Mafala Adalembwa pa Paredhi

Mukupita kwa ndzidzi, Bhelsazari adzakhala mambo wa Bhabhilonya. Ntsiku inango namasiku iye acemeresa anthu akufunika a mu nzinda unoyu toera kugumanika pa phwando. Iye atuma atumiki ace toera kubulusa makopo a ouro adakwata Nabhukodhonozore mu templo ya Yahova. Bhelsazari na alendo ace amwera makopo anewa mbalambira alungu awo. Mwakututumusa, waoneka nkono wa munthu mbukalemba mafala akukhonda dziwika pa paredhi ya mbuto ikhadyera iwo.

Bhelsazari agopa kakamwe. Iye acemeresa mang’anga ace mbapikira kuna iwo: ‘Munthu anakwanisa kufokotoza mafala awa, ndinadzan’khazikisa ninga ntongi wacitatu wa Bhabhilonya.’ Iwo ayesera, mbwenye nee m’bodzi adakwanisa kufokotoza. Nyanyi abwera mbalonga: ‘Mamuna anacemerwa Dhanyeli aphatisirwa na Nabhukodhonozore toera kufokotoza ndoto. Iye anakwanisa kufokotoza mafala anewa.’

Dhanyeli aenda kuna mambo. Bhelsazari apanga Dhanyeli: ‘Ungakwanisa kuleri mafala awa na kuafokotoza, unadzabvazikwa nkufu wa ouro, pontho ndinadzakuikha ninga mambo wacitatu wa Bhabhilonya.’ Dhanyeli alonga: ‘Nee ndisafuna miyoni yanu, mbwenye ndinakupangani mabvekero a mafala anewa. Babanu, Nabhukodhonozore, adzikuza. Natenepa Yahova ancepesa. Imwe musadziwa pyonsene pidancitikira, mbwenye mwapwaza Yahova thangwi yakumwera vinyu m’makopo a ouro adakwatwa mu templo Yace. Na thangwi ineyi Mulungu alemba mafala awa: Mene, Mene, Tekeli na Parsini. Mafala anewa asabveka kuti Amedhi na Apersya anadzakunda Bhabhilonya, pontho imwe nee munadzakhalabve mambo.’

Nzinda wa Bhabhilonya ukhaoneka ninga nkhabe munthu wakuti mbadakwanisa kuukunda. Iwo ukhadatsidzikizwa na mipanda yakuwanga na nkulo wakuzika. Mbwenye ntsiku ibodzi ene namasiku, Amedhi na Apersya akunda Bhabhilonya. Mambo wa Apersya, Siro, apwesa madzi a nkulo mpaka anyankhondo kukwanisa kuwambuka, mbafika pa misuwo ya nzinda. Pidafika iwo agumana misuwo ikhali yakufunguka! Anyankhondo apita, akunda nzinda mbapha mambo. Buluka penepo Siro adzakhala mambo wa Bhabhilonya.

Mu caka ceneci, Siro alonga: ‘Yahova andipanga toera kumanga pontho templo yace ku Yerusalemu. Onsene mwa mbumba yace anafuna kuphedzera mbaende.’ Natenepa, ninga pidapikira Yahova, Ayuda azinji abwerera ku Yerusalemu pidapita pyaka 70 nzinda unoyu mbudamala kale kufudzwa. Siro apereka makopo a ouro na a parata na pyonsene pidakwata Nabhukodhonozore mu templo. Mwandimomwene Yahova aphatisira Siro toera kuphedza mbumba yace.