Yobe Akhali Ani?

Ku dziko ya Uzi kukhali na mamuna m’bodzi akhalambira Yahova. Dzinace ikhali Yobe. Iye akhali na banja ikulu, pontho akhadapfuma kakamwe. Iye akhali wantsisi, akhaphedza atcerengi, akazi adaferwa na amuna awo na ana aumphawi. Kodi pyenepi pisabveka kuti Yobe nee mbadagwerwabve na nyatwa basi ene thangwi akhacita pinthu pyadidi?

Yobe nee akhadziwa kuti Sathani akhaona pyonsene pikhacita iye. Yahova abvundza Sathani: ‘Waona ntumiki wanga Yobe? Nkhabepo munthu unango ninga iye pa dziko yapantsi. Iye asandibvera mbacita pinthu pyadidi.’ Sathani atawira: ‘Inde, Yobe asakubverani thangwi imwe musantsidzikiza mbamumpasa nkhombo. Mwampasa dziko yadidi na pifuyo. Natenepa nkwatireni pyonsene piri na iye, munadzaona kuti iye anasiya kukutumikirani.’ Yahova alonga: ‘Cita pyenepi kuna Yobe. Mbwenye leka kufuthula djanja yako toera kun’thabusa.’ Thangwi yanji Yahova atawirisa kuti Sathani ayesere Yobe? Iye akhali na cinyindiro cakuti Yobe mbadapitiriza kukhala wakukhulupirika.

Sathani atoma kuyesera Yobe na nyatwa zizinji. Pakutoma, iye aphatisira anthu akhacemerwa Asabheya toera kuba ng’ombe na makavalo a Yobe. Buluka penepo, moto wapisa mabira onsene a Yobe. Nsoka unango wa anthu ukhacemerwa Akaldheya, waba makamelo a Yobe. Anyabasace akhaonera pinyama pyenepi aphiwa. Buluka penepo, pacitika pontho cinthu cinango cakutsukwalisa kakamwe. Ana onsene a Yobe afa mu ndzidzi udagwa nyumba ikhacitira iwo phwando. Yobe atsukwala kakamwe, mbwenye iye nee asiya kutumikira Yahova.

Sathani akhanyerezera kuti Yobe anasiya kutumikira Mulungu angatamba nyatwa zinango. Yobe adzakhala na utenda wakugopswa. Iye nee akhadziwa kuti thangwi yanji akhathabuka na nyatwa zenezi zonsene. Ngakhale tenepo, Yobe apitiriza kulambira Yahova. Mulungu akhaona pyonsene, pontho akomerwa kakamwe pidaona iye kuti Yobe apitiriza kukhala wakukhulupirika.

Buluka penepo, Sathani atuma amuna atatu toera kuyesera Yobe. Iwo alonga: ‘Panango iwe wadawa mbubisa madawo ako. Mulungu akukutcunyusa.’ Yobe atawira: ‘Ine nee ndacita cinthu cakuipa.’ Natenepa Yobe atoma kunyerezera kuti ndi Yahova akhacitisa nyatwa zenezi, pontho alonga kuti Mulungu nee akhambvera ntsisi.

M’phale unango akhacemerwa Eliyu basi ene akhabvesera makani akhacedza iwo. Buluka penepo iye alonga: ‘Pyonsene pidalonga imwe mphyauthambi. Yahova ndi wankulu kakamwe kupiringana pinadziwa ife. Iye cipo asacita pyakuipa. Iye asaona pinthu pyonsene, pontho asaphedza anthu anatamba nyatwa.’

Buluka penepo, Yahova alonga na Yobe: ‘Ukhali kupi pikhacita ine kudzulu na dziko yapantsi? Thangwi yanji walonga kuti ine nkhabe bvera ntsisi? Iwe usalonga, mbwenye nee usadziwa thangwi yanji pinthu pisacitika.’ Yobe adzindikira kuti adodoma mbalonga: ‘Ndadawa. Ine ndabva kulonga pya imwe, mbwenye cincino ine ndisakudziwani mwadidi. Nkhabe cinthu cinacimwana imwe. Ndilekerereni thangwi ya pinthu pidalonga ine.’

Mu ndzidzi udamala mayesero, Yahova acitisa kuti Yobe akhale pontho na ungumi wadidi mbampasa pinthu pizinji kupiringana pikhali na iye kale. Yobe akhala m’maso mu pyaka pizinji, pontho akhala wakutsandzaya kakamwe. Yahova apasa nkhombo Yobe thangwi iye akham’bvera ngakhale m’midzidzi ya nyatwa. Kodi tisafunambo kukhala ninga Yobe, mbatipitiriza kulambira Yahova, mwakukhonda tsalakana pinentso?