Mose Asankhula Kulambira Yahova

Mu Ejitu, anthu a m’banja ya Yakobe adzadziwika ninga mbumba ya Aizraeli. Pidafa Yakobe na Zuze, Farau unango atoma kutonga mu Ejitu. Iye akhagopa thangwi Aizraeli akhali azinji kakamwe kupiringana Aejitu. Na thangwi ineyi, Farau acitisa Aizraeli kuphata basa ninga mabitcu. Iye aakakamiza toera aumbe mabhuloko na kuphata basa yakuwanga m’maminda. Ngakhale Aizraeli akhakakamizwa na Aejitu toera kuphata basa ninga mabitcu, iwo akhapitiriza basi kuthimizirika. Nakuti Farau nee akhafuna kuti pyenepi picitike, iye alonga kuti anapiana onsene amuna anabalwa asafunika kuphiwa. Mwandimomwene pyenepi mbapidacitisa Aizraeli kugopa kakamwe.

Nkazi m’bodzi wa ku Izraeli akhacemerwa Yokebhedhi abala mwana wamamuna wakubalika. Toera kutsidzikiza mwana, nkazi unoyu amuikha m’bokosi peno mu sestu mbaibisa m’mabande mu Nkulo wa Nilo. Mbwenye mwanankaziace mwana unoyu, akhacemerwa Miriya alimira kutali pang’ono toera kuona pikhafuna kucitikira m’bale wace.

Mwana wankazi wa Farau aenda kasamba mu nkulo unoyu, mbaona sestu. Mu sestu ineyi, iye aona mwana mbakalira, pontho ambvera ntsisi. Miriya abvundza: “Ndiende kacemere nkazi Wacihebheri toera akuyamwisireni mwana?” Pidatawira mwana wa Farau, Miriya aenda kacemera mai wace mwana. Mwana wa Farau ampanga: “Kwata mwana uyu undiyamwisire, ine ndinakulipa.”

Pidakula mwana unoyu pang’ono, Yokebhedhi ampereka kuna mwana wankazi wa Farau, pontho mwana wa Farau ampasa dzina ya Mose mbankuza ninga mwanace ene. Mose akuzwa ninga mwana wa mambo, pontho iye mbadakwanisa kukhala na pyonsene pikhafuna iye. Mose cipo aduwala Yahova, thangwi iye akhadziwa kuti akhali Muizraeli. Na thangwi ineyi, iye asankhula kutumikira Yahova.

Pikhali Mose na pyaka 40, iye asankhula kuphedza mbumba yace. Pidaona iye munthu wa ku Ejitu mbakamenya munthu wa ku Izraeli, Mose abvunulira munthu wa ku Izraeli, mbapha munthu wa ku Ejitu. Buluka penepo, Mose afikira manungo a munthu unoyu m’matcetca. Pidadzindikira Farau pyenepi, iye akhafuna kupha Mose. Mbwenye Mose athawa mbaenda ku Midhiyani. Kweneko Yahova antsalakana.