NSOLO WA REVISTA | KODI SATHANI ALIPODI?

Kodi Sathani Asaimirira Uipi Basi?

Mphyakukhonda nentsa kutawira kuti Sathani analongwa m’Bhibhlya basi ene asaimirira pinthu pyonsene pyakuipa. Kodi mwandimomwene, ndi pyenepi pinapfundzisa Bhibhlya? Khala ndi pyenepi, thangwi yanji Bhibhlya isapangiza kuti Sathani alonga na Yezu Kristu, pontho na Mulungu Wamphambvu Zonsene? Onani maulendo mawiri a kucedza kweneku.

NDZIDZI UDALONGA SATHANI NA YEZU

Pidatoma Yezu utumiki wace, Dyabo amuyesera munjira zitatu. Pakutoma, Sathani awangisira kunyengerera Yezu toera kuphatisira mwakucenama mphambvu yace idapaswa iye na Mulungu toera kumalisa njala yace. Buluka penepo, Sathani ayesera Yezu toera aikhe pangozwi umaso wace toera akhale na mbiri. Pakumalisa, Sathani apikira kupasa Yezu mwai wakutonga maumambo a madziko onsene, basi ene khala amulambira pang’ono basi. Yezu akhonda manyengerero matatu ene, paulendo ubodzi na ubodzi iye aphatisira Malemba.​—Mateo 4:1-11; Luka 4:1-13.

Kodi Yezu akhalonga na ani? Akhalonga na uipi wakuti ukhali mwa iye ene? Mwakubverana na Bhibhlya, Yezu ‘ayeserwa munjira zonsene sawasawa ninga ife pano; mbwenye madawo, iye hadaacita tayu.’ (Ahebere 4:15) Bhibhlya isalongambo: ‘Kristu hadacita madawo tayu, mu nkanwa mwace hamudabuluka pyakunama tayu.’ (1 Pedro 2:22) Yezu apitiriza kukhala waungwiro, mbapangiza kukhala munthu wa umumphu. Iye cipo atawirisa kuti cinthu cakuipa cikule mwa iye. Inde, Yezu nee akhalonga na khundu yakuipa mwa iye; mbwenye akhalonga na munthu wandimomwene.

Makani anewa asapangiza mwakukwana kuti Sathani ndi munthu wandimomwene.

• Kumbukani kuti Dyabo apereka kuna Yezu mwai wakutonga madziko onsene, khala basi ene amulambira pang’ono. (Mateo 4:8, 9) Khala Sathani nee si wandimomwene, muoni unoyu nee mbudakhala na mabvekero. Kusiyapo pyenepi, Yezu nee apokanya kuti Sathani akhali na mphambvu ineyi ikulu.

• Pidamala Yezu kukhonda mayesero onsene, Dyabo ‘amuleka pyace mpaka pa ndzidzi unango.’ (Luka 4:13) Kodi pyenepi pisapangiza kuti Sathani ndi makhaliro akuipa basi, peno ndi nyamalwa wakuti ali wakutonga kukhonda bwerera nduli?

• Onani kuti ‘aanju abwera kudzatumikira’ Yezu. (Mateo 4:11) Kodi aanju anewa akhali andimomwene, akuti apereka ciwangiso na ciphedzo cakuthema kuna Yezu? Inde! Mphapo, thangwi yanji mbatidanyerezera kuti Sathani nee akhali munthu wandimomwene wauzimu?

NDZIDZI UDALONGA SATHANI NA MULUNGU

Ndzidzi unango usaphataniza Yobe, mamuna wakugopa Mulungu. Bukhu ineyi isapangiza maulendo mawiri adacedza Dyabo na Mulungu. M’maulendo mawiri ene, Mulungu asimba Yobe thangwi ya kukhulupirika kwace. Sathani alonga kuti Yobe akhatumikira Mulungu mwaumbirimi, thangwi Mulungu akhadyekera Yobe toera kukhala wakukhulupirika. Inde, Sathani alonga kuti akhadziwa mwadidi Yobe kupiringana Mulungu. Yahova atawirisa Sathani kufudza upfumi wa Yobe, anace na ungumi wace ene.a Mukupita kwa ndzidzi, pyadzaoneka pakweca kuti Yahova akhadalonga pyandimomwene thangwi ya Yobe, pontho kuti Sathani akhali nyauthambi. Mulungu apasa nkhombo Yobe thangwi ya kukhulupirika kwace.​—Yobe 1:6-12; 2:1-7.

