NYIMBO YA CILIRO
א [Alefi]
1 Yerusalemu wakuti kale akhadadzala na anthu azinji,+ cincino asala ekhene!
Nzinda wakuti ukhali na anthu azinji kupiringana mizinda ya anthu a madzindza anango+ wadzakhala ninga nkazi wanzice,
Nzinda wakuti ukhali wakulemedzeka pakati pa maprovinsya, wadzakhala bitcu!+
ב [Bheti]
2 Iye asalira kakamwe namasiku,+ pontho misozi yace isawewa kunkhope kwace.
Amuna onsene akuti akhanfuna, nkhabepo adasala toera kumʼbalangaza.+
Andzace onsene ansandukira;+ mbadzakhala anyamalwa ace.
ג [Gimeli]
3 Yuda aendeswa ku ubitcu,+ pontho iye asathabuka kakamwe ninga bitcu.+
Iye asafunika kukhala pakati pa anthu a madzindza anango;+ pontho iye nkhabe gumana mbuto toera kupuma.
Onsene akhantowera anʼgumana mu ndzidzi ukhathabuka iye.
ד [Dhaleti]
4 Miseu yakuenda ku Sioni iri paciliro, thangwi nkhabebve munthu anabwera ku maphwando.+
Misuwo yace yonsene yamala kufudzwa;+ anyantsembe ace ali kubulira.
Atsikana ace ali paciliro, Sioni ali kuthabuka kakamwe.
ה [He]
5 Cincino iwo ali kutongwa na anyamalwa awo; pontho anyamalwa awo asakhala pyawo mwakukhonda dzudzumika.+
Yahova aabweresera nyatwa thangwi ya madawo awo mazinji.+
Anawo akwatwa na anyamalwa awo,+ mbaendeswa ku ubitcu.
ו [Vau]
6 Kubalika konsene kwa mbumba ya ku Sioni kwamala.+
Akulu-akulu ace ndi ninga mbawala zidasowa mbuto yakusodza,
Pontho iwo asafamba mwakuneta kakamwe patsogolo pa ale anaatowerera.
ז [Zaine]
7 Mu ntsiku zenezi zakuti ali wakutsukwala na wakusowa mbuto yakukhala, Yerusalemu asakumbuka,
Pinthu pyonsene pyadidi pikhali na iye mu ndzidzi wakale.+
Pidakundwa mbumba yace na nyamalwa mbakhonda kuoneka munthu toera kumʼphedza,+
Anyamalwa ace amuona, mbanseka thangwi yakufudzwa kwace.+
ח [Heti]
8 Yerusalemu adawa kakamwe.+
Na thangwi ineyi, iye adzakhala cinthu cakunyanyasa.
Onsene akhamulemedza, cincino asampwaza, thangwi iwo amuona cipezipezi.+
Iye asabulira,+ asakhala kutali na anthu, mbapasika manyadzo.
ט [Tete]
9 Nguwo zace ziri na midonthi.
Iye nee anyerezera pinthu pikhafuna kuncitikira kutsogolo.+
Iye afudzwa mwakudzumatirisa; pontho iye nkhabe munthu toera kumʼbalangaza.
Yahova, onani nyatwa zanga, thangwi nyamalwa wanga akuzika ekhene.+
י [Yodhe]
10 Nyamalwa akwata mpfuma zace zonsene.+
Iye aona madzindza a anthu mbakapita pa mbuto yace yakucena,+
Madzindza adakhondesa imwe kuti nee asafunika kupita pakati pa mbumba yanu.
כ [[Kafe]
11 Anthu onsene a ku Yerusalemu ali kubulira; iwo ali kusaka cakudya.+
Iwo apereka pinthu pyawo pyakufunika kakamwe toera apaswe cakudya, toera apitirize kukhala na umaso.
Yahova, onani basi, ine ndadzakhala ninga nkazi wakusowa basa.
ל [Lamedhi]
12 Imwe monsene munapita na mʼmiseu, kodi musaona kuti nyatwa ineyi ndi ingʼono?
Ndiyangʼaneni, pontho onani!
