“Umambo Wanu Mbudze”

Yahova alonga: ‘Ndinadzapukuta misozi yonsene m’maso mwawo, pontho nkhabe kudzaonekabve kufa, nee kutsukwala, nee kulira, nee kubva kupha. Thangwi pinthu pyonsene pyakuipa pinadzaduwalika.’

Yahova acita Adhamu na Eva mbaaikha m’munda wa Edheni toera akhale mwakutsandzaya na mwantendere. Iwo akhafunika kulambira Babawo wakudzulu na kubala ana toera kudzadza dziko yapantsi. Adhamu na Eva nee abvera Yahova, mbwenye cifuniro ca Yahova nee cacinja. M’bukhu ino, taona kuti pyonsene pinalonga Yahova pisacitikadi. Mu Umambo wace, iye anadzabweresa nkhombo zakutsandzayisa pa dziko yapantsi, ninga pidapikira iye kuna Abhrahamu.

Mwakukhonda dembuka, Sathani, madimonyo ace na anthu onsene akuipa anadzafudzwa. Anthu onsene anadzalambira basi ene Yahova. Ife nee tinadzabva pontho kupha peno kufa. M’mbuto mwace, ntsiku zonsene tinadzalamuka na ungumi wadidi, pontho mwakutsandzaya. Dziko yonsene yapantsi inadzakhala paraizu. Anthu onsene anadzakhala na pyakudya pyadidi na nyumba yadidi. Anthu onsene anadzakhala akulungama, pontho nee anadzacitabve pyakuipa. Pinyama pya ntsanga nee pinadzatigopa, pontho ife nee tinadzapigopambo.

Pinadzakhala pyakutsandzayisa kakamwe Yahova angatoma kulamusa anthu muli akufa. Ife tinadzadziwa anthu a ndzidzi wakale, ninga Abheli, Nowa, Abhrahamu, Sara, Mose, Rute, Esteri na Dhavidhi. Iwo anadzaphata basa pabodzi na ife toera kucitisa Dziko Yapantsi kukhala paraizu. Ndzidzi onsene panadzaoneka mabasa mazinji adidi toera kucita.

Yahova asafuna kuti mupite m’Paraizu. Imwe munadzadziwa mwadidi Yahova. Mungawangisa uxamwali wanu na Yahova cincino, munadzakhala axamwali a Yahova kwenda na kwenda!