa ntsiku ineyi. 12 Iye asafunika aperekeke pontho kuna Yahova toera atome pontho kutumikira ninga Nazireu, asafunika abwerese bira ya caka cibodzi ninga ntsembe ya mulando wace. Mbwenye ntsiku zidatumikira iye pakutoma nee zinalengeswa thangwi iye apswipisa Unazireu wace.

13 “‘Uyu ndi mwambo unafunika kutowezerwa na Nazireu: Iye angafikisa kunkhomo ntsiku zace zakutumikira ninga Nazireu,+ anadzaendeswa pansuwo wa nsasa wa nsonkhano. 14 Penepo iye asafunika apereke ntsembe yace kuna Yahova: Bira imuna ya caka cibodzi yakusowa cilema, toera kuipereka ninga ntsembe yakupiswa;+ bira ikazi ya caka cibodzi yakusowa cilema, toera kuipereka ninga ntsembe yakulekererwa madawo;+ bira imuna yakusowa cilema toera kuipereka ninga ntsembe toera kupereka takhuta,+ 15 sestu* ibodzi ya mikate yakusowa pyakutupisa yakulandana na mphete, yakucitwa na ufa wadidi kakamwe wakubvungazwa na mafuta a azeti; mikate yakuphaphatika yakusowa pyakutupisa, yakukhwazwa mafuta a azeti. Asafunika aipereke pabodzi na ntsembe ya pyakudya+ na ntsembe za pyakumwa.+ 16 Nyantsembe anadzapereka pinthu pyenepi kuna Yahova, pontho anadzapereka ntsembe yakulekererwa madawo na ntsembe yakupiswa. 17 Iye anadzapereka bira kuna Yahova ninga ntsembe toera kupereka takhuta, na sestu ya mikate yakusowa pyakutupisa; pontho asafunika apipereke pabodzi na ntsembe ya pyakudya+ na ntsembe ya pyakumwa.

18 “‘Buluka penepo, Nazireu asafunika acinge+ tsisi yace pansuwo wa nsasa wa nsonkhano, iye anadzakwata tsisi yace idakula mu ndzidzi ukhali iye Nazireu mbaenda kaiikha pa moto uli pantsi pa ntsembe toera kupereka takhuta. 19 Nyantsembe anadzakwata mwendo+ wakutsogolo wa bira, udagwandwa mbuperuswa;* pontho akwate nkate ubodzi wa mu sestu wakusowa pyakutupisa wakulandana na mphete na nkate ubodzi wakuphaphatika wakusowa pyakutupisa; asafunika apiikhe mʼmanja mwa Nazireu angamala kucingwa tsisi yace yakuti ndi cidzindikiro ca Unazireu wace. 20 Nyantsembe anadzapiendesa kutsogolo mbapibweza nduli ninga ntsembe pamaso pa Yahova.+ Ineyi ndi khundu ya nyantsembe pabodzi na diti ya ntsembe idaendeswa kutsogolo mbibwezwa nduli na mwendo udaperekwa+ ninga muoni. Buluka penepo Nazireu anakwanisa kumwa vinyu.

21 “‘Uyu ndi ntemo unafunika kutowezerwa na Nazireu+ anadumbira toera kupereka ntsembe: Khala iye adumbira, pontho anakwanisa kupereka ntsembe kuna Yahova kupiringana ire inaphembwa thangwi ya Unazireu wace, iye asafunika kucita pidapikira iye mwakubverana na ntemo wa Unazireu.’”

22 Buluka penepo Yahova alonga na Mose: 23 “Panga Aroni na anace: ‘Mungafuna kupasa nkhombo+ mbumba ya Izraeli longani tenepa:

24 “Yahova mbakupaseni+ nkhombo, pontho mbakutsidzikizeni.

25 Yahova mbapangize kukoma ntima kwace kuna imwe,+ pontho mbakubvereni ntsisi.

26 Yahova mbapangize kuna imwe nkhope yakutsandzaya, pontho akupaseni ntendere.”’+

27 Iwo asafunika alonge dzina yanga kuna mbumba ya Izraeli+ toera ine ndiapase+ nkhombo.”

7 Pa ntsiku idamalisa Mose kumanga tabhernakulo,+ aidzodza+ mbaicenesa pabodzi na pyombo pya tabhernakulo, guwa ya ntsembe na pyombo+ pyace pyonsene. Pidamala iye kudzodza na kucenesa pinthu+ pyenepi, 2 atsogoleri a mbumba ya Izraeli,+ akuti akhali atsogoleri a madzindza awo, apereka ntsembe. Atsogoleri anewa a madzindza adaonera basa yakulemberwa kwa anthu, 3 abweresa ntsembe yawo kuna Yahova: Ngolo zitanthatu na ngʼombe 12, pyenepi pikhabveka kuti atsogoleri awiri apereka ngolo ibodzi, pontho ntsogoleri mʼbodzi na mʼbodzi apereka ngʼombe ibodzi; iwo apereka pinthu pyenepi pa tabhernakulo. 4 Yahova apanga Mose: 5 “Tambira pinthu pyenepi pidabweresa iwo, thangwi pinadzaphatisirwa mʼbasa ya pa nsasa wa nsonkhano, pontho usafunika upipase Alevi, mʼbodzi na mʼbodzi mwakubverana na pinafunika kuna iye toera aphate basa yace.”

6 Natenepa, Mose atambira ngolo na ngʼombe zenezi; mbapereka pinthu pyenepi kuna Alevi. 7 Ngolo ziwiri na ngʼombe zinai azipereka kuna ana a dzindza ya Jersoni, mwakubverana na pikhafunika toera iwo aphate mabasa+ awo; 8 ngolo zinai na ngʼombe zisere azipereka kuna ana a dzindza ya Merari, mwakubverana na pikhafunika toera iwo aphate mabasa awo. Pinthu pyenepi pikhaonerwa na Itamari, mwana wa nyantsembe+ Aroni. 9 Mbwenye ana a dzindza ya Kowati nee aapasa cinthu, thangwi basa yawo ikhali kuthukula pyombo pikhaphatisirwa pa mbuto yakucena,+ pyombo pyenepi iwo akhapithukula paphewa+ pawo.

10 Atsogoleri a madzindza apereka ntsembe zawo pidatoma kuphatisirwa+ guwa ya ntsembe pa ntsiku idadzodzwa iyo. Atsogoleri a madzindza pidapereka iwo ntsembe zawo pa guwa ya ntsembe, 11 Yahova apanga Mose: “Ntsogoleri mʼbodzi na mʼbodzi anadzakhala na ntsiku yakupereka ntsembe yace toera guwa ya ntsembe itome kuphatisirwa.”

12 Adatoma kupereka ntsembe yace pa ntsiku yakutoma ndi Nasoni+ mwana wa Aminadhabhu wa dzindza ya Yuda. 13 Ntsembe yace ikhali mbale ibodzi ya parata ikhalemera masiklo* 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 14 iye apereka ndiko* ibodzi ya ouro ikhalemera masiklo khumi, ikhadadzala na insenso; 15 abweresa mwanangʼombe, bira na mwanabira* wa caka cibodzi toera piperekwe ninga ntsembe yakupiswa;+ 16 abweresambo mwanambuzi toera aperekwe ninga ntsembe+ yakulekererwa madawo. 17 Toera kupereka ntsembe+ inapangiza kupereka takhuta, iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi. Ineyi ikhali ntsembe idapereka Nasoni mwana wa Aminadhabhu.+

18 Pa ntsiku yaciwiri, Netaneli+ mwana wa Zuwari, ntsogoleri wa dzindza ya Isakari apereka ntsembe yace. 19 Ntsembe idapereka iye ikhali mbale ibodzi ya parata ikhalemera masiklo 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 20 iye apereka ndiko* ibodzi ya ouro ikhalemera masiklo khumi, ikhadadzala na insenso; 21 abweresa mwanangʼombe, bira na mwanabira* wa caka cibodzi toera piperekwe ninga ntsembe yakupiswa;+ 22 abweresambo mwanambuzi toera aperekwe ninga ntsembe+ yakulekererwa madawo. 23 Toera kupereka ntsembe+ inapangiza kupereka takhuta, iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi. Ineyi ikhali ntsembe idapereka Netaneli mwana wa Zuwari.

24 Pa ntsiku yacitatu, Eliabhe+ mwana wa Eloni, ntsogoleri wa dzindza ya Zebhuloni, 25 apereka ntsembe yace: Mbale ibodzi ya parata ikhalemera masiklo 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 26 iye apereka ndiko ibodzi ya ouro ikhalemera masiklo khumi, ikhadadzala na insenso; 27 abweresa mwanangʼombe, bira na mwanabira wa caka cibodzi toera piperekwe ninga ntsembe yakupiswa;+ 28 abweresambo mwanambuzi toera aperekwe ninga ntsembe+ yakulekererwa madawo. 29 Toera kupereka ntsembe+ inapangiza kupereka takhuta, iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi. Ineyi ikhali ntsembe idapereka Eliabhe+ mwana wa Eloni.

30 Pa ntsiku yacinai, Elizuri+ mwana wa Sedheuri, ntsogoleri wa dzindza ya Rubheni, 31 apereka ntsembe yace: Mbale ibodzi ya parata ikhalemera masiklo 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 32 iye apereka ndiko ibodzi ya ouro ikhalemera masiklo khumi, ikhadadzala na insenso; 33 abweresa mwanangʼombe, bira na mwanabira wa caka cibodzi toera piperekwe ninga ntsembe yakupiswa;+ 34 abweresambo mwanambuzi toera aperekwe ninga ntsembe+ toera kulekererwa madawo. 35 Pontho iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi ninga ntsembe+ toera kupereka takhuta. Ineyi ikhali ntsembe idapereka Elizuri+ mwana wa Sedheuri.

36 Pa ntsiku yacixanu, Selumiyeli+ mwana wa Zurisadhai, ntsogoleri wa dzindza ya Simeoni, 37 apereka ntsembe yace: Mbale ibodzi ya parata ikhalemera masiklo 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 38 iye apereka ndiko ibodzi ya ouro ikhalemera masiklo khumi, ikhadadzala na insenso; 39 abweresa mwanangʼombe, bira na mwanabira wa caka cibodzi toera piperekwe ninga ntsembe yakupiswa;+ 40 abweresambo mwanambuzi toera aperekwe ninga ntsembe+ yakulekererwa madawo. 41 Toera kupereka ntsembe+ inapangiza kupereka takhuta, iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi. Ineyi ikhali ntsembe idapereka Selumiyeli+ mwana wa Zurisadhai.

42 Pa ntsiku yacitanthatu, Eliyazafe+ mwana wa Dheuweli, ntsogoleri wa dzindza ya Gadhi, 43 apereka ntsembe yace: Mbale ibodzi ya parata ikhalemera masiklo 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 44 iye apereka ndiko ibodzi ya ouro ikhalemera masiklo khumi, ikhadadzala na insenso; 45 abweresa mwanangʼombe, bira na mwanabira wa caka cibodzi toera piperekwe ninga ntsembe yakupiswa;+ 46 abweresambo mwanambuzi toera aperekwe ninga ntsembe+ yakulekererwa madawo. 47 Toera kupereka ntsembe+ inapangiza kupereka takhuta, iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi. Ineyi ikhali ntsembe idapereka Eliyazafe+ mwana wa Dheuweli.

48 Pa ntsiku yacinomwe, Elizama+ mwana wa Amiyudhi, ntsogoleri wa dzindza ya Efraimu, 49 apereka ntsembe yace: Mbale ibodzi ya parata ikhalemera masiklo 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 50 iye apereka ndiko ibodzi ya ouro ikhalemera masiklo khumi, ikhadadzala na insenso; 51 abweresa mwanangʼombe, bira na mwanabira wa caka cibodzi toera piperekwe ninga ntsembe yakupiswa;+ 52 abweresambo mwanambuzi toera aperekwe ninga ntsembe+ yakulekererwa madawo. 53 Toera kupereka ntsembe+ inapangiza kupereka takhuta, iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi. Ineyi ikhali ntsembe idapereka Elizama+ mwana wa Amiyudhi.

54 Pa ntsiku yacisere, Gamaliyeli+ mwana wa Pedhazuri, ntsogoleri wa dzindza ya Manase, 55 apereka ntsembe yace: Mbale ibodzi ya parata ikhalemera masiklo 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 56 iye apereka ndiko ibodzi ya ouro ikhalemera masiklo khumi, ikhadadzala na insenso; 57 abweresa mwanangʼombe, bira na mwanabira wa caka cibodzi toera piperekwe ninga ntsembe yakupiswa;+ 58 abweresambo mwanambuzi toera aperekwe ninga ntsembe+ yakulekererwa madawo. 59 Toera kupereka ntsembe+ inapangiza kupereka takhuta, iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi. Ineyi ikhali ntsembe idapereka Gamaliyeli+ mwana wa Pedhazuri.

60 Pa ntsiku yacipfemba, Abhidhani+ mwana wa Jidhioni, ntsogoleri+ wa dzindza ya Bhenjamini, 61 apereka ntsembe yace: Mbale ibodzi ya parata ikhalemera masiklo 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 62 iye apereka ndiko ibodzi ya ouro ikhalemera masiklo khumi, ikhadadzala na insenso; 63 abweresa mwanangʼombe, bira na mwanabira wa caka cibodzi toera piperekwe ninga ntsembe yakupiswa;+ 64 abweresambo mwanambuzi toera aperekwe ninga ntsembe+ yakulekererwa madawo. 65 Toera kupereka ntsembe+ inapangiza kupereka takhuta, iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi. Ineyi ikhali ntsembe idapereka Abhidhani+ mwana wa Jidhioni.

66 Pa ntsiku yacikhumi, Aiyezeri+ mwana wa Amisadhai, ntsogoleri wa dzindza ya Dhani, 67 apereka ntsembe yace: Mbale ibodzi ya parata ikhalemera masiklo 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 68 iye apereka ndiko ibodzi ya ouro ikhalemera masiklo khumi, ikhadadzala na insenso; 69 abweresa mwanangʼombe, bira na mwanabira wa caka cibodzi toera piperekwe ninga ntsembe yakupiswa;+ 70 abweresambo mwanambuzi toera aperekwe ninga ntsembe+ yakulekererwa madawo. 71 Toera kupereka ntsembe+ inapangiza kupereka takhuta, iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi. Ineyi ikhali ntsembe idapereka Aiyezeri+ mwana wa Amisadhai.

72 Pa ntsiku 11, Pajiyeli+ mwana wa Okrani, ntsogoleri wa dzindza ya Azeri, 73 apereka ntsembe yace: Mbale ibodzi ya parata ikhalemera masiklo 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 74 iye apereka ndiko ibodzi ya ouro ikhalemera masiklo khumi, ikhadadzala na insenso; 75 abweresa mwanangʼombe, bira na mwanabira wa caka cibodzi toera piperekwe ninga ntsembe yakupiswa;+ 76 abweresambo mwanambuzi toera aperekwe ninga ntsembe+ yakulekererwa madawo. 77 Toera kupereka ntsembe+ inapangiza kupereka takhuta, iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi. Ineyi ikhali ntsembe idapereka Pajiyeli+ mwana wa Okrani.

78 Pa ntsiku 12, Aira+ mwana wa Enani, ntsogoleri wa dzindza ya Nafitali, 79 apereka ntsembe yace: Mbale ibodzi ya parata ikhalemera masiklo 130 na basiya ibodzi ya parata ikhalemera masiklo 70 mwakubverana na nʼdida wa siklo inaphatisirwa pa mbuto yakucena,+ mbale na basiya pikhadadzala na ufa wadidi kakamwe wakubvungazwa na mafuta a azeti toera ukhale ntsembe ya pyakudya;+ 80 iye apereka ndiko ibodzi ya ouro ikhalemera masiklo khumi, ikhadadzala na insenso; 81 abweresa mwanangʼombe, bira na mwanabira wa caka cibodzi toera piperekwe ninga ntsembe yakupiswa;+ 82 abweresambo mwanambuzi toera aperekwe ninga ntsembe+ yakulekererwa madawo. 83 Toera kupereka ntsembe+ inapangiza kupereka takhuta, iye abweresa ngʼombe ziwiri, mabira maxanu, mabokho maxanu na anamabira axanu a caka cibodzi. Ineyi ikhali ntsembe idapereka Aira+ mwana wa Enani.

84 Toera guwa ya ntsembe itome kuphatisirwa,+ atsogoleri a dzindza ya Izraeli apereka ntsembe izi pa ntsiku idadzodzwa iyo: Mbale 12 za parata, mabasiya 12 a parata na ndiko+ 12 za ouro; 85 mbale ibodzi na ibodzi ikhalemera masiklo* 130, basiya ibodzi na ibodzi ikhalemera masiklo 70; parata ya pyombo pyonsene ikhali masiklo 2.400 mwakubverana na nʼdida wa siklo inaphatisirwa pa mbuto yakucena;+ 86 ndiko 12 za ouro zakuti zikhadadzala na insenso, ibodzi na ibodzi ikhalemera masiklo* khumi mwakubverana na nʼdida wa siklo inaphatisirwa pa mbuto yakucena; ouro ya ndiko zonsene ikhali masiklo 120. 87 Pinyama pidaphatisirwa toera kupereka ntsembe yakupiswa pikhali ngʼombe 12, mabira 12, anamabira 12 a caka cibodzi kuphatanizambo ntsembe za pyakudya, pabodzi na anambuzi 12 toera aperekwe ninga ntsembe yakulekererwa madawo. 88 Pinyama pidaperekwa ninga ntsembe toera kupereka takhuta, pikhali ngʼombe 24, mabira 60, mabokho 60, na anamabira 60 a caka cibodzi. Ineyi ikhali ntsembe+ idaperekwa toera guwa ya ntsembe itome kuphatisirwa pidamala iyo kudzodzwa.+

89 Ndzidzi onsene ukhapita Mose mu nsasa wa nsonkhano toera kulonga na Mulungu,+ iye akhabva fala ikhalonga na iye pa mphampha+ ya Bokosi ya Umboni, pakati pa akerubhi+ awiri; Mulungu akhalonga na iye.

8 Yahova alonga na Mose: 2 “Panga Aroni kuti: ‘Ungagasa nyale pa cakuikhira nyale, nyale zinomwe zisafunika kumwanikira mbuto iri kutsogolo kwa cakuikhira nyale.’”+ 3 Natenepa, Aroni acita ipi: Agasa nyale toera zimwanikire mbuto iri kutsogolo kwa cakuikhira nyale,+ mwakubverana na pidalonga Yahova kuna Mose. 4 Cakuikhira nyale cikhadacitwa na ouro yakumenywa na martelo; kutomera muti wace mpaka maluwa ace pikhadacitwa na ouro yakumenywa+ na martelo. Cakuikhira nyale cacitwa mwakubverana na cidapangizwa Mose mʼmasomphenya+ na Yahova.

5 Yahova alonga pontho na Mose: 6 “Kwata Alevi pakati pa Aizraeli, mbuacenesa.+ 7 Usafunika kucita ipi toera kuacenesa: Awazire madzi akucenesa madawo, iwo asafunika apale manungo awo onsene na lezi, afule nguwo zawo, natenepa mbakhala+ akucena. 8 Buluka penepo, iwo anadzakwata mwanangʼombe+ na ntsembe ya pyakudya+ ya ufa wadidi kakamwe wakubvungazwa na mafuta a azeti, pontho iwe unadzakwata mwanangʼombe unango toera umpereke ninga ntsembe yakulekererwa madawo.+ 9 Usafunika kupereka Alevi kutsogolo kwa nsasa wa nsonkhano, mbugumanya mbumba yonsene ya Aizraeli.+ 10 Ungapereka Alevi pamaso pa Yahova, Aizraeli asafunika aikhe manja awo pa misolo ya Alevi.+ 11 Aroni asafunika apereke Alevi pamaso pa Yahova ninga ntsembe+ ya Aizraeli yakuti inaendeswa kutsogolo mbibwezwa nduli, pontho Alevi anadzaphata basa ya Yahova.+

12 “Buluka penepo, Alevi anadzaikha manja awo pa misolo ya ngʼombe,+ Buluka penepo zisafunika kuperekwa kuna Yahova, ibodzi ninga ntsembe toera kulekererwa madawo, inango ninga ntsembe yakupiswa, toera kucenesa*+ madawo a Alevi. 13 Usafunika kulimirisa Alevi patsogolo pa Aroni na anace, mbuapereka kuna Yahova ninga ntsembe yakuti inaendeswa kutsogolo mbibwezwa nduli. 14 Usafunika kuikha pakhundu Alevi pakati pa Aizraeli, pontho Alevi anadzakhala anga.+ 15 Buluka penepo, Alevi anadzapita toera atumikire mu nsasa wa nsonkhano. Usafunika kucita pyenepi toera kuacenesa, na kuapereka ninga ntsembe yakuti inaendeswa kutsogolo mbibwezwa nduli. 16 Thangwi iwo ndi anthu adaperekwa ninga miyoni pakati pa Aizraeli. Ine ndinadzaakwata toera akhale anga pa mbuto ya ana autombo onsene a Aizraeli.+ 17 Thangwi ana autombo onsene a Aizraeli ndi anga, mwakukhonda tsalakana khala ndi mwana wa munthu peno wa cinyama.+ Ine ndaaikha pakhundu toera akhale anga pa ntsiku idapha ine ana autombo onsene mu dziko ya Ejitu.+ 18 Ine ndinadzakwata Alevi pa mbuto ya ana autombo onsene a Aizraeli. 19 Ndinadzapereka Alevi kuna Aroni na anace ninga anthu adaperekwa na Aizraeli, toera aphate basa, mbaphedza Aizraeli pa nsasa wa nsonkhano,+ pontho acenese madawo a mbumba, toera pakhonde kuoneka cidengwa pakati pa Aizraeli+ mbumba ya Izraeli ingafendedzera mbuto yakucena.”

20 Mose, Aroni na mbumba ya Izraeli acita pyenepi kuna Alevi. Aizraeli acita kuna Alevi pinthu pyonsene pidalonga Yahova kuna Mose thangwi ya Alevi. 21 Alevi aceneseka, mbafula nguwo+ zawo. Buluka penepo, Aroni aapereka kuna Yahova+ ninga ntsembe inaendeswa kutsogolo mbibwezwa nduli. Pontho Aroni apereka ntsembe yakuphimbira madawo awo toera akhale+ akucena. 22 Pidamala iwo, Alevi apita toera kuphata basa yawo pa nsasa wa nsonkhano pamaso pa Aroni na anace. Iwo acitira pyenepi Alevi mwakubverana na pidalonga Yahova kuna Mose thangwi ya Alevi.

23 Yahova alonga pontho na Mose: 24 “Ipi ndipyo pinafunika imwe kucita kuna Alevi: Kutomera pyaka 25 pyakubalwa kuenda kutsogolo, mamuna anadzapita mu nsoka wa ale anatumikira pa nsasa wa nsonkhano. 25 Mbwenye angafikisa pyaka 50 pyakubalwa, asafunika abuluke mu nsoka unoyu, mbakhonda kutumikira pontho. 26 Iye anakwanisa kutumikira abale ace anaphata basa pa nsasa wa nsonkhano, mbwenye nee asafunika aphate basa penepo. Pyenepi ndipyo pinafunika imwe kucita kuna Alevi na mabasa+ awo.”

9 Yahova alonga na Mose nʼthando ya Sinai pa mwezi+ wakutoma wa caka caciwiri, pidamala iwo kubuluka mu dziko ya Ejitu. Iye alonga: 2 “Aizraeli asafunika akhunganye ntsembe+ ya Paskwa pa ndzidzi+ udakhazikiswa. 3 Musafunika kuikhunganya pa ndzidzi udakhazikiswa, pa ntsiku 14 ya mwezi uno, ncidodo cidima mbacidzati kutoma.* Musafunika kuikhunganya+ mwakubverana na mitemo yace yonsene na pitsogolero pyace pyonsene pidakhazikiswa.”

4 Natenepa, Mose apanga Aizraeli toera kukhunganya ntsembe ya Paskwa. 5 Iwo akhunganya ntsembe ya Paskwa pa ntsiku 14 ya mwezi wakutoma nʼthando ya Sinai, ncidodo cidima mbacidzati kutoma.* Aizraeli acita pinthu pyonsene mwakubverana na pidalonga Yahova kuna Mose.

6 Mbwenye akhalipo amuna anango akuti akhali akukhonda cena thangwi akhuya manungo+ a munthu wakufa, na thangwi ineyi iwo nee mbadakwanisa kukhunganya ntsembe ya Paskwa ntsiku ineyi. Natenepa, amuna anewa aenda kalonga na Mose na Aroni pa ntsiku ineyi.+ 7 Iwo alonga: “Ife tiri akukhonda cena thangwi takhuya munthu wakufa. Mphapo thangwi yanji tisafunika kupingizwa mbatikhonda kupereka ntsembe kuna Yahova pabodzi na Aizraeli+ anango pa ndzidzi udakhazikiswa?” 8 Penepo Mose aapanga: “Dikhirani penepo, ndisafuna ndibve pinafuna kulonga Yahova thangwi ya imwe.”+

9 Penepo Yahova apanga Mose: 10 “Panga Aizraeli kuti: ‘Khala munthu wa pakati panu peno wa dzindza yanu ntsogolo ali wakukhonda cena thangwi akhuya manungo+ a munthu wakufa peno ali kutali paulendo, ngakhale tenepo asafunika akhunganyire Yahova ntsembe ya Paskwa. 11 Iwo asafunika aikhunganye pa ntsiku 14 ya mwezi+ waciwiri, ncidodo cidima mbacidzati kutoma.* Pa ntsiku ineyi, iye asafunika kudya nyama ya mwanabira pabodzi na mikate yakusowa pyakutupisa na masamba+ akuwawa. 12 Nee asafunika kusiya cinthu mpaka mangwana mwace,+ pontho nee gogodo ibodzi ya mwanabira+ isafunika kuswiwa. Iwo asafunika kuikhunganya mwakubverana na pitsogolero pyonsene pya ntsembe ya Paskwa. 13 Mbwenye khala munthu akhali wakucena, pontho nee akhali kutali paulendo mbapwaza kukhunganya ntsembe ya Paskwa, munthu unoyu asafunika kuphiwa pakati pa mbumba+ yace, thangwi iye nee apereka ntsembe ya Yahova pa ndzidzi udakhazikiswa. Munthu unoyu anadzaphiwa thangwi ya* madawo ace.