Iripo nyatwa inango idalandana na nyatwa idatcunyuswa na ine,
Ninga nyatwa idanditcunyusa na Yahova pa ntsiku yakuipirwa kwace kukulu?+
מ [Memi]
13 Iye atumiza moto buluka kudzulu mbupita mʼmagogodo mwanga,+ moto unoyu usapisa magogodo anga onsene.
Iye ateyera nsampha miyendo yanga; andikakamiza toera ndibwerere nduli.
Iye andicitisa kukhala ninga nkazi adasiyiwa.
Ine ndiri kubva kupha ntsiku yonsene.
נ [Nuni]
14 Madawo anga amangirwa nʼkhosi mwanga ninga goli, iye aamanga na manja ace.
Iwo aikhwa nʼkhosi mwanga, pontho mphambvu zanga zamala.
Yahova andipereka mʼmanja mwa anthu akuti nee ndinakwanisa kuakunda.+
ס [Sameki]
15 Yahova aponya kunja anyankhondo onsene akhali pakati panga.+
Iye acemeresa mwinji wa anthu toera ubwere kudzandifudzira aphale anga.+
Yahova aponda-ponda Yuda pa mbuto yakukamulira mauva.+
ע [Ayine]
16 Ine ndiri kulira thangwi ya pinthu pyenepi;+ misozi iri kuwewa buluka mʼmaso mwanga.
Thangwi ule wakuti mbadandibalangaza peno kundipasa mphambvu ali kutali na ine.
Ananga ali akutsukwala kakamwe, thangwi nyamalwa awina.
פ [Pe]
17 Sioni afuthula manja ace+ toera kuphemba ciphedzo; mbwenye iye nkhabe munthu toera kumʼbalangaza.
Yahova apanga anthu onsene anakhala nʼkhundu mwa Yakobe toera akhale anyamalwa ace.+
Yerusalemu adzakhala cinthu cakunyanyasa kuna iwo.+
צ [Tsadhe]
18 Yahova ndi wakulungama,+ thangwi ine ndasiya kubvera mitemo yace.+
Imwe anthu a mbumba zonsene; bveserani, pontho onani nyatwa yanga.
Atsikana anga na aphale anga aendeswa ku ubitcu.+
ק [Kofi]
19 Ine ndacemera ale akhandifuna kakamwe, mbwenye iwo andisandukira.+
Anyantsembe anga na akulu-akulu anga afa mu nzinda,
Mu ndzidzi ukhasaka iwo cakudya toera apitirize kukhala na umaso.+
ר [Rexi]
20 Yahova, onani, ine ndiri pa nyatwa ikulu kakamwe.
Mʼmimba mwanga muli yalu-yalu.
Ntima wanga uli wakutsukwala, thangwi ine ndakhala munthu wakukhonda bvera kakamwe.+
Kunja anthu asaphiwa na supada;+ mbwenye nkati mwa nyumba anthu asafambo.
ש [Xini]
21 Anthu asabva kubulira kwanga; nkhabe munthu toera kundibalangaza.
Anyamalwa anga onsene abva kulonga pya nyatwa yanga.
Iwo ali akutsandzaya, thangwi ndimwe adandibweresera nyatwa ineyi.+
Mbwenye imwe munadzabweresa ntsiku idalonga imwe;+ pa ntsiku ineyi, iwo anadzakhalambo ninga ine.+
ת [Tau]
22 Pinthu pyonsene pyakuipa pidacita iwo, mbapifike kuna imwe,
Pontho atcunyuseni kakamwe+ ninga mudanditcunyusa imwe thangwi ya madawo anga onsene.
Thangwi nyatwa zanga ndi zizinji, pontho ntima wanga uli kuduwala.
א [Alefi]
2 Yahova aphimbira nzinda wa Sioni na khole ya ukali wace!
Kubulukira kudzulu, iye aponya pantsi+ kubalika kwa Izraeli.
