NSOLO WA REVISTA | ALIPO ANAKANISA KUONA PYA NTSOGOLO?
Mapikiro Anango Asakwanirisika, Mbwenye Mazinji Nkhabe
Kodi musafuna kudziwa pya ntsogolo mwanu? Maonero anewa asatundusa anthu azinji. Pana anthu azinji analonga mwanyapantsi pinthu pya ntsogolo, mbwenye kazinji kene nee pisacitika munjira inadikhirwa ipyo. Dingani pinatowerera:
ASIYENTISTA asaphatisira mitcini ya ntengo ukulu na kobiri izinji toera kulonga mwanyapantsi pinthu pyakusiyana-siyana, ninga kupswipiswa kwa muya kunadzakhuya tani dziko, pontho khala madzi anabvumba pacisa canu mangwana.
ANYAKUDZIWISA PYA MAONERO asalonga mwanyapantsi pya malonda na ndale. Warren Buffett, nyakupfuma m’bodzi pa dziko yapantsi, akhanyindirwa kakamwe thangwi yakupembera m’malonda ace. Nate Silver nyakudziwisa unango alonga maonero anango toera kumphedza kudziwa mwanyapantsi pinthu pyonsene kutomera mu ndale za Estados Unidos mpaka maphaso akuwina miyoni ya mafilimu a Hollywoo.
MPHANGWA ZAKALE zisafokotozwa ninga maprofesiya. Anthu anango asaona kukwanirisika kwa pinthu pizinji mu pyakulembwa pya Michel de Notredame (Nostradamus) wa mu pyaka madzana 16 adapita. Ndzidzi wa kalendaryo Maya wamala pa ntsiku 21 ya Mainza ya caka 2012. Kalendaryo unoyu akhaphatisirwa na anango toera kulonga mwanyapantsi pidengwa pya ntsogolo.
ATSOGOLERI A MAUPHEMBERI midzidzi inango asalonga mwanyapantsi pidengwa pinafuna kucitika pa dziko yonsene toera kucenjeza anthu na kugumanyiza atowereri awo. Mprofeta Harold Camping wakuti akhalonga mwanyapantsi pidengwa pyacibaliro pabodzi na atowereri ace acenjeza kuti dziko mbidafudzwa mu caka 2011. Mbwenye dziko isapitiriza mpaka lero.
ANYAKUPFUNDZA MANYEREZERO asalonga kuti ali na maluso akupambulika toera kulonga pya ntsogolo. Edgar Cayce na Jeane Dixon alonga mwanyapantsi pinthu pyakundendemera pyakuti pyacitika mu pyaka madzana 20. Uwiri wawo alongambo mapikiro akuti nee akwanirisika. Mwacitsandzo, Dixon alonga kuti mu caka 1958 mbakudaoneka Nkhondo Yacitatu ya Dziko yonsene. Cayce apikirambo kuti dziko ya Nova York mbidabizwa na bara nkati mwa pyaka 1970.
Kodi pana njira toera kuona pinthu pyantsogolo? Unoyu ndi mbvundzo wakufunika. Mbamudakwanisa kudziwa pinthu pinafuna kucitika ntsogolo, mbapidakhuya umaso wanu na pisankhulo pyanu.