14 “‘Pontho khala munthu wakudza asakhala na imwe pakati panu, iye asafunikambo akhunganyire Yahova+ ntsembe ya Paskwa. Asafunika aikhunganye mwakubverana na ntemo wa ntsembe ya Paskwa na pitsogolero+ pidakhazikiswa. Imwe na anthu akudza anakhala pakati panu,+ monsene musafunika kutowezera ntemo ubodzi ene.’”

15 Pa ntsiku idamangwa+ tabhernakulo, khole yaphimbira tabhernakulo yakuti ndi nsasa wa Umboni, mbwenye namasiku khole ya moto yapitiriza padzulu pa tabhernakulo mpaka mangwana mwace namacibese.+ 16 Ipi ndipyo pikhacitika ndzidzi onsene: Namasikati khole ndiyo ikhaphimbira tabhernakulo, namasiku+ ikhaphimbirwa na khole ya moto. 17 Ndzidzi onsene ukhabuluka khole pa tabhernakulo, mwakucimbiza Aizraeli akhabulukambo+ pa mbuto ikhali iwo, pontho pa mbuto ikhalimira khole, ndi penepo pakhamanga Aizraeli misasa+ yawo. 18 Aizraeli akhathukusa misasa yawo mwakubverana na citsogolero ca Yahova, pontho akhamanga misasa+ yawo mwakubverana na citsogolero ca Yahova. Mu ndzidzi ukhapitiriza khole padzulu pa tabhernakulo, Aizraeli nee akhathukusa misasa yawo. 19 Khole ingapitiriza mu ntsiku zizinji padzulu pa tabhernakulo, Aizraeli akhabvera Yahova mbakhonda kubuluka+ pa mbuto ineyi. 20 Midzidzi inango khole ikakhala padzulu pa tabhernakulo mu ntsiku zingasi basi. Aizraeli akhapitiriza kukhala mʼmisasa yawo mwakubverana na citsogolero ca Yahova, pontho akhathukusa misasa yawo mwakubverana na citsogolero ca Yahova. 21 Midzidzi inango khole ikhalimira padzulu pa tabhernakulo namaulo mpaka mangwana mwace namacibese; khole ingakwira buluka padzulu pa tabhernakulo, Aizraeli akhabuluka pa mbuto ineyi. Khole ingabuluka pa tabhernakulo, mwakukhonda tsalakana khala ndi namasikati peno namasiku, iwo akhabuluka+ pa mbuto ineyi. 22 Khole ingapitiriza kukhala pa tabhernakulo ntsiku ziwiri, mwezi ubodzi peno ntsiku zizinji, Aizraeli akhapitiriza pa mbuto ineyi, mbakhonda kuthukusa misasa yawo. Mbwenye khole ingakwira buluka pa tabhernakulo, iwo akhabuluka pa mbuto ineyi. 23 Iwo akhamanga misasa yawo mwakubverana na citsogolero ca Yahova, pontho akhathukusa misasa yawo mwakubverana na citsogolero ca Yahova. Iwo akhabvera Yahova mbatoweza citsogolero cidapereka Yahova kuna Mose.

10 Yahova apanga Mose: 2 “Cita matuluka+ mawiri; usafunika kuacita na parata yakumenywa na martelo, aphatisire ungafuna kudziwisa mbumba toera igumanyikane, pontho ungafuna kudziwisa mbumba toera ithukuse misasa. 3 Matuluka mawiri ene angalira, mbumba yonsene isafunika igumanyikane pana iwe pansuwo wa nsasa wa nsonkhano.+ 4 Ingalizwa tuluka ibodzi, basi ene atsogoleri a madzindza, akuti ndi aimiriri a pikwi na pikwi pya Aizraeli anadzagumanyikana pana iwe.+

5 “Tuluka ingalizwa mwakucinja-cinja, nsoka wa madzindza ali kumabulukiro a dzuwa+ asafunika atome ulendo wawo. 6 Tuluka ingalizwa kaciwiri mwakucinja-cinja, nsoka wa madzindza ali kumadokero a dzuwa+ asafunika atome ulendo wawo. Nsoka ubodzi na ubodzi ungafuna kubuluka, musafunika kuliza tuluka mwakucinja-cinja.

7 “Mungafuna kucemera mbumba* toera igumanyikane, musafunika kuliza matuluka,+ mbwenye nee musafunika kualiza mwakucinja-cinja. 8 Ana a Aroni akuti ndi anyantsembe asafunika alize matuluka+ anewa; unoyu ndi ntemo wakwenda na kwenda mʼmadzindza mwanu.

9 “Mu dziko yanu, mungafuna kuenda kunkhondo kamenyana na anyamalwa anu akuti asakuthabusani, musafunika kuliza matuluka+ a cidzindikiro cakuenda kunkhondo, penepo Yahova Mulungu wanu anadzakukumbukani mbakupulumusani kuna anyamalwa anu.

10 “Pontho mʼmidzidzi+ yanu yakutsandzaya, yakuti ndi midzidzi inacita imwe maphwando+ anu na pakutoma kwa miyezi, musafunika kuliza matuluka patsogolo pa ntsembe+ zanu zakupiswa na ntsembe+ zanu toera kupereka takhuta;* matuluka anewa anadzakhala cidzindikiro toera Mulungu wanu akukumbukireni. Ine ndine Yahova Mulungu+ wanu.”

11 Pa ntsiku 20 ya mwezi+ wakutoma wa caka caciwiri, khole ikhali padzulu pa tabhernakulo+ ya Umboni yabuluka. 12 Aizraeli atoma ulendo wawo nʼthando ya Sinai mwakubverana na citsogolero cidakhazikiswa toera kubuluka,+ khole ineyi yalimira nʼthando ya Parani.+ 13 Unoyu ukhali ulendo wakutoma udabuluka iwo mwakubverana na citsogolero cidapereka Yahova kuna Mose.+

14 Natenepa, nsoka wa madzindza matatu a misasa ya ana a Yuda ndiwo adatoma kubuluka; Nasoni+ mwana wa Aminadhabhu ndiye akhatsogolera nsoka unoyu. 15 Nsoka wa ana a dzindza ya Isakari ukhatsogolerwa na Netaneli+ mwana wa Zuwari. 16 Nsoka wa ana a dzindza ya Zebhuloni ukhatsogolerwa na Eliabhe+ mwana wa Eloni.

17 Pidabuluswa+ khundu ibodzi na ibodzi ya tabhernakulo, ana a Jersoni+ na ana a Merari+ akuti ndiwo akhathukula tabhernakulo, atoma ulendo wawo.

18 Penepo, nsoka wa madzindza matatu a misasa ya ana a Rubheni abuluka; Elizuri+ mwana wa Sedheuri ndiye akhatsogolera nsoka unoyu. 19 Nsoka wa ana a dzindza ya Simeoni ukhatsogolerwa na Selumiyeli+ mwana wa Zurisadhai. 20 Nsoka wa ana a dzindza ya Gadhi ukhatsogolerwa na Eliyazafe+ mwana wa Dheuweli.

21 Buluka penepo, ana a dzindza ya Kowati akuti ndiwo akhathukula pyombo+ pya pa mbuto yakucena, atoma ulendo wawo. Iwo angafika akhafunika agumane kuti tabhernakulo yamala kulimiriswa.

22 Pidamala iwo, nsoka wa madzindza matatu a misasa ya ana a Efraimu atoma ulendo wawo; Elizama+ mwana wa Amiyudhi ndiye akhatsogolera nsoka unoyu. 23 Nsoka wa ana a dzindza ya Manase ukhatsogolerwa na Gamaliyeli+ mwana wa Pedhazuri. 24 Nsoka wa ana a dzindza ya Bhenjamini ukhatsogolerwa na Abhidhani+ mwana wa Jidhioni.

25 Buluka penepo, nsoka wa madzindza matatu a misasa ya ana a Dhani atoma ulendo wawo; mbakhala nduli mwa misasa yonsene, Aiyezeri+ mwana wa Amisadhai ndiye akhatsogolera nsoka unoyu. 26 Nsoka wa ana a dzindza ya Azeri ukhatsogolerwa na Pajiyeli+ mwana wa Okrani. 27 Nsoka wa ana a dzindza ya Nafitali ukhatsogolerwa na Aira+ mwana wa Enani. 28 Pyenepi pikhali pitsogolero pikhatowezera Aizraeli na misoka yawo angafuna kubuluka.+

29 Mose apanga Obhabhu mwana wa Reuweli*+ wa dzindza ya Midhiyani wakuti akhali tebzwalace Mose: “Ife tiri kubuluka toera kuenda ku mbuto idalonga Yahova kuti: ‘Ndinadzapereka mbuto ineyi kuna imwe.’+ Tendeni pabodzi,+ ife tinadzakutsalakanani mwadidi thangwi Yahova apikira kuti anapasa pinthu pyadidi Aizraeli.”+ 30 Mbwenye iye atawira: “Nee ndinaenda pabodzi na imwe. Ndinabwerera ku dziko yanga kuna abale anga.” 31 Penepo Mose ampanga: “Ndaphata miyendo, lekani kutisiya, thangwi imwe musadziwa mbuto zisafunika ife kumanga misasa yathu nʼthando, natenepa munakwanisa kutipangiza njira. 32 Mungaenda pabodzi na ife,+ mwakukhonda penula, tinadzakucitirani udidi onsene unafuna kuticitirambo Yahova.”

33 Natenepa iwo abuluka paphiri ya Yahova+ mbacita ulendo wa ntsiku zitatu, pontho Bokosi+ ya Cibverano ca Yahova ikhaenda patsogolo pawo mu ndzidzi ukhacita iwo ulendo unoyu wa ntsiku zitatu mbakasaka mbuto toera apume.+ 34 Pontho khole+ ya Yahova ikhali padzulu pawo namasikati pidabuluka iwo pa mbuto ineyi ikhadamanga iwo misasa yawo.

35 Ndzidzi onsene ukhathukuswa Bokosi, Mose akhalonga: “Lamukani Yahova,+ anyamalwa anu mbabalalike; pontho ale anakuidani mbathawe pamaso panu.” 36 Bokosi ingalimira, iye akhalonga: “Yahova, bwererani kuna pikwi na pikwi pya Aizraeli.”+

11 Penepo mbumba yatoma kudungunya kakamwe pamaso pa Yahova. Yahova pidabva iye pyenepi aipirwa kakamwe, natenepa moto udatumiza Yahova watoma kugaka pakati pawo, mbutoma kupisa anthu angasi nʼkhundu mwa misasa. 2 Mbumba pidakhuwa iyo toera kuphemba ciphedzo kuna Mose, iye adembetera Yahova,+ moto mbuthima. 3 Natenepa, mbuto ineyi aipasa dzina ya Tabhera,* thangwi moto udatumiza Yahova ukhadagaka pakati pawo.+

4 Mwinji+ wa anthu a madzindza anango akhali pakati pawo watoma kudungunya+ kakamwe thangwi yakufuna cakudya, natenepa Aizraeli atoma kulira pontho mbalonga: “Mbani anafuna kutipasa nyama toera tidye?+ 5 Tatsuwa* kakamwe ntsomba* zikhadya ife papezi ku Ejitu, pontho makaka, mabvembe, masabola na maadyo!+ 6 Mbwenye cincino ife nkhabebve mphambvu. Pyonsene pinaona ife ndi mana+ basi.”

7 Mana+ akhadalandana na mbeu+ ya mapira, pontho maonekero ace akhali ninga mbirira yakucena.* 8 Mbumba ikhabalalika toera kulokota mana mbaapeya pa libwe peno kuathibula.* Buluka penepo, iwo akhaaphika ncikalango peno kuumba mikate+ yakusowa nkhomo, pontho akhakoma ninga mabholo akucitwa na mafuta. 9 Bume ingatoma kuoneka mʼmisasa namasiku, mana akhagwambo penepo.+

10 Mose abva anthu mbakalira mʼmabanja onsene pakati pa mbumba, mʼbodzi na mʼbodzi pansuwo wa nsasa wace. Penepo Yahova aipirwa+ kakamwe, pontho Mose aipirwambo napyo kakamwe. 11 Natenepa Mose apanga Yahova: “Thangwi yanji muli kuonesa nyatwa ntumiki wanu? Thangwi yanji nee mwakomerwa na ine ntumiki wanu, mbamundithukisa+ ntolo wa mbumba iyi yonsene? 12 Kodi ndine adabala mbumba ineyi? Kodi ndine adaabala toera mundipange kuti: ‘Abale kunduli kwako ninga pinacita makayaya* anakwata mwana wa pabere,’ mpaka ku dziko idapikira imwe kuti mbamudaipasa ambuyawo!+ 13 Ndinaigumana kupi nyama toera kupasa mbumba yonsene iyi? Thangwi iwo asapitiriza kundilirira, mbalonga: ‘Tipase nyama tidye!’ 14 Ine nee ndinakwanisa kutsalakana ndekhene mbumba yonsene iyi; kwa ine+ pyatekera kakamwe. 15 Khala munapitiriza kucita pyenepi kuna ine, ndaphata miyendo, ndipheni pyanu cincino+ pano. Khala musakomerwa na ine, lekani kundisiya ndione pontho nyatwa.”

16 Yahova apanga Mose: “Gumanya amuna 70 akuti ndi akulu a mbumba ya Izraeli, amuna anadziwa iwe kuti asatumikira ninga akulu a mpingo na atsogoleri a mbumba,+ abwerese pa nsasa wa nsonkhano, alimire penepo pabodzi na iwe. 17 Ine ndinatcita+ toera kulonga na iwe penepo,+ ndinadzabulusa pangʼono nzimu+ wakucena uli muna iwe, mbandiuikha muna amuna anewa, pontho iwo anadzakuphedza kutsalakana mbumba, toera ukhonde kuphata wekhene+ basa ineyi. 18 Usafunika kupanga mbumba kuti: ‘Cenesekani lero, thangwi mangwana+ munadzadya nyama, thangwi imwe mwalirira+ Yahova mbamulonga: “Mbani anafuna kutipasa nyama toera tidye? Ife tikhali mwadidi kakamwe ku Ejitu!”+ Mwakukhonda penula, Yahova anadzakupasani nyama, pontho imwe munadzaidya.+ 19 Imwe munadzaidya, tayu pa ntsiku ibodzi, nee mu ntsiku ziwiri, nee mu ntsiku zixanu, nee mu ntsiku khumi, nee mu ntsiku 20, 20 mbwenye munadzamala mwezi mbamukaidya, mpaka ingabuluka na mphuno mwanu* mbamunyebvuka+ nayo ntima, thangwi imwe mwakhonda Yahova, wakuti ali pakati panu; pontho mwalira mbamulonga: “Thangwi yanji ife tabuluka ku Ejitu?”’”+

21 Penepo Mose alonga: “Mbumba iri na ine, pali na amuna+ akukwana 600.000 akuti anakwanisa kuenda kunkhondo, ngakhale tenepo, imwe mwalonga kuti: ‘Ine ndinaapasa nyama yakuti anamala mwezi wamumphu mbakaidya!’ 22 Maseze iphiwe mikumbi yonsene ya ngʼombe na mabira, kodi inakwana kuna iwo? Pontho, mbapidakwanisika kuphata ntsomba* zonsene ziri mʼbara, kodi mbazidakwana kuna iwo?”

23 Penepo Yahova apanga Mose: “Usanyerezera kuti djanja ya Yahova ndi yakubvira+ kakamwe?* Cincino unaona khala pinalonga ine pinacitika peno nkhabe.”

24 Natenepa Mose abuluka, mbalonga mafala a Yahova kuna mbumba. Iye agumanya amuna 70 pakati pa akulu a mbumba, mbaalimirisa nʼkhundu mwa nsasa+ wa nsonkhano. 25 Yahova atcita pa khole,+ mbalonga na iye,+ abulusa pangʼono nzimu+ wakucena ukhali muna Mose, mbauikha muna akulu a mpingo akukwana 70. Pidapita nzimu wakucena muna amuna anewa, penepo pene iwo atoma kucita pinthu ninga aprofeta,*+ mbwenye pyenepi pyacitika kabodzi basi.

26 Awiri mwa amuna anewa akhali ku misasa. Iwo akhacemerwa Eldhadhi na Medhadhi. Nzimu wakucena wapita muna iwo, thangwi iwo akhali mu nsoka wa anthu adalemberwa, mbwenye nee akhadaenda ku nsasa wa nsonkhano, iwo atoma kucita pinthu ninga aprofeta pakati pa misasa. 27 Mʼphale mʼbodzi athamanga mbaenda kadziwisa Mose: “Eldhadhi na Medhadhi ali kucita pinthu ninga aprofeta ku misasa!” 28 Na thangwi ineyi, Yoswa+ mwana wa Nuni, wakuti akhaphedzera Mose kutomera mu uwana wace, alonga: “Mbuyanga Mose, akhondeseni!”+ 29 Mbwenye Mose antawira: “Ine nkhabe ntcanje, mphapo iwe usafunika kukhala nayo? Leka kukhala na ntcanje, thangwi ine ndikhafuna kuti mbumba yonsene ya Yahova ikhale aprofeta, pontho kuti Yahova aikhe nzimu wace muna iwo!” 30 Mukupita kwa ndzidzi, Mose abwerera mʼmisasa pabodzi na akulu a mpingo a mbumba ya Izraeli.

31 Penepo Yahova asosesa mphepo idatoma kubweresa makwerekwece akhabuluka ku bara, aagwisa nʼkhundu mwa misasa,+ mbamwazika kukhundu ibodzi nsindzo wa ntsiku ibodzi, kukhundu inango nsindzo wa ntsiku ibodzi, pontho buluka pa mataka kuenda ndzulu, makwerekwece akhadadzala mpaka makhono* mawiri. 32 Natenepa, mbumba yapitiriza kugumanya makwerekwece pa ntsiku ineyi mbaphuphudza mpaka mangwana mwace. Ale adagumanya pangʼono, akwanisa kudzadza pyombo* khumi pikulu, pontho iwo akhaathasika nʼkhundu mwa misasa. 33 Mbwenye nyama mbiciri nkanwa mwawo, mbadzati kuimeza, Yahova aipirwa na mbumba, penepo Yahova abweresa muliri mbapha+ anthu azinji kakamwe.

34 Natenepa, mbuto ineyi iwo aithula Kibhroti-Atava,*+ thangwi penepo ndipo padaikha iwo munthumbi anthu adapangiza ntima wakudyesa.+ 35 Mbumba yabuluka ku Kibhroti-Atava mbienda ku Azeroti, iwo apitiriza kukhala ku Azeroti.+

12 Penepo Miriya na Aroni atoma kulonga mwakuipa Mose thangwi ya nkazi+ wa dzindza ya Kusi adasemba iye. 2 Iwo akhalonga: “Kodi Yahova alonga na Mose basi? Nee alongambo na ife?”+ Mbwenye Yahova akhabva+ pyenepi. 3 Mose akhali munthu wakucepeseka* kakamwe kupiringana anthu+ onsene pa dziko yapantsi.

4 Mwakucimbiza Yahova apanga Mose, Aroni na Miriya: “Bulukani, utatu wanu ndokoni ku nsasa wa nsonkhano.” Natenepa, utatu wawo aenda. 5 Yahova atcita pa khole,+ alimira pansuwo wa nsasa wa nsonkhano mbacemera Aroni na Miriya. Uwiri wawo aenda kutsogolo. 6 Iye alonga: “Ndaphata miyendo, bveserani mafala anga. Mbidakhala kuti pakati panu pali na mprofeta wa Yahova, mbidandziwisa pya ine kubulukira mʼmasomphenya,+ pontho mbidalonga naye kubulukira mu ndoto.+ 7 Mbwenye si pyenepi tayu pinacita ine na ntumiki wanga Mose! Iye apaswa basa yakuonera mbumba*+ yanga yonsene. 8 Ine ndisalonga naye+ nkhope na nkhope, pakweca, tayu na mafala akunentsa kubvesesa; pontho Yahova asaonekera pamaso pace.* Mphapo thangwi yanji imwe nee mwagopa kulonga mwakuipa ntumiki wanga Mose?”

9 Natenepa Yahova aipirwa na iwo, mbabuluka pana iwo. 10 Khole yabuluka padzulu pa nsasa wa nsonkhano, penepo pene Miriya aphatwa na matanya akucena ninga matalala.+ Aroni pidayangʼana iye Miriya, aona kuti iye aphatwa na matanya.+ 11 Mwakucimbiza Aroni apanga Mose: “Ndisakudembeterani mbuyanga! Ndaphata miyendo, lekani kutisiya kuti titcunyuswe thangwi ya madawo anewa! Pidacita ife mphyaupswiru.* 12 Ndaphata miyendo, lekani kunsiya kuti akhale tenepo ninga munthu adabalwa wakufa kale, wakuti khundu ibodzi ya manungo ace yamala kubvunda!” 13 Penepo Mose atoma kudembetera Yahova mbalonga: “Mulungu wanga, ndaphata miyendo, muwangiseni! Ndaphata miyendo!”+

14 Yahova apanga Mose: “Mbidakhala pai wace amʼphulira mata, kodi iye nee mbadapasika manyadzo mu ntsiku zinomwe? Mbakhale kutali na anthu mu ntsiku zinomwe kunja kwa misasa;+ angamala anakwanisa kubwereswa mʼmisasa.” 15 Natenepa Miriya aendeswa kunja kwa misasa toera akhale kutali na anthu mu ntsiku zinomwe,+ pontho mbumba nee yabuluka pa mbuto ineyi Miriya mbadzati kubwereswa mʼmisasa. 16 Penepo mbumba yabuluka ku Azeroti+ mbimanga misasa yawo nʼthando ya Parani.+

13 Yahova apanga Mose: 2 “Tuma amuna toera aende kaona dziko ya Kanani inafuna ine kupasa Aizraeli. Mu dzindza ibodzi na ibodzi musafunika kutumiza mamuna mʼbodzi, mʼbodzi na mʼbodzi asafunika akhale ntsogoleri+ pakati pa mbumba.”+

3 Natenepa Mose atuma amuna anewa kubuluka kuthando ya Parani+ mwakubverana na pidalonga Yahova. Amuna onsene akhali atsogoleri a Aizraeli. 4 Awa ndi madzina awo: Samuwa mwana wa Zakuri, wa dzindza ya Rubheni; 5 Safati mwana wa Ori, wa dzindza ya Simeoni; 6 Kalebe+ mwana wa Yefune, wa dzindza ya Yuda; 7 Igali mwana wa Zuze, wa dzindza ya Isakari; 8 Ozeya+ mwana wa Nuni, wa dzindza ya Efraimu; 9 Paliti mwana wa Rafu, wa dzindza ya Bhenjamini; 10 Gadhiyeli mwana wa Sodhi, wa dzindza ya Zebhuloni; 11 Gadhe mwana wa Suzi, wa dzindza ya Zuze+ kubulukira mu dzindza ya Manase;+ 12 Amiyeli mwana wa Jemali, wa dzindza ya Dhani; 13 Seturi mwana wa Mikaeli, wa dzindza ya Azeri; 14 Nabhi mwana wa Vofisi, wa dzindza ya Nafitali; 15 Jeweli mwana wa Maki, wa dzindza ya Gadhi. 16 Anewa ndi madzina a amuna adatumwa na Mose toera kuenda kaona dziko. Mbwenye Ozeya mwana wa Nuni, Mose ampasa dzina ya Yoswa.*+

17 Pidaatuma Mose toera kuenda kaona dziko ya Kanani, aapanga: “Ndokoni ku Nejebhu, mungamala ndokoni kucisa+ ca mapiri. 18 Musafunika kuona kuti dziko ineyi yakhala tani,+ pontho khala anthu anakhala mwenemu ndi amphambvu peno nkhabe, khala ndi azinji peno akucepa, 19 onani khala dziko ndi yadidi peno nkhabe, pontho khala mizinda inakhala iwo iri na mipanda peno nkhabe. 20 Pontho onani khala dziko ineyi iri na mataka a ndimu* peno akusowa ndimu,+ khala muli na miti peno nkhabe. Khalani acipapo,+ mbamukwata misapo mingasi ya mu dziko ineyi.” Unoyu ukhali ndzidzi unatokota mauva+ akutoma.

21 Natenepa iwo aenda kaona dziko ineyi, kutomera kuthando ya Zini+ mpaka ku Reobhi,+ cifupi na Lebho-Amati.*+ 22 Pidaenda iwo ku Nejebhu, afika ku Ebhroni+ cisa cikakhala Aimani, Sesai na Talimai,+ akuti ndi a dzindza ya Anaki.+ Nzinda wa Ebhroni ukhadamangwa pyaka pinomwe mbudzati kumangwa nzinda wa Zoani wa ku Ejitu. 23 Pidafika iwo ku Gowa* ya Eskole,+ agwanda nthawi ikhali na tsandzo ya mauva, yakuti ikhafunika kuthukulwa na anthu awiri pa mpingiro; iwo akwatambo misapo ya romaa na masambvu.+ 24 Mbuto ineyi, iwo aicemera Gowa* ya Eskole,*+ thangwi ya tsandzo ya mauva idagwanda Aizraeli kweneko.

25 Pidamala iwo ntsiku 40+ mbakaona dziko, iwo abwerera. 26 Iwo abwerera kuna Mose, Aroni na kuna mbumba yonsene ya Izraeli nʼthando ya Parani, ku Kadhesi.+ Iwo afokotoza pinthu pyonsene kuna mbumba, mbaapangiza misapo ya dziko ineyi. 27 Iwo apanga Mose: “Ife tapita mu dziko idatituma imwe, mwandimomwene iyo ndi dziko ya nkaka na uci;+ iyi ndi misapo+ ya dziko ineyi. 28 Mbwenye anthu anakhala mu dziko ineyi ndi amphambvu, pontho mizinda yawo idazungulirwa na mipanda ndi mikulu kakamwe. Kweneko+ ife taonambo dzindza ya Anaki. 29 Aamaleke+ asakhala mu dziko ya Nejebhu;+ Aeti, Ayebusi+ na Aamori+ asakhala kucisa ca mapiri; Akanani+ asakhala cifupi na bara,+ na nʼkhundu mwa nkulo wa Yordani.”