Kodi pa makani anewa, Yahova akhacedza na makhaliro akuipa mwa iye ene? Bhibhlya isalonga: ‘Njira ya Yahova njakulungama.’ (2 Samwele 22:31) Mafala a Mulungu asalongambo: ‘Wakucena, wakucena, wakucena ndi Yahova Mulungu Wamphambvu Zonsene.’ (Apokalipse 4:8) Fala yakuti wakucena, isabveka cinthu caungwiro, cakusowa madawo. Yahova ndi waungwiro wakusowa madawo. Mwa iye nkhabe kwanisika kuoneka makhaliro akuipa.

Ngakhale tenepo, anango anakwanisa kulonga kuti Yobe nee akhali munthu wandimomwene, mbanyerezera kuti makani anewa ndi mbiri yauthambi. Kodi maonero anewa ndi akulinganira? Malemba anango a Bhibhlya asapangiza kuti Yobe akhali munthu wandimomwene. Mwacitsandzo, pa Tyago 5:7-11, Yobe asaphatisirwa ninga citsandzo kwa Akristu toera kupirira nyatwa, iye asaphatisirwambo ninga cikumbuso cakuti Yahova asapasa nkhombo ale anapirira. Khala Yobe nee akhali munthu wandimomwene, kodi mafala anewa mbadakhala na mphambvu yanji? Kodi kupomokera kwa Sathani nee mbakudakhala kwapezi? Kusiyapo pyenepi, pa Ezekyele 14:14, 20, Yobe asaphatanizwa na Nowa pabodzi na Danyele pa nzera wa anthu atatu akulungama. Ninga Nowa na Danyele, Yobe akhali munthu wandimomwene, munthu wacikhulupiro cakuwanga. Khala Yobe akhali munthu wandimomwene, kodi ule adamuonesa nyatwa nee akhalimbo wandimomwene?

Natenepa, Bhibhlya isapangiza kuti Sathani ndi munthu wandimomwene wauzimu. Panango munasaka kudziwa: ‘Kodi iye ndi wakugopswa kwa ine na acibale anga lero mu dziko ino yakuthambaruka?’

NDIYE TANIMBO LERO?

Nyerezerani kuti mu nzinda wanu mwapita nsoka wa mapanga! Mwakukhonda penula, citsidzikizo canu mbicidakhala pangozwi, makhaliro adidi a nzinda wanu mbadacinja. Cincino nyerezerani tenepa: Sathani na mademonyo ace​—aanju andimomwene akuipa akuti ninga Sathani apandukira Mulungu aponywa pa dziko yapantsi. Kodi pyenepi mbapidabweresanji? Nyerezerani pinaona peno pinabva imwe mu mphangwa za pacisa canu na za dziko yonsene.

• Mwakukhonda tsalakana kuwangisira kunacitwa pa dziko yonsene, nee musaona kuti uphanga na makhaliro akuipa pisathimizirika kakamwe?

• Nee musaona kuthimizirika kwa ubalangazi unapangiza pyakukhulupira mizimu, maseze anyakubala asadzudzumika napyo kakamwe?

• Nee musaona kuti makhaliro akudambo asapitiriza kufudzika mwakukhonda tsalakana kuwangisira kunacita anthu toera kuatsalakana mwadidi?

• Kodi pyenepi nee pisapangiza kuti ciripo cidadodomeka pakati pa anthu​—kuti pana munthu wamphambvu anatsogolera anthu ku cidengwa?

Taphata miyendo, onani pinalonga Bhibhlya thangwi inabweresa nyatwa: “Yaponywa nyoka ikulu ire ya kale, inathulwa Dyabo na Sathani, inanyengerera anthu onsene a pantsi pano, mbiponyiwa pantsi pano pabodzi na aanju ace. . . . Dzedze yafika pantsi pano na ku bara, thangwi Dyabo atcitha kuli imwe mbakhala na ukali wakugopswa, mbadziwambo kuti ndzidzi wace ndi ung’ono basi.’ (Apokalipse 12:9, 12) Pakumala kudinga undimomwene, anthu azinji asafika pakutawira kuti Sathani ndi nyamalwa wakugopswa wauzimu, wakuti asanyengerera dziko yonsene yapantsi.

Mbwenye panango munasaka kudziwa kuti munagumana tani citsidzikizo. Kudzudzumika kweneku ndi kwakulinganira. Nsolo unatowerera usapereka maonero mangasi akuphata basa.

[Cidzindikiro capantsi]