Nsolo Khumi Nacitatu
Mwinji Ukulu Pamaso Pa Mpando Wa Umambo Wa Yahova
1. (a) Kodi ndi ninji cidafunika kucitikira anzakazi a Mulungu a nzidzi wa Biblya mbasati kutambira sagwati wawo, na a 144.000 asafunikambo kucitikirwa nanji? (b) Kodi ndi ninji cinafuna citikira ‘mwinji ukulu’ unakhala maso m’nzidzi uno?
ANZAKAZI akukhulupirika a Mulungu kutomera Abele mpaka Jwau Mbatizi aikha kucita cifuno ca Mulungu pa mbuto yakutoma m’umaso wawo. Mbwenye iwo onsene afa na asadikhira kulamuswa muli akufa towera akhale maso pa dziko yapantsi m’dziko ipswa ya Mulungu. Ale a 144.000, anafuna kudzatonga na Kristu m’Umambo wakudzulu wa Mulungu, asafunikambo kufa mbasati kutambira sagwati wawo. Kukhundu inango, Apokalipse 7:9 asapangiza kuti m’ntsiku zino zakumalisa, panadzakhala “[mwinji] ukulu” wakubuluka ku madzinza onsene wakuti nee unadzalawira kufa tayu mbwenye unakhala na cidikhiro ca kukhala maso pa dziko yapantsi kwenda na kwenda. Kodi imwe muli pakati pa iwo?
Kudzindikira Mwinji Ukulu
2. Kodi ndi ninji cidacitisa kuti cidzindikiro ca mwinji ukulu udalembwa pa Apokalipse 7:9 cikwanise kubveseswa mwadidi?
2 M’caka ca 1923, anzakazi a Yahova adzindikira kuti “mabira” adalongwa pa nsanje wa Yezu unagumanika pa Mateo 25:31-46 na “mabira anango” adatculula iye pa Jwau 10:16 ndi anthu akuti mbadatambira mwai wa kukhala maso kwenda na kwenda pa dziko yapantsi. M’caka ca 1931, ale analongwa pa Ezekyele 9:1-11 ninga akulembwa cidzindikiro pa nkhope zawo aoniwambo ninga anthu akuti ali na cidikhiro ca kukhala maso pa dziko yapantsi. Patsogolo pace, m’caka ca 1935 kwadzadzindikirwa kuti mwinji ukulu ndi khundu ya nsoka wa mabira anango adalongwa na Yezu. Lero, cilengesero ca mwinji ukulu unoyu wakuti usatambira nkhombo cafika pa mamiliyau.
3. Thangwi yanji mafala akuti “kulimira pa mpando” nee asalonga pya nsoka wa ale anafuna khala maso kudzulu?
3 Pa Apokalipse 7:9, mwinji ukulu nee usalongwa kuti uli kudzulu tayu. ‘Kulimira kwawo pa mpando’ wa umambo wa Mulungu nee kusafuna kulonga kuti iwo ali kudzulu tayu. Iwo ali pamaso pa Mulungu basi. (Masalmo 11:4) Tingalandanisa mwinji ukulu unoyu, ‘wakucimwana kulengesiwa,’ na pidalembwa pa Apokalipse 7:4-8 na Apokalipse 14:1-4 tisaona pakweca kuti si nsoka unafuna khala maso kudzulu tayu thangwi cilengeso cawo nkhabe longwa. Pa malemba anewa tisaona kuti cilengeso ca ale adasankhulwa pa dziko yapantsi towera kuenda kudzulu ndi 144.000.
4. (a) Kodi “nyatwa zikulu” munabuluka mwinji ukulu ndi ninji? (b) Ninga pyalembwa pa Apokalipse 7:11, 12, kodi mbani anayang’ana mwinji ukulu na kuphatana na iwo m’kulambira?
4 Apokalipse 7:14 asalonga tenepa pya mwinji ukulu: “Ndiwo ale adabuluka mu nyatwa zikulu.” Iwo asapulumuka pa nyatwa zakunensa kakamwe zakuti cipo zikhadatambwa m’mbiri ya anthu. (Mateo 24:21) Munasimba iwo Mulungu na Kristu thangwi ya kupulumuka kwawo, pyakucitwa pyonsene pyakukhulupirika pyakudzulu pinadzaphatana na iwo m’kulonga: “Amen. Chidzo, mbiri, udziwisi, takhuta, kulemerera na chipapo mbapikhale kuli Mulungu wathu pa midzidzi yonsene kuenda na kuenda. Amen.”—Apokalipse 7:11, 12.
