NSOLO WA REVISTA | KODI MULUNGU ASAFUNIKA KUCITA KHUNDU MU UMASO WATHU?
Thangwi Yanji Mbvundzo Unoyu Usacitwa?
“Kodi musanyerezera kuti Mulungu asafunika kucita khundu mu umaso wanu? Azinji asanyerezera kuti nkhabe.” Mafala anewa asagumanika pa kwadru ipswa ya mphangwa idalipwa na nsoka wa anthu akukhonda kukhulupira kukhalapo kwa Mulungu. Mwandimomwene iwo asapibva kuti Mulungu nee asafunika kucita khundu mu umaso wawo.
Mu njira inango, azinji analonga kuti asakhulupira Mulungu asacita pisankhulo ninga kuti iye nee alipo. Salvatore Fisichella, bispo wa Katolika, alonga thangwi ya piwalo pya gereja yace kuti: “Anthu angatiyang’ana panango nee m’bodzi mbadatidzindikira kuti ndife Akristu lero thangwi makhaliro a umaso wathu ndi akulandana na a anthu akukhonda kukhulupira.”
Anango asadzudzumika kakamwe thangwi ya Mulungu. Iwo asanyerezera kuti iye ali kutali kakamwe peno wakukhonda kufendedzereka toera kucita khundu mu umaso wawo. Natenepa, anthu anewa asasaka Mulungu basi ene angagwerwa na nyatwa peno angafuna pinthu, kazinji kene Mulungu asakhala ninga ntumiki wawo wakuti asacita pyonsene pinafuna iwo.
Anango asaona pipfundziso pya uphemberi kuti nkhabe phedza, peno asacimwana kuphatisira mphangwa zinapfundzisa gereja yawo. Mwacitsandzo, mapurusento 79 a Katolika a ku Alemanya asakhulupira kuti ndi pyakutawirika kuti mamuna na nkazi akhale pabodzi mbadzati kumanga banja. Pyenepi nee pisabverana na pipfundziso pya gereja yawo na pya Bhibhlya. (1 Akorinto 6:18; Ahebere 13:4) Mwandimomwene, nee ndi a Katolika basi akuti ali na makhaliro akukhonda kubverana na pipfundziso pya uphemberi wawo. Atsogoleri a mauphemberi mazinji asadungunya kuti anthu awo asakhala ninga “anthu akukhonda kukhulupira kukhalapo kwa Mulungu.”
Pitsandzo pyenepi pisacitisa anthu kucita mbvundzo uyu: Kodi Mulungu asafunikadi kucita khundu mu umaso wathu? Nkhani ineyi nee ndi ipswa tayu. Pakutoma yalongwa m’bukhu yakutoma ya Bhibhlya. Toera kugumana ntawiro wa mbvundzo unoyu, tendeni tione nkhani zingasi zinagumanika m’bukhu ya Genesi.
[Foto pa tsamba 3]