Pfunziro 11
Khondani Relijiau Yauthambi!
Satana na madimoni ace nkhabe funa kuti imwe muphatire basa Mulungu. Asafuna kupeusa kwa Mulungu anthu onsene anakwanisawo. Kodi asakwanisa tani kucita pyenepi? Njira ibodzi ndi yakubulukira m’relijiau yauthambi. (2 Akorinto 11:13-15) Relijiau ndi yauthambi khala iyo nkhabe kupfunzisa undimomwene wa m’Bibilya. Relijiau yauthambi ndi ninga kobiri ya pezi pezi—isaoneka ninga yandimomwene, mbwenye ndi yakusoa basa. Iyo inakwanisa kukubwereserani pyakunentsa pizinji pene.
Uthambi wa relijiau cipo na cipo nkhabe kukomeresa Yahova, Mulungu wa undimomwene. Pikakhala Yezu pa dziko yapantsi, ukhalipo nsoka wa relijiau ukhafuna kumupha. Anthu akhali m’nsoka unoyu akhanyerezera kuti njira ya kulambira kwawo ikhali yandimomwene. Iwo ati: “Tina Baba mbodzi basi, Mulungu.” Kodi Yezu abverana napyo pyenepi? Tayu! Iye aapanga kuti: “Imwe dimwe a kwa babanu, Diyabu.” (Jwau 8:41, 44) Lero, anthu akuinjipa asanyerezera kuti asalambira Mulungu, mbwenye mwandimomwene ali kuphatira basa Diyabu na madimoni ace.—1 Akorinto 10:20.
Sawasawa ninga muti wa kubvunda usabala misapo yakubvunda, relijiau yauthambi isakhala na anthu akucita pinthu pyakuipa. Dziko yadzala na pyakunetsa na thangwi ya pinthu pyakuipa pinacita anthu. Pana ulukwale, nthonga, kuba, kuponderezana, kupha, na upombo wakukakamiza. Azinji anacita pinthu pyenepi ali na relijiau, mbwenye relijiau yawo nkhabe kuwatsogolera kucita pinthu pyadidi. Angakhonda basika na kucita pinthu pyakuipa iwo nkhabe dzakhala axamwali a Mulungu.—Mateo 7:17, 18.
Relijiau yauthambi isapfunzisa anthu kuphemberera adzimunthu. Mulungu akhondesa kuphemberera adzimunthu. Pyenepi mphyakutawirika. Mbamudanyerezera tani khala munthu cipo na cipo nkhabe longa namwe, mbwenye asalonga na pithunzithunzi pyanu basi? Mbadakhala munthu unoyu xamwali anu wapantima? Tayu, nkhabe kwanisika. Yahova asafuna kuti anthu alonge na iye, tayu na dzimunthu peno na cithunzithunzi cakusowa umaso.—Eksodo 20:4, 5.
Relijiau yauthambi isapfunzisa kuti si pyakuipa tayu kupha anthu m’midzidzi ya nkhondo. Yezu alonga kuti axamwali a Mulungu anadzafunana unango na nzace. Ife nkhabe kupha anthu anafunefe. (Jwau 13:35) Mphyakuipa kuna ife ngakhale kupha anthu akuipa ene. Pidayenda anyamalwa a Yezu kammanga, iye hadatawirisa tayu kuti anyakupfunza ace amenye nkhondo towera kuntsidzikira.—Mateo 26:51, 52.
Relijiau yauthambi isapfunzisa kuti akuipa anadzathabuka m’infernu ya moto. Mbwenye Bibilya isapfunzisa kuti madawo asabweresa kufa. (Aroma 6:23) Yahova ndi Mulungu wa kufuna. Kodi pinakwanisika kuti Mulungu wa kufuna, athabuse anthu kwenda na kwenda? Ndimomwene kuti nkhabe! M’Paradizu munadzakhala relijiau ibodzi basi, ire inatawiriswa na Yahova. (Apokalipse 15:4) Marelijiau onsene adagona pa m’maunthawatawa a Satana anadzamala.