Mphangwa Za Umambo N.° 37

Mphangwa Kwa Dziko Yonsene Yapantsi

Kumala Kwa Uphemberi Waunthawatawa Kuli Cifupi!

▪ Kodi uphemberi waunthawatawandi ninji?

▪ Unadzamala tani?

▪ Kodi imwe munadzakhuyiwa tani?

Kodi uphemberi waunthawatawa ndi ninji?

Kodi imwe musanenseka thangwi ya usumankha unacitwa m’dzina ya uphemberi? Kodi nkhondo, uphanga na uipi unacitwa na ale analonga kuti asatumikira Mulungu usadzudzumisa manyerezero anu thangwi ya ulungami? Thangwi yanji uphemberi usaoneka ninga phata inatomesa nyatwa zizinji?

Mulando nee uli na mauphemberi onsene tayu, mbwenye uli na uphemberi waunthawatawa. Munthu wauphemberi wakulemedzeka kakamwe, Yezu Kristu, alonga kuti uphemberi waunthawatawa usacita mabasa akuipa, tenepa ninga ‘muti wakuipa usabala misapo yakuipa.’ (Mateo 7:15-17) Kodi uphemberi waunthawatawa usabala misapo ya ntundu wanji?

Uphemberi Waunthawatawa . . .

◼ USAPITA M’NKHONDO NA M’NDALE: Tsamba ya mphangwa Asiaweek yalonga: “Ku Asiya na m’makhundu anango, atsogoleri akuti ana maba na kutonga asacinja mwaukali manyerezero a anthu thangwi ya uphemberi towera aphindule napyo.” Ninga cakubwereswa, tsamba ya mphangwa isacenjeza: “Dziko iri m’ngobzi ya kuririma m’upswiru.” Ntsogoleri wankulu wauphemberi ku Estados Unidos alonga: “Musafunika kupha maphanga towera akhonde kupitiriza kupha anthu.” Kodi iye akhafuna kuti kucitwenji? Iye alonga: “Amaliseni onsene m’dzina ya Mbuya.” Mwakusiyana na pyenepi, Biblya isalonga: “Munthu mbodzi angalonga kuti: ine pano [ndisafuna] Mulungu, mbatchinga mbale wache ndi nyakunama.” (1 Jwau 4:20) Yezu alonga: “Funani [anyamalwa] anu.” (Mateo 5:44) Kodi ndi mauphemberi mangasi ananyerezera imwe kuti piwalo pyawo pisacita khundu m’nkhondo?

◼ USAMWAZA CIPFUNZISO CAUNTHAWATAWA: Mauphemberi azinji asapfunzisa kuti moyo peno nzimu ndi khundu yakukhonda oneka ya munthu inapulumuka pa kufa kwa manungo aunya­ma. Kubulukira ku cipfunziso ceneci, mauphemberi azinji asadyera piwalo pyawo, m’kupiphemba kobiri towera kuphemberera miyoyo yakufa. Mbwenye Biblya ina cipfunziso cakusiyana. ‘Moyo unadawa ndiwo unafuna kufa.’ (Ezekyele 18:4) ‘Anthu ali maso asapidziwa kuti anafa, mbwenye adafa kale nkhabe chibodzi chinakhulupira iwo.’ (Koelete [Mlaliki] 9:5) Yezu apfunzisa kuti anyakufa anadzalamuswa muli akufa. Kulamuswa muli akufa nee mbukudafunika mbidakhala kuti anthu ali na moyo wakukhonda kufa. (Jwau 11:11-25) Kodi uphemberi wanu usapfunzisa kuti moyo nkhabe kufa?

