NSOLO WA REVISTA

Alipo Anakwanisa Kuona Pya Ntsogolo?

Tonsene tisanyerezera pya ntsogolo. Tisafuna kudziwa kuti umaso wathu na wa anyakufunika athu unadzakhala tani. Tisacita mibvundzo ninga iyi: ‘Kodi mwananga anadzakhala mu dziko yadidi? Kodi dziko inadzafudzwa na cidengwa? Pana cinthu cakuti ndinakwanisa kucicinja toera kukhala na tsogolo yadidi?’ Kufuna kudziwa kweneku kusacita khundu ya umaso wathu; ife tisafuna kukhala na cinyindiro na citsidzikizo. Mbamudadziwa mwadidi pya ntsogolo, mbamudakhunganya manyerezero anu na manungo anu.

Ninji pinafuna kudzacitika ntsogolo mwanu? Alipo anapidziwa? Anyakudziwisa asayesera kulonga pya ntsogolo, pinango pisacitika, mbwenye pizinji nkhabe. Ngakhale tenepo, Mulungu asalongwa kuti anakwanisa kulonga mwanyapantsi pinthu pyakundendemera pinafuna kucitika ntsogolo. Mafalace asalonga: ‘Pinthu mbapidzati kutoma, Ine ndalonga kale kuti pinamala tani. Kalene ndafokotoza pinthu pinafuna kucitika.’ (Izaiya 46:10) Kodi pinapikira iye pisakwanirisika?

MBIRI YAKUKWANIRISIKA KWA MAPIKIRO A MULUNGU

Thangwi yanji musafunika kudziwa mbiri yakukwanirisika kwa maprofesiya a kale a Mulungu? Nyerezerani kuti musadziwa nyakulonga pya makhaliro akudambo wakuti pinalonga iye pisacitika ntsiku zonsene mu pyaka pizinji, imwe mbamudadzumatirwa. Mwakukhonda penula, imwe mbamudafuna kubvesera pinalonga iye thangwi ya makhaliro akudambo mangwana. Munjira ibodzi ene, mungadziwa kuti Mulungu acita mapikiro akuti akwanirisika mwakundendemera, mwandimomwene, imwe mbamudafuna kudziwa pidapikira iye thangwi ya ntsogolo mwanu.

KUFUDZWA KWA NZINDA UKULU: Mwacitsandzo, mbidakhala pyakudzumatirisa kakamwe kulonga mwanyapantsi munjira yakulinganira kuti nzinda ukulu unadziwika ninga wamphambvu m’madzana a pyaka mbudafudzwa mwakucimbiza. Kubulukira mwa m’bodzi wa aprofeta ace, Mulungu alongeratu pyenepi​—kufudzwa kwa Ninive. (Sofoniya 2:13-15) Ninji pidalemba anyambiri? Mu pyaka madzana manomwe M.N.W., panango mudapita pyaka 15 kubulukira padalonga Mulungu mafala anewa, Ababilonya na a Medo afudza Ninive. Kusiyapo pyenepi, Mulungu afokotoza mwanyapantsi kuti Ninive ‘mbadafudzwa mbasala wakuuma ninga tcetca ya n’thando.’ Kodi pikiro ineyi idalongwa mwanyapantsi yakwanirisika? Inde. Ngakhale kuti nzinda unoyu na pisa pyace pikhaphataniza mbuto yakukwana 518 km quadrado, ale adakunda nzinda nee ausiya, pontho nee auphatisira ninga pikhadikhira anango. Mbuto mwace, iwo aufudza. Kodi anyakudinga pya ndale mbadakwanisa kulonga pyakucitika ninga pyenepi mwakundendemera?

MAGOGODO AANTHU MBADAPISWA: mbani akhafuna kukhala na cipapo ca kudziwisa mwanyapantsi​—mu pyaka 300—​dzina yandimomwene na ya makolo ace wakuti mbadapisa magogodo a anthu pa guwa, kuphatanizambo nzinda ukhafuna kugumanika guwa ineyi? Khala pikiro ineyi yakudzumisa mbidakwanirisika, mwanaciro mbadakhala wakubvekera kakamwe. Mprofeta wa Mulungu adziwisa kuti: ‘Mwana anacemerwa Yosiya mbadabalwa mu dzindza ya Dhavidhi,’ alongambo kuti iye ‘mbadapisa magogodo a anthu’ pa guwa mu nzinda wa Betele. (1 Amambo 13:1, 2) Mudapita pyaka madzana matatu, mambo akhacemerwa Yosiya, dzina yakuti nee ikhaphatisirwa kazinji kene m’midzidzi ya Bhibhlya, abalwa mu dzindza ya Dhavidhi. Ninga mudalongerwa ipyo, Yosiya ‘abulusisa magogodo akhali mwenemo mbaapisira pa guwa’ ikhagumanika ku Betele. (2 Amambo 23:14-16) Kodi munthu mbadakwanisa tani kulonga unyomonyomo wa mapikiro anewa mwakukhonda kutsogolerwa na mphambvu yakupiringana yacibaliro?