30 Kalebe ayesera kuphedza mbumba toera ikhurudzike pamaso pa Mose, mbalonga: “Tendeni mwakucimbiza, mwakukhonda penula, ife tinakwanisa kukunda dziko ineyi, thangwi mwandimomwene tinakwanisa kuikunda.”+ 31 Mbwenye amuna adaenda pabodzi na iye alonga: “Ife nee tinakwanisa kuenda kamenyana na mbumba ineyi, thangwi iwo ndi amphambvu kakamwe kupiringana ife.”+ 32 Pontho apitiriza kupanga Aizraeli mphangwa+ zakuipa thangwi ya dziko ineyi idaenda iwo kaona, mbalonga: “Dziko idaenda ife kaona ndi dziko yakugopswa yakuti imwe munafa kweneko; anthu onsene adaona ife mwenemu ndi akulapha na a manungo makulu kakamwe.+ 33 Kweneko ife taona Anefili, akuti ndi ana a Anaki,+ a dzindza ya Anefili; tingalandanisika na iwo, tikhaoneka ninga nthete, pontho iwo akhationambo tenepo.”

14 Penepo mbumba yonsene yatoma kukhuwa, mbiphuphudza na kulira pa masiku+ anewa. 2 Aizraeli onsene atoma kudungunyira Mose na Aroni,+ pontho mbumba yonsene ikhaalonga mwakuipa. Iwo akhalonga: “Mbapidakhala mwadidi kakamwe mbidafa pyathu mu dziko ya Ejitu, peno khala tafera pyathu nʼthando ino! 3 Thangwi yanji Yahova atibweresa ku dziko ino toera tiphiwe na supada?+ Akazathu na anathu anadzakwatwa ninga pinthu pyakutapatwa.+ Kodi nee pinakhala mwadidi kakamwe tibwerere pyathu ku Ejitu?”+ 4 Iwo akhalongambo unango na ndzace: “Tendeni tisankhule ntsogoleri, toera tibwerere pyathu ku Ejitu!”+

5 Mose na Aroni pidabva iwo pyenepi, agodama mbakotamisa misolo yawo mpaka pantsi pamaso pa mbumba yonsene ya* Izraeli ikhali penepo. 6 Yoswa+ mwana wa Nuni na Kalebe+ mwana wa Yefune, akuti akhalimbo pakati pa amuna adaenda kaona dziko, apandula nguwo zawo, 7 mbalonga ipi kuna mbumba yonsene ya Izraeli: “Dziko+ idaenda ife kaona ndi yadidi, yadidi kakamwe. 8 Khala Yahova akomerwa na ife, mwakukhonda penula, iye anatipitisa mu dziko ineyi, mbatipasa dziko ineyi ya nkaka na uci.+ 9 Mbwenye lekani kusandukira* Yahova, pontho lekani kugopa anthu a dziko+ ineyi, thangwi ife tinaakunda mwakukhonda nentsa.* Iwo nkhabe citsidzikizo, mbwenye Yahova ali na ife.+ Lekani kuagopa.”

10 Ngakhale tenepo, mbumba yonsene ikhalonga kuti iwo asafunika kuponyerwa+ miyala. Penepo ceza ca mbiri ya Yahova caoneka pa nsasa wa nsonkhano pamaso pa mbumba yonsene ya Izraeli.+

11 Yahova alonga na Mose: “Mpaka lini mbumba iyi inapitiriza kukhonda kundilemedza,+ pontho mpaka lini inapitiriza kukhonda kundikhulupira, mwakukhonda tsalakana pirengo* pyonsene pidacita ine pakati pawo?+ 12 Dikhira ndiabweresere muliri toera ndiafudze, pontho ndinacitisa kuti iwe ukhale mbumba ikulu na yamphambvu kupiringana iwo.”+

13 Mbwenye Mose apanga Yahova: “Mungacita pyenepi, anthu a ku Ejitu, kule kwakuti na mphambvu yanu, mwabulusa mbumba yanu, anapibva+ 14 mbalonga pyenepi kuna anthu a dziko ino. Kusiyapo pyenepi, anthu a dziko ino abva kuti imwe Yahova, muli pakati pa mbumba+ iyi, pontho musaonekera pakweca*+ kuna iwo. Iwo abva kuti imwe ndimwe Yahova, kuti khole yanu iri padzulu pawo; pontho kuti namasikati musaenda patsogolo pawo mu khole, namasiku+ mu khole ya moto. 15 Mungapha mbumba iyi pa ndzidzi ubodzi ene,* anthu a madzindza anango adabva pya mbiri yanu, analonga kuti: 16 ‘Yahova nee akwanisa kupitisa mbumba ineyi mu dziko idapikira iye toera kuapasa, na thangwi ineyi, iye amala kuapha nʼthando.’+ 17 Cincino Yahova, ndaphata miyendo, pangizani kukula kwa mphambvu zanu, ninga mudapikira imwe kuti: 18 ‘Yahova, wakupirira,* waufuni+ kakamwe,* wakulekerera madodo na madawo, mbwenye iye cipo anasiya kuti nyakudawa akhonde kutcunyuswa, pontho thangwi ya madawo a ababa, iye asatcunyusa ana, adzukulu na ana a adzukulu.’+ 19 Ndaphata miyendo, lekererani madodo a mbumba iyi, mwakubverana na ufuni wanu, ninga mudalekerera imwe mbumba iyi kutomera ku Ejitu mpaka pano.”+

20 Penepo Yahova alonga: “Ine ndinaalekerera mwakubverana na pidalonga+ iwe. 21 Mbwenye ine ndiri kudumbira mu dzina yanga, dziko yonsene yapantsi inadzala na mbiri ya Yahova.+ 22 Mbwenye anthu awa adaona mbiri yanga na pirengo+ pidacita ine ku Ejitu na nʼthando, mbapitiriza kundiyesera+ kazinji kene,* pontho mbakhonda kubvesera fala+ yanga, nee mʼbodzi wa iwo 23 anadzaona dziko idapikira ine kupasa ababawo. Inde, ale adakhonda kundilemedza,* nee mʼbodzi wa iwo anadzaona dziko+ ineyi. 24 Mbwenye nakuti ntumiki wanga Kalebe+ apangiza makhaliro akusiyana,* mbapitiriza kundibvera na ntima onsene, mwakukhonda penula, ine ndinamʼphedza toera apite mu dziko idaenda iye kaona, pontho anace anadzakhala mu dziko+ ineyi. 25 Nakuti Aamaleki na Akanani+ asakhala mu gowa,* mangwana musafunika muzungunuke, muende kuthando, mupite na njira ya ku Bara+ Yakufuira.”

26 Buluka penepo Yahova apanga Mose na Aroni: 27 “Mpaka lini mbumba iyi yakuipa inapitiriza kundidungunyira?+ Ine ndabva kudungunya kunandicitira+ Aizraeli. 28 Apange kuti: ‘Yahova alonga: “Ine ndiri kudumbira mu dzina yanga, ine ndinakucitirani pinthu pyenepi pidabva ine mbamukapilonga!+ 29 Manungo anu akufa anadzagwa+ nʼthando ino, inde, onsene adalemberwa, akuti ali na thunga ya pyaka 20 kuenda kutsogolo, imwe monsene mudandidungunyira.+ 30 Nee mʼbodzi wa imwe anadzapita mu dziko idadumbira ine* toera kukupasani,+ basi ene Kalebe mwana wa Yefune na Yoswa mwana wa Nuni,+ ndiwo anafuna kupitamo.

31 “‘“Mbwenye ananu adalonga imwe kuti anadzakwatwa ninga pinthu pyakutapatwa,+ ine ndinadzaapitisa mu dziko idakhonda+ imwe, iwo anadzaidziwa. 32 Mbwenye manungo anu akufa anadzagwa nʼthando ino. 33 Cincino, ananu anadzakhala akumbizi nʼthando mu pyaka 40,+ iwo anadzatcunyuswa thangwi yakucita kwanu pinthu mwakukhonda kukhulupirika, mpaka munthu wakumalisa angafa nʼthando+ pakati panu. 34 Imwe munadzatcunyuswa mu pyaka 40+ thangwi ya madawo anu, mwakubverana na ntsiku 40+ zidamala imwe mu ndzidzi udaenda imwe kaona dziko, pyenepi pisabveka ntsiku ibodzi ndi caka cibodzi, imwe munadzadziwa nyatwa zinaoneka thangwi ya kundisandukira.*

35 “‘“Ine Yahova ndalonga. Ipi ndipyo pinafuna kucitira ine mbumba iyi yonsene yakuipa, ale onsene adagumanyikana toera kundisandukira: Iwo anamalira nʼthando ino, iwo anafera+ muno. 36 Amuna onsene adatumwa na Mose toera kuenda kaona dziko mbacitisa mbumba yonsene kudungunyira Mose pidabwerera iwo na mphangwa zakuipa thangwi ya dziko+ ineyi, 37 inde, amuna adabweresa mphangwa zakuipa thangwi ya dziko ineyi, anadzatcunyuswa, mbafa pamaso pa Yahova.+ 38 Mbwenye Yoswa mwana wa Nuni na Kalebe mwana wa Yefune, akuti akhali pabodzi na ale adaenda kaona dziko, mwakukhonda penula iwo anapitiriza na umaso.”’”+

39 Mose pidalonga iye mafala anewa kuna Aizraeli onsene, mbumba yatsukwala kakamwe. 40 Kusiyapo pyenepi, mangwana mwace iwo abesera thangwi akhafuna kuenda kucisa ca mapiri, mbalonga: “Ife tadawa.+ Mbwenye cincino tiri dzololo toera kuenda ku mbuto idalonga Yahova.” 41 Mbwenye Mose aapanga: “Thangwi yanji muli kupwaza ntemo wa Yahova? Pinafuna imwe nee pinacitika. 42 Lekani kuenda, toera mukhonde kukundwa na anyamalwa anu,+ thangwi Yahova nee ali pakati panu. 43 Aamaleki na Akanani ali kweneko toera kumenyana na imwe,+ imwe munadzaphiwa na supada. Nakuti imwe mwasiya kubvera* Yahova, Yahova nee anadzakhala na imwe.”+

44 Ngakhale tenepo, iwo acita pikhafuna iwo mbaenda* padzulu paphiri,+ mbwenye Bokosi ya Cibverano ca Yahova nee yabuluka pakati pa misasa,+ pontho Mose nee abulukambo. 45 Penepo, Aamaleki na Akanani akuti akakhala paphiri ineyi, atcita mbatoma kuapha, iwo aabalalisa mpaka ku Orma.+

15 Yahova apanga pontho Mose: 2 “Panga Aizraeli kuti: ‘Mungapita mu dziko inafuna kukupasani ine toera mukhalemo,+ 3 mungapereka kuna Yahova ntsembe yakupiswa pa moto, khala ndi ntsembe ya ngʼombe peno ya bira toera ikhale khwema yakununkhira, mwakukhonda tsalakana khala ndi ntsembe+ yakupiswa peno ntsembe inaperekwa thangwi ya pikiro idacitwa, peno khala ndi ntsembe+ inaperekwa mwakufuna peno ntsembe inaperekwa mʼmaphwando+ anu anacitwa mʼmidzidzi idakhazikiswa pa caka, toera ikhale khwema yakununkhira pamaso pa Yahova,+ 4 ule anapereka ntsembe yace, asafunikambo apereke kuna Yahova ntsembe ya pyakudya ya ufa+ wadidi kakamwe, usafunika ukhale khundu yacikhumi ya efa,* wakubvungazwa na litru ibodzi ya mafuta a azeti. 5 Musafunikambo kupereka litru ibodzi ya vinyu ninga ntsembe ya pyakumwa, pabodzi na ntsembe yakupiswa+ peno ntsembe ya mwanabira. 6 Pakupereka ntsembe ya bira, musafunika kupereka ntsembe ya pyakudya ya ufa wadidi kakamwe, usafunika ukhale khundu yacikhumi ya efa,* mbamuubvungaza na mafuta a azeti akupiringana litru ibodzi. 7 Musafunikambo kupereka vinyu yakupiringana litru ibodzi ninga ntsembe ya pyakumwa toera ikhale khwema yakununkhira pamaso pa* Yahova.

8 “‘Mbwenye mungapereka ngʼombe imuna ninga ntsembe yakupiswa+ peno ntsembe toera kucita pidapikira+ imwe, peno mungapereka kuna Yahova+ ntsembe toera kupereka takhuta, 9 mungapereka ntsembe ya bira, musafunikambo kupereka ntsembe ya pyakudya+ ya ufa wadidi kakamwe, usafunika ukhale wa malitru matanthatu na hafu, mbamuubvungaza na mafuta a azeti cifupi na malitru mawiri. 10 Musafunikambo kupereka vinyu cifupi na malitru mawiri ninga ntsembe+ ya pyakumwa, ninga ntsembe yakupiswa pa moto, toera ikhale khwema yakununkhira pamaso pa* Yahova. 11 Ndi pyenepi pinafunika imwe kucita na ngʼombe, bira, mwanabira na bokho. 12 Mwakukhonda tsalakana kunjipa kwa pinyama pinafuna kupereka imwe, musafunika kucita pyenepi na cinyama cibodzi na cibodzi. 13 Pyenepi ndipyo pinafunika kucita Aizraeli onsene angapereka ntsembe yakupiswa pa moto ninga khwema yakununkhira pamaso pa* Yahova.

14 “‘Khala munthu wakudza asakhala na imwe peno ali pakati panu mu pyaka pizinji, asafunikambo apereke ntsembe yakupiswa pa moto ninga khwema yakununkhira pamaso pa* Yahova, iye asafunika aipereke ninga munaipereka+ imwe. 15 Imwe a mbumba ya Izraeli* pabodzi na anthu akudza anakhala pakati panu, musafunika mukhale na ntemo ubodzi ene. Unadzakhala ntemo wakwenda na kwenda mʼmadzindza mwanu. Munthu wakudza asafunika akhale sawasawa na imwe pamaso pa Yahova.+ 16 Imwe pabodzi na munthu wakudza anakhala pakati panu, musafunika kukhala na* mwambo ubodzi ene na matongero mabodzi ene.’”

17 Yahova alonga na Mose: 18 “Panga Aizraeli kuti: ‘Mungapita mu dziko inafuna kukupasani ine, 19 mungadya cakudya ca mu dziko+ ineyi, musafunika kupereka miyoni kuna Yahova. 20 Musafunika kupereka mikate yakulandana na mphete yakucitwa na ufa wakuti uli na usembe ninga miyoni ya misapo yanu yakutoma.+ Musafunika kupereka miyoni ineyi ninga munapereka imwe mbeu zakububudwa pa mbuwa. 21 Kwenda na kwenda mʼmadzindza mwanu, musafunika kupereka kuna Yahova miyoni ya ufa wanu wakuti uli na usembe.

22 “‘Mungacita madodo mbamusiya kubvera mitemo yonsene idapereka Yahova kuna Mose, 23 pyonsene pidakupangani Yahova kubulukira kuna Mose, kutomera pa ntsiku idampanga Yahova mpaka kwenda na kwenda mʼmadzindza mwanu, 24 khala pyacitwa mwasusudeu,* mbumba mbikhonda kupidziwa; mbumba yonsene inadzapereka mwanangʼombe ninga ntsembe yakupiswa ya khwema yakununkhira pamaso pa* Yahova; anaipereka pabodzi na ntsembe ya pyakudya na ntsembe ya pyakumwa mwakubverana na pitsogolero+ pya ntsembe zakupiswa, anaperekambo mbuzi ninga ntsembe yakulekererwa madawo.+ 25 Nyantsembe anadzapereka ntsembe toera kucenesa* madawo a mbumba yonsene ya Izraeli, natenepa mbumba inadzalekererwa madawo awo,+ thangwi iwo acita pyenepi mwakukhonda funa, pontho iwo abweresa kuna Yahova ntsembe yawo yakupiswa pa moto, mbapereka kuna Yahova ntsembe yakulekererwa madawo thangwi ya mulando wawo. 26 Mbumba yonsene ya Izraeli na munthu wakudza anakhala pakati pawo anadzalekererwa, thangwi mbumba yonsene yacita pyenepi mwakukhonda funa.

27 “‘Munthu angadawa mwakukhonda funa,* anadzapereka mbuzi ikazi ya caka cibodzi ninga ntsembe+ yakulekererwa madawo. 28 Nyantsembe anadzacenesa madawo a munthu adadawira Yahova mwakukhonda funa; iye anadzacenesa madawo a munthu unoyu, natenepa iye+ anadzalekererwa. 29 Imwe pabodzi na munthu wakudza anakhala pakati panu musafunika kutoweza* ntemo ubodzi ene khala munthu acita cinthu mwakukhonda funa.+

30 “‘Mbwenye munthu angacita madawo mwakufuna+ kwace, mwakukhonda tsalakana khala ndi Muizraeli peno munthu wakudza anakhala pakati panu, munthu unoyu ali kutikana Yahova, natenepa asafunika kuphiwa pakati pa mbumba yace. 31 Nakuti iye apwaza mafala a Yahova mbakhonda kubvera matongero ace, mwakukhonda penula+ munthu unoyu asafunika kuphiwa. Iye anadzatcunyuswa* thangwi ya madawo ace.’”+

32 Mu ndzidzi ukhali Aizraeli nʼthando, agumana mamuna akhasaka nkhuni pa ntsiku ya Sabudu.+ 33 Ale adanʼgumana mbakasaka nkhuni, aenda naye kuna Mose na Aroni pabodzi na mbumba yonsene. 34 Iwo anfungira,+ thangwi nee akhadziwa kuti akhafunika kucitanji kuna iye.

35 Yahova apanga Mose: “Mamuna unoyu asafunika kuphiwa;+ mbumba yonsene isafunika kumponyera miyala kunja kwa misasa.”+ 36 Natenepa mbumba yonsene yaenda naye kunja kwa misasa, mbamponyera miyala mpaka kufa, mwakubverana na pidalonga Yahova kuna Mose.

37 Penepo Yahova apanga Mose: 38 “Panga Aizraeli kuti kwenda na kwenda mʼmadzindza mwawo, asafunika asonere pimbverere nʼkhundu mwa nguwo zawo, pontho asafunika asonere usalu wa bhurumu pa pimbverere piri kunkhomo kwa nguwo+ zawo. 39 ‘Nguwo zanu zisafunika zikhale na pimbverere pyenepi, toera mungapiona mukumbuke matongero onsene a Yahova mbamuabvera.+ Lekani kutowerera pinthu pinafuna mitima yanu na pinasirira maso anu, pyakuti pisakutsogolerani ku ulukwali+ wauzimu.* 40 Pyenepi pinakuphedzani toera kukumbuka na kubvera matongero anga onsene, mbamukhala akucena kuna Mulungu+ wanu. 41 Ine ndine Yahova Mulungu wanu, ule adakubulusani mu dziko ya Ejitu toera ndipangize kuti ndine Mulungu+ wanu. Ine ndine Yahova Mulungu+ wanu.’”

16 Kora+ mwana wa Izari,+ ndzukulu wa Kowati+ wa dzindza ya Levi,+ agumanyikana na Dhatani na Abhironi ana a Eliabhe,+ pabodzi na Oni mwana wa Pelete wa dzindza ya Rubheni.+ 2 Amuna anewa asandukira Mose. Iwo akhali pabodzi na amuna 250 a dzindza ya Izraeli, akuti akhali atsogoleri, anthu adasankhulwa pakati pa mbumba,* amuna akubvekera. 3 Natenepa iwo agumanyikana, aenda+ kuna Mose na Aroni, mbaapanga: “Ife taneta na imwe!* Mbumba yonsene ndi yakucena,+ onsene, pontho Yahova ali pakati+ pawo. Thangwi yanji musafuna mukuzike pakati pa mbumba ya* Yahova?”

4 Mose pidabva iye pyenepi, agodama mwakucimbiza mbakotamisa nsolo wace mpaka pantsi. 5 Buluka penepo iye apanga Kora na anyakuphedzera ace onsene: “Mangwana namacibese, Yahova anadzapangiza kuti mbani munthu wace,+ mbani wakucena, pontho mbani adatawiriswa toera kunfendedzera.+ Ule anafuna kusankhulwa+ na iye, ndiye anafunika kunfendedzera. 6 Citani ipi: Iwe Kora na anthu onsene anakuphedzera,+ kwatani pyakuikhira+ insenso, 7 mangwana ikhani mwenemu makala a moto na insenso pamaso pa Yahova; ule anafuna kusankhulwa+ na Yahova, unoyu ndi wakucena. Imwe ana a Levi,+ pidacita imwe pyatekera kakamwe!”

8 Penepo Mose apanga Kora: “Ndaphata miyendo, bveserani imwe ana a Levi. 9 Kodi musaona kuti pyacepa pidakucitirani Mulungu wa Aizraeli? Iye akuikhani pakhundu pakati pa mbumba ya Izraeli,+ mbakutawirisani kuti munfendedzere toera muphate mabasa pa tabhernakulo ya Yahova, pontho mulimire patsogolo pa mbumba toera muitumikire.+ 10 Iye akutawirisani toera munfendedzere pabodzi na abale anu, ana a Levi. Mphapo musafunambo mukhale anyantsembe?+ 11 Na thangwi ineyi, iwe pabodzi na anthu onsene anakuphedzera, adamala kugumanyikana, muli kusandukira Yahova. Kodi Aroni mbani iye toera munʼdungunyire?”+

12 Buluka penepo, Mose acemeresa Dhatani na Abhironi+ ana a Eliabhe, mbwenye iwo alonga: “Ife nkhabe kuenda! 13 Kodi usanyerezera kuti pyacepa pidaticitira iwe, pidatibulusa iwe mu dziko ya nkaka na uci toera utiphese nʼthando?+ Cincino usafunambo ukhale ntongi wankulu kakamwe pakati pathu?* 14 Mwandimomwene, iwe nee watibweresa ku dziko ya nkaka na uci,+ peno kutipasa minda yakuti iri na mauva toera ikhale unthaka wathu. Kodi usanyerezera kuti ndife maboliboli? Ife nkhabe kuenda!”

15 Penepo Mose aipirwa kakamwe mbapanga Yahova: “Lekani kuyangʼana ntsembe zawo za pyakudya. Nee buru ibodzi idaakwatira ine, pontho nee mʼbodzi wa iwo+ adacitira ine pyakuipa.”

16 Buluka penepo, Mose apanga Kora: “Mangwana, iwe na onsene anakuphedzera bwerani muonekere pamaso pa Yahova. Iwe, iwo na Aroni musafunika mubwere. 17 Mʼbodzi na mʼbodzi asafunika akwate cakuikhira insenso mbaikhamo insenso, buluka penepo, acipereke pamaso pa Yahova. Iwe na Aroni pabodzi na amuna 250 anakuphedzera, mʼbodzi na mʼbodzi asafunika aphatirire cinthu cace cakuikhira insenso.” 18 Natenepa, mʼbodzi na mʼbodzi akwata cinthu cace cakuikhira insenso, aikhamo makala a moto na insenso, mbalimira cifupi na nsuwo wa nsasa wa nsonkhano pabodzi na Mose na Aroni. 19 Kora pidamala iye kugumanya anyakuphedzera+ ace cifupi na nsuwo wa nsasa wa nsonkhano toera kusandukira Mose na Aroni, ceza ca mbiri ya Yahova caoneka pana mbumba+ yonsene.

20 Penepo Yahova apanga Mose na Aroni: 21 “Bulukani pakati pa nsoka unoyu toera ine ndiafudze kabodzi na kabodzi.”+ 22 Na thangwi ineyi, iwo agodama mbakotamisa misolo yawo mpaka pantsi, mbalonga: “Taphata miyendo Mulungu, imwe Mulungu munapasa umaso anthu+ onsene, kodi munaipirwa na mbumba+ yonsene thangwi ya madawo a munthu mʼbodzi basi?”

23 Natenepa Yahova apanga Mose: 24 “Panga mbumba kuti: ‘Bulukani* pakati pa misasa ya Kora, Dhatani na Abhironi!’”+

25 Penepo Mose alamuka mbaenda kuna Dhatani na Abhironi. Akulu+ a mbumba ya* Izraeli aenda pabodzi na iye. 26 Iye apanga mbumba: “Ndaphata miyendo, bulukani* pakati pa misasa ya anthu anewa akuipa, pontho lekani kuphata pinthu pyawo, nee cibodzi, toera mukhonde kufudzwa thangwi ya madawo awo.” 27 Mwakucimbiza iwo abuluka mʼmakhundu onsene a misasa ya Kora, Dhatani na Abhironi. Dhatani na Abhironi abuluka mʼmisasa yawo mbalimira pa misuwo ya misasa yawo pabodzi na akazawo, anawo athunga na angʼono.

