NSOLO WA REVISTA | KODI MULUNGU ASAFUNIKA KUCITA KHUNDU MU UMASO WATHU?

Thangwi Yanji Mulungu Asafunika Kucita Khundu mu Umaso Wathu

Anyakudziwa pya ungumi wa manyerezero alonga kuti anthu asafunika pifuno pyauzimu toera kutsandzaya. Tisaona pyenepi nakuti anthu asafuna kucita pinthu pinafuna iwo peno kutumikira munthu wakuti ndi nkulu kupiringana iwo. Toera kukwanirisa pyenepi, anango asabvunga ndzidzi wawo mbakatsandzaya na mabasa awo, nyimbo na pinthu pinango. Mbwenye, azinji nee asapembera peno kukwanirisa kwenda na kwenda pinthu pyenepi.

Nakuti anthu abalwa mwakusowa pifuno pyauzimu, pyenepi nee pisadzudzumisa anyakuleri Bhibhlya. Kapitulu yakutoma ya Genesi isapangiza kuti pidamala Mulungu kucita Adhamu na Eva, iye akhalonga na iwo ndzidzi onsene, mbaatawirisa toera kukhala na uxamwali na iye. (Genesi 3:8-10) Mulungu nee acita anthu toera atongeke okhene; mbwenye iwo acitwa na cifuno toera kulonga na Nsasanyi wawo. Kazinji kene Bhibhlya isalonga kufunika kwa kulonga na Nsasanyi.

Mwacitsandzo, Yezu alonga: “Anyakutsandzaya ndi ale anadzindikira pyakusowa pyawo pyauzimu.” (Mateo 5:3) Na mafala anewa, tinakwanisa kulonga kuti cinthu cakufunika kakamwe toera kutsandzaya na kukomerwa na umaso ndi kukwanirisa pifuno pyathu pyauzimu. Tinacita tani pyenepi? Yezu apangiza ntawiro mudalonga iye kuti: ‘Si na mikate yokha tayu munthu anakhala na moyo, mbwenye na mafala onsene anabuluka n’kanwa mwa Mulungu.’ (Mateo 4:4) Kodi ndi mu njira zipi mafala a Mulungu asalonga kuti, manyerezero na pitsogolero pya Mulungu pinagumanika m’Bhibhlya pisaticitisa toera tikhale akutsandzaya na umaso wadidi? Tendeni tidinge njira zitatu zakufunika kakamwe.

Tisafunika Citsongolero Cadidi

Lero, kuna anthu azinji adapfundza kakamwe akuti ali dzololo toera kupereka uphungu thangwi ya uxamwali, ufuni, umaso wa banja, kutonga nseru, kutsandzaya ngakhale mu pinthu pyonsene pya umaso. Mbwenye, mbani adathema toera kupereka citsogolero cadidi na cakulinganira mu pinthu pyenepi pyonsene kusiyapo Nsasanyi wa anthu, Yahova Mulungu?

Mwacitsandzo: Mungagula cinthu cipswa, ninga ntcini wakukhoma foto peno ntcini wandzeru, musadikhira kuti uli na bukhu ya pitsogolero pya nciti, peno bukhu inafokotoza kuti munaphatisira tani mwadidi cinthu ceneci mbamukomerwa. Bhibhlya ndi ninga bukhu ineyi ya pitsogolero. Ndi bukhu ya pitsogolero pya umaso wa anthu yakuti Mulungu, nsasanyi wace atipasa toera tiiphatisire. “Bukhu ineyi” isafokotoza kuti anthu asafunika kucitanji, pontho asafunika kuphatisira tani umaso wawo.

Ninga bukhu ya pitsogolero yakulembwa mwadidi, Bhibhlya isacenjeza anyakuleri toera kucalira kuphatisira pinthu pyakuti pinacimwanisa kutsidzikiza na kuphata basa mwadidi kwa umaso wawo. Anthu anango anakwanisa kupereka uphungu wakuti unaoneka ninga wakukhonda nentsa kuutowerera, mbwenye nee ndi pyakuthema kunyerezera kuti tinakhala na maphindu adidi na kucalira nyatwa tingatowerera pitsogolero pya Nsasanyi?

Ngakhale kuti Yahova Mulungu asapereka pitsogolero, iye nee asatikakamiza toera kupitawira. Thangwi iye asatifuna na asafuna kutiphedza, mwaufuni asatipanga kuti: ‘Ine ndine Yahova, Mulungu wanu, ule anafuna kukupfundzisani toera udidi wanu, ndinakucitisani kufamba pa njira inatongwa imwe kutoweza. Imwe, mbumudabvera matongero anga basi, pidzo pizinji mbapidadza kuna imwe ninga nkulo wakukhonda uma, kutsandzaya kwanu mbukudakhala ninga munabwerera mabimbi pa gombe.’ (Izaiya 48:17, 18) M’mafala anango, tingabvera citsogolero ca Mulungu, tinadzakhala na umaso wadidi. Mu njira inango, toera kukhala na umaso wadidi na wakutsandzaya tisafunika kuti Mulungu acite khundu mu umaso wathu.