Pa ntsiku ya ukali wace, iye nee akumbuka mbuto inaikhira iye manyalo ace.+
ב [Bhete]
2 Yahova afudza mbuto zonsene zinakhala Yakobe, iye nee azibvera ntsisi.
Thangwi ya ukali wace, iye agomola mbuto zakuwanga za ku Yuda.+
Iye afudza umambo,+ mbapasa manyadzo akulu-akulu ace.+
ג [Gimeli]
3 Thangwi ya ukali wace ukulu, iye amalisa mphambvu zonsene za Izraeli.
Pidabwera anyamalwa athu,+ iye nee atiphedza,*
Pontho ukali wace wapitiriza kugaka kuna Yakobe, ninga moto unapisa pinthu pyonsene piri nʼkhundu mwace.+
ד [Dhaleti]
4 Iye akunga uta wace ninga nyamalwa, nkono wace wamadyo wakhunganyika toera kumenya nkhondo ninga nyamalwa;+
Iye apha anthu onsene akhakomerwa na iye.+
Ukali wace aukhutula ninga moto+ mu nsasa wa nzinda wa Sioni.+
ה [He]
5 Yahova adzakhala ninga nyamalwa;+
Iye afudza Izraeli.
Afudza nyumba zawo za ndzulu;
Afudza mbuto zawo zonsene zakuwanga.
Kuna mbumba ya Yuda, iye athimizira kutsukwala na ciliro.
ו [Vau]
6 Iye asatsalakana nsasa wace mwakuipirwa,+ ninga nsasa wakuti uli mʼmunda.
Iye amalisa phwando yace.+
Yahova acitisa kuti maphwando na ntsiku ya Sabudu, piduwaliwe ku Sioni,
Pontho, thangwi yakuipirwa kwace kukulu, iye asapwaza mambo na nyantsembe.+
ז [Zaine]
7 Yahova akhonda guwa yace;
Apwaza mbuto yace yakucena.+
Apereka kuna anyamalwa+ mipanda ya nyumba zace zakuwanga,
Iwo akhuwa nʼnyumba ya Yahova,+ ninga pa ntsiku ya phwando.
ח [Heti]
8 Yahova atonga kufudza mpanda wa nzinda wa Sioni.+
Iye apima nzinda na nkhambala yakupima nayo.+
Iye nee abweza nkono wace toera ukhonde kufudza.
Iye acitisa kuti nthunda na mpanda pifudzwe.
Pyonsene pyamala mphambvu.
ט [Tete]
9 Misuwo yace yamala kugwa pantsi.+
Iye afudza, mbagwanda-gwanda mipiringanyo yace.
Mambo wace na akulu-akulu ace aendeswa ku ubitcu kuna anthu a madzindza anango.+
Mwambo nee usabverwa, pontho aprofeta nee asatambirabve masomphenya a Yahova.+
י [Yodhe]
10 Akulu-akulu a mu nzinda wa Sioni akhala pantsi, mbamatama.+
Asaponya mataka munsolo, mbabvala masakha.+
Atsikana a ku Yerusalemu asakotamisa misolo yawo mpaka pantsi.
כ [Kafe]
11 Maso anga aneta thangwi yakulira kakamwe.+
Mʼmimba mwanga muli yalu-yalu.
Ntima wanga watsukwala kakamwe,* thangwi yakufudzwa kwa mbumba yanga,+
Thangwi anangʼono na ana apabere asakomoka mu mbuto zapakweca mu nzinda.+
ל [Lamedhi]
12 Mʼbodzi na mʼbodzi asapanga mai wace: “Mai, ine ndiri na njala, pontho ndiri na nyota!”*+
Mu ndzidzi unakomoka iwo mu mbuto zapakweca mu nzinda, ninga munthu adaphekeswa,
Mu ndzidzi wakuti mʼbodzi na mʼbodzi ali kufa* mʼmanja mwa mai wace.
מ [Memi]
13 Ndinaphatisiranji ninga umboni kuna imwe,
Peno ndinakulandanisani nanji imwe mbumba ya ku Yerusalemu?
Ndinakulandanisani nanji imwe mbumba ya ku Sioni toera kukubalangazani?
Thangwi nyatwa yanu ndi ikulu kakamwe ninga bara.+ Mbani wakuti anakwanisa kukuwangisani?+
נ [Nuni]
14 Masomphenya adaoneswa aprofeta anu thangwi ya imwe akhali apezi na akusowa basa,+
Iwo nee apangiza pakweca madodo anu, mbadacita pyenepi, imwe nee mbamudaendeswa ku ubitcu,+
Mbwenye iwo apitiriza kukupangani masomphenya apezi na akunyengeza.+
ס [Sameki]
15 Anthu onsene anapita na njira asakumenyerani manja mwakupwaza.+
Asaimba ciruzwi mwakudzumatirwa,+ asasukusa nsolo thangwi ya mbumba ya ku Yerusalemu, mbalonga:
“Kodi uyu ndi nzinda ukhalonga iwo kuti ndi wakubalika kakamwe, wakuti usatsandzayisa anthu pa dziko yonsene yapantsi’?”+
פ [Pe]
