Perekani Takhuta Kuna Yahova Mbamutambira Nkhombo
“Perekani takhuta kuna Yahova, thangwi iye ndi wadidi.”—SAL. 106:1, Tradução do Novo Mundo.
MBAMUDATAWIRA TANI?
Tisapfundzanji kubulukira kwa mpostolo Paulu thangwi yakupereka takhuta?
Kunyerezera mwacidikhodikho na kucita phembero pinatiphedza tani toera kupitiriza na nzimu wakupereka takhuta?
Kudinga mwacidikhodikho pya nkhombo zathu kusatiphedza tani toera kuthimbana na nyatwa?
1. Thangwi yanji Yahova athema kusimbwa?
YAHOVA, ndi Nyakupasa miyoni ‘yadidi yonsene na yaungwiro,’ mwandimomwene iye athema kusimbwa. (Tgo. 1:17) Ninga Nkumbizi wathu waufuni, mwantsisi iye asatsalakana pifuno pyathu pyakumanungo na pyauzimu. (Sal. 23:1-3) Iye ndi ‘pakuthawira pathu na mphambvu yathu’—makamaka m’midzidzi ya nyatwa! (Sal. 46:1) Mwandimomwene, ife tiri na mathangwi mazinji toera kupangiza mabvero mabodzi ene na a nyamasalmo adalemba kuti: ‘Perekani takhuta kuna Yahova, thangwi iye ndi wadidi; thangwi ufuni wace ndi wakwenda na kwenda.’—Sal. 106:1.
2, 3. (a) Ndi ngozwi zipi za kusiya kupereka takhuta? (b) Ndi mibvundzo ipi inafuna kudinga ife mu nsolo uno?
2 Thangwi yanji mphyakufunika kakamwe kwa ife kudinga pya nkhani yakupereka takhuta? Ninga pidalongwa mwanyapantsi, mu ntsiku zakumalisa, anthu ndi akukhonda pereka takhuta kakamwe. (2 Tim. 3:2) Anthu azinji nkhabe kupasa ntengo pinthu pyadidi pidaacitira Yahova. Lero tikukhala mu dziko yakuti isakulumiza anthu toera kuwangisira kukhala na pinthu pizinji pyampfuma, mbuto mwakukomerwa na piri na iwo. Ife tinakwanisambo kukhuyiwa na nzimu unoyu wakukhonda kupereka takhuta. Ninga Aisraele akale, tinakwanisa kukhonda pereka takhuta, mbatisiya kupasa ntengo uxamwali wathu na Yahova, na nkhombo zinatambira ife kwa iye.—Sal. 106:7, 11-13.
3 Munjira ibodzi ene, nyerezerani pinafuna kucitika tingathimbana na mayesero. M’midzidzi ineyi, panango tinakundwa mwakucimbiza mbatisiya kupasa ntengo nkhombo ziri na ife. (Sal. 116:3) Mphapo, tinakwanisa tani kukulisa nzimu wakupereka takhuta na kupitiriza kuupangiza? Ninji cinafuna kutiphedza toera kupitiriza na maonero akulinganira, maseze tithimbane na mayesero makulu kakamwe? Tendeni tidinge pyenepi.
‘YAHOVA, MWATICITIRA PINTHU PIZINJI’
4. Tinakwanisa tani kupitiriza kupangiza nzimu wakupereka takhuta?
4 Khala tisafuna kukulisa nzimu wakupereka takhuta na kupitiriza kuupangiza, tisafunika kudzindikira mbatinyerezera mwacidikhodikho nkhombo zinatipasa Yahova, mbatinyerezera mwakukwana macitiro ace aufuni. Nyamasalmo acita pyenepi, natenepa, iye adzumatirwa na pinthu pizinji pyakudzumatirisa pidancitira Yahova.—Lerini Masalmo 40:5; 107:43.