KUMALA KWA UTONGI WAMPHAMBVU: mbapidakhala pyakudzumisa kakamwe khala munthu akwanisa kulonga mwanyapantsi dzina ya munthu​—mu ndzidzi uzinji mbadzati kubalwa—​wakuti mbadacita masasanyiro akufudza utongi wa dziko yonsene yapantsi, kuphatanizambo njira ikhafuna iye kuphatisira toera kuufudza. Mulungu adziwisa kuti mamuna anacemerwa Siro, mbadafudza mbumba. Siro unoyu mbadasudzula Ayuda mu ubitcu, na kuphedzera kumangwa papswa kwa templo yawo yakucena. Mwakuthimizira, Mulungu alongeratu kuti masasanyiro a nkhondo ya Siro mbadaphataniza kuumisa mikulo, alongambo kuti misuwo mbidasiyiwa bwandzu, pyenepi mbapidaphedzera kukundwa kwawo. (Izaiya 44:27–45:2) Kodi unyomonyomo wa profesiya ya Mulungu wakwanirisika mwakulinganira? Anyakulemba pyakucitika asatawira kuti Siro akunda nzinda. Anyankhondo a Siro aphatisira luso yakudzumisa yakupeusa madzi a nkulo wa Babilonya​—mwandimomwene kukhali kuumisa mikulo. Cakudzumisa kakamwe, ndi cakuti anyankhondo apita mu nzinda na pa misuwo yakuti yasiiwa bwandzu. Buluka penepo, Siro asudzula Ayuda mbatonga kuti aende kamanga papswa templo yawo ku Yerusalemu. Pyenepi pikhali pyacilendo, thangwi Siro nee akhalambira Mulungu wa Ayuda. (Esdra 1:1-3) Mbani unango wakuti mbadakwanisa kulonga unyomonyomo wa pyakucitika pyenepi?

Talonga pitsandzo pitatu pinapangiza mbiri ya Mulungu yakukwanirisa pidapikira iye ntsogolo. Si pyakucitika pyenepi basi tayu. Yoswa, ntsogoleri wa Ayuda alonga undimomwene wakuti ukhadziwika kakamwe kwa anyakubvesera ace: ‘Dzindikirani na ntima wanu wonsene na nzimu wanu wonsene, kuti muli pyonsene pidakupangani Yahova Mulungu wanu, nee cibodzi cidakhonda kucitika; pyonsene pyacitika.’ (Yoswa 23:1, 2, 14) Anyakubvesera a Yoswa nee apokanya kukwanirisika kwa mapikiro a Mulungu na maprofesiya ace. Kodi Mulungu asacita tani pyenepi? Njira za Mulungu zasiyana kakamwe na za anthu. Mphyadidi kudziwa pyenepi, thangwi Mulungu acita mapikiro anango akufunika kakamwe thangwi ya tsogolo akuti anadzakhuya umaso wanu mwakukhonda dembuka.

KUSIYANA KWA MAPIKIRO A MULUNGU NA A ANTHU

Mapikiro a anthu kazinji kene asacitwa mwakubverana na kufufudza kwa asiyentista, anyakudinga maonero na pipendamiro, peno ale analonga kuti ali na mphambvu ya mizimu. Angamala kucita mapikiro awo, kazinji kene anthu asakhala pyawo mbadikhira kuona pinafuna kucitika.​—Misangani 27:1.

Mwakusiyana na anthu, Mulungu asadziwa unyomonyomo onsene. Iye asadziwa mwadidi makhaliro na pipendamiro pya anthu; natenepa, angatonga kucita cinthu, Mulungu anakwanisa kuona mwakulinganira kuti anthu peno dzindza yamumphu inadzapangiza makhaliro anji. Mbwenye Mulungu anakwanisa kucita pizinji kupiringana pyenepi. Iye asakwanisa kutsogolera na kucinja pinthu na pipendamiro, toera pinthu picitike ninga munafunikira ipyo. Iye asalonga: ‘Fala inalonga ine; hinabuluka pa mulomo wanga papezi tayu, mbwenye inacita pyonsene pinafuna ine, mbikwanirisa pyonsene pidatumirwa iyo.’ (Izaiya 55:11) Na thangwi ineyi, maprofesiya mazinji a Mulungu asakhala ninga akutipanga mphangwa za pinafuna iye kucita ntsogolo. Mwandimomwene iye ali na mbiri yakukwanirisa mapikiro ace mwakundendemera.