16 Anyamalwa anu onsene asakulongani mwakuipa.
Iwo asaimba ciruzwi, pontho asakikiriza mano awo, mbalonga: “Ife taafudza.+
Ineyi ndi ntsiku ikhadikhira ife!+ Iyo yafika, pontho ife tiri kuiona!”+
ע [Ayine]
17 Yahova acita pikhafuna iye;+ iye acita pidalonga iye,+
Pinthu pidalonga iye kale kakamwe kuti mbadapicita.+
Afudza mwakukhonda kubvera ntsisi.+
Iye atawirisa kuti nyamalwa atsandzaye thangwi ya imwe; iye apasa mphambvu anyamalwa anu.
צ [Tsadhe]
18 Iwe mpanda wa Sioni, mitima ya mbumba isalirira Yahova.
Misozi mbiwewe masiku na masikati ninga madzi a mu nkulo.
Lekani kupuma, maso anu mbaleke kupuma.
ק [Kofi]
19 Lamuka! Phuphudza nakulira.
Khutula ntima wako ninga madzi pamaso pa Yahova.
Lamusa manja ako kuna iye thangwi ya umaso wa anako,
Akuti ali kukomoka na njala mʼmiseu yonsene.+
ר [Rexi]
20 Yahova, onani! Yangʼanani ale adatcunyusa imwe kakamwe.
Kodi akazi asafunika kudya anawo adabala iwo, ana adabala iwo akuti ali na ungumi wadidi?+
Kodi anyantsembe na aprofeta asafunika kuphiwa pa mbuto yakucena ya Yahova?+
ש [Xini]
21 Aphale na ankhalamba amala kuphiwa, iwo ali thasa-thasa mʼmiseu.+
Atsikana anga na aphale anga aphiwa na supada.+
Imwe mwaapha pa ntsiku yakuipirwa kwanu; imwe mwaapha mwakukhonda kuabvera ntsisi.+
ת [Tau]
22 Imwe musacemeresa pyakugopesa buluka mʼmakhundu onsene, ninga muli kucemera anthu pa ntsiku ya phwando.+
Pa ntsiku yakuipirwa kwa Yahova, nkhabe munthu adathawa, nee kupulumuka;+
Ale adabala ine mbandiakuza, nyamalwa wanga aapha.+
א [Alefi]
3 Ine ndaona anthu mbakathabuka, thangwi Mulungu aipirwa kakamwe mbaatcunyusa.
2 Iye andithamangisa, mbandifambisa ncidima, tayu mu ceza.+
3 Mwandimomwene, iye asandimenya na djanja yace mwakubwereza-bwereza ntsiku yonsene.+
ב [Bheti]
4 Iye athabusa manungo anga na khanda yanga;
Iye aswa magogodo anga.
5 Iye andizungulira; aikha venenu+ yakuwawa na nyatwa nʼkhundu mwanga.
6 Iye andikakamiza toera ndikhale mu mbuto za cidima, ninga anthu adafa kale kakamwe.
ג [Gimeli]
7 Iye andizungulira na mpanda toera ndikhonde kuthawa;
Andimanga na maunyolo akulemera a nkuwa.+
8 Ndingakhuwa mwakusowa cidikhiro toera kuphemba ciphedzo, iye asakhonda kubvesera* phembero yanga.+
9 Iye afunga njira zanga na miyala yakusemwa;
Iye agongonyesa njira zanga.+
ד [Dhaleti]
10 Iye asandibisalira ninga ursu,* ninga nkhalamu idabisala.+
12 Akunga uta wace, pontho iye andicitisa kukhala cinthu cinafuna iye kulasa.
ה [He]
