NYIMBO YA SALOMONI
1 Nyimbo yadidi kakamwe ya Salomoni:+
2 “Ndimpswompswone na mulomo wako,
Thangwi ufuni unapangiza iwe ndi wadidi kakamwe kupiringana vinyu.+
3 Khwema ya mafuta ako ndi yadidi kakamwe.+
Dzina yako ndi ninga mafuta akununkhira anathirirwa munsolo.+
Na thangwi ineyi, atsikana asakufuna.
4 Ndikwate, tende tithamange.
Thangwi mambo andipitisa nkwartu mwace!
Tende tikomerwe, mbatitsandzaya pyathu.
Tende tilonge* pya ufuni wako, wakuti ndi wadidi kakamwe kupiringana vinyu.
Na thangwi ineyi iwo* asakufuna.
5 Imwe akazi a ku Yerusalemu, ine ndine wakupswipirira,* mbwenye ndine wakubalika,
Ninga misasa ya ku Kedhari,+ ninga nguwo zinaphimbira nsasa+ wa Salomoni.
Abale anga amuna aipirwa na ine;
Iwo andituma toera ndiende kaonere minda ya mauva,
Natenepa, ine nee ndakwanisa kuonera munda wanga wa mauva.
7 Ndipange iwe anafuna ine kakamwe,
Usaenda kadyesa kupi pifuyo pyako?+
Usaenda kapipumisa kupi namasikati?
Thangwi yanji ndisafunika kufamba pakati pa mikumbi ya axamwali ako,
Ninga nkazi adaphimbira nkhope yace na nguwo yaciliro?”
8 “Iwe nkazi wakubalika kupiringana onsene, khala nee usadziwako,
Pita na mule mudapita na mikumbi ya pifuyo,
Kwata mbuzi zako toera uzidyese cifupi na misasa ya akumbizi.”
9 “Iwe wanga wakufunika, kwa ine, iwe walandana na kavalo ikazi pakati pa ngolo za Farau.+
10 Maputu ako ndi akubalika na mphete zako,*
Pontho khosi yako ndi yakubalika na mikufu ya usanga.
11 Ife tinakucitira mikufu ya ouro,
Mbatiibalikisa na parata.”
13 Kwa ine, wakufunika wanga ndi ninga budu ingʼono ya mafuta akununkhira a mira,+
Yakuti namasiku isakhala pakati pa mabere anga.
14 Kwa ine, wakufunika wanga ndi ninga tsandzo ya maluwa a muti wa hena,+
Pakati pa minda ya mauva a ku Eni-Jedhi.”+
15 “Wakufunika wanga, iwe ndiwe wakubalika!
Iwe ndiwe wakubalika! Maso ako ndi ninga a nkhangaiwa.”+
16 “Wakufunika wanga, iwe ndiwe wakubalika, iwe ndiwe wakubalika kakamwe!+
Talimba yathu iri pakati pa masamba.
17 Ntsoi ya nyumba yathu,
Ndi ya miti ya sedhro na junipero.
2 “Wakufunika wanga pakati pa atsikana,
Ndi ninga luwa pakati pa minga.”
3 “Wakufunika wanga pakati pa aphale,
Ndi ninga muti wa masau pakati pa miti ya mu nsitu.
Ndisafuna kakamwe kukhala pa nʼthundzi wace,
Misapo yace ndi yakutapira nkanwa mwanga.
4 Iye andipitisa mu sala inacitirwa phwando,*
Anthu onsene akhakwanisa kuona kuti iye asandifuna.
5 Ndipaseni nkate wa mauva akuuma toera ndiwange manungo;+
Ndipaseni masau toera ndikhale na mphambvu,
Thangwi ndiri kufa na ufuni.
6 Nkono wace wabzwere waphata nsolo wanga,
Mbandikhumbatira na nkono wace wamadyo.+
7 Ine ndisakudumbirisani imwe akazi a ku Yerusalemu,
Na kubalika kwa mbawala+ na ntsengo za nʼthando:
Lekani kundicitisa kuti ndifune munthu, mpaka ndzidzi ungakwana.+
8 Ndiri kubva fala ya wakufunika wanga!
Onani! Iye ali kufika,
Iye ali kukwira mapiri, mbanumpha nthunda.
9 Wakufunika wanga ndi ninga mbawala, ninga mwanantsengo.+
Iye ali kule, kuntsi kwa pfufu ya nyumba yathu,
Asayangʼana na mʼmajanela,
Mbasuzumira nkati na mʼmajanela.