Kuoniwa Ninga Wakuthema
5. Kodi tinakwanisa tani kudziwa pire pinafunika kuti munthu acite khundu ya mwinji ukulu?
5 Kupulumuswa kwa mwinji ukulu pa nyatwa zikulu kusacitika mwakubverana na midida yakulungama ya Yahova. Biblya isafokotoza mwapakweca makhaliro anadzindikirisa ale anafuna kudzapulumuswa. Natenepa, ale anafuna kulungama angakwanise kucita pinthu cincino towera kupangiza kuti athema kupulumuswa. Kodi iwo asafunika kucitanji?
6. Thangwi yanji ndi kwakuthema kulandanisa mwinji ukulu na mabira?
6 Mabira ndi akupfulika na akungonjera. Natenepa, mudalonga Yezu kuti ali na mabira anango akuti nee asacita khundu ya nsoka wakudzulu, iye nee akhalonga pya anthu akuti mbadafuna kukhala maso kwenda na kwenda pa dziko yapantsi basi tayu mbwenye akuti mbadafunambo kungonjera pipfunziso pyace. Iye alonga: “Mabira anga asabva mafala anga, ine ndinaadziwa, iwo asanditowerera.” (Jwau 10:16, 27) Anewa ndi anthu anabveseradi na kucita mwakubvera pinalonga Yezu, mbakhala anyakupfunzace.
7. Kodi ndi makhaliro api anafunika kukuliswa na atowereri a Yezu?
7 Kodi ndi makhaliro api anango anafunika kukuliswa na atowereri a Yezu? Mafala a Mulungu asatawira: “Pisafunika mphapo kuti mudule umunthu wanu wa kale, udaoneka pa machitiro a kale, . . . mbamubvala munthu mupswa, adachitwa na Mulungu towera akhale chithunzi cha Mulungu mwa kulungama na mwa kukhala munthu wakuchena.” (Aefesi 4:22-24) Iwo asakulisa makhaliro akuti asagomezera kuphatana kwa anzakazi a Mulungu—“kufuna andzako, kusekera, ntendere, kupirira, kukoma ntima, udidi, kukhulupirika, kupfulika na kudzitonga.”—Agalata 5:22, 23, MZ.
8. Kodi mwinji ukulu unadzathimbana nanji munaphedza iwo ale ali na cidikhiro ca kukhala maso kudzulu?
8 Mwinji ukulu usaphedza cilengeso cakucepa ca ale ali na cidikhiro ca kukhala maso kudzulu, akuti asatsogolera basa ya kumwaza mphangwa. (Mateo 24:14; 25:40) Mabira anango asaaphedza, maseze adziwe kuti anadzapingizwa thangwi pakutoma kwa ntsiku zino zakumalisa Kristu Yezu na aanju ace athamangisa Sathani na mademonyo ace kudzulu. Pyenepi pyabweresa ‘dzedze pantsi pano thangwi Dyabo atchitha kuli iwo mbakhala na ukali wakugopswa, mbadziwambo kuti ndzidzi wache ndi ung’ono basi.’ (Apokalipse 12:7-12) Natenepa, Sathani asathimizira kupingiza anzakazi a Mulungu thangwi makhaliro ano ali cifupi na kumala.
9. Kodi anzakazi a Mulungu asapembera tani m’kumwaza mphangwa zadidi, na thangwi yanji?
9 Mokhonda tsalakana kutcingwa kwaukali, basa ya kumwaza mphangwa ikupitiriza kuenda kutsogolo. Pakumala kwa Nkhondo Yakutoma Ya Dziko Yonsene Yapantsi pakhali pikwi pyakucepa basi pya amwazi mphangwa a Umambo, mbwenye cincino pana mamiliyau, thangwi Yahova apikira: “Mbwenye pida pyonsene pinachimwana kukulasa [peno kukukunda].” (Izaiya 54:17) Ngakhale ciwalo cibodzi ca thando ikulu yakutonga miseru ya Ciyuda cadzindikira kuti basa ya Mulungu nkhabe limiriswa. Iye apanga Afarisi m’piaka dzana yakutoma pya anyakupfunza: “Lekani anthu awa aende pyawo. Nzeru zenezi na machitiro awa, angabuluka kwa anthu anadzafudzika okha. Mbwenye angabuluka kwa Mulungu, munachimwana kuafudza, mbamuonekambo ninga anyamalwa a Mulungu.”—Machitiro 5:38, 39.
