Yezu Amangwa

Yezu na apostolo ace apita na ku Gowa ya Sidhroni, pikhaenda iwo ku Phiri ya Mulivera. Dzuwa ikhadadoka, pontho mwezi ukhagaka. Pidafika iwo m’munda wa Getsemani, Yezu aapanga: ‘Khalani pano, pontho lekani kugona.’ Mwandimomwene Yezu akhadzudzumika kakamwe. Na thangwi ineyi, iye abuluka pana iwo mbaenda patsogolo pang’ono, agodama mbatoma kucita phembero: “Mbapicitike ninga munafunira imwe.” Natenepa, Yahova atuma anju toera kuwangisa Yezu. Pidabwerera Yezu kuna apostolo ace atatu, aagumana mbakagona. Iye aapanga: ‘Lamukani! Uno nee ndi ndzidzi toera kugona! Wafika ndzidzi toera ine ndiperekwe m’manja mwa anyamalwa anga.’

Mwakukhonda dembuka Yuda afika pabodzi na mwinji wa anthu wakuti ukhali na masupada na mitcamu. Yuda akhadziwa kuti Yezu akhali kweneko thangwi kazinji kene iwo akhaenda pa mbuto ineyi. Yuda akhadabverana na anyankhondo kuti mbadadzindikira tani Yezu. Iye afendedzera Yezu cifupi mbalonga: “Muli tani Mpfundzisi!” Buluka penepo, iye ampswompswona Yezu. Natenepa Yezu alonga: ‘Yuda, ukundipereka na mpswompswono?’

Yezu ayang’ana mwinji mbabvundza: “Mbani anasaka imwe?” Iwo atawira: “Yezu wa ku Nazareti.” Buluka penepo, iye aatawira: “Ndine pano.” Natenepa pidabva iwo pyenepi, iwo abwerera nduli mbagwa pantsi thangwi yakugopa. Yezu abvundza pontho mwinji: “Mbani anasaka imwe?” Iwo atawira: “Yezu wa ku Nazareti.” Yezu atawira: ‘Ine ndakupangani kale kuti ndine pano. Awa asiyeni pyawo aende.’

Pidadzindikira Pedhru pikhacitika, iye abulusa supada mbagwanda khutu ya Malko, nyabasa wa nyantsembe wankulu. Mbwenye Yezu aphata khutu ya nyabasa unoyu mbamuwangisa. Buluka penepo, iye apanga Pedhru: “Ikha supada yako pa mbuto payo, thangwi onsene anaphatisira supada anadzafa na supada.” Anyankhondo aphata Yezu mbam’manga, pontho apostolo ace onsene athawa. Natenepa iwo ankwata mbaenda naye kuna nkulu wa anyantsembe anacemerwa Anasi. Anasi acita Yezu mibvundzo, buluka penepo mbantumiza kuna Nyantsembe Wankulu Kaifa. Mphapo ninji pidacitika na apostolo?