10 Wakufunika wanga asandipanga:
‘Iwe wakufunika wanga, lamuka,
Iwe wanga wakubalika, bwera tiende pabodzi.
11 Ona basi! Ndzidzi wa khoni wapita.
Madzi nee ali kubvumbabve, iwo aca.
12 Maluwa atoma kuoneka mucisa,+
Ndzidzi wakugwanda nthawi za miti ya mauva wafika,+
Pontho anthu asabva kulira kwa madjiwa mucisa cathu.+
13 Misapo yakutoma ya nsambvu yatokota;+
Miti ya mauva iri kubuluka maluwa mbimwaza khwema yace.
Lamuka iwe wakufunika wanga, bwera kuno.
Iwe wanga wakubalika, bwera tiende pabodzi.
14 Iwe nkhangaiwa yanga, buluka mʼmphako za miyala,+
Mʼmphako za ntsonga za miyala mikulu,
Ndisafuna ndikuone, pontho ndibve fala yako,+
Thangwi fala yako ndi yadidi, pontho iwe ndiwe wakubalika.’”+
15 “Tiphatireni anambwa a ntsanga,
Anambwa angʼono a ntsanga anabvunga minda yathu ya mauva,
Thangwi minda yathu ya mauva iri na maluwa.”
16 “Wakufunika wanga ndi wanga, inembo ndine wace.+
Iye asakumbiza pifuyo+ ku mbuto yakuti iri na maluwa.+
17 Mphepo mbidzati kupepesa namasikati, nʼthundzi mbuthawa,
Wakufunika wanga, bwerera mwakucimbiza,
Ninga mbawala+ peno mwanantsengo+ pa mapiri pakati pa iwe na ine.*
3 “Namasiku patalimba yanga,
Ine ndasaka ule anafuna ine.+
Ndansaka, mbwenye nee ndanʼgumana.+
2 Ine ndinalamuka mbandifamba mu nzinda;
Mʼmiseu na mu mbuto zapakweca,
Ndinasaka ule anafuna ine.
Ndansaka, mbwenye nee ndanʼgumana.
3 Anyakuonera akuti akhafamba-famba mu nzinda andigumana.+ Ine ndaabvundza:
‘Mwaonambo ule anafuna ine?’
4 Pidamala ine kwene kusiyana nawo,
Ndagumana ule anafuna ine.
Ndamʼphata, mbandikhonda kunsiya,
Mpaka pidapita ine naye nʼnyumba ya mai wanga,+
Nkwartu ya mai wanga adandibala.
5 Ine ndisakudumbirisani imwe akazi a ku Yerusalemu,
Na kubalika kwa mbawala na ntsengo za nʼthando:
Lekani kundicitisa kuti ndifune munthu, mpaka ndzidzi ungakwana.”+
6 “Ninji cinaoneka nʼthando ninga khole ya utci,
Cakuti ciri kununkhira mafuta a mira na a olibhano,
Pabodzi na ntundu onsene wa mafuta akununkhira anaguliswa na nyamalonda?”+
7 “Onani! Ndi mpando wa Salomoni.
Amuna amphambvu akukwana 60 a anyankhondo a Izraeli,+
Ali nʼkhundu mwa mpando unoyu,
8 Onsene ali na masupada,
Onsene apfundziswa toera kumenya nkhondo,
Mʼbodzi na mʼbodzi ali na supada yace ncunu,
Toera kutsidzikiza Salomoni namasiku.”
10 Mizati yace ndi ya parata,
Pyakutsamira ndi pya ouro.
Cakukhalira ndi ca maweya a mabira adakhwazwa pinthu pyakufuirira,
Nkati mwace mwabalikiswa mwaufuni,
Na akazi a ku Yerusalemu.”
11 “Imwe akazi a ku Sioni,
Bwerani muone Mambo Salomoni,
Iye abvala nthimba ya maluwa idancitira mai wace,+
Pa ntsiku idamanga iye banja,
Pa ntsiku idatsandzaya iye na ntima onsene.”
4 “Wakufunika wanga, iwe ndiwe wakubalika!
Iwe ndiwe wakubalika!
Maso ako ndi ninga a nkhangaiwa mu nguwo yako yakuphimbira nsolo.