28 Buluka penepo, Mose aapanga: “Ipi pingacitika, imwe munadziwa kuti ndi Yahova adandituma toera kucita pinthu pyenepi, pontho kuti nee ndiri kucita pya munsolo mwanga: 29 Iwo angafa ninga munafa anthu onsene, kutcunyuswa kwawo mbakulandana na kwa anthu onsene, nee ndi Yahova adandituma.+ 30 Mbwenye Yahova angacita pinthu pyakudzumatirisa kuna iwo, mataka angafunguka mbameza iwo na pinthu pyawo pyonsene, iwo mbatcitira Munthumbi* mbaciri na umaso, dziwani kuti mwandimomwene, anthu awa atsalakana Yahova mwakusowa cilemedzo.”*

31 Pidamala iye kwene kulonga mafala anewa, mataka a pa mbuto idaponda iwo afunguka.+ 32 Mataka afunguka mbameza iwo na anthu a panyumba pawo, pabodzi na anthu onsene akhali kukhundu ya Kora+ na pinthu pyawo pyonsene. 33 Natenepa iwo na anthu onsene akhali kukhundu yawo atcitira Munthumbi* mbaciri na umaso, mataka mbafungika padzulu pawo. Natenepa iwo azambazika pakati pa mbumba.*+ 34 Pikhakhuwa anthu anewa, Aizraeli onsene akhali nʼkhundu mwawo athawa, mbalonga: “Tisagopa kumezwambo na mataka!” 35 Penepo pene, moto wabuluka kuna Yahova+ mbupisa amuna 250 akhapereka insenso.+

36 Yahova apanga Mose: 37 “Panga Eleazare mwana wa nyantsembe Aroni abuluse pyakuikhira+ insenso piri pa moto, thangwi ipyo ndi pinthu pyakucena. Pontho mpange toera amwaze madotha kutali na mbuto ineyi. 38 Pyakuikhira insenso pya amuna adafa thangwi ya madawo awo, pisafunika kucitwa mabhande a utale toera kuaikha mʼmakhundu a guwa ya ntsembe,+ thangwi iwo apipereka kuna Yahova mbapikhala pinthu pyakucena. Pinthu pyenepi pinadzakhala cidzindikiro kuna Aizraeli.”+ 39 Natenepa, nyantsembe Eleazare akwata pyakuikhira insenso pya nkuwa pidaperekwa na anthu adamala kupiswa na moto, apicita mabhande toera kuaikha mʼmakhundu a guwa ya ntsembe 40 mwakubverana na pidalonga Yahova kuna Mose. Pyenepi pikhakumbusa Aizraeli kuti nee munthu mʼbodzi wakukhonda tawiriswa, wakuti nee ndi wa dzindza ya Aroni asafunika kufendedza toera kupisa insenso pamaso pa Yahova,+ pontho kuti nee mʼbodzi asafunika kukhala ninga Kora na anyakuphedzera+ ace.

41 Mbwenye mangwana mwace, mbumba yonsene ya Izraeli yatoma kudungunyira Mose na Aroni,+ mbilonga: “Imwe uwiri wanu ndimwe adapha mbumba ya Yahova.” 42 Pidagumanyikana mbumba toera kusandukira Mose na Aroni, iwo ayangʼana ku nsasa wa nsonkhano mbaona kuti khole ikhadaphimbira nsasa, pontho kuti ceza ca mbiri ya Yahova catoma kuoneka.+

43 Mose na Aroni aenda kutsogolo kwa nsasa wa nsonkhano,+ 44 Yahova mbapanga Mose: 45 “Bulukani* pakati pa mbumba ineyi toera ine ndiifudze kabodzi na kabodzi.”+ Penepo iwo agodama mbakotamisa misolo yawo mpaka pantsi.+ 46 Mose apanga Aroni: “Kwata cakuikhira insenso mbuikhamo makala a moto ali pa guwa ya ntsembe,+ ikha insenso mwenemu ndoko mwakucimbiza kuna mbumba kacenesa* madawo awo,+ thangwi Yahova aipirwa. Pontho muliri watoma!” 47 Mwakucimbiza Aroni akwata cakuikhira insenso mwakubverana na pidampanga Mose, athamanga mbapita pakati pa mbumba, mbwenye muliri ukhadatoma pakati pa mbumba. Iye aikha ntsembe* mu cakuikhira insenso, mbatoma kucenesa* madawo a mbumba. 48 Iye apitiriza kulimira pakati pa anthu akufa na amaso, pakumalisa muliri wamala. 49 Anthu adafa na muliri unoyu akhali 14.700, kusiyapo ale adafa thangwi ya Kora. 50 Pakumalisa, pidabwerera Aroni kuna Mose pansuwo wa nsasa wa nsonkhano, muliri ukhadamala.

17 Yahova apanga Mose: 2 “Panga Aizraeli toera abwerese ndodo ya ntsogoleri wa dzindza+ ibodzi na ibodzi, zonsene zisafunika zikhale ndodo 12. Lemba dzina ya mʼbodzi na mʼbodzi pa ndodo yace. 3 Lemba dzina ya Aroni pa ndodo ya dzindza ya Levi, thangwi ntsogoleri wa dzindza ibodzi na ibodzi ali na ndodo ibodzi. 4 Ikha ndodo zenezi mu nsasa wa nsonkhano, kutsogolo kwa Bokosi ya Umboni,+ panaonekera ine kuna imwe+ ndzidzi onsene. 5 Ndodo ya munthu anafuna kusankhula+ ine inadzaphukira, natenepa ndinadzamalisa kudungunya kunacita Aizraeli kuna ine+ na kuna imwe.”+

6 Mose alonga pyenepi kuna Aizraeli. Atsogoleri onsene a madzindza apereka ndodo zawo kuna iye, ntsogoleri wa dzindza ibodzi na ibodzi apereka ndodo ibodzi, zikhali ndodo 12, pontho ndodo ya Aroni ikhali pakati pa ndodo zenezi. 7 Buluka penepo Mose aikha ndodo zenezi pamaso pa Yahova mu nsasa wa Umboni.

8 Mangwana mwace, Mose apita mu nsasa wa Umboni, mbaona kuti ndodo ya Aroni yakuti ikhaimirira dzindza ya Levi ikhadaphukira. Iyo ikhadaphukira mbibuluka maluwa, pontho ikhadabala misapo yakutokota ya amendwa. 9 Penepo Mose akwata ndodo zonsene zikhali pamaso pa Yahova, mbabuluka nazo kunja kuna mbumba ya Izraeli. Iwo aziyangʼana, mʼbodzi na mʼbodzi mbakwata ndodo yace.

10 Penepo Yahova apanga Mose: “Bweza ndodo+ ya Aroni kutsogolo kwa Bokosi ya Umboni toera ikoyiwe ninga cidzindikiro+ kuna anthu anewa akukhonda bvera,+ toera asiye kundidungunyira, pontho toera akhonde kufa.” 11 Mwakucimbiza Mose acita ninga mudampanga Yahova. Iye acita sawasawa ninga mudapangwa iye.

12 Penepo Aizraeli apanga Mose: “Cincino ife tinafa, mwakukhonda penula, ife tinafa, tonsene tinamala kufa! 13 Munthu onsene anafuna kufendedzera tabhernakulo ya Yahova, anafa!+ Mphapo tonsene tisafunika kufa tenepo?”+

18 Buluka penepo Yahova apanga Aroni: “Iwe na anako pabodzi na dzindza yako, ndimwe anafuna kutawirira madodo onsene anafuna kucitwa thangwi ya mbuto yakucena,+ pontho iwe na anako ndimwe anafuna kutawirira madodo onsene a basa ya unyantsembe.+ 2 Cemerambo abale ako a dzindza ya Levi, yakuti ndi dzindza yako, toera abwere kudzakuphedzani, atumikire iwe+ na anako patsogolo pa nsasa wa Umboni.+ 3 Iwo asafunika aphate mabasa anafuna kuapasa imwe na mabasa onsene a pa nsasa+ wa nsonkhano. Mbwenye iwo nee asafunika kufendedzera pyombo pinaphatisirwa pa mbuto yakucena na pa guwa ya ntsembe, toera iwo na imwe mukhonde kufa.+ 4 Iwo anadzaphata basa pabodzi na iwe, mbaphata mabasa awo pa nsasa wa nsonkhano na mabasa onsene pa nsasa unoyu; mbwenye nee munthu mʼbodzi wakukhonda tawiriswa* asafunika kufika dhuzi na imwe.+ 5 Musafunika kuphata mabasa anu pa mbuto yakucena+ na pa guwa ya ntsembe,+ toera ndikhonde kupangiza pontho kuipirwa+ kwanga kuna mbumba ya Izraeli. 6 Ine ndakwata Alevi, akuti ndi abale anu pakati pa Aizraeli mbandiapereka kuna imwe+ ninga miyoni. Iwo ndi anthu adaperekwa kuna Yahova toera aphate mabasa a pa nsasa wa nsonkhano.+ 7 Iwe na anako ndimwe mudapaswa basa ya unyantsembe inacitwa pa guwa ya ntsembe na pinthu piri kuntsi kwa nguwo ikulu,*+ imwe musafunika kuphata basa+ ineyi. Ine ndakupasani basa ya unyantsembe ninga muoni kuna imwe, pontho munthu onsene wakukhonda tawiriswa* angafendedza dhuzi, asafunika kuphiwa.”+

8 Kusiyapo pyenepi, Yahova apanga Aroni: “Ine ndakupasa basa yakuonera pinthu pidapereka Aizraeli kuna ine.+ Pa pinthu pidapereka Aizraeli, khundu+ ibodzi ndaipereka kuna iwe na anako toera ikhale yanu kwenda na kwenda. 9 Iyi inadzakhala khundu yako pakati pa ntsembe zakupiswa pa moto zinaperekwa ninga pinthu pyakucena kakamwe: Ntsembe zonsene zinapereka iwo, kuphatanizambo ntsembe za pyakudya,+ ntsembe toera kulekererwa madawo+ na ntsembe zinafuna kupereka iwo kuna ine thangwi ya mulando.+ Zenezi ndi ntsembe zakucena kakamwe, pontho zinadzakhala zako na za anako. 10 Musafunika kuzidyera+ pa mbuto yakucena kakamwe. Amuna onsene pakati panu anakwanisa kuzidya. Zinadzakhala pinthu pyakucena kuna imwe.+ 11 Pontho ipi ndi pyako: Miyoni inapereka+ Aizraeli pabodzi na ntsembe+ zawo zinaendeswa kutsogolo mbazibwezwa nduli. Ineyi ndi miyoni yanga idapereka ine kuna iwe, kuna anako amuna na akazi, toera ikhale khundu+ yanu kwenda na kwenda. Munthu onsene wakuti ali wakucena panyumba pako, anakwanisa kuidya.+

12 “Pinthu pyonsene pyadidi kakamwe pinapereka iwo kuna Yahova, ninga mafuta adidi kakamwe a azeti, vinyu ipswa yadidi kakamwe na mbeu zadidi,+ ine ndiri kupipereka kuna iwe.+ 13 Misapo yakutoma kutokota inagumanika mu dziko yawo yonsene, yakuti anaibweresa kuna Yahova, inadzakhala yako.+ Munthu onsene wakuti ali wakucena panyumba pako, anakwanisa kuidya.

14 “Pinthu pyonsene pinaperekwa kuna Mulungu* mu Izraeli pisafunika pikhale pyako.+

15 “Ana onsene autombo+ anafuna kupereka iwo kuna Yahova asafunika akhale ako, mwakukhonda tsalakana khala ndi mwana wa munthu peno wa cinyama. Mbwenye iwe usafunika kutawirisa kuti ana autombo a anthu+ na ana akutoma a pinyama pyakukhonda cena, aombolwe.+ 16 Usafunika kutawirisa kuti aombolwe na ntengo wakuombola nawo angakhala na thunga ya mwezi ubodzi kuenda kutsogolo, usafunika ukhale ntengo udakhazikiswa wa masiklo*+ maxanu a parata, mwakubverana na nʼdida wa siklo inaphatisirwa pa mbuto yakucena, yakuti ndi majera 20.* 17 Mbwenye leka kutawirisa kuti mwana wakutoma wa ngʼombe, wa bira na wa bokho aombolwe.+ Pyenepi ndi pyakucena. Ciropa ca pinyama pyenepi usafunika kuciwaza pa guwa ya ntsembe,+ mafuta ace usafunika kuapisa ninga ntsembe yakupiswa pa moto toera akhale khwema yakununkhira kuna* Yahova.+ 18 Nyama za pinyama pyenepi inadzakhala yako. Isafunika ikhale yako+ ninga pinacita iwe na diti inaperekwa ninga ntsembe inaendeswa kutsogolo mbibwezwa nduli pabodzi na mwendo wamadyo wanduli. 19 Pinthu pyonsene pinapereka Aizraeli kuna Yahova+ ninga miyoni yakucena, ndiri kupipereka kuna iwe, kuna anako amuna na akazi toera pikhale khundu+ yanu kwenda na kwenda. Ceneci ndi cibverano munyu,* ca kwenda na kwenda cidacita Yahova kuna iwe na dzindza yako.”

20 Yahova apitiriza kulonga na Aroni: “Mu dziko ya Aizraeli, iwe nee unadzakhala na unthaka, nee khundu ibodzi ya dziko yawo inadzakhala yako.+ Ine ndine khundu yako na unthaka wako pakati pa Aizraeli.+

21 “Bvesera, makhundu onsene acikhumi+ a pinthu pya Aizraeli ine ndiri kuapereka kuna ana a dzindza ya Levi thangwi ya basa inaphata iwo pa nsasa wa nsonkhano. 22 Aizraeli nee asafunikabve kufendedzera nsasa wa nsonkhano, gopa anadzakhala na madawo, mbafa. 23 Alevi ndiwo anafunika kuphata basa ya pa nsasa wa nsonkhano, pontho ndiwo anafuna kutawirira madawo+ a mbumba. Unoyu ndi ntemo wakwenda na kwenda mʼmadzindza mwanu: Alevi nee asafunika kukhala na unthaka pakati pa Aizraeli.+ 24 Thangwi makhundu acikhumi anapereka mbumba ya Izraeli ninga miyoni kuna Yahova, ine ndiri kuapereka kuna Alevi ninga unthaka wawo. Na thangwi ineyi, ine ndaapanga: ‘Iwo nee asafunika kutambira unthaka+ pakati pa Aizraeli.’”

25 Buluka penepo Yahova apanga Mose: 26 “Usafunika kupanga Alevi kuti: ‘Imwe munadzapaswa na Aizraeli makhundu acikhumi adakupasani ine ninga unthaka+ wanu, pontho pa makhundu acikhumi anewa, imwe musafunika kubulusapo khundu yacikhumi mbamuipereka ninga muoni kuna Yahova.+ 27 Iyo inadzaoniwa ninga muoni udapereka imwe, ninga mbeu za pa mbuwa+ yanu, peno ninga vinyu yanu na mafuta anu azeti. 28 Munjira ineyi, imwe munadzaperekambo muoni kuna Yahova pa makhundu onsene acikhumi anapaswa imwe na Aizraeli. Pa makhundu acikhumi anewa musafunika kupereka muoni wa Yahova kuna nyantsembe Aroni. 29 Pa pinthu pyonsene pinapaswa imwe,+ munadzabulusa khundu yadidi kakamwe, ninga cinthu cakucena, mbamuipereka ninga muoni kuna Yahova.’

30 “Usafunikambo kuapanga kuti: ‘Mungamala kupereka khundu yadidi kakamwe ya pinthu pyenepi, pinafuna kusala pinadzaoniwa na imwe Alevi ninga mbeu zanu, vinyu yanu na mafuta anu a azeti. 31 Imwe na anthu a panyumba panu munakwanisa kupidyera pa mbuto yonsene, thangwi unoyu ndi ntengo unatambiriswa imwe pa basa inaphata imwe pa nsasa wa nsonkhano.+ 32 Mungapereka khundu yadidi kakamwe ya miyoni ineyi, nee munadzakhala na madawo thangwi ya miyoni ineyi, pontho lekani kupswipisa pinthu pyakucena pinapereka Aizraeli, gopa munadzafa.’”+

19 Yahova apanga pontho Mose na Aroni: 2 “Uyu ndi ntemo udalonga Yahova: ‘Pangani Aizraeli toera akubweresereni ngʼombe ikazi ya maweya akufuirira, yakusowa cilema+ yakuti cipo yamangirwa goli. 3 Musafunika kuipereka kuna nyantsembe Eleazare toera iye aende nayo kunja kwa misasa, pontho isafunika iphiwe pamaso pace. 4 Buluka penepo nyantsembe Eleazare anadzabvika cala cace mu ciropa ca ngʼombe ineyi, mbaciwaza kanomwe kukhundu ya nsuwo wa nsasa wa nsonkhano.+ 5 Buluka penepo ngʼombe inadzapiswa pamaso pace. Nthembe, nyama, ciropa na matubzwi ace pinadzapiswa.+ 6 Nyantsembe anadzakwata phindi ya muti wa sedhro, nthawi za muti wa isopo+ na usalu wakufuira kakamwe, mbapiponya pa moto unapiswa ngʼombe ineyi. 7 Buluka penepo anadzafula nguwo zace mbasamba, angamala anakwanisa kupita mʼmisasa; mbwenye anapitiriza kukhala wakukhonda cena mpaka dzuwa ingadoka.

8 “‘Ule adapisa ngʼombe ineyi anadzafula nguwo zace mbasamba, pontho anapitiriza kukhala wakukhonda cena mpaka dzuwa ingadoka.

9 “‘Munthu wakuti ali wakucena anadzagumanya madotha a ngʼombe+ ineyi mbaaikha pa mbuto yakucena kunja kwa misasa, mbumba ya Izraeli isafunika kukoya madotha anewa toera kukhunganya nawo madzi anafuna kuphatisirwa toera kucenesa+ nawo. Ineyi ndi ntsembe yakulekererwa madawo. 10 Ule anafuna kugumanya madotha a ngʼombe ineyi, anadzafula nguwo zace mbakhala wakukhonda cena mpaka dzuwa ingadoka.

“‘Unoyu unadzakhala ntemo+ wakwenda na kwenda kuna Aizraeli na munthu wakudza anakhala pakati pawo. 11 Munthu angakhuya manungo a munthu wakufa anadzakhala wakukhonda cena mu ntsiku zinomwe.+ 12 Pa ntsiku yacitatu, iye asafunika aceneseke na madzi akucenesa nawo, natenepa pa ntsiku yacinomwe anadzakhala wakucena. Mbwenye angakhonda kuceneseka pa ntsiku yacitatu, nee anadzakhala wakucena pa ntsiku yacinomwe. 13 Ule anaphata manungo a munthu wakufa mbakhonda kuceneseka, ali kupswipisa tabhernakulo+ ya Yahova, natenepa iye asafunika kuphiwa pakati pa Aizraeli.+ Iye anapitiriza kukhala wakukhonda cena, thangwi nee awazirwa madzi akucenesa+ nawo. Iye anapitiriza na makhaliro ace akukhonda cena.

14 “‘Uyu ndi ntemo unafunika kutowezerwa khala munthu afera mu nsasa: Ule anapita mu nsasa unoyu peno ule wakuti akhali mu nsasa unoyu, anadzakhala wakukhonda cena mu ntsiku zinomwe. 15 Combo consene cakuti cikhali bwandzu, cakuti nee cikhadagudumirwa na mphampha,* cinadzakhala cakukhonda cena.+ 16 Kunja kwa misasa, munthu angakhuya munthu adaphiwa na supada peno manungo a munthu wakufa, gogodo ya munthu wakufa, peno angakhuya nthumbi, anadzakhala wakukhonda cena mu ntsiku zinomwe.+ 17 Toera kucenesa munthu unoyu wakukhonda cena, iwo asafunika akwate pangʼono madotha a ntsembe yakulekererwa madawo idamala kupiswa, aaikhe mu combo, akwate madzi adatungwa pa mbuto yakuwewa mbaaikha mʼmadotha anewa. 18 Munthu+ wakuti ali wakucena asafunika akwate nthawi ya isopo,+ aibvike mʼmadzi anewa mbawazira nsasa na pyombo pyonsene piri mwenemu, kuphatanizambo anthu akhali mwenemu na ule adakhuya gogodo, peno munthu adaphiwa, manungo a munthu wakufa peno nthumbi. 19 Pa ntsiku yacitatu na yacinomwe, munthu wakuti ali wakucena anadzawazira madzi anewa kuna munthu unoyu wakukhonda cena, pontho pa ntsiku yacinomwe+ anadzacenesa madawo a munthu unoyu. Buluka penepo, munthu wakukhonda cena asafunika afule nguwo zace mbasamba, natenepa dzuwa ingadoka iye anadzakhala wakucena.

20 “‘Mbwenye munthu wakukhonda cena angakhonda kuceneseka, asafunika kuphiwa pakati pa mbumba,*+ thangwi iye apswipisa mbuto yakucena ya Yahova. Nakuti iye nee awazirwa madzi akucenesa nawo, iye ndi wakukhonda cena.

21 “‘Unoyu unadzakhala ntemo wakwenda na kwenda kuna imwe: Ule anafuna kuwazira ndzace madzi akucenesa+ nawo, asafunika afule nguwo zace, pontho ule anafuna kukhuya madzi akucenesa nawo anadzakhala wakukhonda cena mpaka dzuwa ingadoka. 22 Cinthu consene cinafuna kuphata munthu wakukhonda cena, cinadzakhala cakukhonda cena, pontho munthu anafuna kuphata cinthu ceneci anadzakhala wakukhonda cena mpaka dzuwa ingadoka.’”+

20 Pa mwezi wakutoma, mbumba yonsene ya Izraeli yafika kuthando ya Zini, iwo atoma kukhala ku Kadhesi.+ Kweneko ndiko kudafa Miriya,+ mbaikhwa munthumbi.

2 Mbuto ineyi nee ikhali na madzi, natenepa mbumba+ yagumanyikana toera kudungunyira Mose na Aroni. 3 Mbumba ikhaketesana na Mose+ mbilonga: “Mbapidakhala mwadidi mbatidafa pyathu pa ndzidzi udafa abale athu pamaso pa Yahova! 4 Thangwi yanji mwabweresa mbumba* ya Yahova nʼthando ino, toera ife na pifuyo pyathu tife kuno?+ 5 Thangwi yanji mwatibulusa mu dziko ya Ejitu mbamutibweresa pa mbuto+ ino yakuipa kakamwe? Ino nee ndi mbuto yakuti tinakwanisa kubzwala mbeu, pontho nkhabepo masambvu, miti ya mauva, miti ya misapo ya romaa, nee madzi toera timwe.”+ 6 Penepo Mose na Aroni abuluka pamaso pa mbumba mbaenda pansuwo wa nsasa wa nsonkhano, iwo agodama mbakotamisa misolo yawo mpaka pantsi, penepo ceza ca mbiri ya Yahova catoma kuoneka pana iwo.+

7 Yahova apanga Mose: 8 “Kwata ndodo mbugumanya mbumba, iwe na mʼbale wako Aroni pangani mwala pamaso pa mbumba toera madzi abuluke pamwala unoyu; imwe munadzabulusa madzi pamwala, mbamupasa mbumba toera imwe+ pabodzi na pifuyo pyawo.”

9 Natenepa Mose akwata ndodo ikhali pamaso pa Yahova,+ ninga mudapangwa iye. 10 Penepo Mose na Aroni acemera mbumba toera igumanyikane patsogolo pamwala, mbaapanga: “Bveserani imwe anthu akukhonda bvera! Musafuna tikubulusireni madzi pamwala+ uyu?” 11 Natenepa Mose athukula nkono wace, amenya kawiri mwala unoyu na ndodo yace, penepo atoma kubuluka madzi mazinji, mbumba na pifuyo pyawo mbatoma kumwa.+

12 Mukupita kwa ndzidzi, Yahova apanga Mose na Aroni: “Nakuti imwe nee mwapangiza cikhulupiro kuna ine, pontho nee mwandipasa mbiri* pamaso pa mbumba ya Izraeli, imwe nee munadzapitisa mbumba iyi mu dziko inafuna kuapasa+ ine.” 13 Anewa ndi madzi a ku Meribha,*+ pa mbuto yakuti Aizraeli alongezana na Yahova, Mulungu mbapangiza kuti iye ndi wakucena.

14 Buluka penepo, Mose atuma anthu buluka ku Kadhesi toera aende kapanga mambo wa ku Edhomi+ kuti: “Ipi ndipyo pidalonga abale anu Aizraeli:+ ‘Imwe musadziwa mwadidi nyatwa zonsene zidatamba ife. 15 Ambuyathu aenda ku Ejitu,+ pontho ife takhala mu Ejitu mu pyaka+ pizinji;* Aejitu athabusa* ife na ambuyathu.+ 16 Pakumalisa, ife talirira Yahova.+ Iye atibvesera mbatuma anju+ wace adatibulusa mu Ejitu; cincino ife tiri kuno ku Kadhesi, nzinda wakuti usacita madire na cisa canu. 17 Taphata miyendo, tisiyeni tipite na mu dziko yanu. Nee tinapita na mʼminda idamala imwe kubzwala peno mʼminda yanu ya mauva, pontho nee tinamwa madzi a mʼmicera yanu. Tinapita na mu Nseu Ukulu,* mbatikhonda kupeuka kukhundu yamadyo peno kukhundu yabzwere mpaka tingapiringana cisa+ canu.’”

18 Mbwenye mambo wa ku Edhomi alonga: “Lekani kupita na mucisa cathu. Thangwi mungapita na kuno, ndinabwera kudzamenyana na imwe na supada.” 19 Mbwenye Aizraeli antawira: “Ife tinapita na mu nseu, ife na pifuyo pyathu tingamwa madzi anu tinaalipa.+ Nkhabe cinango cinafuna ife, basi ene tisafuna tipite na miyendo.”+ 20 Ngakhale tenepo, iye alonga: “Lekani kupita na kuno.”+ Penepo mambo wa ku Edhomi aenda kuna iwo na nsoka ukulu wa anyankhondo amphambvu. 21 Natenepa, mambo wa ku Edhomi nee atawirisa kuti Aizraeli apite na mucisa cace. Na thangwi ineyi, Aizraeli acalira kupita na kweneko.+

22 Mbumba yonsene ya Izraeli yabuluka ku Kadhesi mbifika Kuphiri ya Ori.+ 23 Penepo Yahova apanga Mose na Aroni Paphiri ya Ori mʼmadire a dziko ya Edhomi: 24 “Aroni anadzafa mbaikhwa munthumbi ninga pidacitwa ambuyace.+ Iye nkhabe kudzapita mu dziko inafuna kupasa ine Aizraeli, thangwi imwe uwiri wanu nee mwabvera ntemo wanga pa madzi a ku Meribha.+ 25 Kwata Aroni na mwanace Eleazare ukwire nawo Paphiri ya Ori. 26 Dulisa Aroni nguwo+ zace za unyantsembe, mbuzibvazika mwanace Eleazare;+ Aroni anadzafa penepo.”

