Elizabheti Abala Mwana

Pakhadapita pyaka 400 mipanda ya Yerusalemu mbidamala kale kusasanyirwa. Nyantsembe Zakariya na nkazace, Elizabheti, akakhala cifupi na nzinda unoyu. Papita pyaka pizinji mbadamala kale kumanga banja, mbwenye iwo nee akhali na mwana. Ntsiku inango, Zakariya pikhapereka iye ntsembe zakununkhira m’mbuto yakucena ya mu templo, iye aona anju Gabhriyeli. Zakariya agopa kakamwe, natenepa Gabhriyeli ampanga: ‘Leka kugopa. Ndabwera na mphangwa zadidi za Yahova. Nkazako Elizabheti anadzakhala na mwana, pontho dzina yace inadzakhala Juwau. Yahova asankhula Juwau toera kuphata basa yakupambulika.’ Zakariya abvundza: ‘Ndinakhala tani na cinyindiro cakuti pyenepi pinacitikadi? Thangwi ine na nkazanga takalamba kakamwe toera kukhala na mwana.’ Gabhriyeli alonga: ‘Ndi Mulungu adandituma toera kukudziwisa mphangwa zenezi. Mbwenye nakuti iwe nee wakhulupira pidalonga ine, unadzakhala bewewe mpaka kubalwa kwa mwana unoyu.’

Ntsiku ineyi Zakariya amala ndzidzi uzinji mu templo kupiringana ntsiku zinango zonsene. Pidabuluka iye kunja, anthu akhan’dikhira akhafuna kudziwa pidancitikira. Zakariya nee akhakwanisabve kulonga. Mbwenye basi ene iye akhakwanisa kulonga na manja. Natenepa, anthu adzindikira kuti Zakariya atambira mphangwa za Mulungu.

Mukupita kwa ndzidzi, Elizabheti adzakhala na mimba mbabala mwana wamamuna, ninga pikhadalonga anju. Axamwali ace na acibale ace abwera toera kuona mwana. Iwo atsandzaya kakamwe. Elizabheti alonga: ‘Dzina yace ndi Juwau.’ Mbwenye iwo alonga: ‘Nee m’bodzi mwa abale ako anacemerwa na dzina ya Juwau. Ncemereni Zakariya dzina ya babace.’ Natenepa Zakariya alemba pa tabwa: “Dzina yace ndi Juwau.” Mu ndzidzi ubodzi ene, Zakariya atoma pontho kulonga! Anthu a mu Yudeya adzumatirwa na pidabva iwo thangwi ya mwana unoyu, mbabvundzika: ‘Kodi mwana unoyu anadzakhala ani?’

Na ciphedzo ca nzimu wakucena, Zakariya alonga profesiya iyi: ‘Mbasimbwe Yahova. Iye apikira Abhrahamu kuti mbadatuma Mesiya toera kutipulumusa. Juwau anadzakhala mprofeta, pontho anadzasasanyira njira ya Mesiya.’

Mu ndzidzi unoyu kwacitikambo cinthu cakudzumatirisa kuna Mariya, wacibale wa Elizabheti. Tinadzapfundza pyenepi mu nsolo unatowera.