5. Tinapfundzanji kubulukira kwa mpostolo Paulu thangwi yakupereka takhuta?
5 Tinakwanisa kupfundza pizinji thangwi yakupereka takhuta kuna Yahova kubulukira kwa mpostolo Paulu. Iye anyerezera mwacidikhodikho pya nkhombo zace, thangwi mwakubwereza-bwereza iye apangiza kupereka kwace takhuta na ntima onsene. Paulu akhadziwa mwadidi kuti iye akhali ‘nyakuxola, nyakutcinga na nyakunyoza.’ Mbwenye iye apereka takhuta mwakukhonda tsalakana macitiro akuipa akhadacita iye kale, thangwi Mulungu na Kristu apangiza ntsisi kwa iye mbampasa basa ya utumiki. (Lerini 1 Timoti 1:12-14.) Paulu akhapasambo ntengo Akristu andzace, kazinji kene iye akhapereka takhuta kuna Yahova thangwi ya makhaliro awo adidi na basa yawo yakukhulupirika. (Afil. 1:3-5, 7; 1 Ates. 1:2, 3) Mukhathimbana Paulu na makhaliro akunentsa, mwakucimbiza iye akhapereka takhuta kuna Yahova thangwi ya ciphedzo ca abale ace auzimu cikhatambira iye pa ndzidzi wakuthema. (Mach. 28:15; 2 Akor. 7:5-7) Natenepa, si pyakudzumisa tayu kuti Paulu awangisa Akristu kuti: ‘Perekanimbo takhuta . . . ,wangisanani unango na ndzace pa kuimba masalmo, kuimba nyimbo zauzimu zakusimba Mulungu, toera kupereka takhuta.’—Akol. 3:15-17.
KUDINGA MWACIDIKHODIKHO NA KUCITA PHEMBERO PISAPHEDZA TOERA KUPITIRIZA KUPEREKA TAKHUTA
6. Makamaka ninji cinakucitisani kupereka takhuta kakamwe kuna Yahova?
6 Tinasangizira tani citsandzo cadidi ca Paulu mu kukulisa na kupangiza kupereka takhuta? Ninga Paulu, m’bodzi na m’bodzi wa ife asafunika kunyerezera pinthu pinacitirwa iye na Yahova. (Sal. 116:12) Mbamudatawira tani khala munthu akubvundzani kuti, ‘Ndi nkhombo zipi zidatambira imwe kwa Yahova zinakucitisani kupereka takhuta kakamwe?’ Mbamudalonga pya uxamwali wanu wakufunika na Yahova? Peno pya kulekererwa madawo kunatambira imwe thangwi yakukhulupira kwanu ntsembe ya ciomboli ca Kristu? Mbamudalonga madzina a abale na alongo angasi akuti akuphedzani m’midzidzi ya nyatwa? Mwandimomwene, nee mbamudaduwala anthu akufunika kakamwe kwa imwe, ninga ndzanu wa m’banja peno ananu. Inde, ndandanda wanu mbudapitiriza basi. Kukhala na ndzidzi toera kunyerezera pya nkhombo zenezi zinakupasani Baba wanu waufuni, Yahova, ntima wanu unadzala na kupereka takhuta, mbukukulumizani toera kupereka takhuta ntsiku zonsene.—Lerini Masalmo 92:1, 2.
7. (a) Thangwi yanji tisafunika kucita maphembero akupereka takhuta? (b) Munaphindula tani mungapereka takhuta m’maphembero anu?
7 Tinganyerezera pya nkhombo zathu zonsene, tisakulumizika toera kucita phembero kuna Yahova mbatipereka takhuta kuna iye. (Sal. 95:2; 100:4, 5) Anthu azinji asaona phembero ninga njira toera kuphemba pinthu kuna Mulungu. Mbwenye ife tisadziwa kuti Yahova asakomerwa kakamwe maphembero athu angaphataniza mafala akupereka takhuta thangwi ya pinthu piri na ife. M’Bhibhlya musagumanika maphembero mazinji akupereka takhuta, kuphatanizambo maphembero a Yana na Ezekiya. (1 Sam. 2:1-10; Iza. 38:9-20) Natenepa, towezerani atumiki anewa akukhulupirika adapangiza nzimu wakupereka takhuta. Inde, pakucita phembero perekani takhuta kuna Yahova thangwi ya nkhombo ziri na imwe. (1 Ates. 5:17, 18) Kucita pyenepi kusabweresa maphindu mazinji kakamwe. Imwe musakhala wakutsandzaya, ufuni wanu kwa Yahova usathimizirika, pontho munapitiriza kukhala na uxamwali na iye.—Tgo. 4:8.