13 Iye andilasa na mapswimo a mʼbudu yace mbapita mpaka mu mpswiyo zanga.
14 Ine ndadzakhala cinthu cakusekesa kuna mbumba zonsene, ntsiku zonsene iwo asaimba nyimbo zakundisingirira.
15 Iye andidzadza na pinthu pyakuwawa, mbandikhutisa na masamba a muti wakuwawa.+
ו [Vau]
16 Iye asaswa mano anga na miyala;
Asandicitisa kugona pa dotha thangwi yakugopa.+
17 Imwe musandibulusira ntendere; ine ndaduwala kuti kutsandzaya ninji.*
18 Na thangwi ineyi, ine ndisalonga: “Kubalika kwanga kwamala, cidikhiro canga kuna Yahova camalambo.”
ז [Zaine]
19 Kumbukani kuti ndiri kuthabuka, pontho nee ndiri na pakukhala;+ kumbukanimbo kuti ndisadya masamba akuwawa na venenu yakuwawa.+
20 Mwandimomwene, imwe munadzandikumbukira, pontho munadzakotama pana ine toera kundiphedza.+
21 Ine ndisakumbuka pyenepi muntima mwanga; na thangwi ineyi, ndinapitiriza kudikhira mwakupirira.+
ח [Heti]
23 Iye asatibvera ntsisi ntsiku zonsene;*+ iye ndi wakunyindirika ndzidzi onsene.+
24 Ine ndalonga: “Yahova ndi unthaka wanga,+ na thangwi ineyi, ine ndinapitiriza kunʼdikhira mwakupirira.”+
ט [Tete]
25 Yahova ndi wadidi kuna ule anapitiriza kunʼdikhira,+ kuna munthu anapitiriza kunsaka.+
26 Mphyadidi kudikhira+ mwakupfulika cipulumuso ca Yahova.+
27 Mphyadidi kuti munthu apfundze kuthukula ntolo mbaciri mʼphale.*+
י [Yodhe]
28 Mulungu anganʼthukisa ntolo, iye mbakhale pyace pantsi ekhene mwakupfulika.+
29 Mbakotamise nsolo wace mpaka mulomo wace ufike pantsi;+ panango cidikhiro+ ciripo cakuti iye anadzapulumuswa.
30 Mbapereke phutu yace kuna ule anafuna kumʼmenya; pontho iye mbatikanwe kakamwe.
כ [Kafe]
31 Thangwi Yahova nee anatikhonda kwenda na kwenda.+
32 Maseze iye atitcunyusa, iye anadzatibvera ntsisi thangwi ya ufuni wace ukulu.+
33 Thangwi muntima mwace iye nee asakomerwa na kuonesa nyatwa anthu peno kuatsukwalisa.+
ל [Lamedhi]
34 Kuponda-ponda anyankaidi onsene pa dziko yapantsi,+
35 Kukhonda kucitira munthu pinthu pyakulungama pamaso pa Wankulu Kakamwe,+
36 Peno kuponderera munthu pakutonga nseru wace,
Yahova nkhabe kutawirisa pinthu pyenepi.
מ [Memi]
37 Mbani anafuna kulonga cinthu, mbacicitika; Yahova angakhonda kulonga kuti cinthu ceneci cicitike?
38 Pamulomo wa Wankulu Kakamwe,
Nkhabe kubuluka pabodzi pene pinthu pyadidi na pyakuipa.
39 Thangwi yanji munthu* asafunika kudungunya na nyatwa zinaona iye thangwi ya madawo ace?+
נ [Nuni]
40 Tendeni tinyerezere mwadidi, mbationesesa makhaliro a umaso wathu,+ pontho tendeni tibwerere kuna Yahova.+
41 Tendeni tidembetere na ntima onsene, pontho tilamuse manja athu kuna Mulungu kudzulu,+ mbatilonga:
42 “Ife tadawa, mbatikhonda kubvera;+ natenepa, imwe nee mwatilekerera.+
ס [Sameki]
