NSOLO WA REVISTA | KODI SATHANI ALIPODI?

Kodi Sathani Alipodi?

“Ndakula mu dziko ya El Salvador. Pikhakhonda ine kubvera, mai wanga akhalonga: ‘Sathani akubwera kudzakukwata!’ Ine ndikhatawira: ‘Nsiyeni abwere pyace!’ Maseze ndikhakhulupira Mulungu, nee ndikhatawira kuti Sathani alipo.”​—ROGELIO.

Kodi muli na maonero mabodzi ene na a Rogelio? Ndi maonero api anatowerera akuti ndi akulinganira kwa imwe?

• Sathani si wandimomwene tayu; basi ene asaphiphirisa uipi.

• Sathani alipo, mbwenye iye nkhabe cifuno kwa anthu.

• Sathani ndi munthu wauzimu wamphambvu wakuti asakhuya kakamwe anthu.

Pikwi na pikwi pya anthu asakhulupira maonero anewa. Kodi mphyadidi kudziwa kuti ndi api maonero akulinganira? Khala Sathani nee alipo, ale anakhulupira kuti iye alipo, akunyengezwa. Khala Sathani alipo, mbwenye nee asatsalakana anthu, anthu azinji asangopa mwakusowa mathangwi. Mbwenye khala Sathani ndi nyakunyengerera wakucenjera, iye ndi wakugopswa kakamwe kupiringana munanyerezera anthu.

Tendeni tione kuti Bhibhlya isatawira tani mibvundzo iyi: Kodi Sathani mbani? Kodi iye asaphiphirisa uipi basi, peno ndi munthu wauzimu? Khala Sathani ndi wandimomwene, kodi iye ndi wakugopswa kwa imwe? Khala ndi wakugopswa, munakwanisa tani kutsidzikizika?