Iwo Alemba Pya Yezu

Ukuona amuna ali pa cithundzithundzi?— Madzina awo ndi, Mateo, Marko, Luka, Jwau, Pedro, Tyago, Yuda, na Paulu. Amuna anewa akhala mu ndzidzi ubodzi ene na Yezu, pontho iwo alemba pya Yezu. Tende tipfundze pizinji thangwi ya iwo.

Atatu mwa iwo akhali apostolo adamwaza mphangwa pabodzi na Yezu. Usadziwa ndi api atatu anewa?— Mateo, Jwau, na Pedro. Mpostolo Mateo na Jwau akhadziwa mwadidi Yezu, m’bodzi na m’bodzi wa iwo alemba bukhu thangwi ya umaso wa Yezu. Mpostolo Jwau alembambo bukhu inacemerwa Apokalipse, na matsamba matatu anacemerwa Jwau Wakutoma, Waciwiri, na Wacitatu. Mpostolo Pedro alemba matsamba mawiri akuti asagumanika m’Bhibhlya. Matsamba anewa asacemerwa Pedro Wakutoma na Waciwiri. Mu tsamba yace yaciwiri, Pedro alemba pya ndzidzi wakuti Yahova akhadalonga pya Yezu kubulukira kudzulu: ‘Uyu ndi mwananga. Ine ndisanfuna, pontho ndisakomerwa naye maningi.’

Amuna anango ali pa cithundzithundzi asatipfundzisambo pya Yezu kubulukira m’mabukhu adalemba iwo. M’bodzi wawo ndi Marko. Panango iye akhalipombo pa ntsiku idamangwa Yezu, mbaona pyonsene pikhacitika. Unango ndi Luka. Iye akhali dotoro, panango adzakhala Nkristu pakumala kufa kwa Yezu.

Anyakulemba Bhibhlya anango awiri anaona iwe pa cithundzithundzi akhali abale ang’ono a Yezu. Usadziwa madzina awo?— Ndi Tyago na Yuda. Pakutoma, iwo nee akhulupira Yezu. Iwo afika pakunyerezera kuti Yezu akhali na nsala pang’ono. Mbwenye mukupita kwa ndzidzi, iwo akhulupira Yezu mbakhala Akristu.

Nyakulemba Bhibhlya wakumalisa anaona iwe pa cithundzithundzi ndi Paulu. Mbadzati kukhala Nkristu, iye akhacemerwa Saulu. Iye akhali munthu wakuipa kakamwe, pontho akhatcinga Akristu. Usadziwa ninji cidacitisa Paulu kukhala Nkristu?— Ntsiku inango, Paulu akhacita ulendo mu nseu, mwakututumusa iye abva munthu mbakalonga kuna iye kubulukira kudzulu. Akhali Yezu! Iye abvundza Paulu: ‘Thangwi yanji usatcinga ale anandikhulupira?’ Buluka penepo, Paulu acinja mbakhala Nkristu. Paulu alemba mabukhu 14 a m’Bhibhlya, kutomera Aroma mpaka Ahebere.

Kodi watoma kuleri mabukhu a m’Bhibhlya analonga pya Yezu, peno alipo adatoma kukuleriri mabukhu anewa?— Cinthu cibodzi mwa pinthu pyakufunika kakamwe cakuti unakwanisa kucita cincino ndi kutoma kupfundza pya Yezu. Ndi pyenepi pinafuna iwe kucita?—