43 Imwe mwaipirwa mbamutipingiza toera tikhonde kufika dhuzi na imwe;*+
Mwatitowerera mbamutipha nee kutibvera ntsisi.+
44 Imwe mwapingiza na khole toera maphembero athu akhonde kupita mbafika kuna imwe.+
45 Musaticitisa kukhala ninga pinthu pyakunyanyasa peno pirombo pakati pa mbumba zinango.
פ [Pe]
46 Anyamalwa athu onsene asafungula milomo yawo, mbatilonga mwakuipa.+
47 Ndzidzi onsene ife tisagopa, mbatisowa cakucita,+ ife tafudzwa mbatisala madembe.+
48 Mʼmaso mwanga musabuluka misozi ninga madzi a mu nkulo thangwi yakufudzwa kwa mbumba yanga.+
ע [Ayine]
49 Ine ndinapitiriza kulira* ndzidzi onsene, nee kumatama,+
50 Mpaka Yahova angayangʼana pantsi, mbaona na kudzulu.+
51 Ntima wanga usatsukwala kakamwe ndingaona pinthu pidacitikira anthu onsene a mu nzinda wanga.+
צ [Tsadhe]
52 Anyamalwa anga anditeyera nsampha ninga mbalame, maseze iwo nee akhali na mathangwi toera kundiida.
53 Iwo ayesera kundipha nʼdjenje; pontho iwo apitiriza kundiponyera miyala.
54 Madzi adzala mpaka kubiza nsolo wanga, penepo ine ndalonga: “Basi, ndafambo ine!”
ק [Kofi]
55 Yahova, ine ndacemera dzina yanu pikhali ine nʼdjenje yakuzika.+
56 Bveserani fala yanga; lekani kufunga makutu anu mu ndzidzi unaphemba ine ciphedzo kuna imwe toera mundipulumuse.
57 Imwe mwafendedza dhuzi pa ntsiku idakucemerani ine. Imwe mwalonga: “Leka kugopa.”
ר [Rexi]
58 Yahova, imwe mwabvunulira nseru wanga, imwe mwaombola* umaso wanga.+
59 Yahova, imwe mwaona pinthu pyakuipa pidacitirwa ine; ndaphata miyendo, tongani nseru wanga mwakulungama.+
60 Imwe mwaona pinthu pyakuipa pidandibwezera iwo, pinthu pyonsene pyakuipa pidabverana iwo toera kundicitira.
ש [Sini] peno [Xini]
61 Yahova, imwe mwabva kutikana kudacita iwo, pinthu pyonsene pyakuipa pidabverana iwo toera kundicitira,+
62 Imwe mwabva mafala adandilonga anyamalwa anga, mwabvambo mafala adandilonga iwo mwaciwerewere ntsiku yonsene.
63 Aoneni basi, angakhala pantsi peno angalimira, iwo asaimba nyimbo zakundisingirira!
ת [Tau]
64 Yahova, imwe munadzaabwezera mwakubverana na mabasa awo.
65 Imwe munadzaacitisa kukhala anthu akuuma ntima, ineyi ndi dzedze inafuna kuapasa imwe.
66 Yahova, imwe munadzaatowerera mwakuipirwa, mbamuafudza pa dziko yapantsi.
א [Alefi]
4 Ouro yakuyetimira, yakuti ikhali yadidi kakamwe,+ nee isayetimirabve!
Miyala ya pa mbuto yakucena,+ iri balala-balala mʼmiseu yonsene!+
ב [Bheti]
2 Mbumba yakufunika ya ku Sioni, yakuti ntengo wace ukhali ninga ouro yadidi kakamwe,
Cincino isatsalakanwa ninga pyombo pya dongo,
Ninga pyombo pidaumbwa na manja a nyakuumba!
ג [Gimeli]
3 Anambwa a ntsanga asayamwisa anawo,
Mbwenye mbumba yanga yadzakhala yakuipa ntima+ ninga mbalame za avestruji zinakhala nʼthando.+
ד [Dhaleti]
4 Lirimi ya mwana wa pabere isaphatirira padzulu nkanwa mwace thangwi ya nyota.
Ana asadembetera toera apaswe cakudya,+ mbwenye nkhabe anaapasa cinthu.+
ה [He]
5 Ale akhadya pyakudya pyadidi kakamwe asakomoka na njala, mbagwa mʼmiseu.+
Ale adakula mbabvala nguwo zadidi kakamwe,+ asagona mʼmikuku ya dotha.
ו [Vau]
6 Kutcunyuswa kwa mbumba yanga ndi kukulu kakamwe kupiringana kutcunyuswa kwa nzinda wa Sodhoma,*+
Wakuti wafudzwa mwakucimbiza, mbakhonda kuoneka munthu toera kuuphedza.+
ז [Zaine]
7 Anazireu+ ace akhali akucena kakamwe kupiringana matalala, maonekero awo akhali akucena kakamwe kupiringana nkaka.
Iwo akhali akufuirira kakamwe kupiringana miyala ya ntengo ukulu; akhayetimira ninga miyala ya safira.
