Adhamu na Eva Nee Abvera Mulungu

Ntsiku inango, mu ndzidzi wakuti Eva akhali ekha, nyoka yabwera mbilonga na iye. Nyoka yambvundza: ‘Ndimomwene kuti Mulungu akukhondesani kudya misapo yonsene ya miti ya m’munda?’ Eva atawira: ‘Tinakwanisa kudya misapo ya miti yonsene ya m’munda, kusiyapo muti ubodzi basi. Tingadya nsapo wa muti unoyu tinadzafa.’ Nyoka yalonga: ‘Imwe nee munadzafa. Mwandimomwene, imwe mungadya nsapo unoyu, munadzakhala ninga Mulungu.’ Kodi unoyu ukhali undimomwene? Nkhabe, mbwenye Eva akhulupira uthambi unoyu. Pikhapitiriza Eva kuyang’ana nsapo unoyu, cifuno cace ca kuudya cikhathimizirikambo. Buluka penepo iye audya mbapasambo Adhamu. Adhamu akhadziwa kuti angakhonda kubvera Mulungu iwo mbadafa, mbwenye iye adya nsapo unoyu maseze akhadziwa pyenepi.

Namaulo a ntsiku ineyi, Yahova alonga na Adhamu na Eva. Iye aabvundza kuti thangwi yanji iwo nee abvera. Eva apasa mulando nyoka, mbwenye Adhamu apasa mulando Eva. Nakuti Adhamu na Eva nee abvera, Yahova aathamangisa m’munda wa Edheni. Toera iwo akhonde kubwerera pontho m’munda unoyu, Yahova aikha aanju na supada yakugaka moto pa njira ikhaenda m’munda unoyu.

Yahova alonga kuti ule adalonga uthambi kuna Eva asafunikambo kutcunyuswa. Undimomwene ndi wakuti nee ndi nyoka idalonga na Eva. Yahova nee acita nyoka toera ilonge. Adacitisa nyoka ineyi kulonga ndi anju wakuipa. Anju unoyu acita pyenepi toera kunyengeza Eva. Pontho iye asacemerwa Sathani Dyabo. Ntsogolo, Yahova anadzafudza Sathani toera akhonde kunyengeza pontho anthu kuti acite pinthu pyakuipa.