Umambo Walandaniswa na Muti Ukulu

Ntsiku inango namasiku, Nabhukodhonozore agopa kakamwe thangwi ya pinthu pidalota iye. Iye acemeresa amuna audziwisi toera ampange mabvekero a ndoto yace. Mbwenye nee m’bodzi adakwanisa kuifokotoza. Natenepa, mambo alonga na Dhanyeli.

Nabhukodhonozore apanga Dhanyeli: ‘Mu ndoto yanga, ndaona muti. Iwo ukhali wakulapha kakamwe mpaka kufika kudzulu. Iwo mbudaoneka na kutali kakamwe. Iwo ukhali na masamba akubalika na misapo mizinji. Pinyama pikhagona pa n’thundzi wa muti unoyu, pontho mbalame zikhamanga ntsandza mu nthawi za muti unoyu. Buluka penepo, anju atcita kubuluka kudzulu. Iye akhuwa: “Gwandani muti uyu, pontho gwandani nthawi zace. Mbwenye citca na mitcitci yace pisiyeni, pontho mangani citca na bhande ya utale na nkuwa. Ntima wa muti unoyu unadzacinja kubuluka wa munthu mbukhala wa cinyama mpaka kumala midzidzi minomwe. Anthu onsene anadzadziwa kuti Mulungu ndi Ntongi, pontho anapasa umambo munthu anafuna iye.”’

Yahova apanga Dhanyeli mabvekero a ndoto ineyi. Dhanyeli agopa kakamwe pidadziwa iye mabvekero ace. Iye alonga: ‘Mambo, ndikhanyerezera kuti ndoto iyi ikhalonga pya anyamalwa anu, mbwenye isalonga pya imwe. Muti ukulu udagwandwa ndimwe. Munakwatirwa umambo, buluka penepo, munadzadya tsanga ninga cinyama ca ntsanga. Nakuti anju alonga toera kusiya citca na mitcitci yace, kutsogolo munadzakhala pontho mambo.’

Caka cidatowera, Nabhukodhonozore akhali padzulu panyumba yace, mbakayang’ana nzinda wa Bhabhilonya. Iye alonga: ‘Onani basi kubalika kwa nzinda udamanga ine. Ndine mambo wankulu kupiringana onsene!’ Mu ndzidzi ukhalonga iye, abva fala yakubuluka kudzulu, mbilonga: ‘Nabhukodhonozore! Cincino unakwatirwa umambo wako.’

Mu ndzidzi unoyu, Nabhukodhonozore adzakhala nyansala, mbatoma kudya tsanga ninga ng’ombe. Iye abuluka panyumba mbaenda kakhala ntsanga na pinyama. Tsisi ya Nabhukodhonozore yadzakula mbikhala ninga manthenga a mbalame inacemerwa capungu, pontho ngole zace zadzakhala ninga za mbalame.

Pidapita pyaka pinomwe, Nabhukodhonozore adzakhala pontho mwadidi, pontho Yahova an’khazikisa ninga mambo. Buluka penepo, Nabhukodhonozore alonga: ‘Mbasimbwe Yahova, Mambo wakudzulu. Cincino ndisadziwa kuti Yahova ndi Ntongi. Iye asacepesa anthu akudzikuza, pontho asapasa umambo ule anafuna iye.’