27 Natenepa, Mose acita ninga mudapangwa iye na Yahova, iwo akwira Phiri ya Ori pamaso pa mbumba yonsene. 28 Penepo Mose adulisa Aroni nguwo zace za unyantsembe mbazibvazika mwanace Eleazare. Aroni afa pa ntsonga ya phiri+ ineyi. Buluka penepo, Mose na Eleazare atcita paphiri. 29 Mbumba yonsene pidaona iyo kuti Aroni afa, Aizraeli onsene alira Aroni mu ntsiku 30.+

21 Mambo wa Akanani wa ku Aradhi,+ wakuti akakhala ku Nejebhu, abva kuti Aizraeli akhabwera na njira ya ku Atarimu, penepo iye aenda kamenyana na Aizraeli, iye aphata anthu angasi mbaenda nawo ku dziko yace. 2 Natenepa Aizraeli acita pikiro kuna Yahova: “Mungapereka mbumba ineyi mʼmanja mwathu, mwakukhonda penula, ife tinadzafudza mizinda yawo.” 3 Penepo Yahova abva phembo ya Aizraeli, mbapereka Akanani mʼmanja mwawo. Aizraeli afudza mbumba ineyi pabodzi na mizinda yawo. Na thangwi ineyi, cisa ceneci acithula Orma.*+

4 Pikhapitiriza iwo na ulendo wawo buluka Kuphiri ya Ori,+ mbapita na njira ya Bara Yakufuira toera kucalira dziko ya Edhomi,+ mbumba yaneta na ulendo. 5 Mbumba yapitiriza kudungunyira Mulungu na Mose,+ mbilonga: “Thangwi yanji mwatibulusa mu dziko ya Ejitu toera tifere nʼthando? Pano nkhabe cakudya nee madzi,+ pontho ife taneta* na cakudya+ ceneci cakupwazika.” 6 Penepo Yahova atumiza nyoka pakati pa mbumba, nyoka zapitiriza kuluma anthu, na thangwi ineyi Aizraeli azinji afa.+

7 Natenepa mbumba yaenda kuna Mose, mbilonga: “Tadawa pidadungunyira ife Yahova na iwe.+ Dembetera Yahova toera abuluse nyoka zenezi pakati pathu.” Penepo Mose adembetera kuna Mulungu thangwi ya mbumba.+ 8 Natenepa, Yahova apanga Mose: “Cita cinthu cakulandana* na nyoka yakugopswa,* mbuimanika pamuti. Penepo munthu angalumwa, anadzayangʼana nyoka ineyi toera apitirize kukhala na umaso.” 9 Penepo pene Mose acita nyoka ya nkuwa,+ mbaimanika pamuti,+ ndzidzi onsene ukhalumwa munthu na nyoka mbayangʼana nyoka ya nkuwa, iye akhapulumuka.+

10 Mukupita kwa ndzidzi, Aizraeli abuluka kweneko, mbamanga misasa yawo ku Obhoti.+ 11 Iwo abuluka ku Obhoti mbamanga misasa yawo ku Ije-Abharimu,+ nʼthando inagumanika kutsogolo kwa Moabhe, kumabulukiro a dzuwa. 12 Pidabuluka iwo kweneko aenda kamanga misasa yawo dhuzi na Gowa* ya Zeredhi.+ 13 Iwo abuluka kweneko mbamanga misasa yawo kucisa ca Arnoni,+ cinagumanika nʼthando inatomera kumadire a dziko ya Aamori, thangwi cisa ca Arnoni ndi madire a cisa ca Moabhe, cisagumanika pakati pa Moabhe na Amori. 14 Na thangwi ineyi, bukhu ya Nkhondo za Yahova isalonga kuti: “Vaebhi ku Sufa, magowa* a Arnoni, 15 materero a magowa* anatcitira ku nzinda wa Ari, unagumanika kumadire a Moabhe.”

16 Buluka penepo iwo aenda ku Bheeri. Kweneko ndiko kukhali ncera udalonga Yahova kuna Mose kuti: “Gumanya mbumba toera ndiipase madzi.”

17 Pa ndzidzi unoyu, Aizraeli aimba nyimbo iyi:

“Bulusa madzi, iwe ncera! Ntawireni!*

Penepo iwo abuluka mbaenda ku Matana, 19 pidabuluka iwo ku Matana aenda ku Naaliyeli, pidabuluka iwo ku Naaliyeli aenda ku Bhamoti.+ 20 Iwo abuluka ku Bhamoti mbaenda ku gowa inagumanika kucisa ca Moabhe,+ padzulu pa nthunda ya Pisga,+ kwakuti munthu anakwanisa kuona cisa ca Yesimoni.*+

21 Aizraeli atumiza mphangwa kuna Sihoni mambo wa Aamori, mbalonga:+ 22 “Tisiyeni tipite na mu dziko yanu. Nee tinapita na mʼminda idamala imwe kubzwala peno mʼminda yanu ya mauva. Nee tinamwa madzi a mʼmicera yanu. Tinapita na mu Nseu Ukulu,* mpaka kupiringana cisa+ canu.” 23 Mbwenye Sihoni nee atawirisa kuti Aizraeli apite na mucisa cace. Iye agumanya anyankhondo ace onsene mbaenda kamenyana na Aizraeli nʼthando. Pidafika iye ku Yaazi, atoma kumenyana na Aizraeli.+ 24 Mbwenye Aizraeli ankunda na supada,+ mbakwata dziko+ yace, kutomera ku Arnoni+ mpaka ku Yaboki,+ cifupi na Aamoni, thangwi cisa ca Yazeri+ cikhacita madire na cisa ca Aamoni.+

25 Natenepa, Aizraeli akwata mizinda yonsene mbatoma kukhala mʼmizinda yonsene ya Aamori+ kuphatanizambo Esibhoni na mizinda yonsene ikhali nʼkhundu mwace. 26 Thangwi Esibhoni ukhali nzinda wa Sihoni mambo wa Aamori, adamenyana na mambo wa Moabhe, mbakwata dziko yace yonsene mpaka ku Arnoni. 27 Ndi pyenepi pidatomesa nsangani uyu wakupwaza nawo:

“Bwerani ku Esibhoni.

Nzinda wa Sihoni mbumangwe, pontho mbukhazikike mwakuwanga.

28 Thangwi ku Esibhoni kwabuluka moto; mu nzinda wa Sihoni mwabuluka malirimi a moto.

Mbufudza nzinda wa Ari ku Moabhe, wafudza anaciro a nthunda za cisa ca Arnoni.

Anace amuna anaaona mbakathawa mu dziko, anace akazi mbakwatwa toera aperekwe kuna Sihoni mambo wa Aamori.

31 Natenepa, Aizraeli atoma kukhala mu dziko ya Aamori. 32 Kweneko Mose atuma amuna toera aende kaona cisa ca Yazeri.+ Aizraeli akunda mizinda ya nʼkhundu mwa nzinda unoyu, mbathamangisa Aamori akhali kweneko. 33 Buluka penepo, iwo azungunuka, mbakwira na Njira ya ku Bhasani. Penepo Ogi+ mambo wa ku Bhasani abwera na anyankhondo ace onsene toera kumenyana na iwo ku Edhirei.+ 34 Yahova apanga Mose: “Leka kunʼgopa,+ thangwi ine ndinampereka mʼmanja+ mwako pabodzi na mbumba yace yonsene na dziko yace. Iwe unadzacita kuna iye pire pidacita iwe kuna Sihoni mambo wa Aamori, wakuti akakhala ku Esibhoni.”+ 35 Pakumalisa, Aizraeli apha iye na anace pabodzi na mbumba yace yonsene, mpaka kumala onsene, mbakhonda kusala munthu adapulumuka,+ natenepa iwo akwata dziko+ yace.

22 Aizraeli abuluka pa mbuto ineyi mbaenda kamanga misasa yawo nʼthando ya Moabhe kukhundu ya Yordani kutsogolo kwa Yeriko.+ 2 Bhalaki+ mwana wa Zipori, abva pinthu pyonsene pikhadacita Aizraeli kuna Aamori, 3 natenepa Amoabhe agopa kakamwe Aizraeli, thangwi iwo akhali azinji; inde, Amoabhe agopa kakamwe Aizraeli.+ 4 Amoabhe apanga akulu a ku Midhiyani:+ “Mbumba* iyi inadzafudza pinthu pyathu pyonsene ninga ngʼombe ingadya tsanga.”

Mu ndzidzi unoyu Bhalaki mwana wa Zipori akhali mambo wa ku Moabhe. 5 Iye atuma anthu toera aende kapange Bhalamu mwana wa Bheori ku Petori,+ cisa cinagumanika cifupi na Nkulo wa Eufrate, kuti: “Kuno kwafika mbumba idabuluka ku dziko ya Ejitu. Iwo adzala konsene kwene mu dziko+ ino, pontho ali kukhala dhuzi kakamwe na cisa canga. 6 Cincino ndaphata miyendo, bwera kuno toera undipasire+ dzedze anthu awa, thangwi iwo ndi amphambvu kakamwe kupiringana ine. Panango ndinakwanisa kuakunda mbandiathamangisa mu dziko ino, thangwi ine ndisadziwa mwadidi kuti munthu anapasa iwe nkhombo asapaswa nkhombo, ule anapasa iwe dzedze asapaswa dzedze.”

7 Natenepa akulu a ku Moabhe na akulu a ku Midhiyani akwata ntengo wakulipa nawo pyakulotera, mbaenda kuna Bhalamu,+ pidafika iwo ampanga mphangwa za Bhalaki. 8 Penepo Bhalamu aapanga: “Gonani pano masiku ano, buluka penepo ndinakudziwisani pinafuna kundipanga Yahova.” Natenepa akulu a ku Moabhe akhala pabodzi na Bhalamu.

9 Mulungu aonekera kuna Bhalamu mbambvundza:+ “Mbani amuna anewa ali na iwe?” 10 Bhalamu atawira Mulungu wandimomwene: “Bhalaki mwana wa Zipori mambo wa ku Moabhe, anditumizira mphangwa, mbalonga kuti: 11 ‘Kuno kwafika anthu adabuluka ku dziko ya Ejitu, iwo adzala konsene kwene mu dziko ino. Cincino bwera kuno toera undipasire+ dzedze anthu awa. Panango ndinakwanisa kumenyana nawo mbandiathamangisa.’” 12 Mbwenye Mulungu apanga Bhalamu: “Leka kuenda pabodzi na iwo. Leka kupasa dzedze mbumba ineyi, thangwi ndi mbumba idapaswa nkhombo.”+

13 Mangwana mwace namacibese, Bhalamu alamuka mbapanga akulu adatumwa na Bhalaki: “Bwererani ku dziko yanu, thangwi Yahova nee anditawirisa toera ndiende pabodzi na imwe.” 14 Natenepa akulu a ku Moabhe abuluka, iwo abwerera kuna Bhalaki mbampanga: “Bhalamu akhonda kubwera pabodzi na ife.”

15 Natenepa Bhalaki atuma pontho akulu anango azinji akuti akhali akulemedzeka kakamwe kupiringana akutoma. 16 Iwo aenda kuna Bhalamu mbampanga: “Ipi ndipyo pidalonga Bhalaki mwana wa Zipori: ‘Ndaphata miyendo, leka kutawirisa nee cinthu cibodzi cikupingize kubwera kuna ine. 17 Thangwi ine ndinadzakulemedza kakamwe,* pontho ndinacita pinthu pyonsene pinafuna kundipanga iwe. Ndaphata miyendo, bwera upase dzedze mbumba ineyi.’” 18 Mbwenye Bhalamu apanga atumiki a Bhalaki: “Maseze Bhalaki andipase nyumba yace yakudzala na parata na ouro, ine nee ndinacita cinthu cinango cikulu+ peno cingʼono cakusiyana na pinafuna kundipanga Yahova Mulungu wanga. 19 Mbwenye ndaphata miyendo, ndisaphemba kuti imwe mugonembo pano toera ndibve kuti ninji pontho pinafuna kundipanga+ Yahova.”

20 Mulungu aonekera kuna Bhalamu namasiku mbampanga: “Khala amuna anewa abwera kudzakucemera, ndoko pabodzi na iwo. Mbwenye basi ene usafunika kulonga pire pinafuna kukupanga+ ine.” 21 Mangwana mwace namacibese Bhalamu alamuka, akhunganya buru yace* mbaenda pabodzi na akulu a ku Moabhe.+

22 Mbwenye Mulungu aipirwa thangwi iye akhaenda, natenepa anju wa Yahova alimira pa nseu toera kunʼkhondesa. Bhalamu akhali pa buru yace, pontho atumiki ace awiri akhaenda pabodzi na iye. 23 Buru yaona anju wa Yahova wakuti akhadalimira mu nseu mbaphatira supada mʼmanja mwace. Penepo buru yayesera kubuluka mu nseu mbipita ntsanga. Mbwenye Bhalamu atoma kuimenya toera ibwerere pontho mu nseu. 24 Penepo anju wa Yahova aenda kalimira panjira ingʼono yakuti ikhapita na pakati pa miti miwiri ya mauva, mʼmakhundu mawiri ene mukhali na mipanda ya miyala. 25 Buru pidaona iyo anju wa Yahova, yatoma kutsamira mpanda, mwendo wa Bhalamu mbupfinyika na mpanda; penepo Bhalamu atoma kuimenya pontho.

26 Natenepa anju wa Yahova aenda kutsogolo kwawo, pa mbuto ingʼono, yakuti nee mbapidakwanisika kupeuka kukhundu yamadyo peno khundu yabzwere. 27 Buru pidaona iyo anju wa Yahova, yagona pantsi, penepo Bhalamu aipirwa kakamwe mbapitiriza kumenya buru na ndodo yace. 28 Pakumalisa, Yahova acitisa kuti buru ilonge,+ natenepa iyo yabvundza Bhalamu: “Ninji pidakucitirani ine toera mundimenye katatu?”+ 29 Bhalamu atawira buru: “Thangwi iwe wandikupwisa.* Mbidakhala na supada mʼmanja mwanga mbidakupha!” 30 Buru yabvundza Bhalamu: “Kodi nee ndine buru yanu inakwira imwe ndzidzi onsene mpaka lero? Kodi ine ndakucitirani kale pyenepi?” Bhalamu atawira: “Nkhabe!” 31 Buluka penepo Yahova afungula maso+ a Bhalamu, mbaona anju wa Yahova wakuti akhadalimira mu nseu na supada mʼmanja mwace. Penepo pene Bhalamu agodama mbakotamisa nsolo wace mpaka pantsi.

32 Natenepa anju wa Yahova ampanga: “Thangwi yanji wamenya buru yako katatu? Bvesera! Ine ndabwera kudzakupingiza, thangwi njira yako ndi yakusiyana* na pinafuna+ ine. 33 Buru yandiona mbiyesera kupeuka katatu.+ Mbidakhonda kupeuka pana ine, ninji pikhafuna kucitika? Pa ndzidzi uno mbandidakupha kale mbandisiya buru na umaso.” 34 Bhalamu apanga anju wa Yahova: “Ndadawa thangwi nee ndikhadziwa kuti imwe mwalimira mu nseu toera kuonana na ine. Cincino khala ndi pyakuipa pamaso panu kuti ine ndiende na amuna awa, ndinabwerera.” 35 Mbwenye anju wa Yahova apanga Bhalamu: “Ndoko pabodzi na amuna anewa, mbwenye basi ene usafunika kulonga pire pinafuna kukupanga ine.” Natenepa Bhalamu apitiriza na ulendo wace pabodzi na akulu adatumwa na Bhalaki.

36 Bhalaki pidabva iye kuti Bhalamu afika, mwakucimbiza aenda kaonana naye ku nzinda wa Moabhe, unagumanika nʼkhundu mwa gowa ya Arnoni mʼmadire a nzinda wa Moabhe. 37 Bhalaki abvundza Bhalamu: “Kodi ine nee ndakucemeresa? Thangwi yanji nee wabwera? Ukhanyerezera kuti nee mbidakwanisa kukulemedza kakamwe?”*+ 38 Bhalamu atawira Bhalaki: “Cincino ine ndabwera, ndiri pano pamaso panu. Mbwenye nee ndinalonga pinthu pya munsolo mwanga. Basi ene ndinalonga pire pinafuna kundipanga+ Mulungu.”*

39 Natenepa Bhalamu aenda pabodzi na Bhalaki, mbafika ku Kiriyati-Uzoti. 40 Bhalaki apha ngʼombe na mabira mbatumiza mapindi anango kuna Bhalamu na akulu akhali pabodzi na iye. 41 Mangwana mwace namacibese, Bhalaki akwata Bhalamu mbakwira naye pa Bhamoti-Bhaale.* Na pa mbuto ineyi, Bhalamu mbadakwanisa kuona mbumba+ yonsene ya Izraeli.

23 Penepo Bhalamu apanga Bhalaki: “Sasanya pano maguwa+ manomwe, mbundikhunganyira ngʼombe zinomwe na mabira manomwe.” 2 Penepo pene Bhalaki acita pidalonga Bhalamu. Bhalaki na Bhalamu apereka ngʼombe na bira pa guwa ya ntsembe+ ibodzi na ibodzi. 3 Buluka penepo, Bhalamu apanga Bhalaki: “Sala pano dhuzi na ntsembe yako yakupiswa, ine ndiri kuenda kule. Panango Yahova analonga na ine. Ndinakudziwisa pyonsene pinafuna kundipanga iye.” Natenepa iye akwira pa nthunda yakuti nee ikhali na miti.

4 Penepo Mulungu aonekera kuna Bhalamu,+ iye apanga Mulungu: “Ine ndasasanya maguwa manomwe mbandipereka ntsembe ya ngʼombe na ya bira pa guwa ibodzi na ibodzi.” 5 Yahova aikha mafalace pamulomo wa Bhalamu,+ mbampanga: “Bwerera kuna Bhalaki, ipi ndipyo pinafunika iwe kumpanga.” 6 Natenepa iye abwerera mbaona kuti Bhalaki na akulu onsene a ku Moabhe akhali dhuzi na ntsembe yace yakupiswa. 7 Penepo iye alonga mafala awa:+

‘Bwera undipasire dzedze* Yakobe.

Inde, bwera usandike Izraeli.’+

 8 Ndinapasa tani dzedze anthu adakhonda kupaswa dzedze na Mulungu?

Ndinasandika tani anthu adakhonda kusandikwa+ na Yahova?

11 Penepo Bhalaki apanga Bhalamu: “Ninji pidandicitira iwe? Ine ndakubweresa kuno toera upase dzedze anyamalwa anga, mbwenye basi ene iwe waapasa+ nkhombo.” 12 Iye atawira: “Kodi nee ndisafunika kulonga basi ene pire pidaikha Yahova pamulomo+ panga?”

13 Bhalaki ampanga: “Ndaphata miyendo, tende pabodzi pa mbuto inango yakuti unakwanisa kuaona na penepo. Unaona khundu ibodzi basi ya mbumba ineyi; nee unaona yonsene. Apase dzedze na penepo.”+ 14 Bhalaki ankwata mbaenda naye ku Zofimu, pa ntsonga ya Phiri ya Pisga.+ Iye asasanya maguwa manomwe mbapereka ntsembe ya ngʼombe na ya bira pa guwa+ ibodzi na ibodzi. 15 Penepo Bhalamu apanga Bhalaki: “Sala pano dhuzi na ntsembe yako yakupiswa, ine ndiri kuenda kule kalonga na Mulungu.” 16 Yahova alonga na Bhalamu mbaikha mafala awa pamulomo+ pace: “Bwerera kuna Bhalaki, ipi ndipyo pinafunika iwe kumpanga.” 17 Iye abwerera kuna Bhalaki mbaona kuti iye akhadikhira dhuzi na ntsembe yace yakupiswa, pontho akulu a ku Moabhe akhali pabodzi na iye. Bhalaki ambvundza: “Ninji pidalonga Yahova?” 18 Penepo Bhalamu alonga mafala awa:+

“Lamuka Bhalaki, bvesera.

Ndibvesere, iwe mwana wa Zipori.

Kodi iye angalonga cinthu, nee asacicita?

Iye angalonga, kodi nee asacita pidalonga+ iye?

22 Mulungu ali kuabweresa buluka ku Ejitu.+

Iye ndi ninga nyanga za nyati* kuna iwo.+

Pa ndzidzi uno anthu anakwanisa kulonga kuna Yakobe na Izraeli:

‘Onani pinthu pidacita Mulungu!’

25 Penepo Bhalaki apanga Bhalamu: “Khala wacimwana kuapasa dzedze, nee usafunikambo kuapasa nkhombo.” 26 Bhalamu apanga Bhalaki: “Kodi ine nee ndakupanga kuti ‘ndinadzacita pinthu pyonsene pinafuna kulonga+ Yahova’?”

27 Bhalaki apanga Bhalamu: “Ndaphata miyendo, tende pontho ku mbuto inango. Panango kweneko+ Mulungu wandimomwene anaona kuti mphyadidi undipasire dzedze mbumba ineyi.” 28 Penepo Bhalaki akwata Bhalamu mbaenda naye pa ntsonga ya Phiri ya Peori, pakuti na penepo mbadakwanisa kuona ku Yesimoni.*+ 29 Bhalamu apanga Bhalaki: “Sasanya pano maguwa manomwe, mbundikhunganyira+ ngʼombe zinomwe na mabira manomwe.” 30 Natenepa Bhalaki acita ninga mudapangwa iye na Bhalamu, mbapereka ngʼombe na bira pa guwa ya ntsembe ibodzi na ibodzi.

24 Bhalamu pidaona iye kuti Yahova akhakomerwa kupasa nkhombo Aizraeli, nee asakabve pinthu* pinango toera kupasa dzedze,+ mbwenye azungunuka mbayangʼana kuthando. 2 Bhalamu pidalamusa iye maso ace mbaona Aizraeli akhali mʼmisasa yawo mwakubverana na madzindza+ awo, penepo nzimu wa Mulungu wapita muna iye.+ 3 Natenepa iye alonga mafala awa:+

Adagwa pantsi mu ndzidzi wakuti maso ace akhali akufunguka:+

10 Penepo Bhalaki aipirwa kakamwe na Bhalamu. Bhalaki aimba manja mwakupwaza, mbapanga Bhalamu: “Ine ndakucemera+ toera upase dzedze anyamalwa anga, mbwenye nkhabe cidacita iwe, mpaka pano waapasa nkhombo katatu. 11 Cincino ndoko pyako kunyumba kwako. Ine ndikhafuna kukulemedza kakamwe,+ mbwenye Yahova akukhondera cilemedzo.”

12 Bhalamu apanga Bhalaki: “Ine ndapanga kale anthu adatuma iwe kuti: 13 ‘Maseze Bhalaki andipase nyumba yace yakudzala na parata na ouro, ine nee mbidacita cinthu cinafuna ine,* cadidi peno cakuipa, cakuti ndi cakusiyana na pidalonga Yahova. Basi ene ndinalonga pire pinandipanga+ Yahova.’ 14 Cincino, ine ndiri kuenda kuna mbumba yanga. Mbwenye mbandidzati kuenda, ndisafuna ndikudziwise pinafuna kucita anthu anewa kuna mbumba yako ntsogolo.”* 15 Natenepa iye alonga mafala awa:+

20 Pidaona iye Amaleki, Bhalamu apitiriza kulonga mafalace:

21 Pidaona iye Akeneu,+ iye apitiriza kulonga mafalace:

“Mbuto inakhala iwe ndi yakutsidzikizika, pontho yamangwa mwakuwanga pamwala.

22 Mbwenye alipo anafuna kudzapisa Akeneu na moto.

Kodi Asirya anakuendesani lini ku ubitcu?”

23 Iye apitiriza kulonga mafalace:

“Mama ine pano! Mbani anafuna kupulumuka Mulungu angacita pyenepi?

Mbwenye iyembo anadzafudzwa, mbamaliratu.”

25 Bhalamu+ abuluka penepo mbabwerera pyace. Bhalaki aendambo pyace.

25 Aizraeli pikakhala iwo ku Sitimu,+ mbumba yatoma kucita ulukwali* na akazi a ku Moabhe.+ 2 Akazi anewa acemera mbumba toera iende pabodzi na iwo kapereka ntsembe kuna alungu+ awo; mbumba yatoma kudya ntsembe zenezi, mbigodamira alungu+ awo. 3 Natenepa Aizraeli atoma* kulambira Bhaale wa ku Peori,+ Yahova mbaipirwa na Aizraeli. 4 Yahova apanga Mose: “Gumanya atsogoleri* onsene a mbumba iyi, aphe, buluka penepo manika manungo awo camasikati pamaso pa Yahova, toera Yahova akhonde kupitiriza kupangiza ukali wace kuna Aizraeli.” 5 Penepo Mose apanga atongi a Izraeli:+ “Mʼbodzi na mʼbodzi wa imwe asafunika aphe amuna adalambira Bhaale wa ku Peori.”+

6 Mbwenye pa ndzidzi unoyu, mʼbodzi wa Izraeli abwera na nkazi+ wa dzindza ya Amidhiyani mbapita naye na pakati pa abale ace, pamaso pa Mose na mbumba yonsene ya Aizraeli, mu ndzidzi wakuti iwo akhalira cifupi na nsuwo wa nsasa wa nsonkhano. 7 Fineya+ mwana wa Eleazare, ndzukulu wa nyantsembe Aroni pidaona iye pyenepi, alamuka mwakucimbiza pakati pa mbumba mbakwata dipa* mʼmanja mwace. 8 Iye atowerera mamuna wa dzindza ya Izraeli mu nsasa, mbaalasa uwiri wawo ene. Pidalasa iye mamuna wa dzindza ya Izraeli, dipa yapita na kumaso* kwa nkazi unoyu. Penepo pene muliri wamala+ pakati pa Izraeli. 9 Anthu adafa na muliri unoyu akhali 24.000.+

10 Penepo Yahova apanga Mose: 11 “Fineya+ mwana wa Eleazare, ndzukulu wa nyantsembe Aroni amalisa ukali wanga pakati pa mbumba ya Izraeli, thangwi iye nee atawirisa kuti mbumba ikhale yakukhonda kukhulupirika kuna* ine pakati pawo.+ Natenepa ine nee ndafudza Aizraeli mpaka kuamalisa, maseze ndisaphemba kuti anthu alambire ine basi.+ 12 Na thangwi ineyi, mpange kuti: ‘Ine ndiri kukhazikisa na iye cibverano canga ca ntendere. 13 Ceneci cinadzakhala cibverano ca unyantsembe wakwenda na kwenda kuna iye na dzindza yace,+ thangwi iye nee atawirisa kuti anthu akhale akukhonda khulupirika kuna Mulungu+ wace, mbacenesa* madawo a mbumba ya Izraeli.’”