Tsisi yako ndi ninga nkumbi wa mbuzi,
Zinatcitira pa mapiri a Jiliyadhi.+
2 Mano ako ndi ninga nkumbi wa mabira adamala kwene kukwedzwa maweya,
Adamala kusambiswa,
Onsene ali na ana a mamphasa,
Pontho nee ibodzi idaferwa na mwanace.
3 Milomo yako ndi ninga usalu wakufuirira,
Mafala ako ndi akutsandzayisa.
Maputu ako mu nguwo yako yakuphimbira nsolo,
Ndi ninga mapindi mawiri a romaa idagwandwa pakati-nakati.
4 Khosi yako+ ndi ninga nyumba yandzulu ya Dhavidhi,+
Idamangwa na miyala idapakwa mwadidi,
Yakuti pasamanikwa maxango 1.000,
Maxango onsene akuzungulira a anyankhondo amphambvu.+
5 Mabere ako ndi ninga ana awiri a mbawala,
Ana a mamphasa a mbawala,+
Akuti asadya tsanga pa mbuto yakuti iri na maluwa.”
6 “Mphepo mbidzati kupepesa namasikati, nʼthundzi mbuthawa,
Ine ndinaenda kuphiri ya mira,
Na kuphiri ya olibhano.”+
8 Mankhadzi wanga, tende titcite pabodzi paphiri ya Libhano,
Titcite pabodzi paphiri ya Libhano.+
Tcita pa ntsonga ya phiri ya Amana,*
Pa ntsonga ya phiri ya Seniri, pa ntsonga ya phiri ya Ermoni,+
Mule munabisala nkhalamu, pa mapiri a anyalugwe.
9 Mankhadzi wanga wakufunika, iwe wakwata ntima wanga,+
Ntima wanga wapaluka thangwi yakundiyangʼana kwako,
Thangwi yakuona nkufu wako.
10 Mankhadzi wanga wakufunika, ufuni wako ndi wadidi kakamwe!+
Ufuni wako ndi wadidi kakamwe kupiringana vinyu,+
Khwema ya mafuta ako akununkhira ndi yadidi kakamwe kupiringana mitundu yonsene ya mafuta akununkhira!+
11 Mankhadzi wanga, milomo yako isadjodja uci wa mu khana.+
Uci na nkaka piri pantsi pa lirimi yako,+
Kununkhira kwa nguwo zako ndi ninga khwema ya ku Libhano.
12 Mankhadzi wanga wakufunika, iwe ndiwe ninga munda wa maluwa udafungirwa,
Ninga munda wa maluwa udazungulirwa na mpanda, ninga ncera udafungwa.
13 Ndiwe ninga paraizu ya miti ya romaa, yakuti nthawi zace zadzala na misapo,
Misapo yadidi kakamwe, pabodzi na miti yakununkhira ya hena na nardho.
14 Miti ya nardho,+ safarau, kalamo+ na ya kanela,+
Miti ya ntundu onsene ya olibhano, kuphatanizambo mira na alowe,+
Na miti yonsene yakununkhira mwadidi kakamwe.+
15 Iwe ndiwe ninga mphuno ya madzi mʼmunda wa maluwa, ninga ncera wa madzi adidi,
Ninga mikulo mingʼono inabuluka ku Libhano.+
16 Lamuka iwe mphepo yakunkwiriro;
Pita iwe mphepo yakunterero.
Pepesa mwadidi munda wanga wa maluwa.
Toera khwema yace yadidi imwazike.”
“Wakufunika mbapite mʼmunda wace wa maluwa,
Toera adye misapo yace yadidi kakamwe.”
5 “Mankhadzi wanga wakufunika,
Ine ndapita mʼmunda wanga wa maluwa.+
Ndamala kubvuna mira yanga na bhalsamu wanga.+
Ndadya khana yanga ya uci na uci wanga;
Ndamwa vinyu yanga na nkaka wanga.”+
“Axamwali anga, dyani!
Mwani, pontho ledzerani na ufuni unapangizana imwe!”+
2 “Ine ndiri kugona, mbwenye ntima wanga nee uli kugona.+
Ndiri kubva wakufunika wanga mbakagogodza nsuwo!”
‘Nkhangaiwa yanga yakusowa cilema!
Iwe wakufunika wanga, ndifungulire nsuwo,
Thangwi nsolo wanga watota na bume,
Tsisi yanga yatota na mathoto a bume ya masiku.’+
3 Ndamala kudula tunika yanga;
Ndisafunika ndiibvale pontho?