◼ UPHEMBERI WAUNTHAWATAWA USALEKERERA ULUKWALI: M’madziko anango, misoka yauphemberi isatawirisa amuna anapita m’mabonde na amuna anzawo peno akazi anapita m’mabonde na akazi anzawo kuti akhale atsogoleri na isakakamiza mautongi kuti atawirise maukwati a mamuna na mamuna peno nkazi na nkazi. Ngakhale mauphe­mberi anakhondesa ulukwali asalekerera atsogoleri amauphemberi adapita m’mabonde na anapiana. Kodi Biblya isapfunzisanji mphapo? Isalonga mwapakweca: “Lekani kudodomeka: anachita pya lukwali, analemedza adzimunthu, anachita upombo, ananyadzisa andzawo, anagona na amuna andzawo . . . , awa onsene n’dziko ya Mulungu hanapitamo tayu.” (1 Akorinto 6:9, 10) Kodi musadziwa mauphemberi analekerera ulukwali?

Kodi ndi ninji cinafuna kudzacitikira mauphemberi anabala misapo ya­kuipa? Yezu acenjeza: “Muti unakhonda kubala misapo [yadidi], unatemiwa mbuponyiwa pa moto.” (Mateo 7:19) Inde, uphemberi waunthawatawa unadzatemiwa na kufudzwa! Kodi pyenepi pinadzacitika lini na pinadzacitika tani? Masomphenya aciprofesiya adalembwa m’bukhu ya Biblya ya Apokalipse, kapitulu 17 na 18, asapasa ntawiro.

Kodi Uphemberi Waunthawatawa Unadzamala Tani?

Nyerezerani ipi. Nkazi wa upombo akhala pa nsana wa cinyama cakugopswa. Cinyama ceneci cina misolo minomwe na nyanga khumi. (Apokalipse 17:1-4) Kodi nkazi wa upombo asaimirira ani? Iye asatonga ‘amambo onsene a pantsi pano.’ Abvala nguwo zakufwira ninga ciropa, asaphatisira lubani na ndi wampfuma kakamwe. Mwakuthimizira, iye asanyengeta “mbumba za anthu onsene” na mabasa ace aufiti. (Apokalipse 17:18; 18:12, 13, 23) Biblya isatiphedza kuona kuti nkazi unoyu wa upombo ndi cigawiko ca uphemberi wa dziko yonsene yapantsi. Iye nee asaimi­rira uphemberi ubodzi basi tayu, mbwenye mauphemberi onsene anabala misapo yakuipa.

Cinyama cidakwira nkazi wa upombo cisaimirira mphambvu za ndale za dziko yonsene yapantsi.a (Apokalipse 17:10-13) Uphemberi waunthawatawa wakwira pa nsana wa cinyama ceneci ca ndale, mbuyesera kutonga pyakusankhula pyaco na kutsogolera njira zaco.

Towera kudziwa pizinji thangwi ya pyenepi, onani bruxura yakuti Khalani Akulindira! tsamba 12 na 13, yakubuluswa na Mboni za Yahova.

Mbwenye, mokhonda dembuka panadzacitika cinthu cakudzumatirisa. “Nyanga zire khumi na chinyama chene [anadzatchinga] nkazi ule wa upombo, anadzan’siya ekha na usiwa, anadzadya manungo ache mbadzam’pisisa na moto.” (Apokalipse 17:16) Mphambvu za ndale za dziko yonsene yapantsi zinadzaphindukira mwakudzidzimusa na mwakugopswa uphemberi waunthawatawa mbaufudziratu! Kodi ndi ninji cinafuna kucimbizisa pyenepi? Bukhu ya Biblya ya Apokalipse isatawira: “[Mulungu] aapasa mu mitima mwawo nzeru zakuchita pikhafuna iye.” (Apokalipse 17:17) Inde, Mulungu anadzacemera uphemberi waunthawatawa towera udzapitawirire thangwi ya mabasa onsene akuipa anacita iwo m’dzina yace. M’kukulumizwa na cilungamo caungwiro, Mulungu anadzaphatisira axamwali andale a uphemberi waunthawatawa ninga cida cace cakufudza.

Kodi musafunika kucitanji khala imwe nkhabe funa kufudzwa pabodzi na uphemberi waunthawatawa? Nyamphangwa wa Mulungu asasembedzera: “Anthu a mbumba yanga, fulukani kuno.” (Apokalipse 18:4) Inde, uno ndi nzidzi wakuthawa m’uphemberi waunthawatawa! Kodi musafunika kuthawira kupi? Nee musafunika kuthawira kwa ale anakhonda kukhalapo kwa Mulungu, thangwi tsogolo yawombo iri pa ngobzi. (2 Atesalonika 1:6-9) Mbuto ibodzi basi yakuthawira ndi uphemberi wandimomwene. Kodi munadzindikira tani uphemberi wandimomwene?