8. Ninji pinafuna kuticitisa kusiya kupasa ntengo pinthu pyonsene pinaticitira Yahova?
8 Mbwenye tingakhonda kucita mpholemphole, tinaluza nzimu wathu wakupereka takhuta kuna Yahova thangwi ya pinthu pyadidi pinatipasa iye. Thangwi yanji? Thangwi kusowa ungwiro kusaticitisa kubalwa na cipendamiro cakukhonda kupereka takhuta. Nyerezerani pya Adhamu na Eva, iwo akhadaikhwa mu paradizu. Iwo akhali na pyonsene pikhafuna iwo, kuphatanizambo cidikhiro cakukhala maso kwenda na kwenda mwantendere. (Gen. 1:28) Mbwenye iwo nee apasa ntengo nkhombo zawo. Mwaumbirimi, iwo afuna pinthu pizinji. Pyenepi pyaacitisa kuluza pyonsene. (Gen. 3:6, 7, 17-19) Nakuti tisakhala mu dziko yakukhonda pereka takhuta, ife tinakwanisa kutoma kusiya kupasa ntengo pyonsene pinatipasa Yahova. Panango tinatoma kuona uxamwali wathu na Yahova ninga cinthu cakusowa ntengo. Panango nee tinapasa ntengo mwai ukulu uli na ife wakucita khundu ya ubale wathu wa dziko yonsene. Panango tinadzudzumika kakamwe na pinthu pya dziko ino pyakuti pinamala cincino. (1 Jwau 2:15-17) Toera kucalira ngozwi zenezi, tisafunika kunyerezera mwacidikhodikho nkhombo zathu, mbatipereka takhuta kuna Yahova ndzidzi onsene thangwi ya mwai wathu wakucita khundu ya atumiki ace.—Lerini Masalmo 27:4.
PAKUTHIMBANA NA NYATWA
9. Pakuthimbana na nyatwa zakutsukwalisa, thangwi yanji tisafunika kunyerezera pya nkhombo ziri na ife?
9 Kukhala na nzimu wakupereka takhuta kunatiphedza toera kuthimbana na nyatwa zakutsukwalisa. Panango tinakundwa na mabvero akutsukwala khala mwakukhonda dikhira tikuthimbana na makhaliro akunentsa ninga kukhonda khulupirika kwa ndzathu wa m’banja, utenda wakugopswa, kuferwa na nyakufunika wathu, peno kugwerwa na cidengwa cikulu cacibaliro. M’midzidzi ineyi, kunyerezera pya nkhombo ziri na ife kunatibalangaza na kutiwangisa. Onani pitsandzo pyandimomwene pinatowerera.
10. Kodi Irina aphindula tani mu kunyerezera mwacidikhodikho pya nkhombo zace?
10 Irinaa ndi mpainiya wa ndzidzi onsene Kunkwiriro kwa Amerika. Iye akhadasembwa na nkulu wa mpingo wakuti nee adzapangiza kukhulupirika, mbansiya ekhene na anawo atatu. Ninji pidaphedza Irina toera kupitiriza kutumikira Yahova mwakukhulupirika? Iye alonga: “Ndisapereka takhuta thangwi ya citsalakano ca Yahova kwa ine. Kunyerezera nkhombo zanga ntsiku zonsene, ndisakwanisa kuona mwai ukulu wakudziwiwa na kufuniwa na Babathu wakudzulu wakuti ndi wacitsidzikizo. Ndisadziwa kuti iye cipo anadzandisiya.” Maseze Irina asathimbana na makhaliro mazinji akutsukwalisa mu umaso wace, nzimu wakukomerwa usapitiriza kumphedza, natenepa, iye ndi nkhombo kwa anango.
