Munda Wakubalika

YANG’ANANI dziko yapantsi ino! Pyonsene mphyakubalika tani! Yang’anani maudzu na miti, maluwa na pinyama pyonsene. Kodi musadziwa kuti nzou ndi ipi na zinkhalamu ndi zipi?

Kodi munda wakubalika unoyu wakhalapo tani? Inde, tendeni tione kuti Mulungu atikhunganyira tani dziko yapantsi.

Pakutoma, Mulungu acitisa kuti maudzu mawisi aphimbire dziko yapantsi. Iye acita mitundu yonsene ya pyakumera ping’ono, mathundudzi na miti. Pyakumera pyenepi pisaphedza kubalikisa dziko yapantsi. Mbwenye pisacita pyakupiringana pyenepi. Pizinji pya ipyo pisatipasambo pyakudya pyakudzipa kakamwe.

Patsogolo pace Mulungu acita ntsomba towera zisambirire m’madzi na mbalame towera zimburuke m’thambo. Acita anambwa na mapaka na makavalu; pinyama pikulu na pinyama ping’ono. Kodi pinyama pinakhala cifupi na panyumba panu ndipipi? Kodi nee tikhafunika kukomerwa thangwi Mulungu aticitira pinthu pyenepi pyonsene?

Pakumalisira, Mulungu acita khundu ibodzi ya dziko yapantsi kukhala mbuto yakupambulika kakamwe. Mbuto ineyi aicemera munda wa Edeni. Ikhali yaungwiro. Pyonsene pikakhala mwenemo pikhali pyakubalika. Mulungu akhafuna kuti dziko yonsene yapantsi ikhale ninga munda uyu wakubalika udacita iye.

Mbwenye yang’anani pontho cithunzithunzi ca munda uyu. Kodi musadziwa cidaona Mulungu kukhala cakusoweka? Tendeni tione.