10. (a) Kodi “chidzindikiro” cinatambira mwinji ukulu cisabvekanji? (b) Kodi anzakazi a Mulungu asabvera tani ‘fala yakubuluka kudzulu’?
10 Ale a mwinji ukulu asaoniwa ninga akulembwa cidzindikiro towera kupulumuka. (Ezekyele 9:4-6) “Chidzindikiro” ndi cipangizo cakuti iwo aperekeka kwa Yahova, abatizwa ninga anyakupfunza a Yezu na asawangisira kusakulira umunthu wakulandana na wa Kristu. Iwo asabvera ‘fala yakubuluka kudzulu’ inalonga pya umambo wa dziko yonsene wa uphemberi waunthawatawa wa Sathani: “Anthu a mbumba yanga, fulukani kuno, gopa munadzaipa na madawo a ndzinda uno, gopambo anadzakugwerani madzedze awo.”—Apokalipse 18:1-5.
11. Kodi ndi m’njira ipi yakufunika ale anacita khundu ya mwinji ukulu asapangiza kuti ndiwo anzakazi a Yahova?
11 Yezu apangambo atowereri ace: “Na kufunana kwanu anthu onsene anadzadzindikira kuti ndimwe anyakupfundza anga.” (Jwau 13:35) Mwakusiyana na pyenepi, piwalo pya mauphemberi a dziko ino pisapha piwalo pinango m’nkhondo, kazinji kene thangwi ndi pya madziko akusiyana! Mafala a Mulungu asalonga: “Ana a Mulungu na ana a mademonyo anadziwika tenepa: uyu anakhonda kuchita pya ulungami, si wa Mulungu tayu; siyembo tayu, uyu anakhonda kufuna mbale wache. . . . Tifunane. Tikhonde kuchita ninga Kaini, akhakhala wa demonyo, mbapha mbale wache.”—1 Jwau 3:10-12.
12. Kodi Yahova anadzacitanji pa nyatwa zikulu na “miti” ya mauphemberi inabala misapo yakusowa basa?
12 Yezu alonga: “Miti yadidi yonsene inabala misapo yadidi, mbwenye muti wakuipa unabalambo misapo yakuipa. Muti wadidi unachimwana kubala misapo yakuipa, mutimbo wakuipa unachimwana kubala misapo yadidi. Muti unakhonda kubala misapo [yadidi], unatemiwa mbuponyiwa pa moto. Munaadzindikira mphapo na misapo yawo.” (Mateo 7:17-20) Misapo inabalwa na mauphemberi a dziko ino isaadzindikirisa ninga “miti” yakubvunda, yakuti iri cifupi na kutemiwa na Yahova pa nyatwa zikulu.—Apokalipse 17:16.
13. Kodi mwinji ukulu usapangiza tani kuti ‘walimira mwakuphatana pa mpando’ wa umambo wa Yahova?
13 Apokalipse 7:9-15 asalonga pinthu pinafuna citisa kuti mwinji ukulu upulumuke. Iwo usapangizwa ninga ‘wakulimira mwakuphatana pa mpando’ wa umambo wa Yahova, mbuphedza utongi wace ukulu. Iwo ‘wafula nguwo zawo mbuzichenesa na chiropa cha Mwanabira,’ mbupangiza kuti usadzindikira ntsembe yakufudza madawo ya Yezu. (Jwau 1:29) Iwo waperekeka kwa Mulungu na waphipirisa kuperekeka kweneku m’kubizwa m’madzi. Iwo uli na ciimiriro cadidi pamaso pa Mulungu, cinaphipiriswa na nguwo zakucena, na ‘usamuimirira [peno usantumikira] masikati na masiku.’ Kodi ziripo njira zakuti mungakwanise kubveranisa mwakukwana umaso wanu na pinafokotozwa pano?