Ndamala kutsuka miyendo yanga;
Ndisafunika kuipswipisa pontho?
4 Wakufunika wanga abulusa manja ace pa benga ya nsuwo,
Ntima wanga wapaluka thangwi ya iye.
5 Ine ndalamuka toera ndifungulire nsuwo wakufunika wanga;
Manja anga akhadjodja mira,
Pyala pyanga pikhadjodja mafuta a mira,
Panaphatwa nsuwo toera kuufunga.
6 Ine ndafungulira nsuwo wakufunika wanga,
Mbwenye iye akhadabulukapo, mbaenda pyace.
Ine ndatsukwala* pidaenda iye.*
Ine ndansaka, mbwenye nee ndanʼgumana.+
Ine ndancemera, mbwenye iye nee anditawira.
7 Anyakuonera akuti akhafamba-famba mu nzinda andigumana.
Iwo andimenya, mbandiphekesa.
Anyakuonera mpanda andikwatira nguwo yanga yakuphimbira nayo nsolo.
8 Ine ndisakudumbirisani imwe akazi a ku Yerusalemu:
Mungagumana wakufunika wanga,
Mpangeni kuti ndiri kufa na ufuni.”
9 “Iwe nkazi wakubalika kupiringana onsene,
Ninji cinacitisa wakufunika wako kukhala wakusiyana na amuna onsene?
Toera utidumbirise tenepo,
Ninji cinacitisa wakufunika wako kukhala wakusiyana na amuna onsene?”
10 “Wakufunika wanga ndi wakubalika na wakuxawa;
Nkhabe unango ninga iye pakati pa amuna 10.000.
11 Nsolo wace ndi wakubalika ninga ouro, ouro yadidi kakamwe.
Tsisi yace isapheperuka ninga masamba a ncindu,*
Ndi yakupswipa ninga khungubwe.
12 Maso ace ndi ninga nkhangaiwa cifupi na madzi akuwewa,
Zinasamba mu nkaka,
Mbazipuma nʼkhundu mwa thawala idadzala na madzi.
13 Maputu ace ndi ninga pikhudhi pya miti yakununkhira,+
Ninga nkuku wa miti yakununkhira.
Milomo yace ndi ninga maluwa anadjodja mafuta a mira.+
14 Pyala pya manja ace ndi pya ouro, idabalikiswa na miyala ya krizolito.
Diti yace ndi ya nyanga zakuyetimira za ndzou, zidaphimbirwa na miyala ya safira.
15 Miyendo yace ndi ninga mizati ya miyala ya marmore idatcimikwa pa ouro yadidi kakamwe.
Maonekero ace ndi akubalika ninga dziko ya Libhano, wakukhonda landanisika ninga miti ya sedhro.+
16 Mulomo wace ndi wakutapira kakamwe,
Pyonsene muna iye ndi pyakutsandzayisa.+
Imwe akazi a ku Yerusalemu, unoyu ndi wakufunika wanga, ule anafuna ine.”
6 “Iwe nkazi wakubalika kupiringana onsene,
Wakufunika wako ali kupi?
Wakufunika wako aenda na kupi?
Tende tikansake pabodzi.”
2 “Wakufunika wanga aenda kumunda wace wa maluwa,
Ku pikhudhi pya miti yakununkhira,
Toera kudyesa pifuyo ku mbuto zakubalika,
Pontho toera kutcoda maluwa.+
3 Ine ndine wa wakufunika wanga,
Pontho wakufunika wanga ndi wanga.+
Iye asakumbiza pifuyo ku mbuto yakuti iri na maluwa.”+
4 “Wakufunika wanga,+ iwe ndiwe wakubalika ninga Tirza,*+
Wakubalika ninga Yerusalemu,+
Ninga misoka ya anyankhondo idagumanyikana toera kumenya nkhondo.+
5 Leka kundiyangʼana,+
Thangwi ungandiyangʼana, ntima wanga usapaluka.
Tsisi yako ndi ninga nkumbi wa mbuzi,
Zinatcitira pa mapiri a Jiliyadhi.+
6 Mano ako ndi ninga nkumbi wa mabira,
Adamala kusambiswa,
Onsene ali na ana a mamphasa,
Pontho nee ibodzi idaferwa na mwanace.