Tisafuna Matawiro a Mibvundzo Inalonga pya Nyatwa Zathu za Umaso

Anango asapibva kuti Mulungu nee asafunika kucita khundu mu umaso wawo thangwi asadzudzumika na pinthu pizinji mu umaso wawo pyakuti nkhabe kubverana na kunyindira kwawo Mulungu waufuni. Mwacitsandzo, iwo anakwanisa kubvundza: ‘Thangwi yanji anthu adidi asathabuka?’ ‘Thangwi yanji anapiana anango akusowa miseru asabalwa akulamala?’ ‘Thangwi yanji umaso ndi wakukhonda kulungama?’ Mwandimomwene, ineyi ndi mibvundzo yakufunika kakamwe, pontho kugumana matawiro a mibvundzo ineyi kunakhuya kakamwe umaso wathu. Mbwenye, mbuto mwakucimbiza kupasa mulando Mulungu thangwi ya nyatwa zenezi, tendeni tione kuti Mafala a Mulungu, Bhibhlya, inakwanisa kupereka ceza pa nkhani ineyi.

Mu kapitulu yacitatu ya Genesi tisagumana nkhani ya Sathani wakuti aphatisira nyoka toera kunyengerera Adhamu na Eva kuti akhonde kubvera ntemo wa Yahova Mulungu wakudya nsapo wa muti wakudziwa pyadidi na pyakuipa. Sathani alonga kuna Eva: “Nkhabe nee munadzafa bi. Mbwenye, Mulungu asadziwa kuti, ntsiku inadzadya imwe, maso anu anadzafunguka, na imwe munadzakhala sawa-sawa na Mulungu, munadzadziwa pya udidi na pyakwipa.”​—Genesi 2:16, 17; 3:4, 5.

Na mafala anewa, Sathani nee alonga basi ene kuti Mulungu ndi nyauthambi mbwenye alongambo kuti matongero a Mulungu ndi akukhonda kulungama. Dyabo alonga kuti anthu angan’bvera, pinthu pinafamba mwadidi kuna iwo. Nkhani zenezi mbizidamaliswa tani? Yahova atawirisa kuti pyakucitika pyenepi pipitirize toera kucitisa anthu onsene kuona kuti kupambizirwa kudacitwa iye kukhali kwandimomwene peno kwauthambi. Mwandimomwene, Mulungu apasa mwai Sathani na ale onsene akhali ku khundu yace toera kupangiza khala anthu anakwanisa kukhala mwadidi mwakusowa citsogolero ca Mulungu.

Kodi ndi upi ntawiro wanu thangwi ya kutonga kwa Sathani? Kodi anthu anakwanisa kukhala mwadidi na kutongeka okhene mwakusowa citsogolero ca Mulungu? Nyatwa, kusowa ulungami, kubva kupha, kufa, kufudzika kwa makhaliro adidi, nkhondo, kuphana na pinthu pinango pyakuipa pinatamba anthu kubulukira mu pyaka pizinji pisapangiza pakweca kuti anthu anayesera kutongeka okhene mwakusowa citsogolero ca Mulungu asathabuka kakamwe. Mbuto mwakupasa mulando Mulungu thangwi ya makhaliro akuipa anatamba anthu, Bhibhlya isalonga thangwi ikulu ya pinthu pyenepi: ‘Munthu asaponderera munthu ndzace mpaka kunfudza.’​—Koelete 8:9.

Kodi kudziwa pyenepi, nee kusapangiza pakweca kuti tisafunika kusaka Mulungu tayu basi ene toera kugumana matawiro a mibvundzo inalonga pya nyatwa zinathimbana na anthu mbwenye kumaliswambo kwa nyatwa? Kodi Mulungu anadzacitanji?

Tisafuna Ciphedzo ca Mulungu

Kutomera kale anthu asafuna kakamwe kukhala na ungumi wadidi, kukhonda kalamba na kukhonda kufa. Iwo asabvunga ndzidzi uzinji, mphambvu na mpfuma toera kukhala na ungumi wadidi pang’ono peno nkhabe. Anango asakhulupira kuti toera kukhala na makhaliro anewa asafunika kumwa mitombwe yakuti isapasa umaso wa kwenda na kwenda peno inacitisa munthu kukhala mphale. Ndoto zenezi zonsene zisakhala zakutsukwalisa.

