Pfunziro 10
Munagumana Tani Relijiau Yandimomwene
Mungafuna kukhala xamwali wa Mulungu, musafunika kupita m’relijiau inatawirwa na Mulungu. Yezu alonga kuti “akulambira andimomwene” anadzalambira Mulungu mwa kubverana na “undimomwene”. (Jwau 4:23, 24) Pana njira ibodzi basi yadidi ya kulambira Mulungu. (Aefesi 4:4-6) Relijiau yandimomwene isatsogolera ku umaso wakukhaliratu mbwenye relijiau yauthambi isatsogolera ku kufudzwa.—Mateo 7:13, 14.
Munakwanisa kudzindikira relijiau yandimomwene na kuyang’ana makhaliro a anthu ace. Nakuti Yahova ndi wadidi, akulambira ace andimomwene asafunikambo kukhala anthu adidi. Sawasawa ninga muraranja wadidi usabala mararanja adidi, relijiau yandimomwene isakhala na anthu adidi.—Mateo 7:15-20.
Axamwali a Yahova asalemedza Bibilya pikulu pene. Asadziwa kuti Bibilya ndi ya Mulungu. Asasiya kuti pinalonga Bibilya pitsogolere umaso wawo, pimalise pyakunetsa pyawo, na kuwaphedza kupfunza pya Mulungu. (2 Timoti 3:16) Asalesera kucita pinamwaza iwo.
Axamwali a Yahova asapangiza kuti asafunana unango na nzace. Yezu apangiza kufuna kuna anthu mwa kuwapfunzisa pya Mulungu, na kuwangisa atenda. Anacita relijiau yandimomwene asapangizambo kufuna kuna anthu anango. Sawasawa ninga Yezu, nkhabe kupwaza anthu akucerenga peno adzinza inango. Yezu alonga kuti anthu anadzadziwa anyakupfunza ace mwa kufunana kunaonesawo kwa anzawo.—Jwau 13:35.
Axamwali a Mulungu asalemedza dzina ya Mulungu, Yahova. Khala munthu akhonda kuphatisa basa dzina anu, mbadakhala munthu unoyu mbodzi wa axamwali anu a pantima? Tayu! Tingakhala na xamwali, tisaphatisa basa dzina ace mbatilonga pya iye kwa anango. Natenepa, ale anafuna kukhala axamwali a Mulungu asafunika kuphatisa basa dzina ace na kulonga udidi wa iye kwa anango. Yahova asafuna kuti ticite pyenepi.—Mateo 6:9; Aroma 10:13, 14.
Sawasawa ninga Yezu, axamwali a Mulungu asapfunzisa anthu pya Umambo wa Mulungu. Umambo wa Mulungu ndi utongi wa kudzulu unafuna dzasanduza dziko yapantsi kukhala paradizu. Axamwali a Mulungu asagawana mphangwa zenezi zadidi za Umambo wa Mulungu na anthu anango.—Mateo 24:14.
Mboni za Yahova zisawangisira kukhala axamwali a Mulungu. Zisalemedza Bibilya pina zisafunana pakati pawo. Pontho zisaphatisa basa na kulemedza dzina ya Mulungu na kupfunzisa anthu anango pya Umambo wa Mulungu. Mboni za Yahova lero ziri na relijiau yandimomwene pa dziko yapantsi.