NSOLO 3
Undimomwene Wa Bhibhlya Wagumaniwa Tani Papswa?
Anyakupfunza Bhibhlya mu pyaka 1870
Revista yakutoma ya Ncenjezi, mu caka 1879
Revista ya Ncenjezi mu ndzidzi uno
Bhibhlya yalonga mwanyapantsi kuti pakumala kufa kwa Kristu, nkati mwa Akristu akutoma mbadaoneka apfundzisi aunthawatawa, pontho mbadadinganyisa undimomwene wa Bhibhlya. (Machitiro 20:29, 30) Mu kupita kwa ndzidzi, pyenepi pyacitikadi. Iwo abvungaza pipfundziso pya Yezu na manyerezero a mauphemberi aunthawatawa, natenepa, wakula ntundu wa Cikristu caunthawatawa. (2 Timoti 4:3, 4) Tinakhala tani na cinyindiro lero cakuti tisabvesesa mwadidi kuti mwandimomwene Bhibhlya isapfundzisanji?
Ndzidzi wafika toera Yahova apangize pakweca undimomwene. Iye alonga mwanyapantsi kuti mu ‘ndzidzi wakumalisa, cidziwiso candimomwene cinadzanjipa.’ (Danyele 12:4, Tradução do Novo Mundo) Mu caka 1870, nsoka ung’ono wa anyakusaka undimomwene wadzindikira kuti pipfundziso pya magereja mazinji nee pikhali pya m’Bhibhlya. Natenepa, iwo atoma kusaka kubvesesa pipfundziso pyandimomwene pya Bhibhlya, Yahova aaphedza kubvesesa mwadidi Bhibhlya.
Amuna akunyindirika apfundza Bhibhlya mwacidikhodikho. Anyakupfundza Bhibhlya anewa aphinga, aphatisira njira yakupfundza yakuti tisapitiriza kuiphatisira mu ntsiku zino. Iwo akhadinga Bhibhlya cipfundziso cibodzi na cibodzi. Mukhagumana iwo ndima ya Bhibhlya yakuti ikhali yakunentsa kubvesesa, iwo akhasaka mavesi anango toera kubvekesa. Pakumala kuibvesesa kuti ikhabverana na malemba anango a Bhibhlya, iwo akhailemba. Mu kusiya kuti Bhibhlya ibvekese yokha malemba ace, iwo akwanisa kugumana papswa undimomwene unalonga pya dzina ya Mulungu, Umambo wace, cifuniro cace kwa anthu na dziko yapantsi, pinacitika kwa anthu akufa, na cidikhiro ca kulamuswa mwa akufa. Kusaka kwawo mwacidikhodikho kwaasudzula ku macitiro na pikhulupiro pizinji pyauthambi.—Jwau 8:31, 32.
Mu caka 1879 Anyakupfundza Bhibhlya adzindikira kuti ukhadafika ndzidzi wakudziwisa undimomwene konsene kwene. Na thangwi ineyi, mu caka ceneci iwo atoma kubulusa revista yakuti tisaiphatisira mpaka lero, ya Ncenjezi Wakudziwisa Umambo wa Yahova. Tisagawira undimomwene wa Bhibhlya kwa anthu m’madziko akupiringana 240, mu pilongero pyakupiringana 750. Cipo cidziwiso candimomwene cikhadanjipa tenepa!
Mudamala kufa Kristu, ninji cidacitika ku undimomwene wa Bhibhlya?
Ninji cidatiphedza kugumana papswa undimomwene kubulukira m’Mafala a Mulungu?