Pedhru Akhonda Yezu

Yezu pikhali iye na apostolo ace mu sala yandzulu, iye aapanga: “Imwe monsene munadzandithawa masiku ano.” Pedhru atawira: ‘Ine nkhabe! Ngakhale kuti onsene akuthaweni, ine cipo ndinadzakuthawani.’ Mbwenye Yezu apanga Pedhru: “Dzongwe mbidzati kulira, iwe unadzandikhonda katatu.”

Pidakwatwa Yezu na anyankhondo mpaka kunyumba kwa Kaifa, apostolo azinji athawa. Mbwenye Pedhru na ndzace atowera Yezu nakutali. Iye apita n’nyumba ya Kaifa mbaotha moto. Namasiku nyabasa m’bodzi wankazi ayang’ana Pedhru soo mbalonga: ‘Ndisakudziwa! Iwe ukhali pabodzi na Yezu!’

Pedhru alonga: ‘Nkhabe, ine nkhabe kundziwa, pontho nee ndisadziwa pinalonga iwe!’ Iye aenda dhuzi na nsuwo ukulu. Mbwenye mwakukhonda dembuka nyabasa unango wankazi amuona mbapanga mwinji: ‘Mamuna uyu akhali na Yezu!’ Pedhru akhonda pontho basi! Buluka penepo mamuna unango alonga: ‘Iwe ndiwe m’bodzi wawo! Usalonga ninga anthu a ku Galileya, sawasawa ninga Yezu.’ Mbwenye Pedhru adumbira: ‘Ine nkhabe kundziwa munthu unoyu analonga imwe!’

Pa ndzidzi unoyu, dzongwe yalira. Yezu azungunuka mbayang’ana Pedhru. Natenepa Pedhru akumbuka mafala akhadalonga Yezu. Iye abuluka panja mbalira kakamwe.

Pa ndzidzi unoyu, nkulu wa anyantsembe na amuna anango agumanyikana n’nyumba ya Kaifa toera kutonga Yezu. Iwo akhadabverana kale toera kupha Yezu, natenepa iwo akhasaka mathangwi toera kucita pyenepi. Mbwenye nee akhaugumana thangwi Yezu nee akhadacita cinthu cakuipa. Pakumalisa, Kaifa abvundza Yezu: ‘Kodi iwe ndiwe Mwana wa Mulungu?’ Yezu atawira: ‘Inde.’ Kaifa alonga: ‘Nee tisafuna pontho umboni unango. Iye atikana Mulungu!’ Anyakutonga atawira: ‘Mamuna uyu athema kuphiwa.’ Penepo anango atoma kum’phulira mata, am’phopha nkhope mbam’menya, mbalonga: “Khala ndiwe mprofeta tipange, mbani adakumenya!”

Pidaca kunja, Kaifa na andzace agumanyikana mbabvundza pontho Yezu: “Mphapo ndiwe mwana wa Mulungu?” Yezu aatawira: “Imwe ene ndimwe analonga kuti ndine Mwana wa Mulungu.” Natenepa, anthu aona kuti Yezu atikana Mulungu, na thangwi ineyi ankwata mbaenda naye kunyumba ya Ntongi Waciroma, Ponsyo Pilato. Buluka penepo ninji pidacitika? Tinaona pyenepi mu nsolo unatowera.