7 Maputu ako mu nguwo yako yakuphimbira nayo nsolo,
Ndi ninga mapindi mawiri a romaa idagwandwa pakati-nakati.
9 Mʼbodzi basi ndiye nkhangaiwa yanga+ yakusowa cilema.
Iye abalwa ekha basi mʼmimba mwa mai wace,
Iye ndi wakufunika kakamwe kuna ule adamʼbala.
Atsikana asamuona, mbancemera wakutsandzaya;
Akazi a mambo pabodzi na akazace apakhundu asansimba.
10 ‘Mbani unoyu anayetimira ninga mʼbambakuca,*
Wakubalika ninga mwezi,
Wakucena ninga ceza ca dzuwa,
Wakubalika ninga misoka ya anyankhondo idagumanyikana toera kumenya nkhondo?’”+
11 “Ine ndaenda kumunda wanga wa miti ya nogera,*+
Toera kuona pidakula nʼgowa,
Toera kuona khala miti ya mauva ikhadaphukira,
Khala miti ya romaa ikhadabuluka maluwa.
12 Mwakukhonda dikhira,
Cifuno ca ntima wanga candikwata,
Mpaka dhuzi na ngolo za mbumba yanga yadidi kakamwe.”
13 “Bwerera, bwerera iwe Sulamita!
Bwerera, bwerera,
Toera ife tikuone!”
“Thangwi yanji musayangʼanisa Sulamita mwakudzumatirwa?”+
“Iye ndi ninga kubvina kwa misoka miwiri ya anthu!”
7 “Iwe ntsikana wadidi,
Miyendo yako ndi yakubalika kakamwe mʼmasandalya ako!
Ntcafu zako ndi zakubalika ninga pyakubalikisa manungo,
Pidacitwa na amesiri aluso kakamwe.
2 Ncombo wako ndi ninga ndiko,
Yakuti cipo musasoweka vinyu yakubvungazwa.
Mimba yako ndi ninga nkuku wa tirigu,
Udazungulirwa na maluwa.
3 Mabere ako ndi ninga ana awiri a mbawala,
Ana a mamphasa a mbawala.+
4 Khosi yako+ ndi ninga nyumba yandzulu idamangwa na nyanga za ndzou.+
Mphuno yako ndi ninga nyumba yandzulu ya ku Libhano,
Idayangʼana kukhundu ya ku Dhamasku.
5 Nsolo wako ndi wakubalika ninga Phiri ya Karmelo,+
Tsisi yako+ ndi ninga maweya a mabira adakhwazwa pinthu pyakufuirira,+
Mambo asakwatika ntima* na kubalika kwa tsisi yako yakulapha.
6 Iwe ntsikana wakufunika na wakubalika kakamwe,
Ndiwe wakutsandzayisa kakamwe kupiringana pinthu pyonsene pyakutsandzayisa ntima!
7 Cimo cako ndi ninga muti wa nʼdikhwa,
Mabere ako ndi ninga matsandzo a ncindu.+
8 Ine ndalonga: ‘Ndinakwira mu nʼdikhwa,
Toera nditcode misapo yace.’
Mabere ako mbakhale ninga matsandzo a mauva,
Khwema ya muya wako mbikhale ninga kununkhira kwa masau;
9 Mulomo wako mbukhale ninga vinyu yadidi kakamwe.”
“Iyo mbidjodje mpaka pa kholongo ya wakufunika wanga,
Mbiwewa mwapangʼono-pangʼono pa milomo ya ale anagona.
10 Ine ndine wa wakufunika wanga,+
Iye asandifuna.
12 Tilamuke nakweru toera tiende kuminda ya mauva,
Toera tione khala miti ya mauva yaphukira,
Khala maluwa abuluka,+
Khala miti ya romaa iri na maluwa.+
Kweneko ine ndinapangiza ufuni wanga kuna iwe.+
13 Misapo ya mandhragora+ isamwaza khwema yace;
Cifupi na misuwo yathu pali na mitundu yonsene ya misapo yadidi.+
Misapo ipswa na yakuuma,*
Wakufunika wanga, misapo ineyi ndaikoyera iwe.
8 “Mbapidakhala mwadidi mbudakhala mʼbale wanga wamamuna,
Adayamwa mabere a mai wanga!
Mbidakugumana kunja, ine mbidakumpswompswona,+
Pontho nkhabe munthu akhafuna kundipwaza.
Mbidakupasa vinyu yakununkhira mwadidi toera umwe,
Na sumu yakutapira ya misapo ya romaa.