Mulungu asafuna kuti anthu akhale mwadidi na mwakutsandzaya. Ceneci cikhali cifuniro cace cakutoma pa kucita anthu, pontho iye nee aduwala cifuniro cace. (Genesi 1:27, 28; Izaiya 45:18) Tiri na cinyindiro ca Yahova Mulungu cakuti pyonsene pinafuna iye kucita pinadzacitika mwakukhonda kudodomeswa. (Izaiya 55:10, 11) Bhibhlya isatipanga pya pikiro ya Mulungu toera kucita papswa makhaliro a Paradizu adaluza Adhamu na Eva. M’bukhu yakumalisa ya Bhibhlya, tisagumana mafala awa: “Iye ene [Yahova Mulungu] anadzakhala pabodzi na anthu, mbapukuta misozi yonsene m’maso mwawo. Kufa hakunadzakhala’po pontho tayu, nee kutsukwala, nee kulira, nee nyatwa, thangwi pya kale pyamala.” (Apokalipse 21:4) Mulungu anabweresa tani makhaliro anewa adidi kakamwe, pontho tinaphindula tani na pikiro ineyi?

Mwana wa Mulungu, Yezu Kristu, apfundzisa atowereri ace toera kuphembera kuti cifuno ca Mulungu cicitwe. Anthu azinji asaidziwa phembero ineyi peno kazinji kene asabwerezera mafala a phembero ineyi yakuti anango asaicemera Phembero ya Mbuya. Isalonga tenepa: ‘Baba wathu muli kudzulu, dzina yanu ikhale na mbiri. Umambo wanu mbudze kuna ife. Pinafuna imwe mbapicitwe pantsi pano ninga kudzulu.’ (Mateo 6:9, 10) Inde, Umambo wa Mulungu ndi njira yakuti Yahova Mulungu anadzaiphatisira toera kumalisa makhaliro akuipa a utongi wa anthu na kubweresa ulungami mu dziko ipswa idapikira iye.a (Danyele 2:44; 2 Pedro 3:13) Kodi tisafunika kucitanji toera kuphindula na pikiro ya Mulungu?

Yezu Kristu alonga cinthu cakutoma cakukhonda nentsa cakuti tisafunika kucicita: “Moyo wakukhalirathu ndi uyu: anthu akudziweni kuti ndimwe mwekha Mulungu wa maso, adziwembo Yezu Kristu adatuna imwe.” (Jwau 17:3) Mwandimomwene, na ciphedzo ca Mulungu, tinakwanisa kutambira umaso wakukhonda mala mu dziko ipswa idapikirwa. Cidikhiro ceneci cinakwanisa kukupasani cinyindiro na thangwi inango toera kutawira inde ku mbvundzo uyu, Kodi Mulungu asafunika kucita khundu mu umaso wathu?

Ndzidzi Toera Kunyerezera Mulungu

Pyaka pikwi piwiri ndulimu, ku Areopago, peno Colina de Marte [Phiri ya Marte] mu dziko ya Atena, mpostolo Paulu alonga ipi thangwi ya Mulungu kwa anthu akukhonda kunyerezera Mulungu a ku Atena: “Thangwi ndiye ene anapasa moyo, muya na pyonsene. Mwa iye tiri na moyo, tinafamba, mbatikhala, ninga mudaimbirambo anyakuimba anu anango mbati: ‘ifembo ndife a dzindza yache ene.’”​—Machitiro 17:25, 28.

Mafala adalonga Paulu kuna anthu a ku Atena asapitiriza kukhala andimomwene. Nsasanyi wathu asatipasa muya unapuma ife, cakudya cinadya ife, na madzi anamwa ife. Mbatidasowa pinthu pyadidi pinatipasa Yahova nee mbatidakhala maso. Mphapo, thangwi yanji Mulungu asapitiriza kucita masasanyiro anewa kwa anthu onsene, ngakhale kuti iwo asan’nyerezera peno nkhabe? Paulu alonga, ‘toera anthu asake Mulungu, ayesere kunfendezera, asakembo kugumana, maseze iye hali kutali na ife tonsene tayu.’​—Machitiro 17:27.

Kodi musafuna kudziwa mwadidi kuti ndi cipi peno kupfundza pizinji thangwi ya cifuniro ca Mulungu na uphungu wace toera mukhale na umaso wadidi, pontho toera mukhale kwenda na kwenda? Khala ndi tenepo, longani na adakupasani revista ino peno pitani ncibverano na asasanyi ayo. Iwo anatsandzaya toera kukuphedzani.

[Cidzindikiro capantsi]

[Foto pa tsamba 7]

Mulungu asafuna kuti anthu akhale akutsandzaya cincino na kwenda na kwenda

[Foto pa tsamba 4]

Ninga bukhu ya pitsogolero, Bhibhlya ndi bukhu ya pitsogolero pya umaso

[Ntsonga ikulu pa tsamba 5]

‘Ine ndine Yahova, Mulungu wanu, ule anafuna kukupfundzisani toera udidi wanu, ndinakucitisani kufamba pa njira inatongwa imwe kutoweza. Imwe, mbumudabvera matongero anga basi, pidzo pizinji mbapidadza kuna imwe ninga nkulo wakukhonda uma, kutsandzaya kwanu mbukudakhala ninga munabwerera mabimbi pa gombe.’​—(Izaiya 48:17, 18)

[Foto pa tsamba 6]

M’Bhibhlya, tinakwanisa kugumana citsogolero na ciphedzo cinafuna ife