Maphindu Anatambirwa Cincino
14. Kodi ndi api maphindu mangasi akupambulika anatambirwa na anzakazi a Yahova ngakhale cincino?
14 Panango mwaona maphindu akupambulika anatambira ale anatumikira Yahova ngakhale cincino. Mwacitsanzo, mudapfunza imwe pya pifuniro pyakulungama pya Yahova, mwabvesesa kuti kutsogolo kuli cidikhiro cakudzumatirisa. Natenepa, cincino umaso wanu uli na cifuniro candimomwene—kutumikira Mulungu wandimomwene na cidikhiro cakukomeresa ca umaso okhonda mala m’paradizu pa dziko yapantsi. Inde, Mambo Yezu Kristu ‘anadzakumbiza [mwinji ukulu] mbauperekera ku michera ya madzi a moyo.’—Apokalipse 7:17.
15. Kodi Mboni za Yahova zisaphindula tani na kuphatisisa midida ya Biblya inalonga pya ndale na makhaliro?
15 Phindu yakudzumatirisa inatsanzaya na mwinji ukulu ndi kufunana, kuphatana na kubverana kunagumanika pakati pa anzakazi a Yahova m’dziko yonsene yapantsi. Nakuti tonsene tisadya cakudya cibodzi cene cauzimu, tisabvera miyambo na midida ibodzi ene inagumanika m’Mafala a Mulungu. Na thangwi ineyi ife nee tisagawiwa na manyerezero andale na akufuna dziko. Pontho, tisakoya midida yapadzulu ya makhaliro adidi anafuna Mulungu kwa mbumba yace. (1 Akorinto 6:9-11) Natenepa, mbuto mwa kukhala mbimenyana, kukhonda phatana, na makhaliro akuipa anagumanika konsene kwene m’dziko ino, mbumba ya Yahova isatsanzaya na pinacemerwa kuti ndi paradizu wauzimu. Onani kuti pyenepi pisafokotozwa tani pa Izaiya 65:13, 14.
16. Mokhonda tsalakana nyatwa zizinji za umaso, kodi ndi cidikhiro canji ciri na ale anacita khundu ya mwinji ukulu?
16 Anzakazi aumunthu a Yahova si aungwiro tayu. Iwo asakhuyiwa na nyatwa zizinji za umaso m’dziko ino, ninga utcerengi, peno kuphiwa mwakusowa mulando na nkhondo za madzinza. Iwombo asathimbana na utenda, kunenseka, na kufa. Mbwenye iwo ali na cikhulupiro cakuti m’dziko ipswa, Mulungu ‘anadzapukuta misozi yonsene m’maso mwawo. Kufa hakunadzakhala’po pontho tayu, nee kutsukwala, nee kulira, nee nyatwa.’—Apokalipse 21:4.
17. Mokhonda tsalakana pinthu pyakuti pingakwanise kuticitikira cincino, kodi ndi tsogolo ya ntundu wanji inadikhira ale analambira Mulungu wandimomwene?
17 Ngakhale muluze umaso wanu cincino thangwi ya kukalamba, utenda, cidengwa, peno kutcingwa, Yahova anadzakulamusani muli akufa towera mukhale maso m’Paradizu. (Machitiro 24:15) M’nzidzi unoyu munadzapitiriza kutsanzaya na phwando yauzimu nkati mwa Utongi wa Kristu wa Piaka Cikwi. Kufuna kwanu Mulungu kunadzakula munaona imwe kukwanirisika kwakudzumatirisa kwa pifuniro pyace. Nkhombo zakumanungo zinafuna kubweresa Yahova zinadzathimizirambo kunfuna kwanu. (Izaiya 25:6-9) Ndi tsogolo yakudzumatirisa tani inadikhira mbumba ya Mulungu!
Kubwerezera Pidapfunzwa
• Kodi Biblya isalandanisa mwinji ukulu na cakucitika cipi cikulu?
• Khala tisafunadi kuphatanizwa m’mwinji unoyu ukulu unatawirika kwa Mulungu, kodi tisafunika kucitanji cincino?
• Kodi ndi zakufunika tani kwa imwe nkhombo zinatsanzaya na mwinji ukulu cincino na zinafuna kutsanzaya na iwo m’dziko ipswa ya Mulungu?
[Foto pa tsamba 123]
Mamiliyau a mwinji ukulu asalambira Mulungu wandimomwene mwakuphatana