11. Ninji pidaphedza Kyung-sook toera kuthimbana na utenda wakugopswa?
11 Kyung-sook asakhala ku Aziya, iye atumikira na mamunace ninga apainiya mu pyaka pyakupiringana 20. Mwakukhonda dikhira, iye adzindikirwa kuti akhali na utenda ukulu wa câncer wa mapapu, mbapangwa kuti mbadakhala maso basi ene mu nthanda zitatu mpaka zitanthatu. Ngakhale kuti iye na mamunace akhadathimbana na nyatwa zizinji zikulu na zing’ono, iwo ndzidzi onsene akhali na cinyindiro ca ungumi wawo. Iye alonga: “Utenda unoyu wandigopesa kakamwe, ndikhabva ninga ndaluza pinthu pyonsene, pontho ndikhagopa kakamwe.” Ninji pidaphedza Kyung-sook toera kuthimbana na makhaliro anewa? Iye alonga: “Ntsiku zonsene namasiku, mbandidzati kuenda kagona, ndikhaenda paberere ya padzulu pa nyumba yathu mbandicita phembero mwakugaluza thangwi ya pinthu pixanu pidandicitisa kupereka takhuta pa ntsiku. Buluka penepo, ndikhakhala na cinyindiro mbandikulumizika toera kulonga pya ufuni wanga kwa Yahova.” Kodi Kyung-sook aphindula tani na maphembero anewa akhacita iye namasiku? Iye alonga: “Ndafika pakudzindikira kuti Yahova asatiphedza m’midzidzi ya nyatwa, pontho kuti pana nkhombo zizinji kakamwe mu umaso wathu kupiringana nyatwa zathu.”
12. Kodi Jason agumana tani cibalangazo pakumala kuferwa na nkazace?
12 Jason wakuti asatumikira ku ofesi ya filiali mu Afrika, ali m’basa ya ndzidzi onsene mu pyaka pyakupiringana 30. Iye alonga: “Mu pyaka pinomwe pidapita, ndaferwa na nkazanga, kutsukwala kunabva ine ndi kukulu. Ndzidzi onsene, kunyerezera pya nyatwa zidatamba iye pikhathimbana iye na utenda wa câncer, ndi pyakutsukwalisa kakamwe.” Ninji pinaphedza Jason toera kuthimbana na nyatwa ineyi? Iye alonga: “Ntsiku inango ndikhanyerezera pya midzidzi yakutsandzayisa idakhala ine na nkazanga, mbandipereka takhuta kuna Yahova mu phembero thangwi ya ndzidzi unoyu. Ndakhurudzika pang’ono, buluka penepo, ndatoma kupereka takhuta kuna Yahova mwakukhonda phonya thangwi ya midzidzi ineyi yakutsandzayisa. Kupereka takhuta kwacinja kakamwe maonero anga. Ndisapitiriza kuthimbana na kutsukwala thangwi yakuferwa, mbwenye kupereka takhuta kuna Yahova thangwi ya banja yadidi ikhali na ine, na mwai wakuntumikira pabodzi na munthu wakuti akhanfuna na ntima onsene pisasasanyira maonero anga.”
13. Ninji pidaphedza Sheryl toera kuthimbana na kuferwa na acibale ace?
13 Kunkhomo kwa caka 2013, Condzi Cikulu cidacemerwa Haiyan cakhuya kakamwe pakati pa dziko ya Filipina, Sheryl, ntsikana wa pyaka 13 pyakubalwa aluza pinthu pyonsene. Iye alonga: “Ndaluza nyumba yathu, na acibale anga.” Mai wace na pai wace, pabodzi na abale ace atatu afa pa condzi ceneci cikulu kakamwe. Ninji pidaphedza Sheryl toera kupirira cidengwa ceneci mbacalira kutsukwala kakamwe? Iye asapitiriza kupereka takhuta kuna Yahova thangwi yakunyerezera mwacidikhodikho pya nkhombo zakuti iye aciri nazo. Iye athimiza: “Ndaona abale na alongo azinji mbakabweresa ciphedzo na cibalangazo kwa ale akhafuna ciphedzo. Ndikhadziwa kuti abale pa dziko yonsene akhandicitira phembero. Ndisapereka takhuta kakamwe thangwi Yahova ndi Mulungu wanga. Ndzidzi onsene iye asatipasa pinthu pinafuna ife.” Inde, kukumbuka pya nkhombo zathu ndi ntombwe ukulu kakamwe toera kucalira kukundwa na kutsukwala. Nzimu wakupereka takhuta usatiphedza toera kuenda kutsogolo mwakukhonda tsalakana midzidzi yakutsukwalisa inathimbana na ife.—Aef. 5:20; lerini Afilipi 4:6, 7.