ח [Heti]
8 Cincino iwo ndi akupswipa kakamwe kupiringana makala;
Anthu nee asaadzindikirabve mʼmiseu.
Iwo aonda kakamwe, khanda yawo mbiphatirira pa magogodo,+ iyo yauma ninga nkhuni.
ט [Tete]
9 Ale adaphiwa na supada ali mwadidi kakamwe kupiringana ale adafa na njala,+
Akuti ndi ale anafa mwapangʼono-pangʼono thangwi yakusoweka kwa pyakudya pinabuluswa mʼmunda.
י [Yodhe]
10 Akazi antsisi, aphika na manja awo anawo+ adabala iwo.
Anawo adzakhala cakudya cawo mu ndzidzi wakufudzwa kwa mbumba yanga.+
כ [Kafe]
11 Yahova apangiza kuipirwa kwace;
Iye apangiza ukali wace onsene.+
Iye agasa moto ku Sioni, wakuti usafudza pitsidzikizo pyace.+
ל [Lamedhi]
12 Amambo a pa dziko yapantsi, pabodzi na anthu onsene, nee akhatawira kuti,
Anyamalwa mbadapita na pa misuwo ya Yerusalemu.+
מ [Memi]
13 Pyenepi pyacitika thangwi ya madawo a aprofeta awo na madodo a anyantsembe+ awo,
Adapha anthu akulungama mu nzinda unoyu.+
נ [Nuni]
14 Iwo asandzendza-ndzendza mʼmiseu ninga maboliboli.+
Pontho ali na midonthi ya ciropa,+
Natenepa, nkhabe munthu anafuna kukhuya nguwo zawo.
ס [Sameki]
15 Iwo asaakhuwira, mbalonga: “Cokani, imwe anthu akukhonda cena! Cokani! Cokani! Lekani kutiphata!”
Thangwi iwo nkhabe pakukhala, pontho asandzendza-ndzendza.
Anthu a madzindza anango alonga: “Iwo nee asafunika kukhala pano pabodzi na ife.+
פ [Pe]
16 Yahova aabalalisa;+
Iye nee anakomerwabve na iwo.
Anthu nkhabe kudzalemedzabve anyantsembe,+ nee kubvera ntsisi akulu.”+
ע [Ayine]
17 Maso athu asapitiriza kuneta na kusaka ciphedzo papezi.+
Ife tasaka, mbatipitiriza kusaka ciphedzo kuna mbumba yakuti nee mbidakwanisa kutipulumusa.+
צ [Tsadhe]
18 Anyamalwa athu akhationera konsene kwene kukhaenda ife;+ natenepa, nee tikhakwanisa kufamba mʼmiseu yathu.
Kufudzwa kwathu kuli cifupi, ntsiku zathu zamala, thangwi ndzidzi wakufudzwa kwathu wafika.
ק [Kofi]
19 Ale akhatitowerera, akhathamanga mwakucimbiza kakamwe kupiringana pyapungu kudzulu.+
Iwo atitowerera mʼmapiri, mbatibisalira nʼthando.
ר [Rexi]
20 Wakudzodzwa wa Yahova,+ wakuti ndi muya unabuluka mʼmphuno mwathu, aphatwa nʼdjenje yawo ikulu,+
Ife tikhalonga thangwi ya iye kuti: “Tinakhala pa nʼthundzi wace pakati pa anthu a madzindza anango.”
ש [Xini]
21 Tsandzayani, pontho komerwani imwe mbumba ya ku Edhomi,+ munakhala ku dziko ya Uzi.
Ngakhale tenepo, imwe munadzatambirambo ndiko+ ya nyatwa, imwe munadzaledzera, mbamuoneka cipezipezi.+
ת [Tau]
22 Imwe mbumba ya ku Sioni, kutcunyuswa kwanu thangwi ya madawo anu, kwafika kunkhomo.
Mulungu nkhabe kudzakuendesani pontho ku ubitcu.+
Mbwenye iye anadzakumbuka madawo anu, imwe mbumba ya ku Edhomi.