14 Mamuna wa dzindza ya Izraeli adaphiwa pabodzi na nkazi wa dzindza ya Amidhiyani akhacemerwa Zinri, mwana wa Salu, ntsogoleri wa mbumba ibodzi ya dzindza ya Simeoni. 15 Nkazi wa dzindza ya Amidhiyani adaphiwa akhacemerwa Kozibhi, mwana wa Zuri;+ wakuti akhali ntsogoleri wa dzindza ibodzi ya Amidhiyani.+

16 Mukupita kwa ndzidzi Yahova apanga Mose: 17 “Tcunyusani Amidhiyani mbamuapha,+ 18 thangwi iwo akuonesani nyatwa pidakunyengererani iwo toera kucita madawo ku Peori,+ pontho thangwi ya Kozibhi mʼbale wawo wankazi, wakuti ndi mwana wa ntsogoleri wa dzindza ibodzi ya Amidhiyani adaphiwa+ pa ntsiku idaoneka muliri thangwi ya pidacitika ku Peori.”+

26 Pidamala muliri,+ Yahova apanga Mose na Eleazare mwana wa nyantsembe Aroni: 2 “Lemberani mbumba yonsene ya Izraeli, onsene akuti ali na pyaka 20 kuenda kutsogolo mwakubverana na madzindza awo, ale akuti anathema toera kupita mu nsoka wa anyankhondo a Aizraeli.”+ 3 Natenepa Mose na nyantsembe Eleazare+ alonga na mbumba nʼthando ya Moabhe+ ku Yordani cifupi na Yeriko,+ mbaapanga: 4 “Lemberani anthu onsene ali na pyaka 20 kuenda kutsogolo, mwakubverana na pidalonga Yahova kuna Mose.”+

Ana a Izraeli adabuluka ku dziko ya Ejitu akhali awa: 5 Rubheni+ mwana wakutoma* wa Izraeli. Awa akhali ana+ a Rubheni: Anoki abala dzindza ya Anoki; Palu abala dzindza ya Apalu; 6 Ezironi abala dzindza ya Azironi; Karmi abala dzindza ya Akarmi. 7 Anewa akhali a dzindza ya Rubheni, amuna onsene adalemberwa akhali 43.730.+

8 Mwana wa Palu akhali Eliabhe. 9 Ana a Eliabhe akhali Nemuweli, Dhatani na Abhironi. Dhatani na Abhironi akhali amuna adasankhulwa pakati pa mbumba; iwo ndiwo adathimbana na Mose+ pabodzi na Aroni, mbakhala mu nsoka+ wa Kora pidathimbana iwo na Yahova.+

10 Penepo mataka afunguka mbaameza onsene. Kora afa pabodzi na ale akhamʼphedzera pidabwera moto mbupisa amuna+ 250. Natenepa iwo adzakhala cenjezo+ kuna anango. 11 Mbwenye ana a Kora nee afa.+

12 Ana a Simeoni+ mwakubverana na mabanja awo ndi awa: Nemuweli abala dzindza ya Anemuweli; Yamini abala dzindza ya Ayamini; Yakini abala dzindza ya Ayakini; 13 Zera abala dzindza ya Azera; Sauli abala dzindza ya Sauli. 14 Anewa ndiwo adalemberwa mu dzindza ya Simeoni, onsene akhali 22.200.+

15 Ana a Gadhi+ mwakubverana na mabanja awo ndi awa: Zefoni abala dzindza ya Azefoni; Adji abala dzindza ya Adji; Suni abala dzindza ya Asuni; 16 Ozini abala dzindza ya Aozini; Eri abala dzindza ya Aeri; 17 Arodhi abala dzindza ya Arodhi; Areli abala dzindza ya Areli. 18 Anewa akhali a dzindza ya Gadhi, amuna onsene adalemberwa akhali 40.500.+

19 Ana a Yuda+ akhali Eri na Onani.+ Mbwenye Eri na Onani afa ku dziko ya Kanani.+ 20 Ana a Yuda mwakubverana na mabanja awo ndi awa: Sela+ abala dzindza ya Asela; Peresi+ abala dzindza ya Aperesi; Zera+ abala dzindza ya Azera. 21 Ana a Peresi akhali awa: Ezironi+ abala dzindza ya Azironi; Amuli+ abala dzindza ya Amuli. 22 Anewa akhali a dzindza ya Yuda, amuna onsene adalemberwa akhali 76.500.+

23 Ana a Isakari+ mwakubverana na mabanja awo ndi awa: Tola+ abala dzindza ya Atola; Puva abala dzindza ya Apuva; 24 Yasubhi abala dzindza ya Yasubhi; Simironi abala dzindza ya Simironi. 25 Anewa akhali a dzindza ya Isakari, amuna onsene adalemberwa akhali 64.300.+

26 Ana a Zebhuloni+ mwakubverana na mabanja awo ndi awa: Seredhi abala dzindza ya Aseredhi; Eloni abala dzindza ya Aeloni; Yaleli abala dzindza ya Yaleli. 27 Anewa akhali a dzindza ya Zebhuloni, amuna onsene adalemberwa akhali 60.500.+

28 Ana a Zuze+ mwakubverana na mabanja awo ndi awa: Manase na Efraimu.+ 29 Ana a Manase+ akhali awa: Makiri+ abala dzindza ya Amakiri. Makiri abala Jiliyadhi. Jiliyadhi+ abala dzindza ya Jiliyadhi. 30 Ana a Jiliyadhi akhali awa: Iyezeri abala dzindza ya Aiyezeri; Eleki abala dzindza ya Aeleki; 31 Azrieli abala dzindza ya Azrieli; Sikemu abala dzindza ya Sikemu; 32 Semidha abala dzindza ya Asemidha; Eferi abala dzindza ya Aeferi. 33 Zelofeadhe mwana wa Eferi nee abala ana amuna, mbwenye abala ana akazi+ basi. Madzina a ana a Zelofeadhe+ akhali awa: Maala, Noa, Ogla, Milka na Tirza. 34 Anewa akhali a dzindza ya Manase, amuna onsene adalemberwa akhali 52.700.+

35 Ana a Efraimu+ akhali awa: Sutela abala dzindza ya Asutela;+ Bhekeri abala dzindza ya Abhekeri; Taani abala dzindza ya Ataani. 36 Ana a Sutela akhali awa: Erani abala dzindza ya Aerani. 37 Anewa akhali a dzindza ya Efraimu, amuna onsene adalemberwa akhali 32.500.+ Anewa akhali ana a Zuze mwakubverana na mabanja awo.

38 Ana a Bhenjamini+ mwakubverana na mabanja awo akhali awa: Bhela+ abala dzindza ya Abhela; Asibhela abala dzindza ya Asibhela; Airamu abala dzindza ya Airamu; 39 Sefufamu abala dzindza ya Asefufamu; Ufami abala dzindza ya Aufami. 40 Ana a Bhela akhali Ardhi na Namani.+ Ardhi abala dzindza ya Ardhi; Namani abala dzindza ya Anamani. 41 Anewa akhali a dzindza ya Bhenjamini mwakubverana na mabanja awo, amuna onsene adalemberwa akhali 45.600.+

42 Ana a Dhani+ mwakubverana na mabanja awo akhali awa: Suamu abala dzindza ya Asuamu. Anewa akhali a dzindza ya Dhani mwakubverana na mabanjawo. 43 Amuna onsene adalemberwa mu dzindza ya Suamu akhali 64.400.+

44 Ana a Azeri+ mwakubverana na mabanja awo akhali awa: Imina abala dzindza ya Aimina; Isivi abala dzindza ya Aisivi; Bheriya abala dzindza ya Abheriya. 45 Ana a Bheriya akhali awa: Ebheri abala dzindza ya Aebheri; Malkiyeli abala dzindza ya Amalkiyeli. 46 Azeri akhali na mwana wankazi akhacemerwa Sera. 47 Anewa akhali a dzindza ya Azeri, amuna onsene adalemberwa akhali 53.400.+

48 Ana a Nafitali+ mwakubverana na mabanja awo akhali awa: Yazeli abala dzindza ya Ayazeli; Guni abala dzindza ya Aguni; 49 Yezeri abala dzindza ya Ayezeri; Silemu abala dzindza ya Asilemu. 50 Anewa akhali a dzindza ya Nafitali mwakubverana na mabanja awo, amuna onsene adalemberwa akhali 45.400.+

51 Anthu onsene adalemberwa a dzindza ya Izraeli akhali 601.730.+

52 Buluka penepo, Yahova apanga Mose: 53 “Dziko isafunika kugawirwa anthu anewa ninga unthaka wawo, mwakubverana na kunjipa kwa dzindza+ ibodzi na ibodzi. 54 Misoka mikulu usafunika kuthimizira unthaka wawo, misoka mingʼono usafunika kucepesa unthaka+ wawo. Unthaka unafuna kupaswa nsoka ubodzi na ubodzi usafunika ubverane na kunjipa kwa anthu adalemberwa. 55 Dziko isafunika kugawirwa anthu mwakubverana na pinafuna kupangiza cidzindikiro.+ Iwo asafunika atambire unthaka wawo mwakubverana na madzina a madzindza a ambuyawo. 56 Khundu ibodzi na ibodzi ya unthaka isafunika kugawirwa misoka mikulu na mingʼono mwakubverana na pinafuna kupangiza cidzindikiro.”

57 Awa ndi ana a dzindza ya Levi+ adalemberwa mwakubverana na mabanja awo: Jersoni abala dzindza ya Ajersoni; Kowati+ abala dzindza ya Akowati; Merari abala dzindza ya Amerari. 58 Awa akhali mabanja a Alevi: Dzindza ya Libhini,+ dzindza ya Ebhroni,+ dzindza ya Mali,+ dzindza ya Musi,+ dzindza ya Kora.+

Kowati abala Amiramu.+ 59 Nkazi wa Amiramu akhacemerwa Yokebhedhi,+ mwana wakuti Levi amʼbalirwa na nkazace ku Ejitu. Yokebhedhi abalira Amiramu ana awa: Aroni, Mose na Miriya+ mʼbale wawo wankazi. 60 Aroni abala Nadhabhe, Abhiyu, Eleazare na Itamari.+ 61 Mbwenye Nadhabhe na Abhiyu afa pidapereka iwo ntsembe yakukhonda* kutawirika kuna Yahova.+

62 Onsene adalemberwa akhali anthu 23.000, onsene akhali amuna akuti akhali na thunga ya mwezi ubodzi kuenda kutsogolo.+ Iwo nee alemberwa pabodzi na Aizraeli+ andzawo, thangwi iwo nee mbadatambira unthaka pakati pa Aizraeli.+

63 Anewa ndiwo adalemberwa na Mose pabodzi na nyantsembe Eleazare, pidalembera iwo Aizraeli nʼthando ya Moabhe ku Yordani cifupi na Yeriko. 64 Mbwenye pakati pa anthu anewa, nee pakhali na munthu adalemberwa na Mose pabodzi na nyantsembe Aroni pa ndzidzi udalemberwa Aizraeli nʼthando ya Sinai.+ 65 Thangwi Yahova akhadalonga kuti: “Mwakukhonda penula, iwo anafera nʼthando+ ino.” Natenepa nee mʼbodzi mwa amuna anewa apulumuka, kusiyapo Kalebe mwana wa Yefune na Yoswa mwana wa Nuni.+

27 Buluka penepo, abwera ana a Zelofeadhe,+ wakuti akhali mwana wa Eferi ndzukulu wa Jiliyadhi. Jiliyadhi akhali mwana wa Makiri, Makiri akhali mwana wa Manase. Onsene akhali a dzindza ya Manase, Manase akhali mwana wa Zuze. Ana a Zelofeadhe akhacemerwa Maala, Noa, Ogla, Milka na Tirza. 2 Iwo alimira pansuwo wa nsasa wa nsonkhano patsogolo pa Mose, nyantsembe Eleazare, atsogoleri+ a madzindza na mbumba yonsene, mbalonga: 3 “Pai wathu afera nʼthando, mbwenye iye nee akhali mu nsoka wa anthu adasandukira Yahova, ale adaphedzera Kora.+ Iye afa thangwi ya madawo ace, mbwenye nee abala ana amuna. 4 Kodi dzina ya pai wathu inafudzika pakati pa dzindza yace basi ene thangwi nee abala ana amuna? Tipasenimbo unthaka pakati pa abale a pai wathu.” 5 Natenepa Mose adziwisa Yahova+ phembo yawo.

6 Penepo Yahova apanga Mose: 7 “Pidalonga ana a Zelofeadhe mphyadidi. Mwandimomwene, usafunika kuapasa mbuto ikhafuna kutambira pai wawo ninga unthaka pakati pa abale ace, toera ikhale unthaka wawo.+ 8 Pontho panga Aizraeli kuti: ‘Mamuna angafa mbakhonda kusiya mwana wamamuna, unthaka wace musafunika kuupasa mwanace wankazi. 9 Khala iye nkhabe mwana wankazi, unthaka wace musafunika kuupasa abale ace amuna. 10 Khala iye nkhabe abale amuna, unthaka wace musafunika kuupasa abale a pai wace. 11 Khala pai wace nkhabe abale, unthaka wace musafunika kuupasa munthu wa dzindza yace, iye anadzatambira unthaka unoyu. Unoyu ndi ntemo wakuti Aizraeli asafunika kuutoweza mwakubverana na pidalonga Yahova kuna Mose.’”

12 Buluka penepo, Yahova apanga Mose: “Kwira paphiri iyi ya Abharimu+ toera uone dziko inafuna kupasa ine Aizraeli.+ 13 Ungamala kuiona, iwe unadzafa mbuikhwa munthumbi+ ninga mudaikhwa mʼbale wako Aroni,+ 14 thangwi mbumba pidaketesana iyo na ine nʼthando ya Zini, imwe nee mwandibvera, pontho nee mwandipasa mbiri* pa madzi+ a ku Meribha,+ ku Kadhesi+ nʼthando ya Zini.”+

15 Buluka penepo, Mose apanga Yahova: 16 “Yahova, Mulungu wakuti asapasa umaso anthu onsene, mbasankhule munthu mʼbodzi pakati pa mbumba, 17 toera aatsogolere pakati pawo, toera mbumba ya Yahova ikhonde kukhala ninga mabira akusowa nkumbizi.” 18 Penepo Yahova apanga Mose: “Cemera Yoswa mwana wa Nuni, mamuna wakuthema,* ikha manja ako pa nsolo pace.+ 19 Usafunika umulimirise patsogolo pa nyantsembe Eleazare pamaso pa mbumba yonsene, mbunʼkhazikisa ninga ntsogoleri pamaso pawo.+ 20 Usafunika umpase khundu ibodzi ya utongi wako,+ toera mbumba yonsene ya Izraeli imbvere.+ 21 Iye anadzalimira patsogolo pa nyantsembe Eleazare wakuti anadzaphatisira Urimi+ toera asake kudziwa cisankhulo ca Yahova thangwi ya iye. Mbumba yonsene ya Izraeli inadzaenda mbibwerera mwakubverana na pinafuna kulonga iye.”

22 Penepo Mose acita pidampanga Yahova. Iye acemera Yoswa mbamulimirisa patsogolo pa nyantsembe Eleazare, pamaso pa mbumba yonsene, 23 aikha manja ace pa nsolo wa Yoswa, mbanʼkhazikisa+ ninga ntsogoleri, mwakubverana na pidalonga Yahova kuna Mose.+

28 Buluka penepo, Yahova apanga Mose: 2 “Panga Aizraeli kuti: ‘Lekani kuduwala kundiperekera ntsembe yanga, yakuti ndi nkate wanga. Ntsembe zanga zakupiswa, zakuti ndi khwema yakununkhira pamaso panga,* zisafunika ziperekwe pa ndzidzi udakhazikiswa.’+

3 “Apange kuti: ‘Iyi ndi ntsembe yakupiswa inafunika imwe kupereka kuna Yahova: Ntsiku zonsene musafunika kupereka anamabira awiri a caka cibodzi, akusowa cilema, ninga ntsembe yakupiswa inaperekwa mwakukhonda phonya.+ 4 Mwanabira mʼbodzi munampereka namacibese, mwanabira unango munampereka mu ndzidzi unabira dzuwa,*+ 5 munampereka pabodzi na ntsembe ya pyakudya,+ ya khundu yacikhumi ya efa* ya ufa wadidi kakamwe wakubvungazwa na litru ibodzi ya mafuta adidi kakamwe a azeti. 6 Ineyi ndi ntsembe yakupiswa+ inaperekwa mwakukhonda phonya, ninga khwema yakununkhira,* yakuti ndi ntsembe yakupiswa pa moto inaperekwa kuna Yahova, mwakubverana na pidapangwa imwe Paphiri ya Sinai. 7 Bira ibodzi na ibodzi+ munaipereka pabodzi na litru ibodzi ya ntsembe ya pyakumwa. Tsanulirani pyakumwa pyenepi* pa mbuto yakucena ninga ntsembe ya pyakumwa inaperekwa kuna Yahova. 8 Bira inango munaipereka mu ndzidzi unabira dzuwa.* Munaipereka pabodzi na nʼdida ubodzi ene wa ntsembe ya pyakudya ninga idaperekwa namacibese, pabodzi na ntsembe yace ya pyakumwa. Munadzaipereka ninga ntsembe yakupiswa pa moto toera ikhale khwema yakununkhira pamaso pa* Yahova.+

9 “‘Mbwenye pa ntsiku ya Sabudu,+ ntsembe isafunika ikhale ya anamabira awiri a caka cibodzi, akusowa cilema. Ntsembe ya pyakudya inadzakhala ya malitru manai na hafu a ufa wadidi kakamwe wakubvungazwa na mafuta a azeti pabodzi na ntsembe ya pyakumwa. 10 Ineyi ndi ntsembe yakupiswa inafunika kuperekwa pa ntsiku ya Sabudu, kuphatanizambo ntsembe yakupiswa inaperekwa ntsiku zonsene pabodzi na ntsembe yace ya pyakumwa.+

11 “‘Pakutoma kwa mwezi ubodzi na ubodzi,* munadzapereka kuna Yahova ntsembe yakupiswa ya ngʼombe ziwiri, bira ibodzi, anamabira anomwe a caka cibodzi,+ akusowa cilema, 12 ngʼombe ibodzi na ibodzi munaipereka pabodzi na malitru matanthatu na hafu a ufa wadidi kakamwe wakubvungazwa na mafuta a azeti ninga ntsembe ya pyakudya,+ bira+ ibodzi na ibodzi munaipereka pabodzi na malitru manai na hafu a ufa wadidi kakamwe wakubvungazwa na mafuta a azeti ninga ntsembe ya pyakudya. 13 Mwanabira mʼbodzi na mʼbodzi munampereka pabodzi na khundu yacikhumi ya ufa wadidi kakamwe wakubvungazwa na mafuta a azeti ninga ntsembe ya pyakudya. Ineyi ndi ntsembe yakupiswa, khwema yakununkhira,*+ yakuti ndi ntsembe yakupiswa pa moto inaperekwa kuna Yahova. 14 Ngʼombe+ musafunika kuipereka pabodzi na ntsembe ya pyakumwa, ya cifupi na malitru mawiri a vinyu; bira+ munaipereka pabodzi na vinyu yakupiringana litru ibodzi, mwanabira+ munampereka pabodzi na litru ibodzi ya vinyu. Ineyi ndi ntsembe yakupiswa inafunika kuperekwa miyezi yonsene pa caka. 15 Musafunikambo kupereka bokho kuna Yahova ninga ntsembe yakulekererwa madawo, munaipereka pabodzi na ntsembe zinaperekwa mwakukhonda phonya, kuphatanizambo ntsembe yace ya pyakumwa.

16 “‘Pa ntsiku 14 ya mwezi wakutoma, munadzacitira Yahova phwando ya Paskwa.+ 17 Pa ntsiku 15 ya mwezi unoyu, munadzacita phwando. Mu ntsiku zinomwe,+ munadzadya mikate yakusowa pyakutupisa. 18 Pa ntsiku yakutoma munadzasonkhana toera kulambira Mulungu. Nee musafunika kuphata basa yakuwanga pa ntsiku ineyi. 19 Munadzapereka kuna Yahova anangʼombe awiri, bira ibodzi, anamabira anomwe a caka cibodzi ninga ntsembe yakupiswa pa moto. Pisafunika pikhale pinyama pyakusowa cilema.+ 20 Musafunika kupereka pinyama pyenepi pabodzi na ntsembe zace za pyakudya za ufa wadidi kakamwe wakubvungazwa na mafuta a azeti.+ Ngʼombe ibodzi munaipereka pabodzi na malitru matanthatu a ufa, bira ibodzi munaipereka pabodzi na malitru manai na hafu a ufa. 21 Pa anamabira anomwe, mʼbodzi na mʼbodzi munampereka pabodzi na khundu yacikhumi ya ufa. 22 Pontho musafunikambo kupereka bokho ninga ntsembe ya madawo, toera kucenesa* madawo anu. 23 Kusiyapo ntsembe zakupiswa zinapereka imwe mwakukhonda phonya namacibese, musafunikambo kupereka ntsembe zenezi. 24 Munadzapereka ntsembe zenezi ntsiku zonsene munjira ibodzi ene ninga cakudya* mu ntsiku zinomwe, ineyi ndi ntsembe yakupiswa pa moto ninga khwema yakununkhira pamaso pa* Yahova. Isafunika iperekwe pabodzi na ntsembe yakupiswa inaperekwa mwakukhonda phonya, kuphatanizambo ntsembe yace ya pyakumwa. 25 Pa ntsiku yacinomwe munadzacita nsonkhano+ ukulu toera kulambira Mulungu. Nee musafunika kuphata basa yakuwanga+ pa ntsiku ineyi.

26 “‘Pa ntsiku ya misapo yakutoma kutokota,+ mungapereka kuna Yahova+ ntsembe ya pyakudya pipswa, musafunika kucita nsonkhano ukulu toera mulambire Mulungu pa Phwando yanu ya Masumana.+ Nee musafunika kuphata basa yakuwanga+ pa ntsiku ineyi. 27 Munadzapereka anangʼombe awiri, bira ibodzi na anamabira anomwe a caka cibodzi+ ninga ntsembe yakupiswa toera ikhale khwema yakununkhira pamaso pa* Yahova, 28 ngʼombe ibodzi na ibodzi munaipereka pabodzi na malitru matanthatu na hafu a ufa wadidi kakamwe wakubvungazwa na mafuta a azeti ninga ntsembe ya pyakudya, bira ibodzi munaipereka pabodzi na malitru manai na hafu a ufa, 29 pa anamabira anomwe, mʼbodzi na mʼbodzi munampereka pabodzi na khundu yacikhumi ya ufa. 30 Kusiyapo pyenepi, musafunikambo kupereka bokho toera kucenesa* madawo anu.+ 31 Kusiyapo ntsembe zakupiswa zinapereka imwe mwakukhonda phonya, musafunikambo kupereka ntsembe zenezi pabodzi na ntsembe zace za pyakudya. Pinyama pyenepi pisafunika pikhale pyakusowa cilema,+ pontho pisafunika kuperekwa pabodzi na ntsembe za pyakumwa.

29 “‘Pa ntsiku yakutoma ya mwezi wacinomwe, musafunika kucita nsonkhano ukulu toera kulambira Mulungu. Nee musafunika kuphata basa yakuwanga+ pa ntsiku ineyi. Ineyi ndi ntsiku yakuti musafunika kuliza tuluka.+ 2 Munadzapereka mwanangʼombe mʼbodzi, bira ibodzi na anamabira anomwe a caka cibodzi, akusowa cilema ninga ntsembe yakupiswa toera ikhale khwema yakununkhira pamaso pa* Yahova, 3 ntsembe ya ngʼombe munaipereka pabodzi na ntsembe ya pyakudya ya ufa wadidi kakamwe wakubvungazwa na mafuta a azeti, usafunika ukhale wa malitru matanthatu na hafu, ntsembe ya bira munaipereka pabodzi na malitru manai na hafu a ufa. 4 Pa anamabira anomwe, mʼbodzi na mʼbodzi munampereka pabodzi na khundu yacikhumi ya ufa. 5 Musafunikambo kupereka bokho ninga ntsembe yakulekererwa madawo, toera kucenesa* madawo anu. 6 Musafunika kupereka ntsembe zenezi, kusiyapo ntsembe zakupiswa zinapereka imwe miyezi yonsene pabodzi na ntsembe za pyakudya,+ ntsembe zakupiswa zinapereka imwe mwakukhonda phonya, ntsembe za pyakudya+ na ntsembe za pyakumwa,+ mwakubverana na pitsogolero pya ntsembe zakupiswa ninga khwema yakununkhira,* yakuti ndi ntsembe yakupiswa pa moto inaperekwa kuna Yahova.

7 “‘Pa ntsiku yacikhumi ya mwezi unoyu wacinomwe, musafunika kucita nsonkhano ukulu+ toera kulambira Mulungu, mbamupangiza kuti muli akutsukwala* thangwi ya madawo anu. Nee mʼbodzi wa imwe asafunika kuphata basa+ pa ntsiku ineyi. 8 Munadzapereka kuna Yahova mwanangʼombe mʼbodzi, bira ibodzi na anamabira anomwe a caka cibodzi, akusowa cilema+ ninga ntsembe yakupiswa toera ikhale khwema yakununkhira.* 9 Ntsembe ya ngʼombe munaipereka pabodzi na ntsembe ya pyakudya ya ufa wadidi kakamwe wakubvungazwa na mafuta a azeti, usafunika ukhale wa malitru matanthatu na hafu, ntsembe ya bira munaipereka pabodzi na malitru manai na hafu a ufa. 10 Pa anamabira anomwe, mʼbodzi na mʼbodzi munampereka pabodzi na khundu yacikhumi ya ufa. 11 Pontho musafunika kupereka bokho ninga ntsembe yakulekererwa madawo.+ Musafunika kupereka ntsembe zenezi kusiyapo ntsembe yakulekererwa madawo inaperekwa toera kucenesa* madawo, kuphatanizambo ntsembe yakupiswa inaperekwa mwakukhonda phonya pabodzi na ntsembe za pyakudya na ntsembe za pyakumwa.

