Mambo Wakutoma wa Izraeli

Yahova akhapasa Aizraeli atongi toera kuatsogolera, mbwenye iwo akhafuna mambo. Iwo apanga Samweli: ‘Madzindza onsene adatizungulira ali na amambo awo. Ife tisafunambo khala na mambo wathu.’ Samweli aipirwa na pyenepi, mbaphembera kuna Yahova. Natenepa Yahova antawira: ‘Mbumba nee iri kukhonda iwe. Iwo akukhonda ine. Apange kuti ndinaapasa mambo, mbwenye iye anadzaaphemba pinthu pizinji.’ Ngakhale tenepo, mbumba yatawira: ‘Nkhabe pinthu. Ife tisafuna mambo!’

Yahova apanga Samweli kuti mamuna anacemerwa Sauli mbadakhala mambo wakutoma. Pidaenda Sauli kaona Samweli ku Rama, Samweli adzodza Sauli na mafuta toera akhale mambo.

Mukupita kwa ndzidzi, Samweli acemera Aizraeli toera kuapangiza mambo mupswa. Mbwenye nee akwanisa kuona Sauli. Thangwi yanji? Thangwi iye akhadabisala pakati pa mitolo. Pidagumana iwo Sauli, ankwata mbamulimirisa pakati pa mbumba. Sauli akhali wakulapha kupiringana onsene, pontho akhali wakubalika kakamwe. Samweli alonga: ‘Onani. Uyu ndi mambo adakusankhulirani Yahova.’ Mbumba yakhuwa: ‘Mbakuzwe mambo.’

Pakutoma Sauli akhabvera Samweli mbacita pikhafuna Yahova. Mbwenye iye adzacinja. Mwacitsandzo, mambo nee akhafunika kupereka ntsembe. Ntsiku inango, Samweli apanga Sauli toera an’dikhire mpaka iye afike. Nakuti Samweli akhadembuka, Sauli apereka ntsembe maseze nee ndiye akhafunika kucita pyenepi. Kodi Samweli acitanji? Iye apanga Sauli: ‘Iwe nee ukhafunika kudawira Yahova.’ Kodi Sauli apfundza na madawo ace?

Mukupita kwa ndzidzi, pidaenda Sauli kamenya nkhondo na Amaleki, Samweli apanga Sauli toera aaphe onsene. Mbwenye Sauli nee apha Mambo Agage. Yahova apanga Samweli: ‘Sauli andipasira nkhodolo, iye akhonda kucita pidampanga ine.’ Samweli atsukwala kakamwe, mbapanga Sauli: ‘Nakuti wakhonda kubvera Yahova, iye anadzasankhula mambo unango.’ Pidazungunuka Samweli toera kuenda, Sauli aphata nguwo ya Samweli mbaikwewa. Nguwo yapanduka, iye mbasala na phindi m’manja mwace. Penepo, Samweli apanga Sauli: ‘Yahova anakupokosera umambo.’ Yahova mbadapasa umambo munthu wakuti mbadanfuna na kumbvera.