Pfunziro 3
Musafunika Kupfunza Pya Mulungu
Towera kukhala xamwali wa Mulungu, musafunika kupfunza pya iye. Kodi axamwali anu asaidziwa na kuiphatisira basa dzinanu? Ndimomwene kuti inde. Mulungu asafunambo kuti imwe mudziwe dzinace na kuiphatisira basa. Dzina ya Mulungu ndi Yahova. (Masalmo 83:18; Mateo 6:9) Musafunika pina kupfunza pinankomera na pinakhonda kunkomera. Musafunika kudziwa kuti mbani axamwali ace na mbani anyamalwa ace. Towera kudziwa munthu pasapita nzidzi. Bibilya isati kuti mphyanzeru kupambula nzidzi towera kupfunza pya Yahova.—Aefesi 5:15, 16.
Axamwali a Mulungu asacita pinakomera iye. Nyerezerani axamwali anu ene. Mungakhonda kuwatsalakana na kucita pinthu pinaida iwo, kodi anapitiriza na kukhala axamwali anu? Ndimomwene kuti nkhabe! Mwa njira ineyi, khala musafuna kuti Mulungu akhale xamwali anu, musafunika kucita pinankomera.—Jwau 4:24.
Si marelijiau onsene tayu anatsogolera ku uxamwali na Mulungu. Yezu, xamwali wapantima wa Mulungu, alonga za njira ziwiri. Ibodzi ya izo njikulu yakudzala na anthu. Iyo isatsogolera ku kufudzwa. Njira inango njakucepa anthu pang’ono basi alikwendamo. Njira ineyi isatsogolera ku umaso wakukhaliratu. Pyenepi pisabveka kuti, mungafuna khala na uxamwali wa Mulungu, musafunika kupfunza njira yakulungama ya kumulambira.—Mateo 7:13, 14.