12 “‘Pa ntsiku 15 ya mwezi wacinomwe, musafunika kucita nsonkhano ukulu toera kulambira Mulungu. Nee musafunika kuphata basa yakuwanga pa ntsiku ineyi, pontho musafunika kucita phwando toera kusimba Yahova mu ntsiku zinomwe.+ 13 Munadzapereka anangʼombe 13, mabira mawiri na anamabira 14 a caka cibodzi akusowa cilema+ ninga ntsembe yakupiswa+ pa moto, yakuti ndi khwema yakununkhira pamaso pa* Yahova. 14 Pa anangʼombe 13, mʼbodzi na mʼbodzi musafunika kumpereka pabodzi na malitru matanthatu na hafu a ufa wadidi kakamwe wakubvungazwa na mafuta a azeti ninga ntsembe ya pyakudya, pontho ntsembe ya mabira mawiri, ibodzi na ibodzi munaipereka na malitru manai na hafu a ufa. 15 Pa anamabira 14, mʼbodzi na mʼbodzi munampereka pabodzi na khundu yacikhumi ya ufa. 16 Munadzaperekambo bokho ninga ntsembe yakulekererwa madawo. Musafunika kupereka ntsembe zenezi kusiyapo ntsembe yakupiswa inaperekwa mwakukhonda phonya, pabodzi na ntsembe ya pyakudya na ntsembe ya pyakumwa.+

17 “‘Pa ntsiku yaciwiri munadzapereka anangʼombe 12, mabira mawiri, anamabira 14 a caka cibodzi, onsene asafunika akhale akusowa cilema,+ 18 anangʼombe, mabira na anamabira, musafunika kuapereka pabodzi na ntsembe za pyakudya na ntsembe za pyakumwa, mwakubverana na kunjipa kwa pinyama pyenepi, mbamutoweza pitsogolero pya ntsembe zakupiswa. 19 Munadzaperekambo bokho ninga ntsembe yakulekererwa madawo. Kusiyapo ntsembe yakupiswa inaperekwa mwakukhonda phonya, musafunika kupereka ntsembe zenezi, pabodzi na ntsembe za pyakudya na ntsembe za pyakumwa.+

20 “‘Pa ntsiku yacitatu, munadzapereka anangʼombe 11, mabira mawiri na anamabira 14 a caka cibodzi, onsene asafunika akhale akusowa cilema,+ 21 anangʼombe, mabira na anamabira, musafunika kuapereka pabodzi na ntsembe za pyakudya na ntsembe za pyakumwa, mwakubverana na kunjipa kwa pinyama pyenepi, mbamutoweza pitsogolero pya ntsembe zakupiswa. 22 Munadzaperekambo bokho ninga ntsembe yakulekererwa madawo. Kusiyapo ntsembe yakupiswa inaperekwa mwakukhonda phonya, musafunika kupereka ntsembe zenezi, pabodzi na ntsembe ya pyakudya na ntsembe ya pyakumwa.+

23 “‘Pa ntsiku yacinai, munadzapereka anangʼombe khumi, mabira mawiri na anamabira 14 a caka cibodzi, onsene asafunika akhale akusowa cilema,+ 24 anangʼombe, mabira na anamabira, musafunika kuapereka pabodzi na ntsembe za pyakudya na ntsembe za pyakumwa, mwakubverana na kunjipa kwa pinyama pyenepi, mbamutoweza pitsogolero pya ntsembe zakupiswa. 25 Munadzaperekambo bokho ninga ntsembe yakulekererwa madawo. Kusiyapo ntsembe yakupiswa inaperekwa mwakukhonda phonya, musafunika kupereka ntsembe zenezi, pabodzi na ntsembe ya pyakudya na ntsembe ya pyakumwa.+

26 “‘Pa ntsiku yacixanu, munadzapereka anangʼombe apfemba, mabira mawiri na anamabira 14 a caka cibodzi, onsene asafunika akhale akusowa cilema,+ 27 anangʼombe, mabira na anamabira, musafunika kuapereka pabodzi na ntsembe za pyakudya na ntsembe za pyakumwa, mwakubverana na kunjipa kwa pinyama pyenepi, mbamutoweza pitsogolero pya ntsembe zakupiswa. 28 Munadzaperekambo bokho ninga ntsembe yakulekererwa madawo. Kusiyapo ntsembe yakupiswa inaperekwa mwakukhonda phonya, musafunika kupereka ntsembe zenezi, pabodzi na ntsembe ya pyakudya na ntsembe ya pyakumwa.+

29 “‘Pa ntsiku yacitanthatu, munadzapereka anangʼombe asere, mabira mawiri na anamabira 14 a caka cibodzi, onsene asafunika akhale akusowa cilema,+ 30 anangʼombe, mabira na anamabira, musafunika kuapereka pabodzi na ntsembe za pyakudya na ntsembe za pyakumwa, mwakubverana na kunjipa kwa pinyama pyenepi, mbamutoweza pitsogolero pya ntsembe zakupiswa. 31 Munadzaperekambo bokho ninga ntsembe yakulekererwa madawo. Kusiyapo ntsembe yakupiswa inaperekwa mwakukhonda phonya, musafunika kupereka ntsembe zenezi, pabodzi na ntsembe ya pyakudya na ntsembe ya pyakumwa.+

32 “‘Pa ntsiku yacinomwe, munadzapereka anangʼombe anomwe, mabira mawiri na anamabira 14 a caka cibodzi, onsene asafunika akhale akusowa cilema,+ 33 anangʼombe, mabira na anamabira, musafunika kuapereka pabodzi na ntsembe za pyakudya na ntsembe za pyakumwa, mwakubverana na kunjipa kwa pinyama pyenepi, mbamutoweza pitsogolero pya ntsembe zakupiswa. 34 Munadzaperekambo bokho ninga ntsembe yakulekererwa madawo. Kusiyapo ntsembe yakupiswa inaperekwa mwakukhonda phonya, musafunika kupereka ntsembe zenezi, pabodzi na ntsembe ya pyakudya na ntsembe ya pyakumwa.+

35 “‘Pa ntsiku yacisere, musafunika kucita nsonkhano ukulu.* Nee musafunika kuphata basa yakuwanga+ pa ntsiku ineyi. 36 Munadzapereka mwanangʼombe, bira na anamabira anomwe a caka cibodzi akusowa cilema+ ninga ntsembe zakupiswa pa moto, zakuti ndi khwema yakununkhira pamaso pa* Yahova. 37 Mwanangʼombe, bira na anamabira, musafunika kuapereka pabodzi na ntsembe za pyakudya na ntsembe za pyakumwa, mwakubverana na kunjipa kwa pinyama pyenepi, mbamutoweza pitsogolero pya ntsembe zakupiswa. 38 Munadzaperekambo bokho ninga ntsembe yakulekererwa madawo. Kusiyapo ntsembe yakupiswa inaperekwa mwakukhonda phonya, musafunika kupereka ntsembe zenezi, pabodzi na ntsembe ya pyakudya na ntsembe ya pyakumwa.+

39 “‘Zenezi ndi ntsembe zinafunika imwe kupereka kuna Yahova mʼmaphwando+ anu a mʼmidzidzi idakhazikiswa, kusiyapo ntsembe zinapereka imwe toera kucita pidapikira imwe+ na ntsembe zinapereka imwe mwakufuna kwanu,+ ninga ntsembe zakupiswa,+ ntsembe za pyakudya,+ ntsembe za pyakumwa+ na ntsembe toera kupereka takhuta.’”*+ 40 Mose apanga Aizraeli pinthu pyonsene pidapangwa iye na Yahova.

30 Buluka penepo, Mose apanga atsogoleri+ a madzindza a Izraeli: “Ipi ndi pidalonga Yahova: 2 Mamuna angapikira+ kuna Yahova toera kucita cinthu, peno angadumbira,+ mbapikira toera akhonde kucita cinthu, iye nee asafunika kupwaza pidalonga iye.+ Asafunika acite+ pinthu pyonsene pidapikira iye.

3 “Nkazi angapikira kuna Yahova toera kucita cinthu, peno angadumbira toera akhonde kucita cinthu mu ndzidzi wakuti aciri ntsikana, pontho asakhala panyumba ya pai wace, 4 pai wace angadziwa pidapikira iye, peno angadziwa dumbiro idacita iye toera akhonde kucita cinthu, pai wace angakhonda kulonga cinthu, asafunika kucita pidapikira iye. 5 Mbwenye pai wace angadziwa pikiro idacita iye peno dumbiro idacita iye toera akhonde kucita cinthu, anganʼkhondesa, pikiro yace nee inapitiriza.* Yahova anamulekerera thangwi pai wace anʼkhondesa.+

6 “Mbwenye nkazi unoyu angasembwa mu ndzidzi wakuti amala kudumbira peno acita kale pikiro yace mbadzati kunyerezera mwadidi, 7 mamunace angadziwa dumbiro idacita iye mbakhonda kulonga cinthu pa ntsiku idadziwa iye pyenepi, dumbiro peno pikiro idacita nkazi unoyu toera akhonde kucita cinthu inapitiriza. 8 Mbwenye mamunace anganʼkhondesa pa ntsiku idadziwa iye dumbiro ineyi, iye anakwanisa kufudza dumbiro peno pikiro idacita nkazace mbadzati kunyerezera mwadidi;+ pontho Yahova analekerera nkazi unoyu.

9 “Khala nkazi wakuti ndi nzice* peno nkazi adakhondwa na mamunace apikira kucita cinthu, asafunika kucita pinthu pyonsene pidapikira iye.

10 “Khala nkazi adumbira peno apikira toera kukhonda kucita cinthu mu ndzidzi wakuti ali panyumba ya mamunace, 11 mamunace angadziwa dumbiro idacita iye mbakhonda kulonga cinthu, peno mbakhonda kunʼkhondesa; dumbiro peno pikiro idacita nkazi unoyu toera akhonde kucita cinthu inapitiriza. 12 Mbwenye khala pa ntsiku idadziwa mamunace afudza dumbiro peno pikiro idacita iye toera akhonde kucita cinthu,+ pikiro peno dumbiro yace nee inapitiriza. Mamunace apifudza, pontho Yahova analekerera nkazi unoyu. 13 Dumbiro peno pikiro inacitwa na nkazi toera akhonde kucita cinthu, mamunace asafunika aitawirise peno aikhondese.* 14 Mu ndzidzi unapita ntsiku ibodzi na ibodzi, mamuna angakhonda kulonga cinthu, iye ali kutawirisa madumbiro peno mapikiro onsene adacita nkazace toera akhonde kucita cinthu. Iye atawirisa thangwi nee alonga cinthu pidadziwa iye dumbiro na pikiro idacita nkazace. 15 Mbwenye mukupita kwa ndzidzi, mamunace angafudza dumbiro na pikiro idacita nkazace, maseze iye apibva kale, mamuna anadzatawirira mulando+ wa nkazace.

16 “Unoyu ndi ntemo udapereka Yahova kuna Mose unalonga pya mamuna na nkazace, peno pai na mwanace wantsikana wakuti asakhala naye panyumba pace.”

31 Penepo Yahova apanga Mose: 2 “Tcunyusa+ Amidhiyani+ thangwi ya pinthu pidacitira iwo Aizraeli. Buluka penepo, iwe unadzafa mbuikhwa munthumbi ninga pidacitwa ambuyako.”+

3 Natenepa, Mose apanga mbumba: “Khunganyani amuna angasi pakati panu toera aende kamenya nkhondo na Amidhiyani, toera Yahova atcunyuse Amidhiyani thangwi ya pinthu pidacita iwo. 4 Mu dzindza ibodzi na ibodzi ya Aizraeli, musafunika kutumiza kunkhondo amuna 1.000.” 5 Natenepa, pa pikwi na pikwi pya anthu a dzindza ya Aizraeli,+ mu dzindza ibodzi na ibodzi mwasankhulwa amuna 1.000. Amuna onsene adakhunganyika toera kuenda kunkhondo akhali 12.000.

6 Penepo Mose aatuma kunkhondo, dzindza ibodzi na ibodzi ikhali na amuna 1.000, iwo aenda kunkhondo mbaperekerwa na Fineya+ mwana wa nyantsembe Eleazare, wakuti mʼmanja mwace akhali na pyombo pyakucena na matuluka+ toera aalize ninga pidzindikiro pya nkhondo. 7 Iwo amenya nkhondo na Amidhiyani ninga pidalonga Yahova kuna Mose, mbapha amuna onsene. 8 Pakati pa anthu adaphiwa, akhalipombo amambo a ku Midhiyani, akuti ndi Evi, Rekemu, Zuri, Huri na Rebha. Bhalamu+ mwana wa Bheori, iwo amuphambo na supada. 9 Mbwenye Aizraeli akwata akazi na ana a ku Midhiyani, mbaenda nawo ninga mabitcu. Kusiyapo pyenepi, iwo akwatambo pifuyo pyawo pyonsene na pinthu pyawo pyonsene. 10 Iwo apisa mizinda yonsene ikakhala Amidhiyani na misasa yawo. 11 Pontho akwata pinthu pyonsene pidatapata iwo, kuphatanizambo anthu na pinyama. 12 Anthu adaphata iwo na pinthu pidatapata iwo aenda napyo ku misasa, kuna Mose, nyantsembe Eleazare na mbumba ya Izraeli, nʼthando ya Moabhe,+ ku Yordani cifupi na Yeriko.

13 Mose na nyantsembe Eleazare pabodzi na atsogoleri a mbumba, aenda kaonana nawo kunja kwa misasa. 14 Mbwenye Mose aipirwa na amuna adasankhulwa toera kutsogolera anyankhondo, akuti akhali atsogoleri a anyankhondo 1.000 na atsogoleri a anyankhondo 100 adabwerera buluka kunkhondo. 15 Mose aabvundza: “Mwasiiranji akazi onsene mbamukhonda kuapha? 16 Akazi anewa ndiwo adatowezera mafala a Bhalamu mbanyengerera Aizraeli toera asiye*+ Yahova, mbalambira mulungu wapezi ku Peori,+ muliri mbuoneka pakati pa mbumba ya Yahova.+ 17 Cincino musafunika kupha ana amuna onsene na akazi onsene akuti apita kale mʼmabonde. 18 Mbwenye munakwanisa kusiya atsikana onsene akuti adzati kupita mʼmabonde.+ 19 Pontho musafunika kukhala kunja kwa misasa mu ntsiku zinomwe. Ale onsene adapha munthu peno adakhuya munthu adaphiwa,+ asafunika kuceneseka+ pa ntsiku yacitatu na yacinomwe, pabodzi na atsikana adabweresa imwe. 20 Musafunika kucenesa nguwo zonsene, pinthu pyonsene pya nthembe, pinthu pyonsene pidacitwa na maweya a mbuzi na pyombo pyonsene pya matabwa.”

21 Penepo nyantsembe Eleazare apanga amuna akuti akhadaenda kunkhondo: “Uyu ndi ntemo udapereka Yahova kuna Mose: 22 ‘Basi ene ouro, parata, nkuwa, utale, ntobve na xumbu, 23 pinthu pyonsene pyakuti nkhabe kupya na moto, musafunika kupiikha pa moto toera piceneswe. Mbwenye pisafunikambo piceneswe na madzi akucenesa nawo.+ Pinthu pyonsene pyakuti pinapya pingaikhwa pa moto, musafunika kupitsuka na madzi. 24 Pa ntsiku yacinomwe, musafunika kufula nguwo zanu, mbamukhala akucena; mungamala munakwanisa kupita mʼmisasa.’”+

25 Buluka penepo, Yahova alonga ipi kuna Mose: 26 “Lengesa pinthu pyonsene pidatapatwa, pyakuti ndi anthu pabodzi na pinyama; cita pyenepi pabodzi na nyantsembe Eleazare na atsogoleri a madzindza. 27 Gawa pinthu pyenepi mʼmakhundu mawiri: Khundu ibodzi munaipasa anyankhondo adaenda kamenya nkhondo, khundu inango munaipasa mbumba.+ 28 Pa pinthu 500, mwakukhonda tsalakana khala ndi anthu, ngʼombe, maburu peno mabira, usafunika kubulusa cibodzi toera kucipereka kuna Yahova ninga nsonkho wa anyankhondo adabuluka kunkhondo. 29 Musafunika kubulusa hafu ya pinthu pyenepi mbamupipereka kuna nyantsembe Eleazare ninga muoni wa Yahova.+ 30 Pa khundu idapaswa Aizraeli, usafunika kubulusa cinthu cibodzi pa pinthu 50, mwakukhonda tsalakana khala ndi anthu, ngʼombe, maburu, mabira peno mitundu inango ya pifuyo. Usafunika kupipasa Alevi,+ akuti asaphata basa pa tabhernakulo ya Yahova.”+

31 Natenepa, Mose na nyantsembe Eleazare acita pidalonga Yahova kuna Mose. 32 Mwa pinthu pidatapatwa na amuna adaenda kunkhondo, pidasala pikhali mabira 675.000, 33 ngʼombe 72.000, 34 na maburu 61.000. 35 Akazi akuti akhadzati kupita mʼmabonde,+ akhali 32.000. 36 Khundu ya hafu idapaswa ale adaenda kunkhondo, ikhali mabira 337.500. 37 Mabira adaperekwa kuna Yahova ninga nsonkho akhali 675. 38 Ngʼombe zikhalipo 36.000, zidaperekwa kuna Yahova ninga nsonkho zikhali 72. 39 Maburu akhalipo 30.500, adaperekwa kuna Yahova ninga nsonkho akhali 61. 40 Atsikana* akhalipo 16.000, adaperekwa kuna Yahova ninga nsonkho akhali 32. 41 Mose apereka nsonkho unoyu kuna nyantsembe Eleazare+ ninga pinthu pidaperekwa kuna Yahova, mwakubverana na pidalonga Yahova kuna Mose.

42 Khundu ya hafu idapaswa Aizraeli pa pinthu pidapambula Mose mu pinthu pidapaswa amuna adamenya nkhondo ndi ipi: 43 Hafu ya mabira akhali 337.500, 44 ngʼombe zikhali 36.000, 45 maburu akhali 30.500, 46 atsikana akhali 16.000. 47 Pa hafu idapaswa Aizraeli, mu pinthu 50 Mose abulusa cinthu cibodzi, mwakukhonda tsalakana khala ndi anthu peno pinyama, mbapipereka kuna Alevi,+ akuti akhaphata mabasa a pa tabhernakulo ya Yahova,+ mwakubverana na pidalonga Yahova kuna Mose.

48 Buluka penepo, amuna adasankhulwa toera kutsogolera misoka ya anyankhondo,+ akuti ndi atsogoleri a anyankhondo 1.000 na atsogoleri a anyankhondo 100, afendedzera Mose, 49 iwo apanga Mose: “Atumiki anu alengesa anyankhondo akuti asatsogolerwa na ife, mbatipangwa kuti nkhabepo adasoweka.+ 50 Natenepa, tawirisani kuti mʼbodzi na mʼbodzi wa ife apereke muoni kuna Yahova wa pinthu pidagumana iye: Pinthu pya ouro, mikufu ya mʼmikono, mapulusera, mphete za mʼpiyala, mphete za mʼmakutu na pinthu pinango pyakubalikisa napyo, toera kucenesa* madawo athu pamaso pa Yahova.”

51 Natenepa, Mose na nyantsembe Eleazare atambira ouro yawo, yakuti ndi pinthu pyonsene pyakubalikisa napyo. 52 Ouro yonsene yakuti atsogoleri a anyankhondo 1.000 na atsogoleri a anyankhondo 100 aipereka ninga muoni kuna Yahova, ikhali masiklo* 16.750. 53 Nyankhondo mʼbodzi na mʼbodzi akhadakwata khundu yace pa pinthu pidatapatwa. 54 Mose na nyantsembe Eleazare atambira ouro idapereka atsogoleri a anyankhondo 1.000 na atsogoleri a anyankhondo 100, mbaenda nayo mu nsasa wa nsonkhano, toera mbumba ya Izraeli ikumbuke pinthu pidaacitira Yahova.

32 Ana a dzindza ya Rubheni+ na ana a dzindza ya Gadhi+ akhali na pifuyo pizinji kakamwe. Iwo aona kuti Yazeri+ na Jiliyadhi pikhali pisa pyadidi toera kufuya mikumbi yawo. 2 Natenepa, ana a dzindza ya Rubheni na ana a dzindza ya Gadhi aenda kuna Mose, nyantsembe Eleazare na atsogoleri a mbumba, mbalonga: 3 “Ataroti, Dhibhoni, Yazeri, Nimira, Esibhoni,+ Eleale, Sebhamu, Nebho+ na Bheoni,+ 4 pisa pidakunda Yahova pamaso pa mbumba ya Izraeli+ ndi mbuto zadidi toera kufuya mikumbi yathu, pontho atumiki anu ali na mikumbi mizinji.”+ 5 Iwo athimiza: “Khala ndife akutawirika pamaso panu, tawirisani kuti atumiki anu apaswe pisa pyenepi ninga unthaka wawo. Lekani kutisiya kuti tiwambuke nkulo wa Yordani.”

6 Penepo Mose apanga ana a dzindza ya Gadhi na ana a dzindza ya Rubheni: “Kodi imwe munasala kuno mu ndzidzi wakuti abale anu ali kuenda kunkhondo? 7 Thangwi yanji musafuna kufewesa manungo mbumba ya Izraeli toera ikhonde kupita mu dziko yakuti mwandimomwene Yahova anadzaapasa? 8 Pyenepi ndi pidacita ambuyanu pidaatuma ine buluka ku Kadhesi-Bharneya toera aende kaona dziko+ ineyi. 9 Pidafika iwo ku Gowa* ya Eskole+ mbaona dziko ineyi, iwo afewesa manungo mbumba ya Izraeli toera ikhonde kuenda ku dziko ikhafuna kuapasa Yahova.+ 10 Yahova aipirwa pa ntsiku ineyi mbadumbira+ kuti: 11 ‘Amuna adabuluka ku Ejitu akuti ali na thunga ya pyaka 20 kuenda kutsogolo nee anadzaona dziko+ idapikira ine toera kupasa Abhrahamu, Izaki na Yakobe,+ thangwi iwo nee andibvera na ntima wawo onsene, 12 basi ene Kalebe+ mwana wa Yefune wa dzindza ya Kenizeu na Yoswa+ mwana wa Nuni ndiwo anafuna kupitamo, thangwi iwo abvera Yahova na ntima wawo onsene.’+ 13 Na thangwi ineyi, Yahova aipirwa na Aizraeli mbaasiya toera andzendze nʼthando mu pyaka 40+ mpaka pidamala kufa+ anthu onsene a thunga yawo, akuti akhacita pinthu pyakuipa pamaso pa Yahova. 14 Cincino imwe ana a dzindza ya anyakudawa, muli kukhalambo ninga ambuyanu toera Yahova athimize kuipirwa kwace kuna Aizraeli. 15 Mungakhonda kupitiriza kumbvera, mwakukhonda penula iye anadzasiya pontho mbumba ineyi nʼthando, natenepa mbumba yonsene inadzafudzwa thangwi ya imwe.”

16 Mukupita kwa ndzidzi, iwo afendedzera Mose mbampanga: “Titawiriseni timange kuno mathanga a miyala toera kuikha pifuyo pyathu, pontho timange mizinda toera anathu akhale mwenemu. 17 Ife tinapitiriza dzololo toera kumenya nkhondo,+ pontho tinaenda patsogolo pa Aizraeli andzathu mpaka iwo angamala kukhazikika mu mbuto zawo, mbwenye anathu anasala mʼmizinda yakuzungulirwa na mipanda yakuwanga, toera akhonde kucitwa pyakuipa na anthu a dziko ino. 18 Ife nee tinabwerera mʼmamidzi mwathu mpaka Aizraeli onsene angamala kutambira dziko yawo ninga unthaka.+ 19 Thangwi ife nee tinatambira unthaka pabodzi na iwo kuntunda ule wa nkulo wa Yordani, thangwi tatambira kale unthaka wathu kuntunda uno wakumabulukiro a dzuwa a Yordani.”+

20 Mose aapanga: “Imwe mungacita ipi: Mungakwata pida mbamuenda kamenya nkhondo pamaso pa Yahova;+ 21 mʼbodzi na mʼbodzi wa imwe angakwata cida, mbawambuka nkulo wa Yordani pamaso pa Yahova mu ndzidzi unathamangisa iye anyamalwa ace pamaso pace,+ 22 mpaka dziko ingamala kukundwa pamaso pa Yahova,+ penepo munakwanisa kubwerera+ mbamukhala akusowa mulando kuna Yahova na Aizraeli. Natenepa dziko ino inadzakhala unthaka wanu pamaso pa Yahova.+ 23 Mbwenye mungakhonda kucita pyenepi, munadzakhala na madawo kuna Yahova. Natenepa dziwani kuti nee munakwanisa kucalira nyatwa zinafuna kukugwerani thangwi ya madawo anu. 24 Na thangwi ineyi, mangani mizinda toera ananu akhale mwenemu, pontho mangani mathanga toera kuikha pifuyo+ pyanu, mbwenye musafunika kucita pidapikira imwe.”

25 Ana a dzindza ya Gadhi na ana a dzindza ya Rubheni alonga ipi kuna Mose: “Atumiki anu anadzacita pidalonga imwe mbuyathu. 26 Anathu, akazathu na mikumbi ya pifuyo pyathu pyonsene pinasala mʼmizinda ya ku Jiliyadhi,+ 27 mbwenye atumiki anu anawambuka nkulo wa Yordani, amuna onsene mbakwata pida toera kumenya nkhondo pamaso pa Yahova,+ mwakubverana na pidalonga imwe mbuyathu.”

