NSOLO WA REVISTA | MUNATSANDZAYA TANI NA BASA YANU

BASA YAKUWANGA​—Ndi Yakukhonda Phindulisa?

Alex apuma mwakubveka mukhaikha iye bokosi m’motokala wa kompanyia ikhapata iye basa. Iye abvundzika: ‘Thangwi yanji ndisathabuka na basa yakukhonda phindulisa? Ndinaphindula lini na basa yanga? Umaso wanga mbudakhala mwadidi kakamwe mbidakhonda kuphata basa!’

Ninga Alex analongwa mu nsolo uno, anthu azinji lero nkhabe funa kuphata basa yakuwanga. Nyakusasanya miotokala unango anacemerwa Aaron alonga: “Anthu azinji asanyerezera kuti anapwazika angaphata basa yakuwanga. Maonero awo ndi akuti: ‘Ndikuphata basa ino mpaka ndingaona inango yadidi.’”

Thangwi yanji anthu azinji nee asafuna kuphata basa yakuwanga? Panango iwo asabva mu pyakupereka mphangwa, pyakuti kazinji kene pisapangiza kuti umaso “wadidi” ndi ule wakukhala na mpfuma na kuphata basa yakufewa. Matthew, nyakusasanya pinthu pyakugudjuka alonga: “Anthu asanyerezera kuti angaphata basa yakuwanga toera kutsalakana umaso, nee asapembera tayu.” Nyakuonera unango anacemerwa Shane akhalimbo na maonero mabodzi ene. Iye alonga: “Kulipwa thangwi ya basa inacita munthu pa ntsiku ibodzi na ibodzi ndi pinthu pyakuti anthu nkhabe kupifuna.”

Mu njira inango, anthu azinji akupembera asakomerwa na basa yakuwanga. Nyakumanga zinyumba anacemerwa Daniel wa pyaka 25 alonga: “Ndisanyerezera kuti basa yakuwanga ndi yakuphindulisa kakamwe, makamaka ingakhala na pifuno pyadidi.” Andre wa pyaka 23 atawirambo: “Ndisakhulupira kuti kutsandzaya kusabwera thangwi yakuphata basa. Kuphata basa yakufewa nkhabe kubweresa kutsandzaya​—basi ene kutsukwala!”

Kodi anthu ninga Daniel na Andre akulisa tani maonero adidi thangwi ya basa yakuwanga? Kulonga mwacigwagwa, iwo aphatisira midida ya Bhibhlya mu umaso wawo. Mbuto mwakulonga mwakuipa basa yakuwanga, Bhibhlya isakulumiza mphinga na kupirira. Mbwenye Bhibhlya isalonga pizinji kupiringana kutipanga kuti tiphate basa. Isatipangambo kuti tinatsandzaya tani na basa yathu.

Ndi midida ipi ya Bhibhlya yakuti inakuphedzani kukhala wakutsandzaya m’basa yanu? Tisakuphembani toera kudinga mingasi mwa iyo inalongwa mu nsolo unatowerera.