3 Nkono wako wabzwere mbudaphata nsolo wanga,
Mbundikhumbatira na nkono wako wamadyo.+
4 Ine ndisakudumbirisani imwe akazi a ku Yerusalemu,
Lekani kundicitisa kuti ndifune munthu, mpaka ndzidzi ungakwana.”+
5 “Mbani unoyu anabwera buluka kuthando,
Wakuti atsamira wakufunika wace?”
“Ine ndakulamusa pantsi pamuti wa masau.
Penepo mai wako abva kupha mu ndzidzi udakubala iye.
Iye abva kupha penepo pidakubala iye.
6 Ndiikhe ninga cidzindikiro* muntima mwako,
Ninga cidzindikiro pa nkono wako,
Thangwi ufuni ndi wakuwanga ninga kufa,+
Ufuni usaphemba kukhulupirika na ntima onsene ninga Masiye* akuti nkhabe kubwerera nduli.
Ufuni ndi ninga malirimi a moto wakugaka, lirimi ya moto wa Yah.*+
7 Madzi mazinji nkhabe kwanisa kuthimisa ufuni,+
Pontho ufuni nkhabe kulobzweka na mphambvu ya kuwewa kwa madzi a mikulo.+
Munthu angapereka pinthu pyonsene pyadidi pya nʼnyumba mwace toera akhale na ufuni,
Anthu mbadapwaza pinthu pyenepi.”*
8 “Ife tiri na mʼbale wathu wankazi wakuti ndi wangʼono,+
Iye adzati kubuluka mabere.
Tinacitanji na mʼbale wathu wankazi,
Pa ntsiku inafuna iye kubvundzirwa toera kumanga banja?”
9 “Iye angakhala mpanda,
Ife tinamanga mpanda ungʼono wa parata padzulu pace,
Mbwenye iye angakhala nsuwo,
Ife tinanfunga na tabwa ya sedhro.”
10 “Ine ndine mpanda,
Mabere anga ndi ninga nyumba za ndzulu.
Natenepa, pamaso pace ine ndadzakhala,
Ninga munthu wakuti ali muntendere.
11 Salomoni akhali na munda wa mauva+ ku Bhaale-Amoni.
Munda unoyu wa mauva ausiya mʼmanja mwa anyakulima.
Mʼbodzi na mʼbodzi akhamʼbweresera kobiri 1.000 za parata thangwi ya misapo yace.
12 Ine ndiri na munda wa mauva wakuti ndi wanga basi.
Salomoni, kobiri 1.000 za parata ndi zako,
Pontho kobiri 200 za parata ndi za ale anaonera misapo yako.”
13 “Iwe wakuti usakhala mu mbuto zakubalika,+
Andzanga asabvesera fala yako.
Ndisiye ndibveserembo fala yako.”+
14 “Thamanga wakufunika wanga,
Thamanga mwakucimbiza ninga mbawala,+
Peno ninga mwanantsengo,
Padzulu pa mapiri a miti yakununkhira.”*
Peno: “Tende ticedze.”
Na thangwi ineyi, atsikana asakufuna.
Peno: “wakubithimira.”
Peno: “wakubithimira.”
Munjira inango: “pakati pa tsisi yako yakulukwa.”
Fala na Fala: “Mafuta anga a nardho.”
Peno: “wa nʼkhundu mwa bara.”
Fala na Fala: “nʼnyumba ya vinyu.”
Munjira inango: “mapiri akugawika.” Peno: “mapiri a Bheteri.”
Unoyu ndi mpando wakuti ukhali na ntsoi ukhaphatisirwa toera kuthukula anthu akufunika kakamwe.
Peno: “Anti-Libhano.”
Peno: “ndafewa manungo.”
Munjira inango: “Ine ndamala mphambvu pidalonga iye.”
Munjira inango: “ninga tsandzo ya ntcindu.”
Peno: “Nzinda Wakutsandzayisa.”
Peno: “mambakuca.”
Ntundu unoyu wa muti usagumanika ku Izraeli, misapo yace yalandana na makastanya.
Peno: “asatunduka.”
Fala na Fala: “yakale.”
Peno: “selo.”
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
“Yah” ndi dzina ya Yahova ingalembwa mwacigwagwa.
Munjira inango: “mbadapwaza munthu unoyu.”
Peno: “ya bhalsamu.”