‘INE NDINASEKERA PYANGA MUNA YAHOVA’
14. Ndi cidikhiro cipi cakutsandzayisa kakamwe ciri na ife? (Onani cithundzithundzi cakutoma.)
14 M’mbiri yonsene ya anthu, atumiki a Yahova asakomerwa na nkhombo ziri na iwo. Mwacitsandzo, pidamala iwo kupulumuswa m’manja mwa Farao na anyankhondo ace pa Bara Yakufuwira, Aisraele apangiza kukomerwa kwawo mu kuimba nyimbo yakusimba na kupereka takhuta. (Eks. 15:1-21) Lero, ibodzi mwa nkhombo zinapasa ife ntengo kakamwe ndi cidikhiro cakuti mwakukhonda dembuka pinthu pyonsene pinabweresa nyatwa na kutsukwala pinadzamala. (Sal. 37:9-11; Iza. 25:8; 33:24) Nyerezerani kuti tinadzabva tani pa ndzidzi wakuti Yahova anadzafudza anyamalwa ace onsene mbatipitisa mu dziko ipswa yantendere na yakulungama. Ineyi inadzakhala ntsiku yadidi kakamwe toera kupereka takhuta kuna Yahova!—Apok. 20:1-3; 21:3, 4.
15. Muli wakutonga toera kucitanji nkati mwa caka 2015?
15 Mu caka 2015, tisadikhira kutambira nkhombo zizinji kakamwe zakutsandzayisa zauzimu kubulukira kwa Yahova. Ndimomwene kuti tisadikhirambo kuthimbana na nyatwa zingasi. Mbwenye cinthu consene cinafuna kuticitikira, tisadziwa kuti Yahova cipo anadzatisiya. (Deut. 31:8; Sal. 9:9, 10) Iye anadzapitiriza kutipasa pyonsene pinafuna ife toera kuntumikira mwakukhulupirika. Natenepa, tendeni tikhale akutonga toera kupitiriza kupangiza nzimu wakupereka takhuta ninga mprofeta Habakuki adalonga kuti: ‘Maseze miti ya misambvu ikhonde kubuluka maluwa, peno muti wa mauva ukhonde kubala misapo; maseze miti ya milivera ikhonde kubala, na m’minda mwene mukhonde kubuluka cakudya; maseze mikumbi ya mabira na ya ng’ombe isoweke n’thanga; ine ndinadzasekera pyanga mwa Yahova; ndinadzakomerwa mwa Mulungu wa cipulumuso canga.’ (Hab. 3:17, 18) Inde, nkati mwa caka 2015, tendeni tinyerezere mwacidikhodikho pya nkhombo zathu mbatitoweza cikulumizo ca lemba yathu ya caka 2015: ‘Perekani takhuta kuna Yahova, thangwi iye ndi wadidi.’—Sal. 106:1.
[Cidzindikiro capantsi]
a Mu nsolo uno, madzina anango acinjwa.
[Ntsonga ikulu pa tsamba 8]
Lemba yathu ya caka 2015: ‘Perekani takhuta kuna Yahova, thangwi iye ndi wadidi.’—Masalmo 106:1
[Ntsonga ikulu pa tsamba 12]
“Ndisapereka takhuta kakamwe thangwi Yahova ndi Mulungu wanga.”—Sheryl