Iye anadzapangiza pakweca madawo+ anu.
5 Yahova, kumbukani pidaticitikira, yangʼanani basi.
Onani manyadzo athu.+
2 Unthaka wathu waperekwa kuna anthu anakhonda ife kudziwa, nyumba zathu zaperekwa kuna anthu a madziko anango.+
3 Ife tadzakhala ana akusowa pai; akazi adatibala adzakhala ninga azice.+
4 Madzi ndi athu,+ mbwenye tisafunika kuagula toera kuamwa, pontho nkhuni ndi zathu, mbwenye tisafunika kuzigula.
5 Ale anatitowerera ali dhuzi kakamwe na ife;
Ife taneta kakamwe, mbwenye nee tisakwanisa kupuma.+
6 Ife tikhanyindira Ejitu+ na Asirya+ toera atipase cakudya cakukwana.
7 Ambuyathu akuti ndiwo adadawa, amala kufa; mbwenye ife ndife anathabuka thangwi ya madawo awo.
8 Cincino ife tisatongwa na atumiki; nkhabepo munthu toera kutibulusa mʼmanja mwawo.
9 Toera tikwanise kugumana cakudya, ife tisaikha umaso wathu+ pangozwi, thangwi ya anthu ali na masupada nʼthando.
10 Ife tisaferuka na njala, na thangwi ineyi, khanda yathu isapisa ninga forno.+
11 Iwo apasa manyadzo akazi a anaciro* ku Sioni, ninga pidacita iwo na amiyali a ku Yuda.+
12 Atsogoleri a mbumba amanikwa pamuti,+ akulu nee alemedzwa.+
13 Aphale asathukula malibwe, anapiana asafamba mwakunentseka thangwi yakulemerwa na misumbu ya nkhuni.
14 Pansuwo wa nzinda+ nkhabebve akulu a mbumba; aphale nee asaimbabve nyimbo zawo.+
15 Kutsandzaya kwamala mʼmitima yathu; kubvina kwathu kwadzakhala ciliro.+
16 Nthimba yakulemedzwa kwathu yagwa munsolo mwathu. Dzedze kuna ife thangwi tadawa!
17 Mitima yathu iri kubva kupha+ thangwi ya pyenepi,
Pontho maso athu nee asaonabve mwadidi+ thangwi ya pinthu pyenepi,
18 Thangwi phiri ya Sioni yamala kufudzwa;+ cincino anambwa a ntsanga asafamba-famba kweneko.
19 Mbwenye imwe Yahova, munapitiriza pa mpando wanu waumambo kwenda na kwenda.
Umambo wanu ndi wakwenda na kwenda.+
20 Thangwi yanji musatiduwala kwenda na kwenda, mbamutisiya tekhene mu ndzidzi uzinji kakamwe?+
21 Yahova, tibwereseni pontho kuna imwe; natenepa, ife tinabwerera kuna imwe mwakucimbiza.+
Tipaseni ntsiku zadidi ninga zikhali na ife mu ndzidzi wakale.+
22 Mbwenye imwe mwatikhonderatu.
Pontho musapitiriza kuipirwa kakamwe na ife.+
Fala na Fala: “iye abulusa nkono wace wamadyo.”
Fala na Fala: “Mafafa anga akhutulwa pantsi.”
Fala na Fala: “Cakudya ciri kupi, pontho vinyu iri kupi?”
Peno: “asamalisika; asatsalika.”
Peno: “asapingiza.”
Peno: “ditiringwe.”
Munjira inango: “mbandicitisa kukhala ninga munda unakhonda kulimwa.”
Peno: “ine ndasiya kale kakamwe kukhala wakutsandzaya.”
Peno: “Ntsisi zace zisakhala zipswa ntsiku zonsene namacibese.”
Peno: “Mphyadidi munthu apfundze kupirira nyatwa mbaciri mwana.”
Fala na Fala: “Thangwi yanji munthu wakuti aciri na umaso.”
Peno: “Imwe nee mwabvesera maphembero athu.”
Peno: “Maso anga anapitiriza kubuluka misozi.”
Peno: “mwapulumusa.”
Fala na Fala: “kupiringana kutcunyuswa thangwi ya madawo a Sodhoma.”
Peno: “Iwo akhwipa akazi a anaciro.”