8 Kupangiza Citsandzo Cadidi

PYENEPI PISABVEKANJI

Anyakubala akuti ndi a citsandzo cadidi, asacita pinapfundzisa iwo anawo. Mwacitsandzo, pinakhala pyakunentsa kakamwe kuna mwananu kulonga undimomwene khala panyumba pangabwera munthu wakuti imwe nee musafuna kulonga naye musampanga kuti: “Mpange kuti ndabulukapo.”

“Kazinji kene anthu asalonga: ‘Cita pinalonga ine, mbwenye leka cita pinacita ine.’ Tingacita pyenepi nee tikupereka citsandzo cadidi kuna anathu. Ana asatowezera pinalonga ife na pinacita ife, pontho khala pinaapanga ife nee pisabverana na pinacita ife, iwo asakwanisa kuona pyenepi.”—David.

PINALONGA BHIBHLYA: “Iwe usapanga anango kuti: ‘Lekani kuba,’ thangwi yanji usaba?”—Aroma 2:21.

THANGWI YANJI ANYAKUBALA ASAFUNIKA KUPANGIZA CITSANDZO CADIDI?

Anang’ono kuphatanizambo aphale na atsikana, asatowezera kakamwe pinacita anyakubalawo kusiyapo pinacita anthu anango peno axamwali awo. Pyenepi pisapangiza kuti anyakubala asafunika kupereka citsandzo cadidi pakupfundzisa anawo. Natenepa, pinthu pinalonga imwe pisafunika kubverana na pinacita imwe.

“Midzidzi inango imwe munakwanisa kulonga pinthu mwakubwereza-bwereza thangwi yakunyerezera kuti mwananu nee akupibva. Mbwenye ntsiku inadzafuna kucita imwe pinthu pyakusiyana na pidalonga imwe, mwananu anadzadziwa pyenepi. Ana asaona mwadidi pinthu pyonsene pinacita ife, maseze ife tinyerezere kuti iwo nee akupiona.”—Nicole.

PINALONGA BHIBHLYA: ‘Udziwisi wakudzulu ndi wakusowa umpfakafaka.’—Tiyago 3:17.

PINTHU PINAFUNIKA IMWE KUCITA

Nyerezerani pinthu pinacita imwe. Ndi mavidhyu api anakomerwa na imwe kuona? Musatsalakana tani ndzanu wa m’banja na ananu? Ndi api anthu anacedza na imwe? Kodi imwe musacita pinthu mbamunyerezerambo anango? Mwacigwagwa, kodi pinacita imwe ndi pyenepi pinafuna imwe kuti ananu apitowezere?

“Ine na mamunanga nee tisapfundzisa anathu pinthu pyakuti ife nee tisapicita.”—Christine.

Phembani kulekererwa mungadodoma. Ananu asadziwa kuti midzidzi inango imwe musadodomambo. Mungadodoma mbamuphemba kulekererwa kuna ndzanu wa m’banja na kuna ananu, imwe musaapfundzisa kufunika kwa kukhala akukhulupirika na akucepeseka.

“Anathu asafuna kutibva mbatikalonga kuti tadodomeka, pontho mbatikaphemba kulekererwa thangwi ya madodo athu. Tingakhonda kucita pyenepi, iwo basi ene anapfundza kubisa madawo awo.” —Robin.