Mphangwa kwa Anyakugumanika

AKALINDI Akalindi asankhulwa toera kukuphedzani. Taphata miyendo, bveranani nawo mwadidi mbamutowezera pitsogolero pyawo pakuikha miotokala, njinga, kuyang’anira anthu, kukoya mbuto yakukhala na pinthu pinango.

UBATIZO Mipando ya anyakufuna kubatizwa inadzakoyiwa kutsogolo kwa platifomu. Nkhani ya ubatizo mbidzati kutoma n’Sabudu namacibese, anyakufuna kubatizwa asafunika kukhala pa mbuto idakoyerwa iwo. Onsene asafunika kubweresa cakupukuta naco manungo na nguwo zakuthema toera kubatizwa nazo.

PYAKUPEREKA Kobiri izinji yaphatisirwa pakucita masasanyiro a mbuto yadidi, mitcini yakugaluza mafala na kwacitwa mabasa anango mazinji toera nsonkhano wa gawo ukhale wakutsandzayisa na wakutiphedza kukhala cifupi na Yahova. Pyakupereka pyanu pyaufulu pisaphedzera toera kulipa pinthu pyenepi na pisaphedzerambo basa ya dziko yonsene yapantsi. Toera kucita pyakupereka, pana mabokosi akulembwa mwadidi pa mbuto ino. Munakwanisambo kucita pyakupereka mukuphatisira saiti yathu donate.jw.org.Tinapereka takhuta thangwi ya pyakupereka pyanu pyonsene. Mathubo Akutonga asapereka takhuta thangwi yakuphedzera kwanu pifuno pya Umambo mwakudzala manja.

UKONDZI WAKUTOMA Taphata miyendo kumbukani kuti ukondzi unoyu ndi wa utenda wa mwandzidzidzi basi.

MBUTO INAKOYERWA PYAKUTAYIKA NA PYAKULOKOTWA Pinthu pyonsene pyakulokotwa pisafunika kuperekwa ku Dhepartamentu ya Pyakutayika na Pyakulokotwa. Khala mwataya cinthu, ndokoni kabvundze dhepartamentu ineyi. Anapiana adatayika asafunika kuperekwa ku dhepartamentu ineyi. Mbwenye mbuto ineyi nee isafunika kuoniwa ninga yakukoyera ana. Taphata miyendo tsalakanani ananu, pontho khalani nawo pabodzi.

PAKUKHALA Taphata miyendo tsalakanani anango. Kumbukani kuti mbuto zisafunika kukoyerwa basi ene ale anacita ulendo pabodzi na imwe, anakhala na imwe panyumba ibodzi ene, peno anapfundzisa imwe Bhibhlya. Taphata miyendo lekani kuikha pinthu m’mipando idakhonda koya imwe.

BASA YAKUPEREKEKA Khala musafuna kuphedzera mabasa pa nsonkhano wa gawo, taphata miyendo dziwisani Dhepartamentu ya Mphangwa na Basa Yakuperekeka.

NSONKHANO WAKUPAMBULIKA

Xikola ya Amwazi Mphangwa a Umambo Apainiya akuti ali nkati mwa pyaka 23 mpaka 65 akuti asafuna kuthimizira utumiki wawo asaphembwa toera agumanike pa nsonkhano wa Xikola ya Amwazi Mphangwa a Umambo unafuna kucitwa nDimingu pa ndzidzi wakupuma. Mbuto na ndzidzi wa nsonkhano unoyu unadzadziwiswa.