28 Natenepa Mose apereka pitsogolero thangwi ya iwo kuna nyantsembe Eleazare, Yoswa mwana wa Nuni na atsogoleri a madzindza a Aizraeli. 29 Mose aapanga: “Ana a dzindza ya Gadhi na ana a dzindza ya Rubheni angawambuka nkulo wa Yordani pabodzi na imwe, onsene mbakwata pida toera kumenya nkhondo pamaso pa Yahova, dziko mbikundwa pamaso panu, penepo munadzaapasa dziko ya Jiliyadhi ninga unthaka wawo.+ 30 Mbwenye angakhonda kukwata pida mbawambuka pabodzi na imwe, iwo asafunika akhale pakati panu mu dziko ya Kanani.”

31 Penepo ana a dzindza ya Gadhi na ana a dzindza ya Rubheni atawira: “Ife tinadzacita pidalonga Yahova kuna atumiki anu. 32 Ife tinadzakwata pida mbatiwambuka pamaso pa Yahova kuenda ku dziko ya Kanani,+ mbwenye dziko inafuna kutambira ife ninga unthaka wathu ndi kuntunda uno wa Yordani.” 33 Natenepa, ana a dzindza ya Gadhi, ana a dzindza ya Rubheni+ na hafu ya dzindza ya Manase+ mwana wa Zuze, Mose aapasa umambo wa Sihoni,+ mambo wa Aamori na umambo wa Ogi,+ mambo wa ku Bhasani, kwakuti ndi pisa pya mʼmizinda ya madziko anewa pabodzi na mizinda ya cifupi na ineyi.

34 Ana a dzindza ya Gadhi amanga* mizinda ya Dhibhoni,+ Ataroti,+ Aroeri,+ 35 Atroti-Sofari, Yazeri,+ Yogibheya,+ 36 Bheti-Nimira+ na Bheti-Arani+ yakuti ndi mizinda yakuzungulirwa na mipanda yakuwanga, iwo amangambo mathanga a miyala toera kuikhamo pifuyo pyawo. 37 Ana a dzindza ya Rubheni amanga mizinda ya Esibhoni,+ Eleale,+ Kiriyataimu,+ 38 Nebho+ na Bhaale-Meoni,+ mbaicinja madzina, pabodzi na nzinda wa Sibhima. Mizinda ineyi idamanga iwo, aipasa madzina anango.

39 Ana a dzindza ya Makiri+ mwana wa Manase aenda ku Jiliyadhi, akunda nzinda unoyu mbathamangisa Aamori akhali mwenemu. 40 Natenepa Mose apereka nzinda wa Jiliyadhi kuna ana a dzindza ya Makiri mwana wa Manase, iye mbatoma kukhala mwenemu.+ 41 Ana a dzindza ya Yaire mwana wa Manase aenda mʼmizinda mingʼono ya ku Jiliyadhi, iye aikunda mbaipasa dzina ya Avoti-Yaire.*+ 42 Nobha aenda ku Kenati na mʼmizinda ya cifupi na unoyu, iye aikunda mbaithula Nobha, yakuti ndi dzina yace.

33 Awa ndi makhundu a ulendo udacita mbumba ya Izraeli pidabuluka iwo ku dziko ya Ejitu+ mwakubverana na misoka+ yawo,* mbatsogolerwa na Mose pabodzi na Aroni.+ 2 Mwakubverana na pidalonga Yahova, Mose akhalemba mbuto zidakhala iwo pa khundu ibodzi na ibodzi ya ulendo wawo. Mbuto zidakhala iwo pa khundu ibodzi na ibodzi+ ya ulendo wawo ndi izi: 3 Iwo abuluka ku Ramese+ pa ntsiku 15 ya mwezi+ wakutoma. Pidamala iwo kucita Paskwa,+ mangwana mwace Aizraeli abuluka na cinyindiro pamaso pa Aejitu onsene. 4 Mu ndzidzi unoyu, Aejitu akhaikha munthumbi ana onsene autombo adaphiwa na Yahova pakati pawo,+ thangwi Yahova akhadatonga alungu+ awo mbaatcunyusa.

5 Natenepa Aizraeli abuluka ku Ramese mbamanga misasa yawo ku Sukoti.+ 6 Iwo abuluka ku Sukoti mbamanga misasa yawo ku Etamu,+ kwakuti ndi kunkhomo kwa thando. 7 Pidabuluka iwo ku Etamu abwerera nduli, mbaenda kukhundu ya Pi-Airoti, kwakuti ndi kutsogolo kwa Bhaale-Zefoni,+ mbamanga misasa yawo kutsogolo kwa Migidholi.+ 8 Pidabuluka iwo ku Pi-Airoti apita na pakati pa bara+ mbafika kuthando;+ afamba nsindzo wa ntsiku zitatu nʼthando ya Etamu,+ mbamanga misasa yawo ku Mara.+

9 Iwo abuluka ku Mara mbafika ku Elimu. Ku Elimu kukhali micera 12 ya madzi na micindu* 70, natenepa iwo amanga misasa yawo kweneko.+ 10 Iwo abuluka ku Elimu mbamanga misasa yawo dhuzi na Bara Yakufuira. 11 Pidabuluka iwo ku Bara Yakufuira amanga misasa yawo kuthando ya Sini.+ 12 Pidabuluka iwo kuthando ya Sini, amanga misasa yawo ku Dhofika. 13 Mukupita kwa ndzidzi, iwo abuluka ku Dhofika, mbamanga misasa yawo ku Alusi. 14 Pidabuluka iwo ku Alusi amanga misasa yawo ku Refidhimu,+ kwakuti nee kukhali na madzi toera mbumba imwe. 15 Pidabuluka iwo ku Refidhimu amanga misasa yawo nʼthando ya Sinai.+

16 Iwo abuluka kuthando ya Sinai mbamanga misasa yawo ku Kibhroti-Atava.+ 17 Pidabuluka iwo ku Kibhroti-Atava amanga misasa yawo ku Azeroti.+ 18 Pidabuluka iwo ku Azeroti amanga misasa yawo ku Ritima. 19 Pidabuluka iwo ku Ritima amanga misasa yawo ku Rimoni-Perezi. 20 Buluka penepo, iwo abuluka ku Rimoni-Perezi mbamanga misasa yawo ku Libhina. 21 Iwo abuluka ku Libhina mbamanga misasa yawo ku Risa. 22 Pidabuluka iwo ku Risa amanga misasa yawo ku Kelata. 23 Iwo abuluka ku Kelata mbamanga misasa yawo Kuphiri ya Seferi.

24 Buluka penepo, iwo abuluka Kuphiri ya Seferi mbamanga misasa yawo ku Aradha. 25 Pidabuluka iwo ku Aradha amanga misasa yawo ku Makeloti. 26 Pidabuluka+ iwo ku Makeloti amanga misasa yawo ku Taati. 27 Pidabuluka iwo ku Taati amanga misasa yawo ku Tera. 28 Pidabuluka iwo ku Tera amanga misasa yawo ku Mitika. 29 Mukupita kwa ndzidzi, iwo abuluka ku Mitika mbamanga misasa yawo ku Asimona. 30 Buluka penepo, iwo abuluka ku Asimona mbamanga misasa yawo ku Mosera. 31 Pidabuluka iwo ku Mosera, amanga misasa yawo ku Bhene-Yakani.+ 32 Iwo abuluka ku Bhene-Yakani mbamanga misasa yawo ku Ori-Agidhigadhi. 33 Pidabuluka iwo ku Ori-Agidhigadhi amanga misasa yawo ku Yotibhata.+ 34 Pidabuluka iwo ku Yotibhata amanga misasa yawo ku Abhrona. 35 Pidabuluka iwo ku Abhrona amanga misasa yawo ku Ezioni-Jebheri.+ 36 Pidabuluka iwo ku Ezioni-Jebheri amanga misasa yawo kuthando ya Zini+ ku Kadhesi.

37 Mukupita kwa ndzidzi, iwo abuluka ku Kadhesi mbamanga misasa yawo Kuphiri ya Ori,+ kumadire a dziko ya Edhomi. 38 Pa ntsiku yakutoma+ ya mwezi wacixanu, mwakubverana na pidalonga Yahova, nyantsembe Aroni akwira Paphiri ya Ori mbafa penepo, mu ndzidzi wakuti pakhadapita pyaka 40 pidamala kubuluka Aizraeli mu dziko ya Ejitu. 39 Aroni akhali na pyaka 123 pa ndzidzi udafa iye Paphiri ya Ori.

40 Pa ndzidzi unoyu, mambo wa ku Aradhi+ wa dzindza ya Akanani wakuti akakhala ku Nejebhu, abva kuti Aizraeli ali kubwera.

41 Mukupita kwa ndzidzi, iwo abuluka Kuphiri ya Ori+ mbamanga misasa yawo ku Zalmona. 42 Pidabuluka iwo ku Zalmona amanga misasa yawo ku Punoni. 43 Buluka penepo, iwo abuluka ku Punoni mbamanga misasa yawo ku Obhoti.+ 44 Pidabuluka iwo ku Obhoti amanga misasa yawo ku Ije-Abharimu, kumadire a dziko ya Moabhe.+ 45 Mukupita kwa ndzidzi, iwo abuluka ku Iyimu* mbamanga misasa yawo ku Dhibhoni-Gadhi.+ 46 Buluka penepo, iwo abuluka ku Dhibhoni-Gadhi mbamanga misasa yawo ku Almoni-Dhibhilataimu. 47 Pidabuluka iwo ku Almoni-Dibhilataimu iwo amanga misasa yawo ku mapiri a Abharimu+ kutsogolo kwa Nebho.+ 48 Pakumalisa, iwo abuluka ku mapiri a Abharimu mbamanga misasa yawo nʼthando ya Moabhe ku Yordani cifupi na Yeriko.+ 49 Iwo apitiriza kukhala nʼkhundu-nʼkhundu mwa Yordani kutomera ku Bheti-Jesimoti mpaka ku Abheli-Sitimu,+ nʼthando ya Moabhe.

50 Yahova alonga na Mose nʼthando ya Moabhe ku Yordani cifupi na Yeriko, mbampanga: 51 “Panga Aizraeli kuti: ‘Imwe muli kuwambuka nkulo wa Yordani toera kupita mu dziko ya Kanani.+ 52 Musafunika kuthamangisa anthu onsene anakhala mu dziko ineyi, mufudze madzimunthu awo onsene a miyala,+ madzimunthu awo onsene a utale+ na mbuto zawo zonsene zinalambira iwo.+ 53 Imwe munadzakwata dziko ineyi, mbamukhala mwenemu, thangwi mwandimomwene ine ndinakupasani dziko ineyi toera ikhale yanu.+ 54 Musafunika kugawa dziko ineyi ninga unthaka mʼmabanja mwanu mwakubverana na pinafuna kupangiza pidzindikiro.+ Misoka mikulu musafunika kuthimizira unthaka wawo, misoka mingʼono musafunika kucepesa unthaka+ wawo. Nsoka ubodzi na ubodzi unadzapaswa unthaka wace ku mbuto inafuna kupangiza cidzindikiro. Munadzatambira mbuto zanu ninga unthaka mwakubverana na madzindza a ababanu.+

55 “‘Mbwenye mungakhonda kuthamangisa anthu onsene anakhala mu dziko ineyi,+ ale anafuna imwe kusiya anakhala ninga cirombo mʼmaso mwanu, pontho ninga minga zinakulasani mʼmanungo mwanu; kusiyapo pyenepi, iwo anadzakuthabusani mu dziko inafuna kukhala imwe.+ 56 Pontho ine ndinacita kuna imwe pire pikhafuna ine kuacitira.’”+

34 Yahova alonga pontho na Mose: 2 “Pereka pitsogolero ipi kuna Aizraeli: ‘Mungapita mu dziko ya Kanani,+ munadzatambira dziko ineyi ninga unthaka, dziko ya Kanani mwakubverana na madire a dziko ineyi.+

3 “‘Madire anu a kunterero* anatomera kuthando ya Zini yakuti iri nʼkhundu mwa Edhomi. Kumabulukiro a dzuwa, madire a kunterero kwa dziko yanu anatoma kunkhomo kwa Bara ya Munyu.*+ 4 Madire anu anacinja khundu toera apite na kunterero kwa nthunda* ya Akirabhimu,+ anapitiriza mpaka ku Zini mbadhroma kunterero kwa Kadhesi-Bharneya.+ Buluka penepo, madire anu anaenda mpaka ku Azari-Adhari+ mbapitiriza mpaka ku Azimoni. 5 Ku Azimoni, madire anu anacinja khundu mbapita na ku Gowa* ya Ejitu, mbadhroma ku Bara.*+

6 “‘Kumadokero a dzuwa, madire anu anadzakhala gombe ya Bara Ikulu.* Anewa anadzakhala madire+ anu kumadokero a dzuwa.

7 “‘Awa anadzakhala madire a kunkwiriro kwa dziko yanu: Munadzaikha madire anu kutomera ku Bara Ikulu mpaka Kuphiri ya Ori. 8 Kutomera Kuphiri ya Ori munadzaikha madire anu mpaka ku Lebho-Amati+ mbadhroma ku Zedhadhi.+ 9 Madire anewa anapita na ku Zifroni mpaka ku Azari-Enani.+ Anewa anadzakhala madire a kunkwiriro.

10 Natenepa, musafunika kuikha madire a cisa canu kumabulukiro a dzuwa, kutomera ku Azari-Enani mpaka ku Sefamu. 11 Madire anewa anadzatoma ku Sefamu mpaka ku Ribhila kumabulukiro a dzuwa a Aini, mbatcitira nʼkhundu mwa Bara ya Kinereti*+ kumabulukiro a dzuwa. 12 Madire anadzafika ku Yordani mbamalisira ku Bara ya Munyu.+ Ineyi inadzakhala dziko+ yanu na madire ace.’”

13 Natenepa Mose apereka pitsogolero pyenepi kuna Aizraeli, mbaapanga: “Ineyi ndi dziko yakuti musafunika kugawirana ninga unthaka wanu mwakubverana na pinafuna kupangiza cidzindikiro,+ ninga pidalonga Yahova toera kupasa madzindza mapfemba na hafu. 14 Thangwi dzindza ya Rubheni mwakubverana na mabanjawo, dzindza ya Gadhi mwakubverana na mabanja awo, na hafu ya dzindza ya Manase atambira kale unthaka+ wawo. 15 Madzindza mawiri na hafu atambira kale unthaka wawo kuntunda uno wakumabulukiro a dzuwa a Yordani, cifupi na Yeriko kukhundu yakumabulukiro a dzuwa.”+

16 Yahova alonga pontho na Mose: 17 “Awa ndi madzina a amuna anafuna kukugawirani dziko ninga unthaka: Nyantsembe Eleazare+ na Yoswa+ mwana wa Nuni. 18 Pontho munadzakwata ntsogoleri wa dzindza ibodzi na ibodzi toera kuphedza kugawa dziko ineyi ninga unthaka+ wanu. 19 Madzina a amuna anewa ndi awa: Wa dzindza ya Yuda+ ndi Kalebe+ mwana wa Yefune; 20 wa dzindza ya Simeoni+ ndi Semueli mwana wa Amiyudhi; 21 wa dzindza ya Bhenjamini+ ndi Elidhadhi mwana wa Kisiloni; 22 wa dzindza ya Dhani+ ndi ntsogoleri Bhuki mwana wa Yogili; 23 mwa ana a Zuze,+ wa dzindza ya Manase+ ndi ntsogoleri Aniyeli mwana wa Efodhi; 24 wa dzindza ya Efraimu+ ndi ntsogoleri Kemuweli mwana wa Sifitani; 25 wa dzindza ya Zebhuloni+ ndi ntsogoleri Elizafani mwana wa Parnaki; 26 wa dzindza ya Isakari+ ndi ntsogoleri Palitiyeli mwana wa Azani; 27 wa dzindza ya Azeri+ ndi ntsogoleri Aiyudhi mwana wa Selomi; 28 wa dzindza ya Nafitali+ ndi ntsogoleri Pedhaeli mwana wa Amiyudhi.” 29 Anewa ndi amuna adapangwa na Yahova toera agawire Aizraeli dziko ineyi, toera akhale na unthaka wawo mu dziko ya Kanani.+

35 Yahova apitiriza kulonga na Mose nʼthando ya Moabhe ku Yordani+ cifupi na Yeriko: 2 “Panga Aizraeli kuti mu dziko inafuna kutambira iwo ninga unthaka, asafunika abuluse mizinda, aipase Alevi toera iwo akhale mwenemu.+ Asafunikambo apase Alevi mbuto zakudyesera pifuyo pyawo nʼkhundu mwa mizinda+ ineyi. 3 Alevi anadzakhala mʼmizinda ineyi, pontho mbuto zakudyesera pifuyo ndi toera iwo adyese pifuyo pyawo, aikhemo pinthu pyawo na mitundu inango yonsene ya pinyama piri na iwo. 4 Mbuto zakudyesera pifuyo zinafuna kupasa imwe Alevi, zisafunika zikhale za makhono* 1.000 kutomera pa mpanda, nʼkhundu mwa nzinda onsene. 5 Kunja kwa nzinda musafunika kupima makhono* 2.000 kumabulukiro a dzuwa, makhono 2.000 kunterero,* makhono 2.000 kumadokero a dzuwa, na makhono 2.000 kunkwiriro;* nzinda unoyu unakhala pakati pa mbuto ineyi. Zenezi zinadzakhala mbuto zakudyesera pifuyo mʼmizinda yawo.

6 “Munadzapasa Alevi mizinda mitanthatu yakuthawira,+ toera ule anapha munthu athawire mwenemu,+ pontho munaapasambo mizinda inango yakukwana 42. 7 Musafunika kupasa Alevi mizinda 48 pabodzi na mbuto zace zakudyesera pifuyo.+ 8 Mizinda inafuna imwe kuapasa, musafunika kuibulusa pakati pa unthaka wa Aizraeli.+ Mʼmisoka mikulu, munakwata mizinda mizinji, mʼmisoka mingʼono munakwata mizinda yakucepa.*+ Nsoka ubodzi na ubodzi unadzapereka mizinda mingasi kuna Alevi mwakubverana na mbuto idapaswa iwo ninga unthaka wawo.”

9 Yahova apitiriza kulonga na Mose: 10 “Panga Aizraeli kuti: ‘Imwe muli kuwambuka nkulo wa Yordani toera kupita mu dziko ya Kanani.+ 11 Sankhulani mizinda yakuthema kwa imwe, toera ikhale mizinda yakuthawira, toera munthu angapha ndzace mwasusudeu,* athawire+ kweneko. 12 Mizinda ineyi inadzakhala mbuto inafuna kuthawira ule adapha ndzace wakuti ali kuthawa mʼbale wa munthu adaphiwa,*+ toera ule adapha ndzace akhonde kuphiwa mbadzati kutongwa pamaso pa mbumba.+ 13 Mizinda mitanthatu inafuna kupereka imwe munadzaiphatisira munjira ineyi. 14 Munadzapereka mizinda mitatu kuntunda uno wa Yordani,+ mizinda mitatu mu dziko ya Kanani,+ toera ikhale mizinda yakuthawira. 15 Mizinda mitanthatu inadzakhala mbuto yakuthawira kuna Aizraeli, munthu wa dziko inango+ anakhala pakati pawo, na munthu wakudza, toera munthu onsene anapha ndzace+ mwasusudeu* athawire kweneko.

16 “‘Mbwenye khala iye amʼmenya na utale, munthu unoyu mbafa, iye ndi nyakupha munthu. Mwakukhonda penula,+ nyakupha munthu asafunika kuphiwa. 17 Khala amenya ndzace na mwala wakuti mbudakwanisa kumupha, iye mbafa, ule adamʼmenya ndi nyakupha munthu. Mwakukhonda penula, nyakupha munthu asafunika kuphiwambo. 18 Khala amenya ndzace na muti wakuti mbudakwanisa kumupha, iye mbafa, ule adamʼmenya ndi nyakupha munthu. Mwakukhonda penula, nyakupha munthu asafunika kuphiwa.

19 “‘Mʼbale wa munthu adaphiwa ndiye anafunika kupha ule adapha ndzace. Iye asafunika kumupha angagumanikana naye. 20 Khala iye afa pidansukhuma iye thangwi akhamuida, peno amponyera cinthu toera kuncita pyakuipa,*+ 21 peno thangwi ya kumuida, amʼmenya na manja mbafa; mwakukhonda penula, iye asafunika kuphiwa. Iye ndi nyakupha munthu. Mʼbale wa munthu adaphiwa, angagumanikana na munthu adapha ndzace, asafunika kumupha.

22 “‘Mbwenye khala pyacitika mwasusudeu, mbansukhuma thangwi nee akhamuida, peno amponyera cinthu maseze nee akhafuna kuncita pyakuipa,*+ 23 peno khala iye nee amuona, mbwenye anʼgwisira mwala, maseze nee akhali nyamalwa wace, pontho nee ayesera kuncita pyakuipa, munthu unoyu angafa, 24 mbumba isafunika kutonga munthu unoyu pamaso pa mʼbale wa munthu adaphiwa, mwakubverana na pitsogolero+ pyenepi. 25 Mbumba isafunika kupulumusa munthu adapha ndzace, toera akhonde kuphiwa na mʼbale wa munthu adapha iye, iwo asafunika amʼbweze ku nzinda udathawira iye. Asafunika akhale kweneko mpaka angafa nyantsembe wankulu adadzodzwa na mafuta+ akucena.

26 “‘Mbwenye ule adapha munthu angabuluka mbapiringana madire a nzinda udathawira iye, 27 mʼbale wa munthu adaphiwa anganʼgumana kunja kwa nzinda wakuthawira, angamupha, mʼbale wa munthu adaphiwa, nee anakhala na mulando wa ciropa. 28 Thangwi iye asafunika akhale mu nzinda udathawira iye, mpaka angafa nyantsembe wankulu. Nyantsembe wankulu angafa, iye anakwanisa kubwerera ku dziko yace.+ 29 Pitsogolero pyenepi pinadzakhala ntemo unafunika imwe kuphatisira ndzidzi onsene toera kutonga mulando mu mbuto zonsene zinafuna kukhala imwe.

30 “‘Munthu onsene anapha ndzace, asafunikambo kuphiwa thangwi yakupha munthu+ mwakubverana na umboni udapereka anthu;+ mbwenye nkhabe munthu anafunika kuphiwa thangwi ya umboni wa munthu mʼbodzi basi. 31 Nee musafunika kutawira cinthu toera kuombola umaso wa munthu adapha ndzace khala iye asafunika kuphiwa, thangwi mwakukhonda penula,+ iye asafunika kuphiwa. 32 Pontho nee musafunika kutawira cinthu toera kuombola munthu adathawira mu nzinda wakuthawira, mbamuntawirisa kuti abwerere toera akhale ku dziko yace, mu ndzidzi wakuti nyantsembe wankulu adzati kufa.

33 “‘Lekani kupswipisa dziko inakhala imwe, thangwi ciropa cisapswipisa dziko;+ pontho nkhabe cinthu cinango cinafuna kucenesa midonthi ya ciropa cidapswipisa dziko, basi ene inaceneswa na ciropa ca ule adamupha.+ 34 Lekani kupswipisa dziko inakhala imwe, yakuti ndi mwenemu munakhala ine; thangwi ine Yahova ndisakhala pakati pa mbumba ya Izraeli.’”+

36 Atsogoleri a mbumba ya dzindza ya Jiliyadhi mwana wa Makiri,+ ndzukulu wa Manase adabalwa mu dzindza ya Zuze, afendedzera Mose na atsogoleri a madzindza pabodzi na akulu a mbumba. 2 Iwo alonga: “Yahova apanga imwe mbuyathu toera mugawe dziko mwakubverana na pinafuna kupangiza cidzindikiro+ toera ikhale unthaka wa Aizraeli; pontho imwe mbuyathu mwapangwa na Yahova toera unthaka wa mʼbale wathu Zelofeadhe muupereke kuna anace a akazi.+ 3 Iwo angasembwa na amuna a madzindza anango a Aizraeli, unthaka wa akazi anewa unabuluswa mu unthaka wa ambuyathu mbuthimizirwa pa unthaka wa dzindza inafuna kuenda kakhala iwo; pyenepi pingacitika, tinadzakwatirwa khundu ibodzi ya unthaka wathu. 4 Natenepa, cingafika Caka ca Ufulu+ kuna Aizraeli, unthaka wa akazi anewa unadzabvungazwa na unthaka wa dzindza inafuna kukhala iwo, munjira ineyi, unthaka wawo unadzabuluswa pakati pa unthaka wa dzindza ya ambuyathu.”

5 Mwakubverana na pidalonga Yahova, Mose apanga Aizraeli: “Pidalonga ana a dzindza ya Zuze mphyandimomwene. 6 Ipi ndipyo pidalonga Yahova kuna ana a Zelofeadhe: ‘Iwo anakwanisa kusembwa na munthu anafuna iwo. Mbwenye asafunika asembwe na munthu wa dzindza ya pai wawo. 7 Nkhabe unthaka wa Aizraeli wakuti usafunika kubuluswa mu dzindza ibodzi mbupaswa dzindza inango, thangwi Aizraeli asafunika apitirize kukhala na unthaka wa dzindza ya ambuyawo. 8 Mwana wankazi wakuti ali na unthaka pakati pa madzindza a Izraeli, asafunika asembwe na munthu wa dzindza ya pai wace,+ toera Aizraeli apitirize kukhala na unthaka wa ambuyawo. 9 Nkhabe unthaka unafunika kubuluswa mu dzindza ibodzi mbupaswa dzindza inango, thangwi madzindza a Izraeli asafunika apitirize kukhala na unthaka wawo.’”

10 Ana a Zelofeadhe acita sawasawa na pidalonga Yahova kuna Mose.+ 11 Natenepa, Maala, Tirza, Ogla, Milka na Noa akuti ndi ana a Zelofeadhe,+ asembwa na amuna akuti akhali ana a abale a pai wawo. 12 Iwo adzakhala akazi a amuna a dzindza ya Manase, mwana wa Zuze; toera unthaka wawo upitirize mu dzindza ya pai wawo.

13 Ineyi ndi mitemo na matongero adapereka Yahova kuna Aizraeli kubulukira kuna Mose nʼthando ya Moabhe ku Yordani, cifupi na Yeriko.+