Nkhani ya Paphiri

Pakumala kusankhula apostolo 12, Yezu aenda paphiri yakuti pakhali na anthu azinji. Iwo akhadabuluka ku Galileya, Yudeya, Tiro, Sidhoni, Sirya na pisa pinango pya Yordani. Iwo akhadabweresa anthu akhanentseka na mautenda, pontho anango akhathabuswa na madimonyo. Yezu aawangisa onsene. Buluka penepo, iye akhala kukhundu ibodzi ya phiri mbatoma kulonga. Iye afokotoza pinthu pinafunika ife kucita toera tikhale axamwali a Mulungu. Pontho afokotozambo kuti tisafunika kufuna Yahova. Mbwenye nee tinakwanisa kufuna Mulungu khala nee tisafuna anthu anango. Tisafunika kukhala anthu akukoma ntima mbaticita pinthu pyadidi kuna onsene, ngakhale kuna anyamalwa athu.

Yezu alonga: ‘Nee musafunika kufuna axamwali anu basi. Musafunikambo kufuna anyamalwa anu na kulekerera anthu na ntima onsene. Munthu angakutsukwalisani, ndokoni kacedze naye munjira yadidi mbamuphemba kulekererwa. Tsalakanani anango ninga munafuna imwe kuti anango akutsalakaneni.’

Yezu aperekambo uphungu wadidi kuna anthu thangwi ya mpfuma. Iye alonga: ‘Mphyakufunika kakamwe kukhala xamwali wa Yahova m’mbuto mwakukhala na kobiri izinji. Mbava anakwanisa kuba kobiri yanu, mbwenye nkhabe munthu anakwanisa kuba uxamwali wanu na Yahova. Lekani kudzudzumika kuti munadyanji, munamwanji peno munabvalanji. Yang’anani mbalame. Mulungu asacita pyonsene toera izo zikhale na pyakudya. Kudzudzumika nee kunakucitisani kukhala na umaso mu ndzidzi uzinji. Dziwani kuti Yahova asadziwa pinthu pinafuna imwe.’

Mwinji wa anthu ukhali paphiri ineyi cipo ukhadabva kale munthu unango mbakapfundzisa ninga Yezu. Iwo nee akhapfundziswa pinthu pyenepi na atsogoleri awo auphemberi. Thangwi yanji Yezu akhali mpfundzisi wankulu? Thangwi pyonsene pikhapfundzisa iye pikhabuluka kwa Yahova.