TSOGOLO YANU

Pana njira yakunyindirika toera kudziwa pya tsogolo yanu na ya anyakufunika anu? Mungadziwa mwanyapantsi pya condzi cikulu, munakwanisa kucita masasanyiro toera kupulumuka. Munakwanisa kucita pibodzi pyene na profesiya ya Bhibhlya. Mulungu apikira cinthu cikulu cakuti cinadzacinja dziko mwakukhonda dembuka. (Onani bokosi: “Kodi Mulungu Afokotozanji Thangwi Ya Tsogolo.”) Tsogolo ineyi yasiyana kakamwe na pinalongwa na anyakudziwisa pya ntsogolo.

Nyerezerani basi: Pinthu pinafuna kucitika na dziko ino pisadziwika. Imwe munakwanisa kupidziwa mwanyapantsi thangwi pyalembwa kale. Mulungu asalonga: ‘Pinthu mbapidzati kutoma, Ine ndalonga kale kuti pinamala tani. Pinthu pinafuna Ine kucita, pinacitikadi.’ (Izaiya 46:10) Imwe na acibale anu munakwanisa kukhala na tsogolo yadidi kakamwe. Phembani Mboni za Yahova toera akupangizeni pinalonga Bhibhlya thangwi ya pinafuna kucitika ntsogolo. Mboni za Yahova si anyakupfundza pya manyerezero tayu; iwo nkhabe kulonga kuti asabva mafala a mizimu peno kuti ali na mphambvu zakupambulika toera kulonga mapikiro. Iwo ndi anyakupfundza a Bhibhlya akuti anakwanisa kukupangizani pinthu pyadidi pyakuti Mulungu akucita masasanyiro toera kukucitirani ntsogolo.

[Bokosi pa tsamba 6]

Kudinga mwacidikhodikho maprofesiya a Bhibhlya kusatipfundzisa cinthu cakufunika kakamwe thangwi ya makhaliro a Mulungu. Mulungu asatidziwisa cifuno cace, mbatipangiza kuti iye si wakuuma ntima peno wakukhonda tsalakana anthu. Mbuto mwace, iye asadzudzumika kakamwe thangwi ya tsogolo yathu. Mwandimomwene, iye asafuna kuti tikhale maso toera kuona tsogolo yadidi kakamwe.

[Bokosi pa tsamba 7]

Kodi Mulungu Afokotozanji Thangwi Ya Tsogolo?

▪ Mwakusiyana na maprofesiya a anthu analonga pya kufudzwa mwacidengwa, Mulungu asatipasa cinyindiro cakuti dziko yapantsi cipo inadzafudzwa.​—Masalmo 104:5; Koelete 1:4.

▪ Anthu anadzagumanika kuti akugudjula dziko pa ndzidzi wakuti Mulungu anadzacita pinthu toera kuafudza.​—Masalmo 92:7; Apokalipse 11:18.

▪ Mulungu asadziwa kuti mauphemberi mazinji asampambizira, pontho asapwaza Bhibhlya, natenepa iye anadzafudza misoka ineyi. Apokalipse 18:4-9.

▪ Utongi wa Mulungu ndiwo unafuna kudzafudza anyakuipa onsene na anthu akukhonda kubvera, tayu mphambvu ya anthu a dziko. “Tsogolo ya anthu akuipa ndi kufudzwa.”​—Masalmo 37:10, 38, Tradução do Novo Mundo; Danyele 2:44.

▪ Mulungu anadzapulumusa anthu anacita cifuno cace, iwo anadzakhala mu dziko yakubalika mbanjipa. “Yang’ana munthu wadidi, tsalakana nyakulungama;” thangwi tsogolo ya munthu unoyu inadzakhala ya ntendere.​—Masalmo 37:10, 37; Apokalipse 21:3, 4.

▪ Mwaufuni, Mulungu asafokotoza m’Bhibhlya kuti munakwanisa tani kukhala wakutawirika kwa iye, pontho kuti munakwanisa tani ‘kupulumuka mu pinthu pyonsene pinafuna kudza.’​—Luka 21:36; Jwau 17:3.