Thangwi Yanji Ntawiro Ndi Wakufunika?

Thangwi yanji ndi pyakufunika kudziwa kuti alipo Nciti? Khala pinthu pinaona imwe na maso pisakucitisani kutawira kuti alipo Mulungu wamphambvu zonsene, panango munafunambo kudinga pinthu pinapangiza kuti iye ndi mwanaciro Bhibhlya. Munganyindira pinalonga Bhibhlya, imwe munaphedzeka munjira izi.

Munakhala na umaso wakutsandzayisa

BHIBHLYA ISALONGA: “[Mulungu] apangiza udidi wace kuna imwe mu kubvumbisa madzi akudzulu na kukupasani midzidzi yakubvuna pinthu pizinji, iye akupasani pyakudya mbatsandzayisa kakamwe mitima yanu.”—Mabasa 14:17.

PYENEPI PISABVEKANJI?: Pinthu pyonsene piri pa dziko yapantsi ndi muoni wa Nciti wathu. Imwe munapereka takhuta kakamwe thangwi ya miyoni ineyi mungadzindikira kuti Nciti asakutsalakanani.

Imwe munagumana uphungu wadidi

BHIBHLYA ISALONGA: “Unabvesesa pinthu pyadidi, pyakulungama na pyakuthema, njira zonsene za pinthu pyadidi.”—Misangani 2:9.

PYENEPI PISABVEKANJI?: Mulungu ndi Nciti wathu, natenepa iye asadziwa pinafuna ife toera tikhale akutsandzaya. Imwe mungapfundza Bhibhlya munadziwa pinthu pizinji pyakuti pinakuphedzani mu umaso wanu.

Imwe munagumana mitawiro ya mibvundzo yanu

BHIBHLYA ISALONGA: “Unadzagumana cidziwiso ca Mulungu.”—Misangani 2:5.

PYENEPI PISABVEKANJI?: Kudziwa kuti alipo Nciti pinatiphedza toera kugumana mitawiro ya mibvundzo yakufunika kakamwe ninga iyi: Ndi cipi cifuniro ca umaso? Thangwi yanji pasaoneka nyatwa zizinji? Ninji pinacitika munthu angafa? Imwe munagumana mitawiro ya mibvundzo ineyi m’Bhibhlya.

Imwe munakhala na cidikhiro thangwi ya ntsogolo

BHIBHLYA ISALONGA: “‘Ine ndisadziwa mwadidi kakamwe pinafuna ine kuna imwe,’ alonga Yahova, ‘ndisafuna kuti mukhale na ntendere, tayu nyatwa, ndisafuna kukupasani cidikhiro na pinthu pyadidi kutsogolo.’”—Yeremiya 29:11.

PYENEPI PISABVEKANJI?: Mulungu apikira kuti ntsogolo iye anadzamalisa uipi, nyatwa, ngakhale kufa. Munganyindira mapikiro anewa a Mulungu, imwe munakwanisa kupirira nyatwa za ntsiku na ntsiku mwacipapo.

Nkhombo zidatambira anango thangwi yakukhulupira kuti alipo nciti

“Ndzidzi onsene ndisadzumatirwa ndingaona kuti Mulungu asatiphedza m’makhundu onsene a umaso wathu. Iye asatiphedza toera kudziwa pinthu pyakufunika kakamwe mu umaso, ninga tinacitanji toera tibverane mwadidi na anango na tinakhala tani na uxamwali na iye.”—Cyndi, wa ku Estados Unidos.

“Kukhulupira kuti alipo Nciti pisacitisa umaso wanga kukhala na cifuniro na wakutsandzayisa. Nakuti pali na pinthu pizinji pyakubalika toera kupfundza thangwi ya iye, thangwi ya pinthu pidacita iye na Mafalace, ine nee ndisaneta kupfundza pya Mulungu.”—Elise, wa ku Fransa.

“Kuphatisira pinatipfundzisa Nciti wathu m’Bhibhlya pisandiphedza toera kukhala wakutsandzaya kakamwe. Kusandiphedza toera ndikhonde kusumula kakamwe anango, ndikhale wacitsalakano na kukomerwa na piri na ine. Pyenepi pyandiphedzambo toera ndikhale baba wadidi.”—Peter, wa ku Holanda.

“Kale, umaso wanga ukhali kudya, kugona na kuthamanga toera kufika nakweru ku basa. Pyenepi pikhanditsukwalisa kakamwe! Mbwenye cincino ine ndisaona umaso ninga muoni wadidi na wakutsandzayisa, muoni wakuti tisafunika kuuphatisira na kuulemedza.”—Liz, wa ku Estoniya.

“Ine ndisapswipa ntima kakamwe. Mbwenye kudziwa kuti uipi, kusowa ulungami na nyatwa zinadzamala, kusandiphedza toera kupirira nyatwa zinatamba ine.”—Adrien, wa ku Fransa.