Watoma Umaso Wakunensa

KUNJA kwa munda wa Edeni, Adamu na Yeva akhali na pinenso pizinji. Akhafunika kuphata basa mwakunenseka towera agumane pyakudya. Mbuto mwa miti ya misapo yakubalika, iwo aona minga na pswepswe yakuinjipa kukula m’nkhundunkhundu mwawo. Pyenepi ndipyo pidacitika mudakhonda bvera Adamu na Yeva Mulungu na mudalekewo kukhala axamwali Ace.

Mbwenye pyakunyanya kupiringana pyenepi, Adamu na Yeva atoma kufa. Kumbukani kuti Mulungu aacenjeza kuti mbadadya nsapo wa ntundu ubodzi wa muti mbadadzafa. Mwandimomwene, pa ntsiku ibodzi ene idadya iwo, atoma kufa. Akhala mapswiru tani m’kukhonda bvesera Mulungu!

Ana onsene a Adamu na Yeva abalwa Mulungu mbadamala thamangisa anyakubala awo m’munda wa Edeni. Pyenepi pisabveka kuti ana aombo mbadadzakalamba na kufa.

Mbadakhala kuti Adamu na Yeva abvera basi Yahova, umaso mbudakhala wakutsanzaya kwa iwo na ana awo. Iwo onsene mbadakwanisa kukhala na umaso kwenda na kwenda mwakutsanzaya m’dziko yapantsi. Nee mbodzi mbadadzakalamba, kuduwala na kufa.

Mulungu asafuna kuti anthu akhale na umaso kwenda na kwenda mwakutsanzaya, na Iye asapikira kuti ntsiku yace iwo anadzakhala tenepa. Si dziko yapantsi basi inafuna kudzakhala yakubalika tayu, mbwenye anthu onsene anadzakhala na ungumi wadidi. Na anthu onsene pa dziko yapantsi anadzakhala axamwali adidi kwa anango pabodzi na a Mulungu.

Mbwenye Yeva hakhalibve xamwali wa Mulungu tayu. Natenepa mudabala iye ana, nee pikhali pyakukhondanensa. Abva kupha. Kukhonda bvera Yahova kwambwereseradi kutsukwala kuzinji, kodi imwe nkhabe tawira?

Adamu na Yeva akhali na ana azinji amuna na akazi. Mudabalwa mwanawo wakutoma wamamuna, ancemera Kayini. Mwana wawo waciwiri wamamuna ancemera Abeli. Kodi ndi ninji pidaacitikira? Kodi musapidziwa?