Munadzindikira Tani Uphemberi Wandimomwene

Kodi uphemberi wandimomwene usafunika kubala misapo ipi yadidi?​—Mateo 7:⁠17.

Uphemberi Wandimomwene . . .

◼ USAPANGIZA KUFUNANA: Alambiri andimomwene “si a pantsi pano tayu [‘nkhabe cita khundu ya dziko,’ Tradução do Novo Mundo],” nkhabe pambulana thangwi ya ntundu peno uunthu, na asapangiza “kufunana” unango na nzace. (Jwau 13:35; 17:16; Machitiro 10:34, 35) Mbuto mwakuphana unango na nzace, iwo ali dzololo towera kufa thangwi ya anango.​—1 Jwau 3:⁠16.

◼ USANYINDIRA MAFALA A MULUNGU: Mbuto mwakupfunzisa “myambo ya makholo” na “myambo ya anthu,” uphemberi wandimomwene usabulusa cipfunziso cawo m’Mafala a Mulungu, Biblya. (Mateo 15:​6-⁠9) Thangwi yanji? Thangwi ‘Malembo onsene ndiye Mulungu adaalembesa towera aphedze anthu pa kupfundisa, pa kuzuza [peno kusumula] na pa kusandika.’—2 Timoti 3:16.

◼ USAWANGISA MABANJA NA USAPHATISIRA MIDIDA YA PADZULU YA MAKHALIRO ADIDI: Uphemberi wandimomwene usapfunzisa amuna ‘kufuna akazi awo sawasawa ninga manungo awo ene,’ usaphedza akazi ‘kulemedza amunawo’ na usapfunzisa ana ‘kubvera ababawo.’ (Aefesi 5:​28, 33; 6:⁠1) Mwakuthimizira, ale adatambira ciimiriro cakupitawirira asafunika kukhala na makhaliro a citsanzo cadidi.—1 Timoti 3:1-10.

Kodi ulipo uphemberi unaphatisira midida ineyi? Bukhu yakuti Holocaust Politics (Kuphiwa Kwa Anthu Thangwi Ya Ndale), idabuluswa m’2001, isalonga: “Anthu azinji mbadaphatisira midida inamwazwa na kuphatisirwa na Mboni za Yahova, mbitidakwanisa kucalira Nkhondo Yaciwiri ya Dziko Yonsene Yapantsi, na kuphiwa kwa madzinza a anthu nee mbukudanensabve dziko tayu.”

Inde, m’madziko akukwana 235, Mboni za Yahova nee zisamwaza basi midida ya makhaliro adidi a Biblya tayu​—izo zisakhala mwakubverana nayo. Tisakudembeterani kuti muphembe Mboni za Yahova kuti zikuphedzeni kupfunza pinafuna Mulungu kwa imwe towera mumulambire m’njira yakutawirika. Uno ndi nzidzi wakucita pinthu. Lekani dembuka. Kumala kwa uphemberi waunthawatawa kuli cifupi!—Sofoniya 2:2, 3.

Khala musafuna mphangwa zakuthimizirika zakubuluswa m’Biblya zinamwaza Mboni za Yahova, khalani aufulu towera kuzilembera pa mbuto inagumanika pantsiapa.

□ Mokhonda funa pinango, ndikuphemba bruxura yakuti Khalani Akulindira!

□ Ndaphata mwendo ndisakeni towera mundicitire pfunziro ya Biblya ya panyumba yokhonda lipa.

[Pidzindikiro pyapantsi]

[Ntsonga ikulu pa tsamba 3]

Uphemberi waunthawatawa usatonga ‘amambo onsene a pantsi pano’

[Ntsonga ikulu pa tsamba 3]

“Anthu a mbumba yanga, fulukani kuno”